Mupemphengi Anyinu Kuti Akuwovyeni

“Munthu wangathereska munthu yumoza, kweni ŵanthu ŵaŵi angalimbana nayu.”—Wakutawula 4:12.

ASANI anyidu atitiwovya, tingafiska kulimbana ndi murwani, kaya murwani yo wangaŵa yani. Mwaviyo, asani mukhumba kumalana ndi chiziŵirizga chakukweŵa, mungachita umampha kupempha abali ŵinu kweniso anyinu kuti akuwovyeni. Mungapempha so munthu munyaki weyosi yo wangaŵa ndi mtima wakukuwovyani mwakuzikira.

Yesani so kupempha chovyu ku ŵanthu wo akuleka kukweŵa foja. Yiwu angakuvwisani ndipu angakuwovyani mwalisungu. Mkhristu munyaki wa ku Denmark zina laki Torben wangukamba kuti: “Anyangu angundiwovya ukongwa.” Abraham yo waja ku India wangulemba kuti: “Chanju cho ŵanthu a mu banja langu ndipuso Akhristu anyangu andilongonga, ndichu chingundiwovya kuti ndileki.” Kweni nyengu zinyaki chinanga abali ŵidu ndipuso anyidu angayesesa wuli, kweni tingakhumbika mbwenu chovyu chinyaki.

Munthu munyaki zina laki Bhagwandas, wangukamba kuti: “Ndingukweŵa foja kwa vyaka 27, kweni chifukwa chakusambira vo Bayibolu likamba vakukwaskana ndi mijalidu yakufipiska, ndingusankha kuti ndileki. Ndingusintha vinthu vinyaki. Ndinguleka kucheza ndi ŵanthu wo ndachezanga nawu pakwamba. Ndinguluta kuchiwonana ndi madokotala. Kweni vinguwovya cha. Kweni zuŵa linyaki ndi usiku ndinguŵeyere Yehova Chiuta mu pempheru kuti wandiwovyi kuleka kukweŵa foja. Venivi ndivu vingundiwovya!”

Chinthu chinyaki chakukhumbika ukongwa cho mungachita, nkhunozgeke masuzgu ngo mukumanengi nangu. Kumbi ndi masuzgu wuli? Wonani nkhani yakulondopu.

[Bokosi]

KUMBI MUKHUMBIKA KUGWIRISKIYA NTCHITU MUNKHWALA?

Ŵanthu anandi ukongwa agwiriskiya ntchitu munkhwala nge wa nicotine patch kuti aleki kukweŵa. Namwi mwechendasankhi kuchita venivi, ŵanaŵaniyani mafumbu yanga:

Kumbi pe phindu wuli? Madokotala nganandi ngakamba kuti munkhwala utovya ukongwa kuti munthu waleki kukweŵa, chifukwa umalisiya limu chibaba. Kweni anyaki akamba kuti asani pajumpha nyengu munkhwala wenuwu utambisa masuzgu nganyaki muliŵavu la munthu.

Kumbi pangaŵa masuzgu wuli? Minkhwala yinyaki yingachitiska kuti munthu waje ndi mseru, watami nthenda yakusuzgika maŵanaŵanu kweniso wayambi kuŵanaŵana kuti wajibayi. Kumbukani kuti minkhwala yeniyi yo yisere mumalu mwa nikotini muliŵavu, nayu yija ndi masuzgu ngaki. Uneneska ngwakuti munthu yo wagwiriskiya ntchitu minkhwala yeniyi waja mbwenu kapolu wa munkhwala wo.

Kumbi pe nthowa so zinyaki? Pa kafukufuku munyaki, ŵanthu 88 pa 100, angukamba kuti anguleka waka kukweŵa kwambula kugwiriskiya ntchitu munkhwala.