Ŵanthu mamiliyoni nganandi agwiriskiya ntchitu fundu zo ze mu nkhani zo zajumpha, ndipu atesesa kutuzgamu sankhu mumtima mwawu. Kukamba uneneska tingalimalisiya limu cha sankhu pakutija. Kweni, kumbi sankhu lazamumaliya limu nyengu yinyaki?

Maboma nga ŵanthu ngatondeka kumalisa sankhu mumitima ya ŵanthu. Kweni kumbi ivi ving’anamuwa kuti palivi boma lo lingamalisa sankhu?

Kuti boma limalisi sankhu likhumbika

1. 1. Kovya ŵanthu kuti asinthi maŵanaŵanu ngawu pa nkhani ya mo awone anyawu.

2. 2. Kovya ŵanthu wo achita sankhu chifukwa chakuti ŵanthu anyaki anguŵachitiyapu sankhu.

3. 3. Kuja ndi alongozgi amampha wo awona kuti munthu weyosi yo atimulamuliya wayanana ndi munyaki.

4. 4. Kovya ŵanthu amitundu yosi kuti akoliyanengi.

Bayibolu lititisimikiziya kuti Chiuta wakujalikiska boma lenili. Boma ili lidanika kuti “Ufumu waku Chiuta.”​—Luka 4:43.

Wonani vo boma laku Chiuta lazamuchita.

‘Akuja mucharu azamusambira urunji.’​—YESAYA 26:9.

“Urunji chayiwu wazamuchitiska kuti paje chimangu. Ndipu chipasu cha urunji chayiwu chazamuja chimangu ndi kuvikilirika mpaka muyaya.”​—YESAYA 32:17.

Kumbi venivi ving’anamuwanji? Ufumu waku Chiuta wazamusambiza ŵanthu vinthu vamampha. Asani ŵanthu azisambira kupambanisa pakati pa chamampha ndi chiheni, vo ving’anamuwa kupambanisa pakati pa urunji ndi vinthu vambula urunji, maŵanaŵanu ngawu ngaheni ngakukwaskana ndi ŵanthu anyaki ngazamumala. Ŵanthu wosi azamuziŵa kuti chinthu chamampha cho atenere kuchita, nkhwanja ŵanthu amitundu yosi.

Chiuta “wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi. Vinthu vakali vatuwapu.”​—CHIVUMBUZI 21:4.

Kumbi venivi ving’anamuwanji? Ufumu waku Chiuta wazamumalisa urwirwi wo uchitika chifukwa cha vinthu vambula urunji. Ŵanthu wosi wo achitikiya vinthu vambula urunji azamuŵavi maŵanaŵanu ngakuweze anyawu.

“Iyu wazamuyeruzga chifukwa cha vo masu ngaki ngawona cha, Pamwenga kuchenya chifukwa cha vo makutu ngaki ngavwa. Iyu wazamuyeruzga ŵanthu akusika mwaurunji, Ndipu wazamuchenya ŵanthu mwakunyoloka chifukwa cha ŵanthu akufwasa a pacharu chapasi.”​—YESAYA 11:3, 4.

Kumbi venivi ving’anamuwanji? Yesu Khristu, yo ndi Fumu ya Ufumu waku Chiuta kuchanya, wazamuyeruzga ŵanthu mwaurunji kweniso mwambula sankhu pacharu chapasi. Yesu watanjiya mtundu unyaki cha wa ŵanthu ndipu wazamuwonesesa kuti ŵanthu wosi pacharu chapasi avwiya marangu ngaki.

Ufumu waku Chiuta usambiza ŵanthu kuja ndi “maŵanaŵanu ngamoza, chanju chakuyanana, mwakuja akukoliyana ukongwa, kweniso mwakulunguruka chinthu chimoza.”​—AFILIPI 2:2.

Kumbi venivi ving’anamuwanji? Kukoliyana kwa zika za Ufumu waku Chiuta, kwazamukuŵa waka kwa pamulomu cha. Yiwu ‘azamukoliyana ukongwa’ chifukwa azamuyanjananga.