“CHILINDIZGA NTCHAKUKHUMBIKA UKONGWA KUTI TIJE PA UBWEZI NDI CHIUTA.” Venivi ndivu buku linyaki likukamba. Ilu likukamba so kuti chilindizga, “ndi munkhwala wamampha ukongwa wakumalisiya maŵanaŵanu ngakuti palivi yo wangatiwovya, kujivwa kuti te tija ndipuso mantha.”—Hope in the Age of Anxiety.

Bayibolu lilongo kuti taŵanthu tikhumbika kuja ndi chilindizga. Kweni litititcheŵeska so kuti tikhumbika cha kugomezga vinthu vaboza. Pa lemba la Sumu 146:3 pakamba kuti, “Ungagomezganga alongozgi cha pamwenga mwana wa munthu, mweniyo wangakutaska cha.” Mumalu mwakugomezga ŵanthu kuti atitaski, tikhumbika kugomezga Mulengi widu yo we ndi nthazi kufiska vosi vo wakulayizga. Kumbi iyu wakutilayizga vinthu wuli? Tiyeni tikambiskani ivi.

VIHENI VAZAMUMALA NDIPU ŴANTHU ARUNJI AZAMUJA MWACHIMANGU: Lemba la Sumu 37:10, 11 likamba kuti: “Kwaja kanyengu kamanavi, ŵanthu aheni azamujaku so cha . . . Kweni akufwasa azamuhara charu chapasi ndipu azamukondwa ndi chimangu chikulu.” Vesi 29 likamba kuti: ‘Arunji . . . azamuja mucharu kwamuyaya.’

KWAZAMUŴAVI NKHONDU: “Yehova . . . walekeska nkhondu pacharu chosi chapasi. Wafyo uta ndi kuvikita mkondu. Wawotcha magareta nga nkhondu ndi motu.”—Sumu 46:8, 9.

KWAZAMUŴAVI MATENDA, KUSUZGIKA PAMWENGA NYIFWA: “Chihema chaku Chiuta che pakati pa ŵanthu . . . Waleskengi masozi ngosi mumasu mwawu, nyifwa yiŵengepu so cha, chinanga nkhuliya pamwenga kukuta pamwenga urwirwi viŵengepu so cha. Vinthu vakali vajumphapu.”—Chivumbuzi 21:3, 4.

WEYOSI WAZAMUJA NDI CHAKURYA CHAKUKWANA: “Pacharu chapasi pazamukuŵa vakurya vinandi. Ndipu vazamuzala pachanya pamapiri.”—Sumu 72:16.

PACHARU CHOSI PAZAMUJA BOMA LIMOZA, UFUMU WA KU KHRISTU: “Kwaku [Yesu Khristu] kukupaskika ulamuliru, ulemu ndi ufumu, kuti ŵanthu, mitundu ya ŵanthu ndi ŵanthu a vineneru vosi amuteŵetiyengi. Ulamuliru waki ngwamuyaya wo wazamumala cha ndipu ufumu waki wazamubwangandurika cha.”—Danyele 7:14.

Ntchifukwa wuli tisimikiza kuti vinthu ivi vazamufiskika? Po wenga pacharu chapasi, Yesu wangulongo pakweru kuti ngwakwenere kuja Fumu. Iyu wachizganga akutama, waliskanga vakurya akavu ndipuso wayuskanga akufwa. Kweni vo wasambizanga ndivu venga vakukhumbika ukongwa chifukwa vazamuwovya ŵanthu kuja mwachimangu kweniso mwakukoliyana kwamuyaya. Yesu wangukamba so vo vazamuchitika kunthazi, kusazgapu vo vazamulongo kuti te mu mazuŵa ngakumaliya.

Yesu wangukambiya limu kuti mu mazuŵa ngakumaliya kwazamuja chimangu cha, kweni masuzgu. Iyu wangukamba vo vazamulongo kuti mugonezi we pafupi kumala. Vinyaki vo wangukamba ndi nkhondu, nja, milili ndi vidilirisi. (Mateyu 24:3, 7; Luka 21:10, 11; Chivumbuzi 6:3-8) Yesu wangukamba so kuti: “Chifukwa chakuti ŵanthu anandi azamuleka kuvwiya marangu, chanju cha anandi chazamuzizira.”—Mateyu 24:12.

Chanju cha ŵanthu anandi chazizira mu nthowa zinandi ndipu Paulo wangukambiya limu venivi. Pa 2 Timote 3:1-5, iyu wangukamba kuti mu “mazuŵa ngakumaliya,” ŵanthu azamuja akujanja, akwanja ndalama ndipuso akwanja masaza. Yiwu azamuja akujikuzga ndipuso akali. Mu mabanja mwazamuŵavi chanju chakawi ndipu ŵana azamuja ambula kuvwiya apapi ŵawu. Ŵanthu anandi azamuwoneka nge asopa Chiuta.

Vinthu ivi vilongo kuti charu che pafupi kumala. Vilongo so kuti Ufumu we pafupi. Po wakambanga vo vazamulongo kuti tija mu mazuŵa ngakumaliya, Yesu wangukamba so kuti: “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.”—Mateyu 24:14.

Uthenga wamampha wenuwu utcheŵeska wo achita vinthu viheni. Kweni upaska chilindizga ku ŵanthu arunji kuti vitumbiku vo Yehova wakulayizga, vifiskikengi pambula kuswera. Kumbi mungayanja kusambira vinandi vakukwaskana ndi vitumbiku ivi? Asani ndi viyo, julani kuseri kwa magazini iyi.