Masambiru ngo ngasanirika m’Bayibolu nge ndi nthazi zo zisintha umoyu wa ŵanthu. Wonani vakuyeruzgiyapu va ŵanthu ŵaŵi yaŵa: Ricardo ndi Andres.

RICARDO: Pa nyengu yo ndenga ndi vyaka 15, ndingusere kagulu kavigeŵenga ka achinyamata. Anyangu ŵenaŵa ndiwu anguchitiska kuti ndije munthu muheni ukongwa. Pa nyengu iyi, ndingwamba kuja ndi chilatu chakuti nkhaje mujeri kwa vyaka 10! Ndiziŵa kuti anyaki angaŵanaŵana kuti kamutu kangu kayendanga umampha cha. Kweni muchigaŵa chidu ŵanthu wo ajanga mujeri kwa vyaka vinandi, ŵanthu aŵakhumbiranga ndipuso aŵatumbikanga. Ndipu nani ndakhumbanga kuja nge yiwu.

Ndingwamba kuchita vinthu viheni ukongwa vo anyangu achitanga nge, kumwa munkhwala wakutimbanyizga wongu, ureŵi ndipuso kuchita viwawa. Ndipu zuŵa linyaki ndi usiku tingwamba kulasana ndi ŵanthu anyaki ndi futi. Ndaŵanaŵananga kuti andibayengi, kweni ndinguthaŵa ndipu ndingupwetekeka cha. Ivi vati vachitika, ndingwamba kuŵanaŵaniya ukongwa umoyu wangu kweniso vo ndikhumba kuchita. Ndipu pavuli paki ndingusankha kuti ndisinthi. Kweni kumbi ndatingi ndisinthengi wuli? Kumbi ndi yani yo watingi wandiwovyengi?

Abali ŵangu anandi akondwanga cha. Yiwu akumananga ndi masuzgu nganandi pa umoyu wawu. Kweni umu ndimu venge cha ndi banja la asibweni amana. Ndaziŵanga kuti yiwu ŵenga ŵanthu amampha, ndipu agwiriskiyanga ntchitu fundu za m’Bayibolu pa umoyu wawu. Ndikumbuka kuti nyengu yinyaki angundisambizapu kuti zina laku Chiuta ndi Yehova. Mwaviyo, pati pajumpha kanyengu kutuliya po talasananga ndi ŵanthu anyaki, ndingupemphera kwaku Yehova, ndinguzumbuwa zina laki mu pempheru ndipu ndingumupempha kuti wandiwovyi. Ndinguzizwa ukongwa kuti mawa laki, yumoza wa Akaboni aku Yehova wanguza kunyumba kwangu! Iyu wangwamba kundisambiza Bayibolu.

Pati pajumpha nyengu yimanavi, ndingukumana ndi suzgu yikulu. Anyangu wo ndachezanga nawu pakwamba angwamba kundimbiya mafoni kuti ndichezengi nawu mbwenu. Ndingukana, chinanga kuti chenga chipusu cha kuchita viyo. Ndingusimikiza mtima kuti ndilutirizgengi kusambira Bayibolu. Ndipu ndikondwa kuti ndivu ndinguchita nadi! Umoyu wangu ungusintha ukongwa, ndipu sonu ndikusaniya likondwa chayilu.

Pa nyengu iyi, ndingukambiya Chiuta mu pempheru kuti pakwamba ndakhumbanga kuchija mujeri kwa vyaka 10, kuti ŵanthu anditumbikengi. Sonu ndingumupempha kuti vyaka 10 vo ndakhumbanga kuchija mujeri wandizomerezi kuti ndichitengi uteŵeti wa nyengu zosi, kuti ndipharazgengi ndi chilatu chakuti ndiwovyi ŵanthu anyaki nge mo nani ndinguwovyeke. Chiuta wangumuka pempheru langu, chifukwa kufika sonu ndamuteŵete kwa vyaka 17 nge mteŵeti wa nyengu zosi. Ndipu kusazgiyapu yapa, ndikulutaku so cha ku jeri.

Kweni anyangu anandi wo ndachezanga nawu pakwamba ŵe mujeri ndipu akuŵalangiya vyaka vinandi. Ndipu anyaki akutayika. Asani ndikumbuka nyengu yakuvuli, nditiŵawonga ukongwa abali ŵangu wo mbakaboni. Yiwu apambananga ukongwa ndi ŵanthu anyaki chifukwa agwiriskiyanga ntchitu fundu za m’Bayibolu pa umoyu wawu. Ndingwamba kuŵatumbika ukongwa kuphara mo ndatumbikiyanga anyangu wo ndenga nawu mu kagulu ka vigeŵenga. Kuphara vosi, nditimuwonga ukongwa Chiuta chifukwa wakundisambiza nthowa yamampha ukongwa yo ndingajaliya ndi likondwa pa umoyu wangu.

 ANDRES: Ndinguwiya kweniso kukuliya mucharu chikavu ukongwa cho ŵanthu ayanjanga kugwiriskiya ntchitu munkhwala wakutimbanyizga wongu, kubayana, uhuli ndipuso kuphanga vinthu vaŵeni mwankhaza. Ada ŵangu ŵenga chidakwa kweniso ayanjanga kumwa munkhwala wakutimbanyizga wongu. Ndipu yiwu ndi ama kanandi apumananga kweniso ajaliyanga waka kupwakasana.

Ndeche munamana ndingwamba kumwa moŵa kweniso kumwa munkhwala wakutimbanyizga wongu. Kanandi ndajanga waka mumsewu kuti ndibengi vinthu va ŵanthu ndipu pavuli paki ndagulisanga vo ndaba. Ndati ndakuwa, ada ŵangu angwamba kundiyanja ukongwa, kweni ŵenga ndi chilatu chiheni. Yiwu angundikambiya vo ndingachita kuti ndibengi munkhwala wakutimbanyizga wongu kweniso vinthu vinyaki mu charu chidu ndipu pavuli paki ndigulisengi. Ndapanganga ndalama zinandi kwanyengu yimanavi waka. Kweni zuŵa linyaki ndinguwona cho chingukweza pusi muchanya. Apolisi anguza kunyumba ndipu angundimanga. Yiwu angundilamula kuti nkhaje mujeri kwa vyaka 5 chifukwa angundisaniya ndi mlandu wakuti ndikubaya munthu.

Zuŵa linyaki ndi mlenji, angupharazga kuti takayidi tosi tidanika kuti tikavwisiyi nkhani ya m’Bayibolu yo yamukambika ndi Akaboni aku Yehova. Ndinguluta kuti nkhavwisiyi. Vo ndinguvwa pa zuŵa ili vingundijula kumasu, ndipu ndingwamba kusambira Bayibolu ndi Akaboni. Yiwu angundipaka waka vumba kumasu cha kweni angundilongo fundu zosi za mijalidu yamampha zaku Chiuta.

Pambula kuswera ndinguziŵa kuti ndatingi ndisinthengi cha kwambula kuwovyeka. Ndingwamba kuŵanaŵana viyo chifukwa akayidi anyangu andiwofyezanga chifukwa chakuti ndingwamba kusambira Bayibolu. Mwaviyo, ndingupemphera kuti Yehova wandipaski zeru ndipuso nthazi ndipu iyu wangundiwovya nadi. M’malu mwakuchita mantha, ndinguchita chiganga ukongwa ndipu ndingukambiya akayidi anyangu vakukwaskana ndi Bayibolu.

Zuŵa lakuti ndituwi mujeri lati lakwana, ndingudandawula kuti ndamusuzgika kwamba umoyu unyaki, chifukwa ndinguziŵiriya umoyu wa mujeri. Ndi chiluta, anyaki mwa akayidi wo ndenga nawu mujeri angundibayibisa. Ndipu anyaki angukamba kuti: “Uyendi umampha mliska wachinyamata.”

Asani ndiŵanaŵaniya vo vatingi vichitikengi pa umoyu wangu nkhalekengi kuzomereza kuti Chiuta wandisambizi, ndiziŵa cha kuti umoyu wangu watingi ujengi wuli. Nditimuwonga ukongwa Chiuta chifukwa watindiyanja kweniso kuti watindiwona nge mbereri yakujowoleka cha. *