Wupu wa United Nations uchiska ŵanthu kuti akoliyanengi, atumbikengi wanangwa wa munthu weyosi ndipuso kuti avikiriyengi chilengedu. Ntchifukwa wuli wupu uwu uchita viyo? Maher Nasser wangulemba mu magazini ya UN Chronicle kuti: “Kusintha kwa nyengu pacharu chosi, vinthu vambula urunji vo mawupu ngachita, sankhu, kusoŵa pakuja, viwawa vambula kumala, kubayana, matenda ngakupasirana ndipuso vinthu vinyaki viheni viwona . . . malu cha,” vichitikiya weyosi.

Ŵanthu anyaki akhumbisiskanga ukongwa kuti pacharu paje boma limoza. Anyaki mwa ŵanthu ŵenaŵa ndi Albert Einstein yo wangusambira vakukwaskana ndi sayansi. Iyu wangujaku kwambiya mu 1879 mpaka mu 1955. Munyaki wenga Dante wa ku Italy yo wenga kaswiri wa zeru za ŵanthu, wakulemba ndakatulu kweniso kaswiri pa nkhani za ndali. Iyu wangujaku kwambiya mu 1265 mpaka mu 1321. Dante wagomezganga kuti vingachitika cha kuti pacharu paje chimangu asani vyaru vigaŵikana pa nkhani za ndali. Iyu wangukamba mazu ngo Yesu Khristu wangukamba ngakuti, “Ufumu . . . wakugaŵikana ukho cha.”—Luka 11:17.

Pati pajumpha nyengu yimanavi kutuliya po Nkhondu Yachiŵi Yapacharu Chosi yingumaliya, Albert Einstein wangulembe kalata General Assembly ya United Nations kuti: “Wupu wa United Nations ukhumbika kuchitapu kanthu mwaliŵi kuti pacharu chosi paje boma limoza, vo vingawovya kuti ŵanthu ajengi mwakuvikilirika.”

Kweni kumbi vingachitika kuti andali wosi wo angapanga boma limoza lanthazi aleki kuchita vachinyengu, kukandilizga ŵanthu, kweniso kuleka sankhu? Pamwenga nawu angaja ndi mijalidu yiheni nge anyawu wosi wo akulamuliyapu? Mafumbu ngosi yanga ngatitikumbuska waka vo munthu munyaki wakulemba mbiri wa ku Britain, zina laki Lord Acton wangukamba. Iyu wangukamba kuti: “Kuja ndi mazaza kuchitiska kuti munthu waje ndi mijalidu yiheni ndipu kuja ndi mazaza ngakulu kuchitiska kuti munthu waje ndi mijalidu yiheni ukongwa.”

Chinanga kuti ve viyo, kuti ŵanthu ajengi mwachimangu akhumbika kukoliyana. Kweni kumbi vingachitika wuli venivi? Kumbi vingachitika nadi? Bayibolu limuka mwakuvwika umampha kuti vingachitika ndipu vazamuchitika nadi. Kumbi vingachitika munthowa wuli? Ivi vingachitika cha ndi boma la ŵanthu andali wo mbachinyengu. M’malu mwaki, vazamuchitika ndi boma laku Chiuta. Boma lenili lazamulongo kuti Chiuta pe ndiyu ngwakwenere kulamuliya chilengedu chosi. Kumbi boma lenili ndi nili? Bayibolu likamba kuti ndi “Ufumu waku Chiuta.”—Luka 4:43.

Yesu Khristu waŵanaŵaniyanga vakukwaskana ndi Ufumu waku Chiuta pa nyengu yo wapempheranga pempheru la chakuwoniyapu kuti: “Ufumu winu uzi. Khumbu linu lichitiki panu pasi.” (Mateyu 6:9, 10) Mwaviyo, Ufumu waku Chiuta wazamuwonesesa kuti khumbu laku Chiuta lachitika pacharu chapasi, kweni wazamufiska khumbu la ŵanthu akujiyanja cha pamwenga wo aryiya anyawu masuku pamutu.

Ufumu waku Chiuta udanika so kuti “Ufumu wakuchanya.” (Mateyu 5:3) Ntchifukwa wuli udanika viyo? Chinanga kuti Ufumu uwu wazamulamuliya pacharu chosi chapasi, wazamulamuliya kutuliya pacharu chapasi cha kweni kutuliya kuchanya. Ivi ving’anamuwa kuti boma lenili lazamupempheskanga vinthu cha pamwenga ndalama kutuwa ku ŵanthu. Ndipu ŵanthu wo azamuwusika ndi boma lenili azamuja mwakukondwa ukongwa!

Ufumu waku Chiuta uwusika ndi Yesu Khristu, Fumu yo yikusankhika ndi Chiuta mweneku. Pakukamba zaku Yesu, Bayibolu likamba kuti:

• “Ufumu ukaŵanga pa pheŵa laki . . . Kukuwa kwa ufumu waki ndi chimangu chaki vazamumala cha.”—Yesaya 9:6, 7, King James Version.

•   “Kwaku iyu kukupaskika nthazi, unkhankhu, ndipuso ufumu, kuti ŵanthu, mitundu yosi, ndipuso ŵanthu a vineneru vosi amuteŵetiyengi. Muwusu waki . . . wazamumala cha.”—Danyele 7:14.

• “Ufumu wa charu chapasi waja Ufumu wa Ambuyafwi [Chiuta] ndipuso waku Khristu wawu.”—Chivumbuzi 11:15.

Ufumu waku Chiuta wazamufiska khumbu laku Chiuta pacharu chapasi. Venivi vazamulongo kuti vo Yesu wangupempha mu pempheru laki vafiskika nadi. Ndipu mu ufumu wenuwu, ŵanthu wosi azamusambira mo angaphwere charu chosi chapasi kuti chije so chamampha ndipuso kuti chizazi ndi vinthu vamoyu.

Kuphara vosi, Ufumu waku Chiuta wazamusambiza ŵanthu ŵaki. Ŵanthu wosi azamusambizika fundu zakuyanana. Ndipu pazamuŵavi kupambana maŵanaŵanu pamwenga kugaŵikana. Bayibolu likamba kuti: “Vazamupwetekana cha pamwenga kusakazana, chifukwa charu chapasi chazamuzaza ndi ŵanthu akuziŵa Yehova nge mo maji ngazaziya nyanja.”—Yesaya 11:9.

Ŵanthu pacharu chosi azamuja mwakukoliyana ndipuso mwachimangu nge mo wupu wa United Nations wakhumbiyanga. Lemba la Sumu 37:11 likamba kuti ŵanthu wo azamuwusika ndi Ufumu waku Chiuta “azamukondwa ndi chimangu chikulu.” Pa nyengu iyi mazu ngakuti “kuswa marangu,” “kunangika kwa chilengedu,” “ukavu,” ndipuso “nkhondu” vazamukumbukika so cha. Kweni kumbi venivi vazamuchitika zukwanji? Nanga kumbi Ufumu waku Chiuta wazamukwamba zukwanji kulamuliya? Wazamufiska wuli venivi? Kumbi mungasaniya vitumbiku wuli chifukwa cha Ufumu wenuwu? Tiyeni tiwoni.