Kuziŵa Chiuta Kungatiwovya Kuti Tije Nayu pa Ubwezi
Mlengi widu ndi nthazi ŵaka cha. Iyu we ndi mijalidu yamampha ukongwa. Ndipu wakhumba kuti tisambiri vakukwaskana ndi iyu kweniso kuja nayu pa ubwezi. (Yohane 17:3; Yakobe 4:8) Ndichu chifukwa chaki wavumbuwa vinandi vakukwaskana ndi iyu.
Mlengi Widu We ndi Zina Laki
“Ŵanthu aziŵi kuti yimwi, yo zina linu ndimwi Yehova, yimwi mwija ndimwi Wapachanya Limu pacharu chosi chapasi.”—SALIMO 83:18.
Bayibolu lititisambiza kuti Yehova ndiyu yija Chiuta wauneneska. Iyu ndiyu Mlengi wa vinthu vosi. Iyu pe ndiyu titenere kumusopa.—Chivumbuzi 4:11.
Yehova ndi Chiuta Wachanju
“Chiuta ntchanju.”—1 YOHANE 4:8.
Kuziya mu Bayibolu kweniso vinthu vo wakulenga, Yehova watitivumbuliya mijalidu yaki yinandi yamampha. Chanju ndilu jalidu laki likulu ukongwa. Vosi vo iyu wachita wativichita chifukwa cha chanju. Asani tisambira vinandi vakukwaskana ndi Yehova ndipu titimuyanja so ukongwa.
Yehova ndi Chiuta Wakugowoke
“Yimwi ndimwi Chiuta wakugowoke.”—NEHEMIYA 9:17.
Yehova waziŵa kuti te akubuda. Mwaviyo, ‘ngwakunozgeka kutigowoke.’ Asani titimukambiya kuti tanangisa ndipu titesesa kusintha kuti tileki vinthu viheni, iyu watigowokiyengi ndipu wakumbukengi cha vinthu vo tingunangisa.—Salimo 103:12, 13.
Yehova Wakhumba Kuti Tipempherengi Kwaku Iyu
“Yehova we pafupi ndi wosi wo atimudana . . . Watuvwa kuliya kwawu kwakupempha chovyu.”—SALIMO 145:18, 19.
Yehova wakhumba kuti tilondongi midawuku yapade cha pamwenga vikozgu pamwenga vinthu vinyaki pakumusopa. Wavwisiya mapempheru ngidu nge mo apapi achanju avwisiya ku ŵana ŵawu.
Mungayanja Kuŵerenga so Nkhani Izi
MAFUMBU NGO BAYIBOLU LIMUKA
Kumbi Yehova Ndiyani?
Kumbi iyu ndi Chiuta wa ŵanthu a mtundu umoza, nge Ayisirayeli?
