KU Spain kusanirika vinthu vinandi. Kwe mapiri, vidika ndipuso ŵanthu amitundu yakupambanapambana. Chigaŵa chikulu cha charu cha Spain kwe minda ya tirigu, mphereska ndipuso kwe vimiti va maolivi. Kumwera kwa charu cha Spain kwe nyanja yo ye ndi makilomita 14 ndipu ndiyu yigaŵa charu ichi ndi Africa.

Ŵanthu a mitundu yakupambanapambana kusazgapu Agiriki angusamiya ku charu chenichi cho che kumwera kwa Europe. Mu vyaka va m’ma 200 B.C.E, Aroma ŵati aphanga charu ichi, anguchidana kuti Hispania. Pa nyengu iyi, mucharu ichi mwajanga ŵanthu a mitundu yinyaki wo pavuli paki anguleka midawuku yawu.

Pambula kuswera, ŵanthu akujumpha 68 miliyoni anguza kuzicheza mucharu cha Spain, chaka chimoza pe. Anandi mwa ŵanthu yaŵa, anguza kuziwona nyanja, nyumba, vinthu  vakali kweniso vinthu vinyaki vinandi. Ŵanthu anandi akopeka so ndi vakurya va ku Spain. Kwenuku, ŵanthu atanja kurya somba, nkhonu, nkhumba, nyama yakubikiya limoza ndi mphangwi, saladi, mphangwi yakubika ŵaka pamwenga yakudaku mafuta nga olivi. Ŵanthu pacharu chosi aziŵa kuti ku Spain kusanirika mazira ngo atingakazinga mwalusu kweniso mpunga wo asazgaku mphangwi, somba ndi nyoli pakubika.

Ŵanthu aku Spain mbakuchezeka ukongwa. Anandi akamba kuti mbakatolika kweni mbamanavi ŵaka wo aluta ku tchalitchi. Mu vyaka va pambula kuswera, ŵanthu anyaki a ku Africa, Asia, ndipuso ku South America akusamiya ku Spain. Anandi akondwa kukonkhose anyawu vo agomeza kweniso vo achita kutchalitchi kwawu. Akaboni aku Yehova akondwa ukongwa kucheza ndi ŵanthu ŵenaŵa ndipu atiŵawovya kuziŵa vo Bayibolu lisambiza pa nkhani zakupambanapambana.

Mu 2015 Akaboni akujumpha 10,500 angujipereka kuti azengi kweniso anozi nyumba zakusopiyamu zakukwana 70 zo ziziŵika kuti Nyumba za Ufumu. Arara a boma angupereka malu kuti azengepu zinyaki mwa Nyumba Za Ufumu zenizi. Kuti awovyi ŵanthu wo atuwa ku vyaru vinyaki, Akaboni aku Yehova apanga maunganu mu vineneru vakujumpha 30, kusazapu Chisipanishi. Mu 2016 ŵanthu akujumpha 186,000 anguza pa mwambu wapade wo Akaboni aku Yehova anguchita kuti akumbukiyi nyifwa yaku Yesu Khristu.