Kumbi Vipangizu va Mazuŵa Nganu Vikwaska Wuli Ubwezi Winu ndi Anyinu?
Ŵanthu ŵaŵi angakambiskana mwambula kusuzga kuziya pa vidiyokonferensi, imelu, mameseji kweniso pa malu ngakucheziyapu nga pa Intaneti chinanga kuti aja mu vyaru vakupambana. Yiwu agwiriskiya ntchitu vipangizu va mazuŵa nganu mu nthowa yakwenere.
Kweni ŵanthu wo agwiriskiya ntchitu ukongwa vipangizu venivi pakukambiskana ndi mabwezi ngawu . . .
-
atiŵalongo lisungu ukongwa cha anyawu.
-
achita phukwa ukongwa ndipuso aguŵa.
-
aŵanaŵaniya vawu pe, va anyawu cha.
VO MUTENERE KUZIŴA
LISUNGU
Kuti timulongo lisungu munthu tikhumbika nyengu yakukwana kuti timuŵanaŵaniyi. Kuchita venivi kungaŵa kwakusuzga asani titangwanika ndi mameseji kweniso kuwona vinthu vo vaŵikika pa malu ngakucheziyapu nga pa Intaneti.
Asani vipangizu va mazuŵa nganu vitikulamuliyani, kungaŵa kwakusuzga kuti mumuki meseji ya mubwezi winu. Maŵanaŵanu nginu ngangaŵa waka pakumuka liŵi mameseji ngosi ngo mwalonde mumalu mwakovya mubwezi winu yo wakhumbika nadi chovyu.
ŴANAŴANIYANI FUNDU IYI: Kumbi mungalongo wuli kuti ‘muŵanaŵaniya’ anyinu asani mugwiriskiya ntchitu vipangizu va mazuŵa nganu pakukambiskana ndi mabwezi nginu?—1 PETURO 3:8.
KUGUŴA
Ŵanthu anyaki akusaniya kuti anandi aguŵa asani amaliya nyengu yinandi pa malu ngakucheziyapu nga pa Intaneti. Yiwu angukamba kuti kuwona vithuzi kweniso vinthu vinyaki vo ŵanthu aŵika pa malu ngakucheziyapu nga pa Intaneti, kungachitiska kuti munthu wajivwengi kuti “wamaliya nyengu yaki paŵaka.”
Kweniso kuwona vithuzi vakukondwesa vo ŵanthu anyaki aŵika pa malu ngakucheziyapu nga pa Intaneti, kungachitiska kuti ŵanthu ajiyeruzgiyengi ndi anyawu. Ve viyo chifukwa vingawoneka nge kuti ŵanthu anyaki akondwa penipo yiwi ukongwa cha.
ŴANAŴANIYANI FUNDU IYI: Asani mugwiriskiya ntchitu malu ngakucheziyapu nga pa Intaneti, kumbi mungachita wuli kuti mukhwechengi kujiyeruzgiya ndi anyinu?—AGALATIYA 6:4.
KUŴANAŴANIYA VAKU PE
Msambizi munyaki wangusaniya kuti ŵana anyaki asukulu aŵanaŵaniyanga vawu pe ndipu akhumbanga mabwezi ngo ngangaŵachitiya ŵaka vinthu vo yiwu akhumba. Munthu wangayamba kuŵanaŵana kuti mubwezi waki we nge chipangizu cha mazuŵa nganu cho chingamukondwesa asani watichikhumba ndipu nyengu zinyaki wangachileka ŵaka.
ŴANAŴANIYANI FUNDU IYI: Kumbi vinthu vo muŵika pa Intaneti vilongo kuti mwe ndi jalidu la maphara pamwenga muŵanaŵaniya ukongwa vinu pe?—AGALATIYA 5:26.
VO MUNGACHITA
SANDANI MO MUGWIRISKIYA NTCHITU VIPANGIZU VA MAZUŴA NGANU
Asani vipangizu va mazuŵa nganu mutivilamuliya mumalu mwakuti vikulamuliyeningi, vikuwovyeningi kuti mukambiskanengi ndi mabwezi nginu ndipuso kuti muŵayanjengi ukongwa.
FUNDU YA MU BAYIBOLU: “Chanju . . . chikhumba vakuchija pe cha.”—1 AKORINTO 13:4, 5.
Sankhani masachizgu ngo mungayanja kungagwiriskiya ntchitu pamwenga lembani fundu zinu.
-
Mukambiskanengi ndi munthu masu ndi masu (mumalu mwakumulembe waka meseji pamwenga imelu)
-
Muŵikengi patali foni (pamwenga pa sayilenti) asani mukambiskana ndi ŵanthu
-
Mungasuŵiliyanga waka kuwona vithuzi pamwenga kuŵerenga vo anyaki alemba pa malu ngakucheziyapu nga pa Intaneti cha
-
Muvwisiyengi mwakuphwere
-
Mukambiskanengi ndi mubwezi winu yo wakumana ndi masuzgu
