Umoyu Wabanja Kweniso Mabwezi
Ŵanthu anandi vitiŵasuzga kuja pa ubwezi wakukho ndi ŵanthu a mubanja lawu kweniso mabwezi ngawu. Tiyeni tikambiskani fundu zinyaki za mu Bayibolu zo zingakuwovyani kuti muje pa ubwezi wakukho ndi anyinu.
MUŴANAŴANIYENGI ANYINU
FUNDU YA M’BAYIBOLU: “Mungaŵanaŵaniyanga vakukhumba vinu pe cha, kweni va ŵanthu anyaki so.”—Afilipi 2:4.
VO FUNDU IYI YING’ANAMUWA: Tingaja pa ubwezi wakukho ndi anyidu asani tiŵanaŵaniya ukongwa vo tingaŵachitiya kuluska vo yiwu angatichitiya. Kweni ubwezi uwu ungatimbanyizgika asani te ndi mtima wambunu. Mwakuyeruzgiyapu, munthu wakuto pamwenga kuyirwa, wangaja cha wakugomezgeka ku munyaki asani waleka kumuŵanaŵaniya. Kweniso palivi yo wangayanja kuja pa ubwezi ndi munthu yo wajaliya ŵaka kukamba za vinthu vo wenavu pamwenga vinthu vo waziŵa. Buku linyaki likamba kuti, “munthu yo waŵanaŵaniya vaki pe wakumana ndi masuzgu nganandi.”—The Road to Character.
VO MUNGACHITA:
-
Muwovyengi anyinu. Ŵanthu wo atanjana agomezgana kweniso awovyana. Kafukufuku munyaki walongo kuti ŵanthu wo atovya anyawu asuzgika ukongwa cha maŵanaŵanu kweniso atijikayikiya cha.
-
Muchitiyengi anyinu lisungu. Lisungu ling’anamuwa kuvwa nge mo anyinu avwiya mumtima. Asani muchitiya lisungu anyinu, mukhwechengi kukamba mazu ngakunyoza kweniso njerengu zo zingaguŵiska anyinu.
Kuchitiya lisungu anyinu kungakuwovyani kuti muŵanaŵaniyengi so vakukhumba vawu. Kweniso lisungu lingakuwovyani kuti mulekengi kusankhana mitundu kweniso kuti muje pa ubwezi ndi ŵanthu a mitundu yakupambanapambana.
-
Muchezengi ndi anyinu. Mungayamba kuŵaziŵa umampha anyinu asani mucheza nawu ukongwa. Kuti musaniyi mabwezi ngamampha, mutenere kukamba nkhani zamampha zo anyinu angayanja. Muvwisiyengi vo anyinu alongoro ndipuso mulongongi kuti mutiŵaŵanaŵaniya. Kafukufuku munyaki wa pambula kuswera, walongo kuti “kukambiskana umampha kutovya ŵanthu kuti akondwengi.”
MUSANKHENGI MABWEZI MWAZERU
FUNDU YA M’BAYIBOLU: “Kwanjana ndi ŵanthu aheni kunanga nkharu yamampha.”—1 Akorinto 15:33.
VO FUNDU IYI YING’ANAMUWA: Ŵanthu wo mucheza nawu ndiwu angachitisa kuti muchitengi vinthu vamampha pamwenga viheni. Ŵanthu wo akusambira va nkharu za ŵanthu awona kuti fundu yeniyi njauneneska. Mwakuyeruzgiyapu, yiwu akamba kuti asani munthu watanja kucheza ndi ŵanthu wo akweŵa pamwenga wo akupatana ndi munthu yo angutorana nayu, nayuso wangayamba kukweŵa pamwenga wangapatana ndi yo wakutorana nayu.
VO MUNGACHITA: Muchezengi ndi ŵanthu a mijalidu yo mukhumbira kuja nayu. Mwakuyeruzgiyapu, muchezengi ndi ŵanthu wo ŵe ndi zeru, ulemu, mtima wakupaska kweniso wo atanja kulonde alendu.
FUNDU ZINYAKI ZA M’BAYIBOLU
Woneriyani maseŵeru nga m’Bayibolu ngo ngakunozgeka kuti ngawovyi ŵanthu akutorana, achinyamata kweniso ŵana kuti akondwengi mubanja lawu
MUNGAKAMBANGA CHA MAZU NGAHENI.
“Mazu ngakukambika kwambula kuŵanaŵana umampha ngaja ngakulasa nge lipanga.”—NTHANTHI 12:18.
MUJENGI AKUPASKA.
“Munthu yo wapereka ndi mtima wosi, vinthu vimuyendiyengi umampha.”—NTHANTHI 11:25.
MUCHITIYENGI ANYINU VO MUKHUMBA KUTI AKUCHITIYENINGI.
“Vinthu vosi vo mukhumba kuti ŵanthu akuchitiyeni, namwi muŵachitiyi venivo.”—MATEYU 7:12.
