NKHANI YAKUSAMBIRA YA NAMBALA 37
“Janja Laku Lingapumuwanga Cha”
“Mija mbewu zaku ndi mlenji ndipu janja laku lingapumuwanga cha mpaka mazulu.”—WAKU. 11:6.
SUMU 68 Kumija Mbewu za Ufumu
VO TISAMBIRENGI MU NKHANI IYI *
1-2. Kumbi lemba la Wakutawula 11:6, likoliyana wuli ndi ntchitu yakupharazga?
MU VYARU vinyaki, ŵanthu akhumba kusambira vinandi asani avwa uthenga wamampha. Vija nge kuti ndivu akhazanga ŵaka. Penipo kunyaki, ŵanthu atanja cha kuvwa vaku Chiuta pamwenga Bayibolu. Kumbi ko muja ŵanthu achita wuli asani mutiŵapharazgiya? Kwali ŵanthu avwisiya pamwenga cha, Yehova wakhumba kuti tingalekanga cha kupharazga mpaka po wakhorwe.
2 Pa nyengu yo Yehova wakuŵika, tazamuleka kupharazga ndipu pavuli paki ‘umaliru wazamukuza.’ (Mate. 24:14, 36) Kumbi tingalongo wuli kuti tivwiya ulongozgi wakuti, “janja laku lingapumuwanga cha” umaliru wechendazi? *—Ŵerengani Wakutawula 11:6.
3. Kumbi tikambiskanengenji mu nkhani iyi?
3 Sabata yamala tingusambira vinthu vinayi vo tikhumbika kuchita kuti tije “alovi a ŵanthu.” (Mate. 4:19) Nkhani iyi yikonkhoskengi vinthu vitatu vo tingachita kuti tifwiyengepu kupharazga chinanga kuti tikumana ndi masuzgu. Tisambirengi chifukwa cho titenere kuŵikiya mtima pa ntchitu yakupharazga, kuja akuzikira, ndipuso kuja ndi chivwanu chakukho.
MUŴIKENGI MTIMA PA NTCHITU YAKUPHARAZGA
4. Ntchifukwa wuli tikhumbika kuŵika mtima widu pa ntchitu yo Yehova watipaska?
4 Yesu wangukambiya akusambira ŵaki mo nkharu ya ŵanthu yazamuŵiya mu mazuŵa ngakumaliya kweniso vo vazamuchitika. Iyu wanguziŵa kuti vinthu venivi vazamuchitiska kuti akusambira ŵaki aleki kuŵika mtima pa ntchitu yakupharazga. Yesu wangukambiya akusambira ŵaki kuti ‘alutirizgi kuja masu.’ (Mate. 24:42) Mu nyengu yaku Nowa, penga vinthu vinandi vo vingutondekeska ŵanthu kuvwiya uthenga wacheruzgu. Nasi venivi vingatichitikiya mazuŵa nganu. (Mate. 24:37-39; 2 Petu. 2:5) Ndichu chifukwa chaki tikhumbika kuŵika mtima widu wosi pa ntchitu yakupharazga yo Yehova watipaska.
5. Kumbi lemba la Machitidu 1:6-8, likamba kuti uthenga wamampha wazamupharazgika mpaka nunkhu?
5 Mazuŵa nganu tikhumbika kufwiyapu kupharazga uthenga wamampha. Yesu wangukamba kuti akusambira ŵaki azamulutirizga kupharazga asani iyu wafwa, ndipu azamupharazga ukongwa kuluska iyu. (Yoha. 14:12) Yesu wati wafwa, akusambira ŵaki anyaki angwamba so kubaya somba. Iyu wati wayuskika wanguwovya akusambira ŵaki kubaya somba zinandi. Yesu wati wachita chakuziziswa chenichi, wangukamba kuti ntchitu yakupharazga ndi kusambiza ŵanthu njakukhumbika ukongwa kuluska ntchitu yeyosi. (Yoha. 21:15-17) Kwati kwanja kamanavi kuti Yesu waluti kuchanya, wangukambiya akusambira ŵaki kuti ntchitu yakupharazga yazamusapaliya kuvigaŵa vakutali ukongwa va charu chapasi. (Ŵerengani Machitidu 1:6-8.) Pati pajumpha vyaka, Yesu wangulongo chiwona wakutumika Yohane. Iyu wangumulongo vo vazamuchitika “mu zuŵa la Ambuya.” * Vinthu vinyaki vo Yohane wanguwona venga vakofya. Mwakulongozgeka ndi angelu, “uthenga wamampha” wapharazgikanga “ku mtundu wewosi, fuku lelosi, lilimi lelosi ndipuso ku ŵanthu wosi.” (Chivu. 1:10; 14:6) Yehova wakhumba kuti tigwirengi ntchitu yakupharazga yo yichitika pacharu chosi mpaka po wakambiya kuti lekani kupharazga.
6. Kumbi tingachita wuli kuti ntchitu yakupharazga yiŵengi pakwamba?
6 Tingalutirizga kugwira ntchitu yakupharazga asani tiŵanaŵaniya vo Yehova wachita kuti watiwovyi. Mwakuyeruzgiyapu, watitipaska chakurya chinandi chauzimu nge mabuku, vinthu vakuvwisiya, mavidiyo kweniso mapulogilamu nga JW Broadcasting. Pasonu panu, webusayiti yidu yisanirika mu vineneru vakujumpha 1,000. (Mate. 24:45-47) Chinanga kuti pacharu chapasi ŵanthu mbakugaŵikana pa nkhani za ndali, visopa ndipuso chuma, kweni ateŵeti aku Chiuta akujumpha 8 miliyoni mbakukoliyana. Mwakuyeruzgiyapu, pa 19 April 2019, Akaboni aku Yehova pacharu chosi chapasi anguwonere vidiyo yakukonkhoska lemba la zuŵa. Mazulu nga zuŵa lenili, ŵanthu akukwana 20,919,041 anguwungana kuti akumbukiyi nyifwa yaku Yesu. Titangwanika ndi ntchitu yakupharazga asani tiŵanaŵaniya mwaŵi wo tenawu wakuwona kufiskika kwa mauchimi.
Yesu wanguzomereza cha kuti chinthu chinyaki chimutimbanyizgi kupharazga uneneska (Wonani ndimi 7)
7. Kumbi vo Yesu wanguchita vingatiwovya wuli?
7 Chinthu chinyaki cho chingatiwovya kuti tiwonengi kuti ntchitu yakupharazga njakukhumbika, nkhulondo vo Yesu wachitanga. Iyu wanguzomereza cha kuti chinthu chinyaki chechosi chimutangwanisi kupharazga uneneska. (Yoha. 18:37) Wangunyengeka cha pa nyengu yo Satana wamupaskanga “maufumu ngosi nga pacharu chapasi ndi vinthu vawu vakuzirwa.” Kweniso wangunyengeka cha pa nyengu yo ŵanthu akhumbanga kumuvwalika ufumu. (Mate. 4:8, 9; Yoha. 6:15) Yesu watolekanga maŵanaŵanu cha ndi chuma kweniso wawopanga cha ŵanthu akususka. (Luka 9:58; Yoha. 8:59) Asani tikumana ndi mayeseru, tingalutirizga kupharazga asani tikumbuka ulongozgi waku Paulo. Iyu wangukambiya Akhristu kuti alondongi vo Yesu wachitanga kuti aleki “kuvuka kweniso kuwere vuli.”—Ahe. 12:3.
MUJENGI AKUZIKIRA
8. Kumbi kuzikira kung’anamuwanji, ndipu ntchifukwa wuli nkhwakukhumbika ukongwa sonu?
8 Kuzikira kung’anamuwa kulindizga kuti vinthu vinyaki visinthi. Tosi tikhumbika kuzikira, kwali tilindizga kuti vinthu viheni vimali pamwenga asani tilindizga kuti vinthu vinyaki vamampha vifiskiki. Mchimi Habakuku wakhumbanga kuti vinthu viheni vo vachitikanga ku Yuda vimali. (Haba. 1:2) Pa nyengu yo Yesu wenga pacharu chapasi, akusambira ŵaki aŵanaŵananga kuti ayambengi kuwona Ufumu waku Chiuta “nyengu yeniyo” kweniso kuti afwatulikengi ku ulamuliru wakukandirizga wa Aroma. (Luka 19:11) Tikhumba kuti Ufumu waku Chiuta uzituzgepu vinthu viheni ndi kuza ndi charu chifya cho chazamuzaza ndi ŵanthu arunji. (2 Petu. 3:13) Kweni tikhumbika kuzikira kuti nyengu yaku Yehova yikwani. Tiyeni tiwoni nthowa zinyaki zo Yehova watitisambiziya kuja akuzikira.
9. Kambani vakuyeruzgiyapu vo vilongo kuti Yehova ngwakuzikira.
9 Yehova ntchakuwoniyapu chamampha pa nkhani yakuzikira. Iyu wangumupaska nyengu yakukwana Nowa kuti wazengi chombu ndipuso kuti wateŵete nge “mupharazgi wa urunji.” (2 Petu. 2:5; 1 Petu. 3:20) Yehova wangumuvwisiya Abrahamu wachifumba mafumbu mwakuwerezawereza ngakukwaskana ndi kubwangandulika kwa Sodomu ndi Gomora. (Chiya. 18:20-33) Kwa vyaka vinandi Yehova wanguzikira ndi Ayisirayeli wo ŵenga ambula kugomezgeka. (Nehe. 9:30, 31) Mazuŵa nganu napu, tiwona kuti Yehova ngwakuzikira chifukwa wapereka mpata ku ŵanthu wo wakhumba kuti aje mabwezi ngaki kuti ‘alapi.’ (2 Petu. 3:9; Yoha. 6:44; 1 Timo. 2:3, 4) Vo Yehova wachita vititiwovya kuti nasi tizikirengi po tilutirizga kupharazga ndi kusambiza ŵanthu. Iyu watitisambiza so kuzikira kuziya mu chakuyeruzgiyapu cho chisanirika mu Mazu ngaki.
Nge mlimi waphamphu kweniso wakuzikira, nasi tilindizga vinthu vamampha chifukwa cha ntchitu yidu yakupharazga (Wonani ndimi 10-11)
10. Kumbi chakuyeruzgiyapu cha mlimi cho che pa Yakobe 5:7, 8, chititisambizanji?
10 Ŵerengani Yakobe 5:7, 8. Chakuyeruzgiyapu cha mlimi chititisambiza mo tingajaliya akuzikira. Mbuneneska kuti mbewu zinyaki zime liŵi. Kweni mbewu zinandi zo zipasa vipasu zito nyengu yitali kuti vipasu vaki vikomi. Ku Yisirayeli nyengu yakulimiya yatonga pafufupi myezi 6. Mlimi wapandanga mbewu zaki asani vuwa yakwamba yawa ndipu wavunanga asani vuwa yakumaliya yawa. (Mariko 4:28) Tingachita umampha kuyezga mlimi pa nkhani yakuzikira. Kweni ntchipusu cha kuchita viyo.
11. Kumbi kuzikira kungatiwovya wuli mu uteŵeti?
11 Kanandi ŵanthu ambula kufikapu apenja kuti vinthu viŵayendiyengi umampha nyengu yeniyo. Kweni asani tikhumba kuti tizikololi, tikhumbika kufwiyapu kulima, kupanda, kulimiliya ndi kudiriya maji. Nasi asani tikhumba kusambiza ŵanthu uneneska titenere kufwiyapu. Pangato nyengu kuwovya ŵanthu wo tisambira nawu Bayibolu kuti ayanjengi munthu weyosi. Kuzikira kungatiwovya kuti tileki kuwere vuli asani ŵanthu aleka kuvwisiya. Asani ŵanthu avwisiya titenere kuzikira mbwenu. Munthu yo tisambira nayu Bayibolu tingamuchichizga cha kuti waje ndi chivwanu. Nyengu zinyaki akusambira aku Yesu asweranga kuvwisa vo waŵasambizanga. (Yoha. 14:9) Titenere kukumbuka kuti tingapanda ndi kudiriya kweni Chiuta ndiyu wakuzga.—1 Akori. 3:6.
12. Kumbi tingachita wuli vinthu mwakuzikira asani tipharazgiya abali ŵidu?
12 Nyengu zinyaki tingatondeka kuzikira asani tipharazgiya abali ŵidu. Lemba la Wakutawula 3:1, 7 lingatiwovya. Likamba kuti: ‘Pe nyengu yakuja cheti ndi nyengu yakulongoro.’ Nkharu yidu yamampha yingawovya abali ŵidu kuti avwisiyi uthenga wamampha. Mwaviyo, nyengu zosi titenere kunozgeka kuŵapharazgiya. (1 Petu. 3:1, 2) Tikhumbika kupharazga kweniso kusambiza mwaphamphu kweni titenere kuzikira ndi munthu weyosi, kusazgapu abali ŵidu.
13-14. Kambani vakuyeruzgiyapu vo vingatiwovya kuja akuzikira?
13 Tingasambira kuzikira ku ŵanthu wo azumbulika mu Bayibolu kweniso kwa ateŵeti aku Yehova a mazuŵa nganu. Habakuku wakhumbisiskanga kuti vinthu viheni vimali, kweni wangukamba kuti: “Ndilutirizgengi kuma pamalu ngangu ngakuchitiyapu ulonda.” (Haba. 2:1) Wakutumika Paulo wangukamba kuti wakhumbanga kumaliza uteŵeti waki. Ndipu wangulutirizga kuzikira kuti ‘wapereki mwakukwana ukaboni wa uthenga wamampha.ʼ—Machi. 20:24.
14 Tiyeni tikambiskani chakuyeruzgiyapu cha banja linyaki lo lingumaliza Sukulu ya Giliyadi. Banja ili, angulituma ku charu cho kwenga Akaboni amanavi ndipu visopa va Chikhristu venga vakuwanda cha. Ŵanthu amanavi ndiwu akhumbanga kusambira Bayibolu. Kweni anyawu wo angusere nawu limoza Sukulu ya Giliyadi wo ateŵetiyanga ku vyaru vinyaki, aŵalembiyanga makalata ngo ngalongonga kuti asambizanga ŵanthu anandi uneneska. Chinanga kuti ŵanthu anandi avwisiyanga cha mu uteŵeti, yiwu angulutirizga kupharazga. Pati pajumpha vyaka 8 vinthu vingwamba kuŵayende ndipu munthu yumoza wangubatizika. Kumbi tingasambiranji ku ŵanthu wo azumbulika mu Bayibolu kweniso kwa ateŵeti aku Yehova a mazuŵa nganu? Ŵanthu ŵenaŵa anguchita ulesi cha pamwenga kupumuzga manja ngawu ndipu Yehova wanguŵatumbika chifukwa cha kuzikira. Tiyeni tosi tiyesesi kuyezga “wo kuporote mu chivwanu ndi kuzikira, alonde vo Chiuta wakulayizga.”—Ahe. 6:10-12.
JANI NDI CHIVWANU CHAKUKHO
15. Kumbi chivwanu chititiwovya wuli pa nkhani yakupharazga?
15 Titiwugomezga uthenga wo tipharazga ndichu chifukwa chaki tipharazgiya ŵanthu anandi. Tigomezga kuti vo Chiuta wakutilayizga mu Mazu ngaki vazamufiskika. (Sumu 119:42; Yesa. 40:8) Mazuŵa nganu tiwona kufiskika kwa mauchimi nga mu Bayibolu. Tiwona mo ŵanthu asinthiya umoyu wawu asani ayamba kugwiriskiya ntchitu ulongozgi wa mu Bayibolu. Venivi vititiwovya kusimikiza kuti ŵanthu wosi akhumbika kuvwa uthenga wamampha wa Ufumu.
16. Mwakukoliyana ndi Sumu 46:1-3, kumbi kugomezga Yehova ndi Yesu kungatiwovya wuli kuti tilutirizgi kupharazga?
16 Tigomezga so Yehova yo ndi Mweneku wa uthenga wo tipharazga kweniso Yesu yo ndi Fumu ya Ufumu waki. (Yoha. 14:1) Kwali tikumani ndi masuzgu wuli, Yehova walutirizgengi kuŵa malu ngidu ngakuthaŵiyaku kweniso nthazi yidu. (Ŵerengani Sumu 46:1-3.) Kweniso tigomezga kuti Yesu walongozga ntchitu yakupharazga mwakugwiriskiya ntchitu nthazi zo Yehova wamupaska.—Mate. 28:18-20.
17. Kambani chakuyeruzgiyapu cho chilongo kuti tingalekanga cha kupharazga.
17 Chivwanu chititiwovya kugomezga kuti nyengu zinyaki Yehova wangatumbika vo tichita mu nthowa yo talindizanga cha. (Waku. 11:6) Mwakuyeruzgiyapu, zuŵa lelosi ŵanthu anandi awona timashelufu to tiŵikapu mabuku ngidu. Kumbi yeniyi ndi nthowa yamampha yakupharazgiya? Hinya! Mu Uteŵeti Widu wa Ufumu wa November 2014, mwenga nkhani ya mwana wa sukulu munyaki. Iyu wakhumbanga kufufuza nkhani yakukwaskana ndi Akaboni aku Yehova ndi kuyilemba. Kweni watondekanga kusaniya Nyumba ya Ufumu. Zuŵa linyaki wangusaniya mabuku pa thebulu po Akaboni aku Yehova apharazganga pafupi ndi sukulu yawu. Wangusaniya so fundu zo wangalemba zakukwaskana ndi Akaboni. Pati pajumpha nyengu wangubatizika ndipu sonu ndi mpayiniya wa nyengu zosi. Vinthu va nge ivi vititichiska kuti tilutirizgi kupharazga chifukwa vilongo kuti peche ŵanthu anandi wo akhumba kuvwa uthenga wa Ufumu.
MANJA NGINU NGANGAPUMUWANGA CHA
18. Ntchifukwa wuli tikayika cha kuti ntchitu yakupharazga uthenga wa Ufumu yimalengi pa nyengu yo Yehova wakhumba?
18 Tisimikiza kuti ntchitu yakupharazga Ufumu yimalengi pa nyengu yakwenere. Tiyeni tikambiskani vo vinguchitika mu mazuŵa ngaku Nowa. Yehova wangulongo kuti wachita vinthu pa nyengu yaki. Kwati kwaja vyaka 120 kuti chigumula chiyambi, Yehova wangusankhiya limu zuŵa lo Chigumula chazamuyambiya. Pati pajumpha vyaka Yehova wangukambiya Nowa kuti wakhomi chombu. Panyaki kwati kwanja vyaka 40 pamwenga 50 kuti Chigumula chiyambi, Nowa wangulutirizga kugwira ntchitu mwaphamphu. Chinanga kuti ŵanthu avwiyanga cha, Nowa wangulutirizga kupharazga uthenga wa cheruzgu mpaka po Yehova wangumukambiya kuti waserezi vinyama mu chombu. Pa nyengu yakwenere, “Yehova wangujala chisasa.”—Chiya. 6:3; 7:1, 2, 16.
19. Kumbi tazamusaniyanji asani tilekengi kupumuzga manja ngidu?
19 Pambula kuswera yapa, Yehova watikambiyengi kuti tamaliza kugwira ntchitu yakupharazga uthenga wa Ufumu. Pavuli paki wazamubwanganduwa charu chaku Satana ndipu wazamuzisa charu chifya cho chazamuzaza ndi ŵanthu akuvwiya Chiuta. Mpaka pa nyengu yeniyi, tiyeni tilutirizgi kuzikira nge mo wanguchitiya Nowa, Habakuku ndi ateŵeti anyaki aku Yehova wo angupumuzga cha manja ngawu. Tiyeni tilutirizgi kuŵika maŵanaŵanu ngidu pa ntchitu yakupharazga, tizikirengi kweniso kugomezga vo Yehova wakulayizga.
SUMU 75 “Ndini Panu! Nditumeni”
^ ndimi 5 Nkhani ya sabata yamala, yinguchiska wo asambira Bayibolu kuti azomeri mudanu waku Yesu wakuti aje alovi a ŵanthu. Mu nkhani yinu, tikambiskanengi vinthu vitatu vo apharazgi wosi angachita, kuti alutirizgi kupharazga uthenga wamampha wa Ufumu mpaka po Yehova wakambiya kuti lekani kupharazga.
^ ndimi 2 VO MAZU NGANYAKI NGANG’ANAMUWA: Mu nkhani iyi mazu ngakuti “janja laku lingapumuwanga cha,” ngang’anamuwa kuti titenere kulutirizga kupharazga uthenga wamampha mpaka po Yehova wakambiya kuti lekani kupharazga.
^ ndimi 5 “Zuŵa la Ambuya” lingwamba mu 1914, Yesu wati waja Fumu ndipu lazamumala kukumaliya kwa Ulamuliru Waku Khristu wa Vyaka 1,000.
