Ntchifukwa wuli Yesu wechendafwi wangukamba mazu ngo Davidi wangulemba pa Salimo 22:1?

Nganyaki mwa mazu ngakumaliya ngo Yesu wangukamba wechendafwi, ndi ngo nge pa Mateyu 27:46 ngakuti: “Chiuta wangu, Chiuta wangu, ntchifukwa wuli mwandisiya?” Pakukamba mazu yanga, Yesu wafiskanga mazu ngo Davidi yo wakulembaku buku la Masalimo wangulemba pa Salimo 22:1. (Mariko 15:34) Kungaŵa kunanga kukamba kuti Yesu wangukamba mazu yanga chifukwa chakuti wanguguŵa pamwenga chifukwa chakuti wengavi chivwanu mwaku Chiuta kwakanyengu. Yesu wavwisanga umampha chifukwa cho wakhumbikiyanga kufwiya ndipu wenga wakunozgeka kufwa. (Mate. 16:21; 20:28) Iyu waziŵanga so kuti pa nyengu ya nyifwa yaki, Yehova wazamukhumbika ‘kumuzingiliza cha ndi mpanda.’ (Yobu 1:10) Ndichu chifukwa chaki Yehova wangumuvikiliya cha Yesu. Iyu wanguchita venivi kuti Yesu walongo kuti walutirizgengi kuja wakugomezgeka, kwali wangakumana ndi masuzgu wuli pa nyifwa yaki.—Mariko 14:35, 36.

Sonu nanga ntchifukwa wuli Yesu wangukamba mazu nga pa salimo ili? Chinanga kuti tiziŵa umampha cha chifukwa cho wangukambiya mazu yanga, kweni tiyeni tikambiskani vifukwa vinyaki vo watenere kuti wangukambiya viyo. *

Pakukamba mazu ngenanga, kumbi Yesu wang’anamuwanga kuti Yehova wangamuwovya cha pa nyifwa yaki? Yesu wakhumbikanga kupereka sembi kwambula kuwovyeka ndi Yehova. Chifukwa chakuti wenga munthu, wakhumbikanga  kufwa kuti “walaŵi nyifwa chifukwa cha munthu weyosi.”—Ahe. 2:9.

Pakukamba mazu ngamanavi nga pa Salimo 22:1, kumbi Yesu wakhumbanga kuti ŵanthu aŵanaŵaniyi mavesi ngosi nga pa salimo lenili? Mu nyengu yaku Yesu, Ayuda ayanjanga kuloŵeza masalimo nganandi. Asani yiwu avwa vesi limoza la pa salimo, nyengu yeniyo aŵanaŵaniyanga mavesi ngosi nga pa salimo lo. Asani venivi ndivu Yesu waŵanaŵaniyanga, ndikwesa iyu Ayuda wanguwovya wo amulondonga kukumbuka mauchimi nganandi ngo ngasanirika mu salimo ili, ngo ngakambanga vo vazichitikanga pa nyifwa yaki. (Salimo 22:7, 8, 15, 16, 18, 24) Kweniso mavesi ngakukumaliya kwa salimo ili, ngathamika Yehova ndipu ngakonkhoska kuti Iyu ndi fumu ya charu chosi.—Salimo 22:27-31.

Pakukamba mazu ngenanga ngaku Davidi, kumbi Yesu walongonga kuti walivi mulandu? Yesu wechendafwi, wakhumbikanga kukunthiyapu mulandu waboza wo amumbanga kuti wanyoza Chiuta. (Mate. 26:65, 66) Mulandu waki anguwuyeruzga mwaliŵi ndi usiku ndipu anguwuyeruzga kwambula kulondo marangu. (Mate. 26:59; Mariko 14:56-59) Yesu wachikamba mazu nga pa Salimo 22:1, venga nge wafumba kuti: “Chiuta wangu, Chiuta wangu, ntchifukwa wuli mwandisiya asani palivi cho ndananga?” Mwaviyo, Yesu watenere kuti wakhumbanga kulongo kuti walivi mulandu.

Kumbi Yesu wakumbusanga so ŵanthu anyaki kuti chinanga kuti Davidi yo wangulemba salimo lenili Chiuta wanguzomereza kuti wakumani ndi masuzgu, kweni venivi vang’anamuwanga cha kuti Yehova wanguleka kukondwa nayu? Fumbu lo Davidi wangufumba, lalongonga kuti walivi chivwanu cha. Iyu wati wafumba fumbu lenili, Davidi wangulutirizga kukamba kuti wathemba Yehova kuti wangataska ŵanthu ŵaki ndipu Yehova wangulutirizga kumutumbika. (Salimo 22:23, 24, 27) Mwakuyanana ŵaka, chinanga kuti Yesu “Mwana waku Davidi,” wangusuzgika pa chimiti chakutombozgekiyapu, venivi vang’anamuwanga cha kuti Yehova wanguleka kukondwa nayu Yesu.—Mate. 21:9.

Kumbi Yesu walongonga chitima chikulu chifukwa chakuziŵa kuti Yehova wakhumbikanga cha kumuvikiliya ndi chilatu chakuti walongo kuti ngwakugomezgeka nadi? Chenga chilatu chaku Yehova cha pakwamba kuti Mwana waki wasuzgiki ndi kufwa. Kweni Yehova wanguzomereza venivi, Adamu ndi Eva ŵati amugarukiya. Palivi cho Yesu wangunanga, kweni wakhumbikanga kusuzgika kweniso kufwa ndi chilatu chakuti wamuki nkhani yo Satana wakwambisa ndipuso kupereka sembi mtengu wakwenere kuguliya so vinthu vo munthu wakwamba wangutaya. (Mariko 8:31; 1 Petu. 2:21-24) Venivi vatingi vifiskikengi pijapija asani Yehova wanguleka kumuvikiliya Yesu kwakanyengu, kakwamba pa umoyu waki.

Kumbi Yesu wakhumbanga kovya akusambira ŵaki kuŵanaŵaniya chifukwa cho Yehova wanguzomereze kuti iyu wafwi mu nthowa yeniyi? * Yesu waziŵanga kuti kufwa nyifwa ya mtundu wenuwu nge chigeŵenga pachimiti chakutombozgekiyapu kwaziguŵiskanga ŵanthu anandi. (1 Akori. 1:23) Asani akusambira ŵaki aŵanaŵaniyanga chifukwa chayichu cho iyu wangufwiya, atingi avwisengi vo nyifwa yaki yang’anamuwanga. (Aga. 3:13, 14) Yiwu atingi amuwonengi nge Mtaski, chigeŵenga cha.

Kwali Yesu wangukamba mazu nga pa Salimo 22:1 pa chifukwa wuli, kweni iyu waziŵanga kuti vo vamuchitikiyanga, kwenga kuchita khumbu laku Yehova. Pati pajumpha kanyengu kamanavi iyu wati wakamba mazu nga pa lemba ili, Yesu wangukamba kuti: “Vafiskika!” (Yoha. 19:30; Luka 22:37) Mwaviyo, fundu yakuti Yehova wanguleka kuvikiliya Yesu kwakanyengu, yinguwovya Yesu kuti wafiski vinthu vosi vo Yehova wangumutuma kuti wazichiti pacharu chapasi. Yinguwovya so kuti wafiski vinthu vosi vakukwaskana ndi iyu vo vikulembeka mu “Dangu laku Mozesi, vo achimi akulemba, ndipuso vo ve mubuku la Masalimo.”—Luka 24:44.