1. Kumbi Yehova wawonanji mu ŵanthu ŵaki?

YEHOVA CHIUTA “wakondwa ndi ŵanthu ŵaki.” (Salimo 149:4) Fundu yeniyi, yititikondwesa ukongwa! Yehova wawona mijalidu yamampha yo tenayu, wawona kuti tingaja munthu wamampha ndipu watitiguziya kwaku iyu. Asani tilutirizgengi kuja akugomezgeka kwaku iyu, walutirizgengi kuja bwezi lidu mpaka muyaya!—Yoha. 6:44.

2. Ntchifukwa wuli anyaki vitiŵasuzga kugomezga kuti Yehova watiŵayanja?

² Ŵanthu anyaki angakamba kuti: ‘Ndiziŵa kuti Yehova watanja ŵanthu ŵaki, kweni kumbi ndingasimikiza wuli kuti watindiyanja ini pakundija?’ Kumbi ntchinthu wuli cho chingachitiska munthu kujifumba fumbu lenili? Oksana * yo wangukumana ndi suzgu yinyaki yikulu pa nyengu yo wenga mwana wangukamba kuti: “Ndakondwanga ukongwa ndati ndabatizika ndi kwamba kuchita upayiniya. Kweni pati pajumpha vyaka 15, ndingwamba kusuzgika maŵanaŵanu ndi vo vingundichitikiya pa nyengu yo ndenga mwana. Ndingwamba kuŵanaŵana kuti Yehova watindiyanja cha kweniso kuti ndenga wakwenere cha kuyanjika ndi iyu.” Mzichi Yua yo ndi mpayiniya ndipu nayu wangukumana ndi masuzgu ngakulu po wenga mwana, wangukamba kuti: “Ndingujipereka kwaku Yehova chifukwa ndakhumbanga kumukondwesa. Kweni ndasimikizanga cha kuti wangandiyanja.”

3. Kumbi tikambiskanengenji mu nkhani iyi?

³ Mwakuyanana ndi azichi ŵaŵi wo azumbulika pachanya yapa, namwi mutanja Yehova, kweni panyaki namwi mungakayikiya kuti watikuyanjani. Ntchifukwa wuli mukhumbika kugomezga ndi mtima  wosi kuti watikuyanjani nadi? Nanga ntchinthu wuli cho chingakuwovyani asani muŵanaŵana kuti Yehova watikuyanjani cha? Tiyeni tikambiskani kwamuka kwa mafumbu ngenanga.

4. Ntchifukwa wuli kukayikiya kuti Yehova watitiyanja nkhwakofya?

⁴ Chanju ntchanthazi ukongwa. Asani tisimikiza kuti Yehova watitiyanja kweniso watitiwovya, vingatichitiska kuti timuteŵetiyengi ndi mtima wosi chinanga kuti tingakumana ndi masuzgu. Kweni asani tikayikiya kuti Chiuta watitiphwere, ‘nthazi zidu zijengi zimana.’ (Nthanthi 24:10) Ndipu asani taguŵa ndi kwamba kuŵanaŵana kuti Chiuta watitiyanja cha, tingatondeka kukhwecha mayeseru ngaku Satana.—Aefe. 6:16.

5. Kumbi kukayikiya kuti Chiuta watitiyanja, kwaŵakwaska wuli abali ndi azichi anyaki?

⁵ Abali ndi azichi ŵidu anyaki awere vuli mwauzimu chifukwa chakukayikiya kuti Chiuta watiŵayanja. Mura munyaki zina laki James wangukamba kuti: “Chinanga kuti ndateŵetiyanga pa Beteli ndipuso ndakondwanga kupharazga limoza ndi mpingu wa chineneru chachilendu, ndakayikiyanga asani Yehova wakondwanga nadi ndi vo ndachitanga. Mwakuti pa nyengu yinyaki, ndingwamba kukayikiya asani Yehova wavwisiyanga mapempheru ngangu.” Eva yo wachita uteŵeti wa nyengu zosi wangukamba kuti: “Ndinguwona kuti kukayikiya chanju chaku Yehova nkhwakofya ukongwa chifukwa kuchita viyo kukwaska vosi vo munthu wachita pakumuteŵete. Venivi vingachitiska kuti munthu waŵevi khumbu lakuchita vinthu vakukwaskana ndi kusopa Yehova ndipu wangaleka kukondwa pakumuteŵete.” Michael yo wachita upayiniya wanyengu zosi kweniso ndi mura mumpingu wangukamba kuti: “Asani munthu uleka kugomezga kuti Chiuta watikuphwere, ungatuwaku kwaku iyu.”

6. Kumbi tikhumbika kuchitanji asani tayamba kukayikiya kuti Chiuta watitiyanja?

⁶ Vakuyeruzgiyapu ivi valongo kuti chivwanu chingamala asani tikayikiya kuti Yehova watitiyanja. Kweni kumbi tingachita wuli asani tayamba kuja ndi maŵanaŵanu ngakukayikiya kuti Chiuta watitiyanja? Tikhumbika kungakaniza mwaliŵi! Mupemphengi Yehova kuti wakuwovyeni kutuzgamu ‘maŵanaŵanu ngo ngatikufipiskani mtima’ ndi kuja ndi ‘chimangu chaku Chiuta cho chivikiliyengi mtima winu ndi maŵanaŵanu nginu.’ (Salimo 139:23; Afi. 4:6, 7) Mukumbukengi kuti mwe mwija cha. Abali ndi azichi anyaki akugomezgeka, nawu asuzgika ndi maŵanaŵanu ngakuti Yehova watiŵayanja cha. Ndipu chinanga mbateŵeti anyaki aku Yehova akali, nawu asuzgikanga ndi  maŵanaŵanu ngenanga. Tiyeni tiwoni vo tingasambira kwa wakutumika Paulo.

7. Kumbi Paulo wakumananga ndi masuzgu wuli?

⁷ Kumbi nyengu zinyaki mutijivwa kuti mwe ndi maudindu nganandi ndipu muwona kuti vakusuzga ukongwa kuchita vosi vo mukhumbika kuchita? Asani ndi viyo, mungamuvwisa Paulo. Iyu wafipiyanga mtima mpingu umoza cha, kweni “mipingu yosi.” (2 Akori. 11:23-28) Kumbi mutama matenda ngakulu ngo ngachitiska kuti muŵevi likondwa? Paulo wasuzgikanga ndi “munga muliŵavu,” wo panyaki ngenga matenda ngo watamanga ndipu wakhumbisiskanga kuti ngamali. (2 Akori. 12:7-10) Kumbi yimwi nyengu zinyaki musuzgika maŵanaŵanu chifukwa cha vo munangisa? Ndimu so Paulo wavwiyanga nyengu zinyaki. Iyu wangukamba kuti wenga “munthu wakusuzgika” chifukwa nyengu zosi wakhumbikanga kuyesesa kuchita cho ntchamampha.—Aro. 7:21-24.

8. Kumbi ntchinthu wuli cho chinguwovya Paulo kukunthiyapu masuzgu ngaki?

⁸ Chinanga kuti Paulo wangukumana ndi mayeseru ngakupambanapambana kweniso vakuguŵiska, wangulutirizga kuteŵete Yehova. Kumbi ndi yani yo wamupaskanga nthazi zakuchitiya venivi? Chinanga kuti iyu waziŵanga umampha kuti wanangisanga vinthu vinyaki, kweni wenga ndi chivwanu chambula kudewezeka mu sembi yaku Yesu. Paulo waliziŵanga so layizgu laku Yesu lakuti ‘weyosi yo wavwana mwaku Yesu wazamuja ndi umoyu wamuyaya.’ (Yoha. 3:16; Aro. 6:23) Tikayika cha kuti Paulo wenga yumoza mwa ŵanthu wo ŵenga ndi chivwanu mu sembi yaku Yesu. Iyu wagomezganga ndi mtima wosi kuti Yehova ngwakunozgeka kugowoke chinanga mbanthu wo akuchita maubudi ngakulungakulu asani alapa.—Salimo 86:5.

9. Kumbi tisambiranji pa mazu ngo Paulo wangukamba pa Agalatiya 2:20?

⁹ Paulo wenga so ndi chivwanu kuti Chiuta wamuyanjanga ukongwa chifukwa wanguziŵa kuti Chiuta wangutuma Khristu kuti wazimufwiyi. (Ŵerengani Agalatiya 2:20.) Wonani mazu ngakuchiska ngo nge kukumaliya kwa vesi ili. Paulo wangukamba kuti: “Mwana waku Chiuta, . . . wakundiyanja ndipu wakujipereka chifukwa chaku ini.” Paulo wanguŵanaŵanapu cha kuti iyu ndi muheni ukongwa ndipu Chiuta wangamuyanja cha. Iyu wanguŵanaŵanapu cha kuti: ‘Yehova wangayanja abali ndi azichi pa vifukwa vinyaki kweni ini wangandiyanja cha.’ Paulo wangukumbusa Akhristu a ku Roma kuti: “Mwakuti po tenga teche akubuda, Khristu wangutifwiya.” (Aro. 5:8) Palivi cho chingachitiska kuti Chiuta waleki kutiyanja!

10. Kumbi tisambiranji pa Aroma 8:38, 39?

¹⁰ Ŵerengani Aroma 8:38, 39. Paulo wakayikiyanga cha kuti chanju chaku Chiuta ntchikulu  ukongwa. Iyu wangulemba kuti palivi cho ‘chingatipatuska ku chanju chaku Chiuta.’ Paulo waziŵanga mo Yehova wanguchitiya vinthu mwakuzikira ndi mtundu wa Ayisirayeli. Iyu waziŵanga so mo Yehova wangumulongore lisungu. Mu mazu nganyaki tingakamba kuti Paulo wakambanga kuti: ‘Chifukwa chakuti Yehova wangutuma mwana ŵaki kuzindifwiya, ndikhumbika cha kukayikiya kuti watindiyanja.’—Aro. 8:32.

11. Chinanga kuti Paulo wanguchita maubudi nge ngo ngakambika pa 1 Timote 1:12-15, ntchifukwa wuli wakayikiyanga cha kuti Chiuta watimuyanja?

¹¹ Ŵerengani 1 Timote 1:12-15. Paulo watenere kuti nyengu zinyaki wasuzgikanga maŵanaŵanu ndi vo wangunangisapu. Mwakuti vakuziziswa cha kuti wangujikamba kuti ‘ngwakubuda ukongwa.’ Wechendasambiri uneneska, Paulo watombozganga Akhristu mumatawuni ngakupambanapambana. Anyaki waŵaŵikanga mujeri ndipu wazomerezanga so kuti anyaki abayiki. (Machi. 26:10, 11) Kumbi muwona kuti Paulo watingi wajivwengi wuli asani wakumana ndi Akhristu achinyamata wo apapi ŵawu iyu ndiyu wanguzomereza kuti abayiki? Paulo wajivwiyanga chitima ndi vo wangunangisa kuvuli kweni waziŵanga kuti wangavisintha cha. Iyu wanguzomereza kuti Khristu wakumufwiya ndipu mwakusimikiza wangulemba kuti: “Chifukwa cha wezi ukulu waku Chiuta nde wakutumika.” (1 Akori. 15:3, 10) Kumbi isi tisambiranjipu? Mugomezgengi kuti Khristu wakufwiya yimwi ndipu wakukujuliyani nthowa kuti muje pa ubwezi wakukho ndi Yehova. (Machi. 3:19) Chakuzirwa kwaku Chiuta, ndi vo tichita sonu kweniso vo tazamuchita kunthazi, vo tingunangisa kuvuli cha, kwali pa nyengu iyi tenga Akaboni aku Yehova pamwenga cha.—Yesa. 1:18.

12. Kumbi mazu ngo nge pa 1 Yohane 3:19, 20, ngangatiwovya wuli asani titijiwona kuti te ambula kwenere kweniso titanjika cha?

¹² Asani muŵanaŵaniya kuti Yesu wangufwa kuti maubudi nginu ngagowokereki, mungakamba kuti: ‘Nde wakwenere cha kulonde mphasu yeniyi.’ Ntchifukwa wuli mungajivwa viyo? Mtima widu wambula kufikapu ungatinyenga, ndipu tingayamba  kuŵanaŵana kuti te ambula kwenere pamwenga titanjika cha. (Ŵerengani 1 Yohane 3:19, 20.) Asani tayamba kuja ndi maŵanaŵanu ngenanga, titenere kukumbuka kuti “Chiuta ndi mukulu kuluska mitima yidu.” Titenere kusimikiza kuti Awusefwi akuchanya atitiyanja ukongwa ndipuso alutirizgengi kutigowoke. Kuti tivwisi umampha mo Yehova watitiwone, titenere kusambira Mazu ngaki pafupipafupi, kupemphera kwaku iyu kaŵikaŵi kweniso kucheza ndi ŵanthu ŵaki akugomezgeka nyengu zosi. Ntchifukwa wuli kuchita venivi nkhwakukhumbika?

13. Kumbi kusambira Mazu ngaku Chiuta, kungatiwovya wuli? (Wonani bokosi lakuti “ Mo Mazu Ngaku Chiuta Nganguŵawovye.”)

¹³ Musambirengi Mazu ngaku Chiuta zuŵa lelosi, ndipu muyiziŵengi umampha mijalidu yinandi yaku Yehova. Muwonengi mo iyu watikuyanjiyani. Asani muŵanaŵaniyapu pa vo mwaŵerenga mu Mazu ngaku Chiuta zuŵa lelosi, vingakuwovyani kuti muŵanaŵanengi umampha ukongwa, kung’anamuwa ‘kunyoloska vinthu’ mu maŵanaŵanu ndi mumtima winu. (2 Timote 3:16) Mura munyaki zina laki Kevin, yo wasuzgikanga maŵanaŵanu chifukwa chakuti wajiwonanga kuti ngwambula kwenere wangukamba kuti: “Kuŵerenga Salimo 103 ndipuso kuŵanaŵaniyapu, kwandiwovya kuti ndijengi ndi maŵanaŵanu ngakwenere ndi kuvwisa mo Yehova watindiwone.” Eva yo tamuzumbuwa kukwamba wangukamba kuti: “Pakumaliya pa zuŵa lelosi, ndisaniya nyengu yakuŵanaŵaniya cho ntchakukhumbika ukongwa kwaku Yehova. Venivi vitindiwovya kuja ndi chimangu cha mumtima ndipu chivwanu changu chikho ukongwa.”

14. Kumbi pempheru lingatiwovya wuli?

¹⁴ Mupempherengi nyengu zosi. (1 Ate. 5:17) Kuti munthu waje pa ubwezi wakukho ndi munthu munyaki, akhumbika kukambiskana kaŵikaŵi kweniso kukambiskana kutuliya pasi pa mtima. Ndimu so viliri ndi ubwezi widu ndi Yehova. Asani titimukambiya maŵanaŵanu ngidu, mo tivwiya kweniso vo vititifipiska mtima mu pempheru, tilongo kuti titimugomezga kweniso tiziŵa kuti iyu watitiyanja. (Salimo 94:17-19; 1 Yoha. 5:14, 15) Yua yo tamukambapu kali wangukamba kuti: “Asani ndipemphera, nditimukambiya vinandi Yehova kuluska ŵaka vo ndachita pa zuŵa lo. Nditimujuliya mtima wangu Yehova ndipu nditimukambiya vosi vo ndiŵanaŵana kweniso mo ndivwiya. Kamana ndi kamana, ndayamba kuwona Yehova nge bwana wa pa kampani yikulu cha, kweni nge Ada wo atanja nadi ŵana ŵawu.”—Wonani bokosi lakuti “ Kumbi Mwaliŵerenga?”

15. Kumbi Yehova walongo wuli kuti watitiyanja?

¹⁵ Muchezengi ndi mabwezi ngakugomezgeka, chifukwa yiwu ndi mphasu yakutuliya kwaku Yehova. (Yako. 1:17) Awusefwi akuchanya alongo kuti atitiyanja chifukwa akutipaska abali ndi azichi wo alongo kuti atitiyanja “nyengu zosi.” (Nthanthi 17:17) Mu kalata yaki yo wangulemba Akhristu a ku Kolose, Paulo wanguzumbuwamu Akhristu  anyaki wo amuwovyanga ndipu wangukamba kuti ‘amuchiskanga ukongwa.’ (Ako. 4:10, 11) Chinanga ndi Khristu Yesu, nayu wakhumbikanga kuwovyeka ndipu wawonganga chovyu cho walondiyanga kutuliya ku mabwezi ngaki, angelu kweniso ŵanthu.—Luka 22:28, 43.

16. Kumbi mabwezi ngakugomezgeka ngangatiwovya wuli kundere kufupi ndi Yehova?

¹⁶ Kumbi mupempha kweniso kulonde chovyu kutuliya ku mabwezi nginu ngakugomezgeka mu mpingu? Asani tikambiyapu mubwezi widu wakukhwima mwauzimu vo vititifipiska mtima, ving’anamuwa kuti chivwanu chidu ntchakulopwa cha, kweni vingativikiliya. Wonani vo James yo tamukambapu kali wangukamba. Iyu wangukamba kuti: “Kuja pa ubwezi wamampha ndi Akhristu akukhwima mwauzimu, kwandiwovya ukongwa. Asani maŵanaŵanu ngaheni ngatindimala nthazi, mabwezi ngakuzirwa ngenanga ngatindivwisiya mwakuzikira ndipu ngatindikambiya kuti ngatindiyanja. Mwaviyo, kuziya mwaku yiwu, ndiwona kuti Yehova watindiyanja kweniso watindiphwere.” Kukamba uneneska, nkhwakukhumbika ukongwa kuja pa ubwezi wakukho ndi abali ndi azichi ŵidu!

17-18. Kumbi titenere kuvwiya yani, ndipu ntchifukwa wuli?

¹⁷ Satana wakhumba kuti tileki kuyesesa kuchita cho ntchamampha. Iyu wakhumba kuti tigomezgengi kuti Yehova watitiyanja cha, ndipu te akwenere cha kumuteŵete. Kweni nge mo tawone mu nkhani iyi, venivi vaboza.

¹⁸ Yehova watikuyanjani. Iyu wawona kuti mwe akuzirwa mu masu mwaki. Asani mumuvwiyengi, “mulutirizgengi kuchita vinthu vo vingachitiska kuti” wakuyanjeningi, nge mo Yesu wanguchitiya. (Yoha. 15:10) Mwaviyo, mukhumbika cha kuvwiya Satana pamwenga mtima winu wakunyenga. Mumalu mwaki, mutenere kuvwiya Yehova, yo wawona vamampha mwaku weyosi waku isi. Mungakayikanga cha kuti iyu “wakondwa ndi ŵanthu ŵaki” kusazgapu yimwi!