1. Kumbi mungachita wuli kuti munthu munyaki waje mubwezi winu?

KANANDI kucheze limoza ndiku kutovya kuti ŵanthu aje mabwezi. Asani mukambiskana maŵanaŵanu nginu kweniso mo muvwiya, muja mabwezi. Kweni nyengu zinyaki ntchipusu cha kuja bwezi laku Yesu. Ntchifukwa wuli ve viyo?

2. Kumbi ndi suzgu yakwamba niyi yo yingatitondekesa kuja pa ubwezi ndi Yesu?

² Suzgu yakwamba njakuti tikukumanapu cha ndi Yesu. Akhristu anandi a mu nyengu ya akutumika nawu angukumanapu nayu cha Yesu. Kweni wakutumika Peturo wangukamba kuti: “Chinanga kuti mukumuwonapu cha, mutimuyanja. Chinanga kuti mutimuwona cha sonu, kweni muvwana mwaku iyu” (1 Petu. 1:8) Mwaviyo, tingaja mabwezi ngaku Yesu chinanga kuti tikukumanapu nayu cha.

3. Kumbi ndi suzgu yachiŵi niyi yo yingatitondekesa kuja pa ubwezi ndi Yesu?

³ Suzgu yachiŵi njakuti tingakambiskana nayu cha Yesu. Asani tipemphera tilongoro ndi Yehova. Mbuneneska kuti tipemphera mu zina laku Yesu kweni tikambiskana ndi iyu cha. Ndipu Yesu wakhumba cha kuti tipempherengi kwaku iyu. Chifukwa wuli? Chifukwa asani tipemphera tisopa, ndipu Yehova pe ndiyu ngwakwenere kumusopa. (Mate. 4:10) Chinanga kuti ve viyo tingamuyanja mbwenu Yesu.

4. Kumbi ndi suzgu yachitatu niyi yo yingatitondekesa kuja pa ubwezi ndi Yesu? Nanga tikambiskanengenji mu nkhani iyi?

 ⁴ Suzgu yachitatu njakuti Yesu waja kuchanya, sonu tingacheza nayu cha. Kweni tingamuziŵa umampha Yesu kwambula kucheza nayu. Mu nkhani iyi, tikambiskanengi vinthu vinayi vo vingatiwovya kuti tilutirizgi kuja pa ubwezi wakukho ndi Yesu. Kweni chakwamba tiyeni tikambiskani umampha wa kuja pa ubwezi ndi Khristu.

5. Ntchifukwa wuli tikhumbika kuja mabwezi ngaku Yesu? (Wonani so bokosi lakuti “ Kwanja Yesu Kuchitiska Kuti Tiyanjengi Yehova” ndipuso lakuti “ Mumuwonengi Mwakwenere Yesu.”)

⁵ Asani tikhumba kuja pa ubwezi ndi Yehova, titenere kuja mabwezi ngaku Yesu. Ntchifukwa wuli tikamba viyo? Pe vifukwa viŵi. Chifukwa chakwamba, Yesu wangukambiya akusambira ŵaki kuti: “Ada atikuyanjani ukongwa chifukwa chakuti mutindiyanja ukongwa.” (Yoha. 16:27) Wangukamba so kuti: “Palivi munthu yo watuza kwa Ada kwambula kuziya mwaku ini.” (Yoha. 14:6) Vingachitika cha kuti munthu waje pa ubwezi ndi Yehova kwambula kuja pa ubwezi ndi Yesu. Chifukwa kuchita viyo, kungaŵa nge kuti munthu wasere munyumba kwambula kuselere pakhomu. Yesu wangukamba chakuyeruzgiyapu chenichi wachikamba kuti iyu ndi “khomu la mbereri.” (Yoha. 10:7) Chifukwa chachiŵi ntchakuti, Yesu we ndi mijalidu yamampha ya Awisi. Iyu wangukambiya akusambira ŵaki kuti: “Yo wawona ini, wawona so Ada.” (Yoha. 14:9) Kuti timuziŵi umampha Yehova, tikhumbika kusambira vakukwaskana ndi umoyu waku Yesu. Tingamuyanja ukongwa Yesu asani tisambira vaku iyu. Ndipu asani titimwanja ukongwa  Yesu ndikuti Awisi nawu tiŵayanjengi ukongwa.

6. Kumbi pe chifukwa so chinyaki cho tijaliya pa ubwezi ndi Yesu? Konkhoskani.

⁶ Asani tikhumba kuti Yehova wamukengi mapempheru ngidu titenere kuja pa ubwezi ndi Yesu. Tikhumbika kuchita vinandi mumalu mwakukamba ŵaka mazu ngakuti “mu zina laku Yesu” asani timaliza kupemphera. Tikhumbika kuziŵa mo Yehova wagwiriskiya ntchitu Yesu pakumuka mapempheru ngidu. Yesu wangukambiya akutumika ŵaki kuti: “Chechosi cho mungapempha mu zina langu, ndazamuchita.” (Yoha. 14:13) Chinanga kuti Yehova ndiyu watuvwa ndi kumuka mapempheru ngidu, kweni wapaska Yesu mazaza kuti wafiski khumbu Laki. (Mate. 28:18) Mwaviyo, Yehova wechendamuki mapempheru ngidu wawona dankha asani nasi tigwiriskiya ntchitu ulongozgi wo Yesu wangukamba. Mwakuyeruzgiyapu, Yesu wangukamba kuti: “Asani mugowoke ŵanthu maubudi ngawu, Awusemwi akuchanya nawu akugowokiyeningi. Kweni asani muleka kugowoke ŵanthu maubudi ngawu, Awusemwi nawu akugowokiyeningi cha maubudi nginu.” (Mate. 6:14, 15) Mwaviyo, tikhumbika kuchitiya lisungu anyidu nge mo Yehova kweniso Yesu achitiya nasi!

7. Kumbi mbayani wo ayanduwa ndi sembi yaku Yesu?

⁷ Ŵanthu wo ŵe pa ubwezi ndi Yesu ndiwu azamuyanduwa ndi sembi yaki. Kumbi tiziŵa wuli venivi? Yesu wangukamba kuti ‘wapereka umoyu waki mumalu mwa abwezi ŵaki.’ (Yoha. 15:13) Ateŵeti akugomezgeka wo ŵengaku, Yesu wechendazi pacharu chapasi, azamusambira vakukwaskana ndi iyu kweniso kumuyanja. Abrahamu, Sara, Mozesi ndi Rahabi azamuyuskika. Kweni ŵanthu arunji ŵenaŵa kuti azisaniyi umoyu wamuyaya azamukhumbika kuja pa ubwezi ndi Yesu.—Yoha. 17:3; Machi. 24:15; Ahe. 11:8-12, 24-26, 31.

8-9. Nge mo pakambiya pa Yohane 15:4, 5, ntchifukwa wuli kuja pa ubwezi ndi Yesu nkhwakukhumbika, nanga ntchifukwa wuli titenere kwanja Yesu?

⁸ Tikondwa kugwira ntchitu ndi Yesu yakupharazga ndi kusambiza uthenga wamampha wa Ufumu. Pa nyengu yo Yesu wenga pacharu chapasi wenga msambizi. Kutuliya po Yesu wakukwere kuchanya, ndi mutu wa mpingu ndipu walutirizga kulongozga pa ntchitu yakupharazga ndi kusambiza. Iyu wawonga phamphu linu lakuwovya ŵanthu anandi kuti amuziŵi kweniso kuti aziŵi Awisi. Ndipu isi tifiska ntchitu yeniyi chifukwa chakuti Yehova ndi Yesu atitiwovya.—Ŵerengani Yohane 15:4, 5.

⁹ Mazu ngaku Chiuta ngakamba mwakuvwika umampha kuti tiyanjengi Yesu kuti tikondwesi Yehova. Sonu tiyeni tikambiskani vinthu vinayi vo tingachita kuti tije mabwezi ngaku Yesu.

10. Kambani chinthu chakwamba cho tingachita kuti tije pa ubwezi ndi Yesu.

¹⁰ (1) Timuziŵengi umampha Yesu. Tingamuziŵa umampha Yesu asani tiŵerenga buku la Mateyu, Mariko, Luka ndi Yohane. Kulunguruka nkhani za mu mabuku ngenanga, kungatiwovya kuti timuyanjengi ukongwa Yesu kweniso kumutumbika chifukwa zilongo mo wachitiyanga lisungu ŵanthu. Mwakuyeruzgiyapu, chinanga kuti wenga Mbuya wa akutumika, kweni waŵatonga nge akapolu cha. Mumalu mwaki waŵakambiyanga maŵanaŵanu ngaki kweniso mo wavwiyanga. (Yoha. 15:15) Asani akusambira ŵaki apwetekeka mtima, nayu vamukwaskanga  ndipu waliyanga nawu. (Yoha. 11:32-36) Chinanga mbarwani ŵaki nawu, ajiwoniyanga ŵija kuti Yesu wayanjanga ŵanthu wo amuvwisiyanga. (Mate. 11:19) Asani tichitengi vinthu nge mo Yesu wachitiyanga ndi akusambira ŵaki, tiyanjanengi ndi anyidu kweniso tikondwengi ukongwa. Ndipu timuyanjengi ukongwa Khristu ndi kumutumbika.

11. Kambani chinthu chachiŵi cho tingachita kuti tije pa ubwezi ndi Yesu.

¹¹ (2) Muŵanaŵanengi kweniso muchitengi vinthu nge Yesu. Asani timuziŵengi umampha Yesu kweniso kuŵanaŵana nge iyu, tijengi nayu pa ubwezi wakukho. (1 Akori. 2:16) Kumbi tingamuyezga wuli Yesu? Wonani chakuyeruzgiyapu ichi. Yesu wenga ndi mtima wakovya anyaki mumalu mwakujikondwesa mweneku. (Mate. 20:28; Aro. 15:1-3) Chifukwa chakuti wenga ndi mtima wenuwu, iyu wajiperekanga kweniso wagowokiyanga ŵanthu. Yesu waguŵanga bweka cha asani ŵanthu atimunena. (Yoha. 1:46, 47) Iyu wawonanga mwakwenere ŵanthu chinanga kuti anguchitapu vinthu viheni kuvuli. (1 Timo. 1:12-14) Yesu wangukamba kuti: “Ŵanthu wosi azamuziŵa kuti ndimwi akusambira ŵangu, asani mwaŵeni mutanjana.” (Yoha. 13:35) Mungachita umampha kujifumba kuti, “Kumbi ndiyezga Yesu mwakuchita vosi vo ndingafiska kuti ndijengi mwachimangu ndi abali kweniso azichi?”

12. Kambani chinthu chachitatu cho tingachita kuti tije pa ubwezi ndi Yesu. Nanga tingachita wuli venivi?

¹² (3) Muwovyengi abali aku Khristu. Yesu wawona kuti vo tichitiya Akhristu akusankhika tichitiya iyu. (Mate. 25:34-40) Nthowa yakwamba yo titovye Akhristu akusankhika nkhugwiraku ntchitu yakupharazga uthenga wa Ufumu ndi kusambiza ŵanthu yo Yesu wangukamba. (Mate. 28:19, 20; Machi. 10:42) Akhristu akusankhika angafiska kugwira ntchitu yakupharazga yo yichitika mazuŵa nganu asani awovyeka ndi a “mbereri zinyaki.” (Yoha. 10:16) Nyengu yosi yo isi a mbereri zinyaki, tigwiraku ntchitu yakupharazga, tilongo kuti titanja akusankhika kweniso Yesu.

13. Kumbi tingagwiriskiya wuli ntchitu ulongozgi waku Yesu wo we pa Luka 16:9?

¹³ Tingaja mabwezi ngaku Yehova ndi Yesu asani tipereka ndalama kuti ziwovyi pa ntchitu yo alongozga. (Ŵerengani Luka 16:9.) Mwakuyeruzgiyapu, tingapereka ndalama kuti ziwovyi pa ntchitu ya pacharu chosi. Ndipu ndalama zenizi zitovya pa ntchitu yakupharazga uthenga wamampha ku vigaŵa vakutali, kuzenga ndi kunozga Nyumba za Ufumu pamwenga nyumba zinyaki za gulu laku Yehova. Zitovya so ŵanthu wo akwaskika ndi masoka nga chilengedu. Tingapereka so ndalama kuti ziwovyi pa mpingu widu kweniso tingagwiriskiya ntchitu ndalama zidu kuti tiwovyi anyidu wo akhumbika chovyu. (Nthanthi 19:17) Venivi ndivu tingachita kuti tiwovyi abali aku Khristu.

14. Nge mo pakambiya pa Aefeso 4:15, 16, kambani chinthu chachinayi cho tingachita kuti tije pa ubwezi ndi Yesu.

¹⁴ (4) Mukoliyanengi ndi vo gulu laku Yehova lanozga. Tija pa ubwezi wakukho ndi Yesu yo ndi mutu wa mpingu asani tivwiya ŵanthu wo wakuŵasankha kuti atilongozgengi. (Ŵerengani Aefeso 4:15, 16.) Mwakuyeruzgiyapu, sonu tiwonesesa kuti Nyumba za Ufumu zosi zigwira ntchitu mwakukwana. Ndichu chifukwa chaki mipingu yinyaki akuyibanya ndipu mphaka za vigaŵa vakupharazgaku zikusintha. Venivi vawovya kuti tileki kusakaza ndalama za gulu laku Yehova. Kweni chifukwa cha venivi apharazgi anyaki  asintha vinthu vinyaki kuti akoliyani ndi gulu laku Yehova. Abali ndi azichi ŵenaŵa ateŵete kwa vyaka vinandi mu mipingu yo anguyiziŵiriya ndipu ayanjananga ukongwa ndi abali kweniso azichi a mu mipingu yo. Kweni sonu apempheka kuti akawunganengi ku mipingu yinyaki. Yesu watenere kuti wakondwa ukongwa kuwona kuti abali ndi azichi ŵenaŵa akoliyana ndi vo gulu laku Yehova lanozga!

15. Kumbi ubwezi widu ndi Yesu wazamukuŵa wuli kunthazi?

¹⁵ Akhristu akusankhika alindizga kuchilamuliya limoza ndi Yesu mu Ufumu waku Chiuta. Yiwu amujanga ndi Khristu, akumuwonanga, amulongoronga nayu ndipuso amuchezanga nayu. (Yoha. 14:2, 3) Akhristu wo azamuja pacharu chapasi nawu, Yesu wazakuŵayanja ndi kuŵaphwere. Chinanga kuti azakumuwona cha, kweni azamulutirizga kuja mabwezi ngaku Yesu ndipu azamukondwa ndi umoyu wo Yehova kweniso Yesu waŵanozge.—Yesa. 9:6, 7.

16. Kumbi titumbikika wuli chifukwa chakuja mabwezi ngaku Yesu?

¹⁶ Asani tizomera kuja mabwezi ngaku Yesu titumbikika ukongwa. Mwakuyeruzgiyapu, pasonu panu tiyanduwa chifukwa chakuti watitiyanja kweniso watitiwovya. Te ndi mwaŵi wakuzija ndi umoyu wamuyaya. Chakukhumbika ukongwa ntchakuti ubwezi widu ndi Yesu utitiwovya kuja pa ubwezi wapachanya ukongwa ndi Yehova wo Mbawisi. Ndi mwaŵi ukulu ukongwa kuja mabwezi ngaku Yesu!