NKHANI YAKUSAMBIRA YA NAMBALA 19
Lutirizgani Kugomezga Ukongwa Layizgu Laku Yehova la Charu Chifya
“Asani [Yehova] wakamba chinthu, kumbi watondeka kuchichita?”—NUME. 23:19.
SUMU 142 Tikolesi Mwanthazi Vinthu vo Tilindiza
VO TISAMBIRENGI MU NKHANI IYI a
1-2. Kumbi tikhumbika kuchitanji tichilindizga charu chifya?
TIWONGA ukongwa kuti Yehova walayizga kuti watuzgengepu charu chiheni ichi ndipu charu chifya chazamusere mumalu mwaki. (2 Petu. 3:13) Chinanga kuti tiziŵa cha kuti charu chifya chizengi zukwanji, kweni vinthu vo vichitika pacharu chapasi mazuŵa nganu vilongo kuti che pafupi ukongwa.—Mate. 24:32-34, 36; Machi. 1:7.
2 Kwali taja mu uneneska kwa nyengu yitali wuli, tosi tikhumbika kulutirizga kugomezga ukongwa layizgu lenili. Chifukwa wuli? Chifukwa chinanga ndi munthu yo we ndi chivwanu chakukho wangawere vuli. Ndipu wakutumika Paulo wangukamba kuti kuŵavi chivwanu, ‘mbubudi wo utitiwonja mwambula kusuzga.’ (Ahe. 12:1) Kuti chivwanu chidu chileki kudewezeka, kanandi tikhumbika kuŵanaŵaniya ukaboni wo ulongo kuti charu chifya chizengi nadi.—Ahe. 11:1.
3. Kumbi tikambiskanengenji mu nkhani iyi?
3 Mu nkhani iyi, tikambiskanengi nthowa zitatu zo zingatiwovya kuti tigomezgengi ukongwa layizgu laku Yehova la charu chifya, (1) tiŵanaŵaniyengi sembi yaku Yesu, (2) tiŵanaŵaniyengi nthazi zaku Yehova kweniso (3) tijitangwamisengi ndi vinthu vauzimu. Pavuli paki, tikambiskanengi mo uthenga wo Yehova wangukambiya Habakuku ungatiwovye kuti tije ndi chivwanu chakukho mazuŵa nganu. Kweni chakwamba, tiyeni tikambiskani vinthu vinyaki vo tingakumana navu pasonu panu vo tingakhumbika kuti tilongo kuti tigomezga ukongwa layizgu la charu chifya.
KUMBI MPHA NYENGU NIYI PO TINGAKHUMBIKA CHIVWANU CHAKUKHO?
4. Kumbi ndi vinthu nivi vo tingasankha vo tingakhumbika kuja ndi chivwanu chakukho?
4 Zuŵa lelosi tikhumbika kuja ndi chivwanu chakukho kuti tisankhi umampha vinthu pa umoyu widu. Mwakuyeruzgiyapu, tikhumbika kusankha umampha ŵanthu akucheza nawu, vakusangaluska, masambiru, nthengwa, kubala ŵana kweniso ntchitu. Tingachita umampha kujifumba kuti: ‘Kumbi vo ndisankha, vilongo kuti ndigomezga kuti charu ichi chituwengepu pambula kuswera yapa ndipu charu chifya chaku Chiuta chiserengi mumalu mwaki? Pamwenga ndichita vinthu nge ŵanthu wo agomezga kuti kulivi so umoyu unyaki?’ (Mate. 6:19, 20; Luka 12:16-21) Mwaviyo, asani te ndi chivwanu chakukho kuti charu chifya che pafupi ukongwa, tisankhengi umampha vinthu.
5-6. Ntchifukwa wuli tikhumbika kuja ndi chivwanu chakukho asani tikumana ndi mayeseru? Kambani chakuyeruzgiyapu.
5 Tikumana so ndi mayeseru ngo tingakhumbika chivwanu chakukho kuti tikunthiyepu. Tingatombozgeka, tingatama matenda ngakulu pamwenga tingakumana ndi vinthu vinyaki vo vingachitiska kuti tiwere vuli. Pakwamba, tingawona kuti tingafiska kukunthiyapu suzgu lo. Kweni asani mayeseru ngo ngalutiriya, tingakhumbika chivwanu chakukho kuti tikunthiyepu kweniso kuti tilutirizgi kuteŵete Yehova mwalikondwa.—Aro. 12:12; 1 Petu. 1:6, 7.
6 Pa nyengu yo tikumana ndi mayeseru tingawona nge kuti charu chifya chizengi cha. Kumbi venivi ving’anamuwa kuti chivwanu chidu ntchimana? Ndimu viliri cha. Tiyeni tikambiskani chakuyeruzgiyapu ichi. Asani ndi nyengu ya chipwepwi ndipu kuzizira ukongwa, tingawona nge kuti chihanya chizengi cha. Kweni chihanya chituza mbwenu. Mwakuyanana ŵaka, asani masuzgu ngatigundiza, tingawona nge kuti charu chifya chizengi cha. Kweni asani te ndi chivwanu chakukho, tiziŵa kuti malayizgu ngaku Chiuta ngazamufiskika nadi. (Salimo 94:3, 14, 15; Ahe. 6:17-19) Asani te ndi chivwanu chaviyo, tilutirizgengi kuŵika mtima widu wosi pakuteŵete Yehova kuphara chinthu chinyaki chechosi.
7. Kumbi ndi maŵanaŵanu nanga ngo tikhumbika cha kuja nangu?
7 Tikhumbika so chivwanu chakukho kuti tifiski kupharazga. Ŵanthu anandi wo titiŵapharazgiya akamba kuti “uthenga wamampha” wakukwaskana ndi charu chifya chaku Chiuta cho chituza, wazamufiskika cha. (Mate. 24:14; Ezeki. 33:32) Mwakupambana ndi ŵanthu ŵenaŵa, tikhumbika cha kukayikiya vinthu vo Yehova watitisambiza. Kuti venivi vileki kutichitikiya, tikhumbika kulutirizga kukholesa chivwanu chidu. Tiyeni tikambiskani nthowa zitatu zo tingachitiya venivi.
MUŴANAŴANIYENGI SEMBI YAKU YESU
8-9. Kumbi kuŵanaŵaniya sembi yaku Yesu kungatiwovya wuli kuti tije ndi chivwanu chakukho?
8 Nthowa yakwamba yo tingakholeske chivwanu chidu, nkhuŵanaŵaniya sembi yaku Yesu. Sembi yaku Yesu yititisimikiziya kuti vo Chiuta wakulayizga vazamufiskika. Asani tiŵanaŵaniya chifukwa cho sembi yikuperekeke kweniso mtengu wo Yehova wakupereka, vititiwovya kugomezga kuti layizgu laku Chiuta lakuti tazamuja ndi umoyu wambula kumala mucharu chifya lazamufiskika nadi. Ntchifukwa wuli tikamba viyo?
9 Kumbi sembi yaku Yesu njakuzirwa wuli? Yehova wangutuma Mwana waki wakwamba, yo wenga bwezi laki la pamtima kutuwa kuchanya ndi kuza pacharu kuziwaku nge munthu wakufikapu. Pa nyengu yo wenga pacharu chapasi, Yesu wangukunthiyapu masuzgu nganandi. Pavuli paki, iyu wangusuzgika ndi kufwa nyifwa yakuŵaŵa ukongwa. Sembi yaku Yesu yo Yehova wangupereka, njakudula ukongwa! Chiuta widu wachanju watingi wazomerengi cha kuti Mwana waki wasuzgiki ndi kufwa kuti isi tizije ndi umoyu wamampha kwa kanyengu kamanavi ŵaka. (Yoha. 3:16; 1 Petu. 1:18, 19) Chifukwa chakuti Yehova wangupereka Mwana waki wapade kuti watiwovyi, Iyu wazamuwonesesa kuti tizije kwamuyaya mucharu chifya.
MUŴANAŴANIYENGI NTHAZI ZAKU YEHOVA
10. Mwakukoliyana ndi Aefeso 3:20, kumbi Yehova wangafiska kuchitanji?
10 Nthowa yachiŵi yo tingakholese chivwanu chidu, nkhuŵanaŵaniya nthazi zaku Yehova. Iyu we ndi nthazi zakufiskiya chechosi cho wakulayizga kuti wachitengi. Mazuŵa nganu ŵanthu anandi awona kuti vingazichitika cha kuti ŵanthu azije ndi umoyu wamuyaya mucharu chifya. Kweni kanandi Yehova walayizga vinthu vakuti ŵanthu angavifiska cha kuchita. Iyu wangachita venivi chifukwa ndi Chiuta Wanthazizosi. (Yobu 42:2; Mariko 10:27) Mwaviyo, tizizwa cha asani watitilayizga vinthu vo ŵanthu awona kuti vingachitika cha.—Ŵerengani Aefeso 3:20.
11. Kambani chakuwoniyapu cha malayizgu ngo Chiuta wangufiska. (Wonani bokosi lakuti, “ Malayizgu Nganyaki Ngo Ngangufiskika.”)
11 Tiyeni tikambiskani vinthu vinyaki vo Yehova wanguchitiya ŵanthu mu nyengu yakali, vo vawonekanga kuti vingachitika cha. Iyu wangukambiya Abrahamu ndi Sara kuti abalengi mwana pa nyengu yo ŵenga akukota. (Gene. 17:15-17) Wangukambiya so Abrahamu kuti mphapu yaki yazamupaskika charu cha Kanani. Kwa vyaka vinandi, Ayisirayeli wo ŵenga mphapu yaku Abrahamu ŵenga ku ukapolu ku Ijipiti. Pa nyengu iyi vawonekanga nge kuti layizgu lenili lazamufiskika cha. Kweni Yehova wangufiska vo wangulayizga. Pavuli paki, Yehova wangukamba kuti Elizabeti yo wenga wakukota wabalengi mwana. Yehova wangukambiya so Mariya yo wenga mwali kuti wabalengi Mwana. Ndipu venivi vatingi vifiskengi vo Yehova wangulayizga vyaka masawuzandi nganandi kuvuli ko mumunda wa Edeni.—Gene. 3:15.
12. Kumbi lemba la Yoswa 23:14 ndipuso la Yesaya 55:10, 11 ngatitiwovya wuli kusimikiza kuti Yehova we ndi nthazi?
12 Asani tiŵanaŵaniya malayizgu ngosi ngaku Yehova kweniso mo wangungafiskiya, tivwisa nthazi zikulu zo wenazu. Venivi vitiwovyengi kuti tigomezgengi ukongwa kuti charu chifya chizengi nadi. (Ŵerengani Yoswa 23:14; Yesaya 55:10, 11.) Ndipu kugomezga venivi kutitiwovya kuti tiwovyengi ŵanthu anyaki kuziŵa kuti charu chifya cho tilindizga ndi malotu ŵaka cha pamwenga nthanu. Yehova ndiyu wakukamba kuti kuŵengi kuchanya kufya ndi charu chapasi chifya ndipu “mazu yanga ngakugomezgeka ndipuso ngauneneska.”—Chivu. 21:1, 5.
MUJITANGWANISENGI NDI VINTHU VAUZIMU
MAUNGANU NGA MPINGU
Kumbi maunganu nga mpingu ngangakholesa wuli chivwanu chinu? (Wonani ndimi 13)
13. Kumbi maunganu nga mpingu ngangatiwovya wuli kuja ndi chivwanu chakukho? Konkhoskani.
13 Nthowa yachitatu yo yingatiwovya kuti tije ndi chivwanu chakukho nkhuchita vinthu vauzimu. Tiyeni tiwoni mo tiyanduliya ndi maunganu ngidu nga mpingu. Anna yo wachita mauteŵeti ngakupambanapambana kwa vyaka vinandi, wangukamba kuti: “Maunganu ngatindiwovya kuja ndi chivwanu chakukho. Chinanga kuti yo wakamba nkhani wangaja kuti walivi lusu ukongwa pakukamba nkhani pamwenga vosi vo wakamba nditiviziŵa kali, kweni ndisaniya mbwenu chinthu chinyaki cho chitindiwovya kulivwisa umampha Bayibolu ndipu venivi vikholesa chivwanu changu.” b Ndipuso tikayika cha kuti chivwanu chidu chikho ukongwa chifukwa cha ndemanga zo abali ndi azichi apereka pa maunganu.—Aro. 1:11, 12; 10:17.
KUPHARAZGA
Kumbi kupharazga kungakholesa wuli chivwanu chinu? (Onani ndimi 14)
14. Kumbi kupharazga kutitiwovya wuli kukholesa chivwanu chidu?
14 Tikholesa so chivwanu chidu asani tipharazga. (Ahe. 10:23) Barbara yo wateŵete Yehova kwa vyaka vakujumpha 70 wangukamba kuti: “Nyengu zosi ndiwona kuti ntchitu yakupharazga yitindiwovya kuja ndi chivwanu chakukho. Asani ndikambiya ŵanthu vakukwaskana ndi malayizgu ngamampha ngo Yehova watilayizga, nani chivwanu changu chikho ukongwa.”
KUSAMBIRA BAYIBOLU PAKUTIJA
Kumbi kusambira Bayibolu pakumwija kungakholesa wuli chivwanu chinu? (Wonani ndimi 15)
15. Kumbi kusambira Bayibolu pakutija kutitiwovya wuli kuja ndi chivwanu chakukho? (Wonani so chithuzi.)
15 Pe so chinthu chinyaki cho chititiwovya kuja ndi chivwanu chakukho, kusambira Bayibolu pakutija. Susan wawona kuti kuja ndi ndondomeku yakusambiriya pakuyija kutimuwovya ukongwa. Iyu wangukamba kuti: “Pa Sabata, ndinozgeke Chigongwi cha Mlinda cho tamusambira sabata yamawa. Pa Mandi ndi pa Chiwi, ndinozgeke maunganu nga mkati mwa sabata penipo mazuŵa nganyaki ngo ngajaku, ndipatuwa nyengu yakusambira Bayibolu pakundija.” Chifukwa chakuti nyengu zosi walondo ndondomeku yaki yakusambiriya, Susan walutirizga kukholesa chivwanu chaki. Irene yo wateŵete ku likulu lidu kwa vyaka vinandi wangukamba kuti chivwanu chaki chikho ukongwa asani wasambira mauchimi nga mu Bayibolu. Iyu wangukamba kuti: “Ndikondwa ukongwa kuwona kuti mauchimi ngaku Yehova ngafiskika ndendende kusazgapu tinthu timanatimana to tingukambika mu uchimi wo.” c
“CHIZENGI KWAMBULA KUTONDEKA”
16. Ntchifukwa wuli vo Yehova wangulayizga Habakuku vititikwaska mazuŵa nganu? (Aheberi 10:36, 37)
16 Ateŵeti aku Yehova anandi aja achilindizga umaliru wa charu chiheni ichi kwa nyengu yitali. Ŵanthu angawona kuti Chiuta waswera kufiska vo wakulayizga. Kweni Yehova waziŵa mo ateŵeti ŵaki avwiya. Ndipu iyu wangusimikiziya mchimi Habakuku kuti: “Pakuti chiwona chilindizga nyengu yaki yakuŵikika, chitchimbiriya ku umaliru waki, ndipu chitondekengi cha. Chinanga kuti chingaswera, lutirizga kuchilindizga! Pakuti chizengi kwambula kutondeka. Chiswerengi cha!” (Haba. 2:3) Kumbi vo Chiuta wangukamba pa lemba ili vakwaskanga Habakuku pe? Pamwenga nasi vititikwaska mazuŵa nganu? Yehova wangukambiya wakutumika Paulo kuti wakambiyi Akhristu wo alindizga charu chifya mazu ngenanga. (Ŵerengani Aheberi 10:36, 37.) Mwaviyo, tingasimikiza kuti layizgu laku Yehova lakuti wazakutitaska lazamufiskika nadi chinanga kuti lingawoneka kuti liswera. Ndipu layizgu lenili ‘lizengi kwambula kutondeka. Liswerengi cha!’
17. Kumbi mzichi munyaki wangugwiriskiya wuli ntchitu ulongozgi wo Yehova wangupereka kwaku Habakuku?
17 Ateŵeti aku Yehova anandi agwiriskiya ntchitu ulongozgi waku Yehova wakuti ‘alutirizgi kulindizga.’ Ndipu achita venivi kwa vyaka vinandi. Mwakuyeruzgiyapu, Mzichi Louise wangwamba kuteŵete Yehova mu 1939. Iyu wangukamba kuti: “Pa nyengu yo, ndaŵanaŵananga kuti Aramagedoni yizengi ndechendamalizi masambiru ngangu nga ku sekondale. Kweni venivi vikuchitika cha. Kwa vyaka vinandi ndaja ndichiŵerenga nkhani za ŵanthu wo angulindizga kuti Yehova wafiski malayizgu ngaki. Ndipu nkhani zenizi zandiwovya kuti nani ndilindizgengi Yehova kuti wafiski malayizgu ngaki. Ndiŵerenga nkhani yaku Nowa, Abrahamu, Yosefi ndi ŵanthu anyaki wo angulindizga kwa nyengu yitali kuti alonde vo Yehova wanguŵalayizga. Kulutirizga kulindizga kwawovya ini kweniso ŵanthu anyaki kuti tigomezgengi ukongwa kuti charu chifya che pafupi ukongwa.” Ŵanthu anandi wo ateŵete Yehova mwakugomezgeka nawu akoliyana ndi fundu yeniyi!
18. Kumbi kuwona vinthu vo Yehova wakulenga kungatiwovya wuli kuti tigomezgengi kuti charu chifya chazamuŵaku nadi?
18 Mbuneneska kuti charu chifya chechendazi. Kweni ŵanaŵaniyani vinthu vinyaki vo vilipu nge nyenyezi, vimiti, vinyama kweniso ŵanthu anyinu. Palivi yo wangakayika kuti vosi venivi viliku nadi chinanga kuti pakwamba kwengavi. Vinthu ivi viliku chifukwa chakuti Yehova wakuvilenga. (Gene. 1:1, 26, 27) Chiuta widu walayizga so kuti wazamupanga charu chifya. Iyu wazamufiska layizgu lenili. Mucharu chifya ŵanthu azamukondwa ndi umoyu wamuyaya kwambula kutama. Mwaviyo, tisimikiza kuti charu chifya chazamuŵaku nadi pa nyengu yo Chiuta wakusankha.—Yesa. 65:17; Chivu. 21:3, 4.
19. Kumbi mungakholesa wuli chivwanu chinu?
19 Pasonu panu, muchitengi vosi vo mungafiska kuti mukholesi chivwanu chinu. Nyengu zosi muwongengi sembi yaku Yesu yo Yehova wakupereka. Muŵanaŵaniyengi nthazi zaku Yehova. Mujitangwamisengi ndi vinthu vauzimu. Asani mwachita venivi, muŵengi mu gulu la ŵanthu wo “kuporote mu chivwanu ndi kuzikira, alonde vo Chiuta wakulayizga.”—Ahe. 6:11, 12; Aro. 5:5.
SUMU 139 Yeruzgiyani Kuti Mwe Mucharu Chifya
a Ŵanthu anandi mazuŵa nganu agomezga cha layizgu la mu Bayibolu la charu chifya. Yiwu aŵanaŵana kuti ndi nthanu ŵaka pamwenga malotu. Kweni isi tigomezga kuti malayizgu ngosi ngaku Yehova ngazamufiskika. Chinanga kuti ve viyo, kuti tigomezgengi venivi, tikhumbika kulutirizga kukholesa chivwanu chidu. Kumbi tingachikholesa wuli? Nkhani iyi yikonkhoskengi mo tingachitiya venivi.
b Mazina nganyaki ngasinthika.
c Nkhani zinandi zakukwaskana ndi mauchimi nga mu Bayibolu mungazisaniya mu Kabuku Kakufufuziya Nkhani ka Akaboni aku Yehova pa kamutu kakuti “Uchimi.” Mwakuyeruzgiyapu wonani nkhani yamutu wakuti “Zimene Yehova Amalosera Zimakwaniritsidwa” mu Chigongwi cha Mlinda cha Chichewa cha January 1, 2008.
