Kumbi Muziŵa?
Ntchifukwa wuli ŵanthu wo ŵenga Ayisirayeli cha anguja asilikali a Fumu Davidi?
PA GULU la asilikali aku Davidi penga ŵanthu wo ŵenga Ayisirayeli cha nge Zeleki Muamoni, Uriya Mhiti ndi Itima wa ku Mowabu. a (1 Mbiri 11:39, 41, 46) Pa asilikali ŵenaŵa penga so ‘Akereti, Apeleti kweniso Agiti.’ (2 Samu. 15:18) Viwoneka kuti Akereti ndi Apeleti ŵenga abali ŵa Afilisiti. (Ezeki. 25:16) Ndipu kwawu kwa Agiti kwenga ku Gati yo yenga tawuni ya Afilisiti.—Yoswa 13:2, 3; 1 Samu. 6:17, 18.
Ntchifukwa wuli Davidi wanguzomereza kuti ŵanthu a mitundu yinyaki aje mu gulu la asilikali ŵaki? Iyu wangusimikiza kuti ŵenga akugomezgeka ukongwa kwaku Yehova kweniso kwaku iyu. Mwakuyeruzgiyapu, pakukamba va Akereti ndipuso Apeleti buku linyaki likamba kuti: “Yiwu angulutirizga kuja akugomezgeka kwaku Davidi pa nyengu yo vinthu venga vakusuzga ukongwa mu ulamuliru waki.” (The New Interpreter’s Dictionary of the Bible) Kumbi yiwu anguchita wuli venivi? Nyengu yinyaki, “ŵanthu wosi a ku Isirayeli” anguyileka Fumu Davidi ndi kwamba kulondo “munthu munyaki wakutimbanyizga yo wadanikanga kuti Sheba.” Kweni Akereti ndi Apeleti angulutirizga kuja akugomezgeka kwaku Davidi ndipuso anguwovya kutondekesa vo Sheba wangunozga kuti wagarukiyi Davidi. (2 Samu. 20:1, 2, 7) Ndipu nyengu yinyaki, Adoniya yo wenga mwana wa Fumu Davidi wakhumbanga kuphanga ufumu wa awisi. Kweni Akereti ndipuso Apeleti angulutirizga kuja akugomezgeka kwaku Davidi kweniso anguwovya kuti Solomoni waje fumu chifukwa ndiyu Yehova wangusankha kuti wahari ufumu wa awisi.—1 Mafu. 1:24-27, 38, 39.
Munthu munyaki yo wenga Myisirayeli cha, yo wenga wakugomezgeka ukongwa kwaku Davidi wenga Itayi Mgiti. Itayi ndi asilikali ŵaki 600 anguwovya Fumu Davidi pa nyengu yo mwana waki Abisalomu wangumugarukiya kweniso kuchitiska kuti Ayisirayeli agarukiyi fumu. Pakwamba Davidi wangukambiya Itayi kuti pakuti wenga Myisirayeli cha, wakhumbikanga cha kumuwovya pankhondu. Kweni Itayi wangukamba kuti: “Ndilapizga mu zina laku Yehova Chiuta wamoyu kweniso nge mo yimwi ambuya fumu yangu muliri amoyu kuti kwekosi ko yimwi ambuya fumu yangu mujengi, kwali mpha nyifwa pamwenga pa umoyu, ini ndamteŵeti winu ndijengi kweniko!”—2 Samu. 15:6, 18-21.
Itayi wenga wakugomezgeka kwaku Davidi, yo wenga fumu yakusankhika ndi Yehova
Chinanga kuti Akereti, Apeleti ndipuso Agiti ŵenga Ayisirayeli cha, kweni yiwu aziŵanga kuti Yehova ndiyu Chiuta wauneneska kweniso kuti Davidi wangusankhika ndi Yehova. Davidi watenere kuti wanguwonga ukongwa kuti anthulumi akugomezgeka ŵenaŵa aje ku chigaŵa chaki!
a Dangu laku Chiuta lo lisanirika pa Dotoronome 23:3-6 lakanizanga Aamoni ndipuso Amowabu kusere mu mpingu wa Ayisirayeli. Chinanga kuti ve viyo, viwoneka kuti dangu ili lakanizanga kuti munthu wa mtundu unyaki waje Myisirayeli mwadangu kweni lakanizanga cha kuti ŵanthu a mitundu yinyaki achitengi vinthu limoza ndi Ayisirayeli ndipuso kuja ndi ŵanthu aku Chiuta. Wonani buku la Insight on the Scriptures, Volume 1, peji 95.
