1. Ntchifukwa wuli Yehova wangulenga angelu kweniso ŵanthu?

NYENGU yinyaki Yehova wenga yija. Kweni wachitanga phukwa cha. Iyu wakhumbikanga munthu weyosi cha kuti wakondwengi. Chinanga kuti venga viyo, Chiuta wangulenga angelu kweniso ŵanthu kuti akondwengi. Ndipu chifukwa cha chanju, Yehova wangwamba kulenga vinthu.—Sumu 36:9; 1 Yoha. 4:19.

2. Kumbi Yesu ndi angelu anguvwa wuli Yehova wachilenga vinthu?

² Pakwamba Yehova wangulenga Yesu. Pavuli paki, kuporote mu Mwana waki, ‘vinthu vinyaki vosi vingulengeka’ kusazgapu angelu anandi. (Ako. 1:16) Yesu wakondwanga kugwira ntchitu ndi Awisi. (Nthanthi 8:30) Angelu nawu akondwanga. Yiwu ŵengaku pa nyengu yo Yehova ndi Mumisili waki Yesu, alenganga kuchanya ndi charu chapasi. Kumbi angelu anguchita wuli? Yiwu “angwamba kudaniriza mwalikondwa” charu chichipangika ndipu angulutirizga kuthamika Chiuta pa nyengu yo vinthu vosi vapangikanga. Ndipu angukondwa ukongwa Chiuta wachilenga ŵanthu. (Jobu 38:7; Nthanthi 8:31) Vosi vo Yehova wakulenga vilongo kuti ngwachanju kweniso ngwazeru.—Sumu 104:24; Aro. 1:20.

3. Nge mo pakambiya pa 1 Akorinto 15:21, 22, kumbi sembi yaku Yesu njakovya wuli?

³ Yehova wakhumbanga kuti ŵanthu ajengi kwamuyaya pacharu chapasi chamampha cho wangupanga. Adamu ndi Heva ŵati agarukiya Awisewu achanju, ubudi ndi nyifwa vingusapaliya ku ŵanthu wosi. (Aro. 5:12) Kumbi Yehova wanguchitanji? Nyengu yeniyo, wangukamba nthowa yakutaskiya ŵanthu. (Chiya. 3:15) Yehova wanguwona kuti wapereki sembi mwana waki Yesu, kuti ŵana aku Adamu ndi Heva afwatuliki ku  ubudi ndi nyifwa. Chifukwa cha sembi yeniyi, munthu wangasankha kuteŵete Yehova ndipuso kuzilonde umoyu wamuyaya.—Yoha. 3:16; Aro. 6:23; ŵerengani 1 Akorinto 15:21, 22.

4. Kumbi tikambiskanengi mafumbu nanga mu nkhani iyi?

⁴ Vo Chiuta wakulayizga kuti wazamuyuska ŵanthu vichitiska kuti pabuki mafumbu nganandi. Mwakuyeruzgiyapu, kumbi ŵanthu azamuyuskika wuli? Kumbi tazakuŵaŵanika abali ŵidu wo azamuyuskika? Kumbi ndi vinthu wuli vo vazakutikondwesa pa nyengu ya chiyuka? Kumbi chiyuka chingatiwovya wuli kuwonga mijalidu yaku Yehova nge chanju, zeru kweniso kuzikira? Tiyeni tikambiskani mafumbu ngenanga.

5. Ntchifukwa wuli tigomezga kuti ŵanthu azamuyuskika mwandondomeku?

⁵ Pa nyengu yo Yehova wazamugwiriskiya ntchitu Mwana waki kuyuska ŵanthu anandi, tingakhazanga kuti wosi azamuyuskika nyengu yimoza cha. Chifukwa wuli? Chifukwa asani wosi angaziyuskika nyengu yimoza, ndikuti pacharu pazamukuŵa chimtimbaheka. Kumbukani kuti Yehova wachita vinthu mwandondomeku. Iyu waziŵa kuti vinthu vikhumbika kuchitika umamphaumampha kuti ŵanthu aje mwachimangu. (1 Akori. 14:33) Yehova Chiuta wanguchita vinthu mwazeru kweniso mwakuzikira pa nyengu yo wagwiranga ntchitu ndi Yesu yakupanga charu kamanakamana, wechendapangi ŵanthu. Yesu nayu wazamuchita vinthu mwazeru kweniso mwakuzikira mu Ulamuliru wa Vyaka 1,000. Pa nyengu yeniyi, wazamugwira ntchitu yakunozga charu ndi ŵanthu wo azamutaskika pa Aramagedoni kuti ŵanthu wo azamuyuskika azisaniyi pakufikiya.

6. Mwakukoliyana ndi Machitidu 24:15, kumbi ŵanthu anyaki wo azamuyuskika ndi Yehova mbayani?

⁶ Chakukhumbika ukongwa ntchakuti ŵanthu wo azamupona pa Aramagedoni  azamusambiza ŵanthu wo azamuyuskika vakukwaskana ndi Ufumu waku Chiuta kweniso marangu ngaki. Chifukwa wuli? Chifukwa anandi mwa ŵanthu wo azamuyuskika azamukuŵa “ambula urunji.” (Ŵerengani Machitidu 24:15.) Ŵanthu ŵenaŵa azamukhumbika kusintha vinandi kuti azilonde vitumbiku chifukwa cha sembi yaku Khristu kweniso kuja ndi umoyu wamuyaya. Kwazamukuŵa ntchitu yikulu yakusambiza ŵanthu mamiliyoni nganandi wo ŵechendavwepu vakukwaskana ndi Yehova. Kumbi munthu weyosi wazamuja ndi msambizi waki nge mo tichitiya mazuŵa nganu asani tichitiska sambiru la Bayibolu? Kumbi ŵanthu akuyuskika ŵenaŵa wo azamusambizika, azamupaskika mipingu kweniso kusambizika kuti azisambizengi anyawu wo azamuyuskika pavuli paki? Tiyeni tilindizgi kuti tiziwoni. Kweni vo tiziŵa vakuti kukumaliya kwa Ulamuliru wa Vyaka 1,000 waku Khristu, “charu chapasi chazamuzaza ndi kuziŵa Yehova.” (Yesa. 11:9) Tazamukondwa kugwira ntchitu yeniyi kwa vyaka 1,000.

7. Ntchifukwa wuli ŵanthu aku Chiuta azamukhumbika kuchita vinthu mwalisungu pakusambiza ŵanthu wo azamuyuskika?

⁷ Mu Ulamuliru wa Vyaka 1,000 waku Khristu, ŵanthu wosi aku Yehova azamulutirizga kusintha kuti akondwesi mtima waki. Yiwu azamuchitanga vinthu mwalisungu pakuwovya ŵanthu wo azamuyuskika kuti asinthi makhumbiru ndi maŵanaŵanu ngaheni, kweniso kuti achitengi vinthu mwakukoliyana ndi marangu ngaku Yehova. (1 Petu. 3:8) Wosi wo azamuyuskika azamuwona kuti ŵanthu aku Yehova mbakujiyuyuwa kweniso alutirizga kusintha nkharu zawu kuti akondwesi Yehova. Ndipu ŵanthu wo azamuyuskika azamukhumba kuteŵete nawu limoza Yehova.—Afi. 2:12.

8. Ntchifukwa wuli tingakamba kuti tazakuŵaziŵa abali ŵidu kweniso anyidu wo azamuyuskika?

⁸ Pe vifukwa vinandi vo tingakambiya kuti abali ŵidu wo azamuyuskika tazakuŵaziŵa. Mwakuyeruzgiyapu, mwakukoliyana ndi mo Yehova wanguchitiya pakuyuska ŵanthu mu nyengu yakali, ŵanthu azamuyuskika nge mo ŵenge pakwamba ŵechendafwi. Yiwu azamuŵanaŵana, kulongoro kweniso kuwoneka nge mo ŵenge, kwaja kamanavi kuti ŵafwi. Kumbukani kuti Yesu wanguyeruzgiya nyifwa ndi tulu ndipuso wanguyeruzgiya chiyuka ndi kuyuskika ku tulu. (Mate. 9:18, 24; Yoha. 11:11-13) Asani munthu wayuka ku tulu chayitu, wawoneka, kulongoro kweniso kukumbuka vinthu nge mo wachitiyanga wechendagoni. Kumbukani vo vinguchitikiya Lazaro. Iyu wanguja mumuwunda kwa mazuŵa nganayi mwakuti liŵavu laki lingwamba kuvunda. Kweni Yesu wati wamuyuska, azichi ŵaki angumuziŵa nyengu yeniyo ndipu Lazaro nayu wanguŵaziŵa.—Yoha. 11:38-44; 12:1, 2.

9. Ntchifukwa wuli ŵanthu wo azamuyuskika azamuyuka akufikapu cha?

⁹ Yehova wakulayizga kuti mu Paradayisu palivi munthu yo wazamukamba kuti: “Ndatama.” (Yesa. 33:24; Aro. 6:7) Mwaviyo, ŵanthu wo azamuyuskika azamuja ndi maliŵavu ngamampha. Kweni azamuja ŵanthu akufikapu nyengu yeniyo cha. Chifukwa asani vingazija viyo, mbwenu abali ŵawu kweniso anyawu azakuŵaŵanika cha. Ŵanthu wosi azamuja akufikapu kamanakamana mu Ulamuliru wa Vyaka 1,000 waku Khristu. Asani vyaka 1,000 vazimala, Yesu wazamuweze Ufumu kwa Awisi. Pa nyengu yo, Ufumu waku Chiuta wamukuŵa kuti wafiska khumbu laku Yehova kusazgapu kuwovya ŵanthu kuja akufikapu.—1 Akori. 15:24-28; Chivu. 20:1-3.

10. Kumbi mwazamukuvwa wuli chifukwa cha chiyuka?

¹⁰ Vazamuja vakukondwesa ukongwa kulondere abali ŵidu kweniso anyidu wo azamuyuskika. Kumbi mwazamusekere pamwenga kuliya chifukwa cha likondwa? Kumbi mwazamuzaya kumba sumu zakuthamika Yehova? Tikayika cha kuti mwazakuŵayanja ukongwa Awusefwi achanju kweniso Mwana wawu Yesu Khristu wo azamuyuska ŵanthu akufwa.

11. Mwakukoliyana ndi mazu ngo Yesu wangukamba pa Yohane 5:28, 29, kumbi ntchinthu wuli cho chazamuchitikiya ŵanthu wo azamuvwiya Chiuta?

¹¹ Ŵanthu wo azamuyuskika azamukondwa ukongwa kuzuwa umunthu wawu wakali ndi kwamba kuchita vinthu mwakukoliyana ndi khumbu laku Chiuta. Ndipu wo azamusintha azamuja ndi umoyu wamuyaya mu Paradayisu. Kweni Chiuta wazamuzomereza cha kuti ŵanthu wo azamukana kusintha nkharu zawu ziheni aje mu Paradayisu kweniso kuti azitimbanyizgi chimangu mucharu chenichi.—Yesa. 65:20; ŵerengani Yohane 5:28, 29.

12. Kumbi Yehova wazakuŵatumbika wuli ŵanthu wosi wo azamuja pacharu chapasi?

¹² Mu Ufumu waku Chiuta, ŵanthu ŵaki wosi azamuwona kufiskika kwa lemba la Nthanthi 10:22. Lemba ili likamba kuti: “Vitumbiku vaku Yehova ndivu vichitiska kuti munthu wakhupuki, ndipu Iyu wasazgiyapu urwirwi cha.” Mwakuwovyeka ndi mzimu wakupaturika ŵanthu azamuja pa ubwezi wakukho ndi Chiuta, kung’anamuwa kuti azamusinthanga kamanakamana kuti ayanani ndi Khristu kweniso azamuja akufikapu. (Yoha. 13:15-17; Aefe. 4:23, 24) Zuŵa lelosi liŵavu lawu lazamusinthanga kuja lanthazi kweniso lamampha ndipu azamuja ŵanthu amampha ukongwa. Kukamba uneneska tazamuja ndi umoyu wamampha ukongwa! (Jobu 33:25) Kumbi kuŵanaŵaniya nkhani ya chiyuka kungakuwovyani wuli mazuŵa nganu?

13. Kumbi lemba la Sumu 139:1-4, likambanji vo vilongo kuti Yehova watitiziŵa umampha, ndipu venivi vazamuziŵika wuli pa nyengu ya chiyuka?

¹³ Nge mo takambiya kali, asani Yehova waziyuska ŵanthu, azamuŵanaŵananga kweniso kuchita vinthu nge mo ŵenge ŵechendafwi. Kumbi venivi ving’anamuwanji? Yehova watikuyanjani ukongwa mwakuti waziŵa kweniso kukumbuka vosi vo muŵanaŵana, mo muvwiya, vo mukamba ndipuso kuchita. Mwaviyo, asani vingazichitika kuti mwafwa ndipu Yehova wazikuyuskani, mwazamuja nge mo mwenge pakwamba mwechendafwi. Davidi Fumu ya Ayisirayeli waziŵanga kuti Yehova watimuziŵa umampha munthu weyosi. (Ŵerengani Sumu 139:1-4.) Kumbi tituvwa wuli chifukwa chakuziŵa kuti Yehova watitiŵanika umampha?

14. Kumbi titenere kuvwa wuli asani tikumbuka kuti Yehova watitiziŵa umampha?

¹⁴ Kuziŵa kuti Yehova watitiŵanika umampha kungatifipiskanga mtima cha. Chifukwa wuli? Ziŵani kuti Yehova watitiŵanaŵaniya ukongwa. Wawona kuti munthu weyosi ngwakuzirwa. Waziŵa umampha vosi vo vititichitikiya pa umoyu. Fundu yeniyi njakuchiska ukongwa. Tingaŵanaŵananga cha kuti te tija. Nyengu zosi Yehova we nasi ndipu wakhumbisiska kutiwovya.—2 Miko. 16:9.

15. Kumbi chiyuka chilongo wuli kuti Yehova we ndi zeru?

¹⁵ Kopa kufwa ndi nthowa yikulu yo Satana wagwiriskiya ntchitu kuti wanangi ubwezi widu ndi Yehova. Ŵanthu wo alongozgeka ndi Satana agwiriskiya ntchitu nthowa yeniyi ndipu achichizga ŵanthu kuti apayiki anyawu pamwenga kuti achiti chinthu chinyaki cho aziŵa kuti ntchiheni. Kweni isi angatichichizga  cha kuti tichiti venivi. Tiziŵa kuti asani arwani ŵidu angatibaya, Yehova wazakutiyuska. (Chivu. 2:10) Tisimikiza kuti palivi cho chingatitondekesa kuja pa ubwezi ndi Yehova. (Aro. 8:35-39) Yehova walongo kuti ngwazeru ukongwa pakunozga kuti waziyuski ŵanthu. Mwaviyo, titopa cha asani ŵanthu aku Satana atitiwofyeza kuti atibayengi chifukwa chakuti takana kuchita vo akhumba. Venivi vititiwovya so kuti tilutirizgi kuja akugomezgeka kwaku Yehova.

16 Kumbi mukhumbika kujifumba mafumbu nanga, ndipu venivi vingakuwovyani wuli?

¹⁶ Asani arwani aku Yehova atikuwofyezani kuti akubayeningi, kumbi muthembengi Yehova kuti wazakukuyuskani? Kumbi mungaziŵa wuli kuti mwazamuthemba Yehova pa nyengu yo? Mungaziŵa venivi mwakujifumba kuti, ‘Kumbi vo ndisankha kuchita zuŵa lelosi vilongo kuti ndithemba Yehova?’ (Luka 16:10) Fumbu linyaki lingaŵa lakuti, ‘Kumbi mo ndigwiriskiya ntchitu nyengu kweniso ndalama vilongo kuti ndithemba layizgu laku Yehova lakuti wandiwovyengi kusaniya vo ndikhumbika pa umoyu chikulu ndidanjizga Ufumu waki?’ (Mate. 6:31-33) Asani kumuka kwa mafumbu yanga nkhwakuti hinya, ndikuti muthemba Yehova ndipuso mulongo kuti mwe akunozgeka kulimbana ndi mayeseru ngo mukumanengi nangu.—Nthanthi 3:5, 6.

17. (a) Kumbi chiyuka chilongo wuli kuti Yehova ngwakuzikira? (b) Kumbi tingalongo wuli kuti titimuwonga Yehova chifukwa cha kuzikira?

¹⁷ Yehova we ndi zuŵa kweniso ora lo wazamunangiya charu chiheni ichi. (Mate. 24:36) Wathaŵiriyengi cha kuchitapu kanthu mpaka pa nyengu yaki. Wakhumbisiska kuziyuska akufwa kweni wazikira. (Jobu 14:14, 15) Yehova walindizga kuti waziyuski ŵanthu akufwa pa nyengu yakwenere. (Yoha. 5:28) Te ndi vifukwa vakuvwika vakuwonge kuti Yehova ngwakuzikira. Mwakuyeruzgiyapu, chifukwa chakuti Yehova ngwakuzikira, ŵanthu anandi kweniso isi, taŵa ndi nyengu yakuti ‘tilapi.’ (2 Petu. 3:9) Yehova wakhumba kuti ŵanthu anandi azisaniyi umoyu wamuyaya. Mwaviyo, tilongongi kuti tiwonga chifukwa chakuti Yehova ngwakuzikira. Kumbi tingalongo wuli? Asani tiyesesa kufufuza ŵanthu wo ŵe ndi “maŵanaŵanu ngamampha ngakuŵawovya kuti azisaniyi umoyu wamuyaya” ndipuso asani titiŵawovya kuti amuyanjengi ndi kumuteŵete. (Machi. 13:48) Asani tichitengi viyo, ayanduwengi chifukwa chakuzikira kwaku Yehova nge mo isi tiyanduliya.

18. Ntchifukwa wuli titenere kuzikira ndi anyidu?

 ¹⁸ Yehova walutirizgengi kulindizga mwakuzikira mpaka po tazijaliya akufikapu ndipu venivi vazamuchitika asani vazimala vyaka 1,000. Yehova walutirizgengi kutigowoke maubudi mpaka pa nyengu yo. Mwaviyo, tikhumbika kuwona vamampha mwanyidu ndi kulutirizga kuchita nawu vinthu mwakuzikira nge mo Yehova wachitiya. Tiyeni tikambiskani va mzichi munyaki yo mulumu waki wafipanga mtima ukongwa ndipu wanguleka kuluta ku maunganu. Mzichi yo wangukamba kuti: “Venga vakupweteka ukongwa pa umoyu wangu. Vinthu vingusintha pa umoyu widu ndipu vo takhumbanga kuchita vingutondeka.” Pa nyengu yosi yeniyi, mzichi mwenuyu wachitanga vinthu mwakuzikira ndi mulumu waki. Iyu wathembanga Yehova ndipu wanguleka cha kovya mulumu waki. Mwakuyanana ndi Yehova, iyu waŵanaŵaniyanga vinthu vamampha vo mulumu waki wachitanga. Mzichi yo wangukamba kuti: “Mulumu wangu we ndi mijalidu yamampha ndipu wafwiyapu kuti waleki kufipa mtima ukongwa.” Nasi tikhumbika kuzikira ndi ŵanthu a mubanja lidu pamwenga a mu mpingu wo atesesa kulimbana ndi masuzgu.

19. Kumbi tasimikiza mtima kuchitanji?

¹⁹ Yesu ndi angelu angukondwa pa nyengu yo charu chalengekanga. Yiwu azamukondwa so ukongwa po charu chosi chapasi chazamuzaziya ndi ŵanthu akufikapu, wo azamukwanja Yehova ndi kumuteŵete. Ndipu wo amulamuliya ndi Yesu kuchanya azamukondwa kuwona kuti ŵanthu wosi ayanduwa ndi ntchitu yawu. (Chivu. 4:4, 9-11; 5:9, 10) Tazamukondwa ukongwa kuwona kuti urwirwi, matenda, chitima kweniso nyifwa kulivi. (Chivu. 21:4) Mpaka pa nyengu yeniyo, tiyeni tisimikizi mtima kuyezga Awusefwi achanju, azeru kweniso akuzikira. Asani tichitengi viyo, ndikuti tilutirizgengi kukondwa chinanga kuti tingakumana ndi masuzgu ngakulu wuli. (Yako. 1:2-4) Titimuwonga ukongwa Yehova chifukwa chakuti walayizga kuti “kwazamuja chiyuka”!—Machi. 24:15.