1. Kumbi Yehova waŵazomerezanji ateŵeti ŵaki?

YEHOVA wakuzomereza kuti mteŵeti waki weyosi wakugomezgeka waje mu mpingu. Chinanga kuti vo tichita viyanana cha kweni tosi te akuzirwa ndipu titovyana. Wakutumika Paulo watitiwovya kuvwisa fundu yeniyi. Kumbi watitiwovya wuli?

2. Mwakukoliyana ndi Aefeso 4:16, ntchifukwa wuli tikhumbika kutumbikana kweniso kugwiriya ntchitu limoza?

² Nge mo likambiya lemba lo patuwa mutu wa nkhani, Paulo wangukamba kuti palivi mteŵeti waku Yehova yo wangakambiya munyaki kuti “Nditikukhumba cha.” (1 Akori. 12:21) Asani tikhumba kuti mu mpingu muje chimangu, tikhumbika kutumbikana kweniso kugwiriya ntchitu limoza. (Ŵerengani Aefeso 4:16.) Mpingu uja wakukho asani tichita vinthu mwakukoliyana kweniso asani titanjana.

3. Kumbi tikambiskanengenji mu nkhani iyi?

³ Kumbi tingalongo wuli kuti titumbika Akhristu anyidu mu mpingu? Mu nkhani iyi tikambiskanengi vo ŵara angachita kuti atumbikanengi. Kweniso tikambiskanengi mo tosi tingalongore kuti titumbika Akhristu ambula kuyirwa pamwenga kuto. Ndipu pakumaliya, tikambiskanengi mo tingatumbikiya abali ndi azichi wo atondeka kulongoro umampha chineneru chidu.

4. Mwakukoliyana ndi Aroma 12:10, kumbi ŵara atenere kuchitanji?

⁴ Ŵara wosi mu mpingu asankhika ndi mzimu wakupaturika waku Yehova. Kweni ayanana cha. (1 Akori. 12:17, 18) Anyaki angaŵa kuti aŵikika ŵaka sonu ndipu aziŵa vinandi cha. Penipo anyaki angaŵa kuti achita vinandi cha chifukwa cha kukota kweniso kutama. Kweni palivi mura yo watenere kuŵanaŵana kuti mura munyaki ngwakukhumbika cha. Mumalu mwaki, mura weyosi watenere kulondo ulongozgi wa pa Aroma 12:10.—Ŵerengani.

5. Kumbi ŵara angalongo wuli kuti atumbika ŵara anyawu?

⁵ Ŵara alongo kuti atumbika ŵara anyawu asani avwisiya pa nyengu yo alongoro. Venivi vakukhumbika ukongwa asani wupu wa ŵara ukambiskana. Chifukwa wuli? Chigongwi cha Alinda cha October 1, 1988 chingukamba kuti: “Ŵara atenere kuziŵa kuti Yesu wangagwiriskiya ntchitu mzimu wakupaturika kuti wawovyi mura weyosi kukamba fundu ya mu Bayibolu, yo yingawovya wupu wa ŵara kuziŵa vo angachita pa nkhani yinyaki pamwenga kusankha vakuchita. (Machi. 15:6-15) Mzimu wakupaturika utovya mura yumoza pe cha kweni ŵara wosi.”

6. Kumbi ndi vinthu wuli vo vingawovya ŵara kuti achitengi vinthu mwakukoliyana, ndipu venivi vingawovya wuli mpingu?

⁶ Mura yo watumbika ŵara anyaki, wadankha ndiyu pe cha nyengu zosi kulongoro asani akambiskana. Iyu wathaza cha pa nkhumanu ya ŵara kweniso kuwona kuti fundu zo wakamba ndizu zakukhumbika pe. Mu malu mwaki wakamba maŵanaŵanu ngaki mwakujiyuyuwa. Iyu wavwisiya asani anyaki akambapu maŵanaŵanu ngawu. Kweni chakukhumbika ukongwa ntchakuti asani wamukapu, wakamba fundu zakutuliya mu Malemba. Iyu walondo ulongozgi wakutuliya kwa “kapolu wakugomezgeka ndi wazeru.” (Mate. 24:45-47) Asani ŵara atanjana kweniso atumbikana po akambiskana, mzimu waku Chiuta uŵengi nawu ndipuso uŵalongozgengi kuti asankhi vinthu vo vingawovya mpingu.—Yako. 3:17, 18.

7. Kumbi Yesu waŵawonanga wuli ŵanthu ambula kuyirwa pamwenga kuto?

⁷ Mazuŵa nganu mu mpingu mwe mabanja ngo nge ndi ŵana kweniso ngo ngalivi ŵana. Mwe so abali ndi azichi anandi ambula kuto pamwenga kuyirwa. Kumbi titenere kuŵawona wuli abali ndi azichi ŵenaŵa? Tiyeni tikambiskani mo Yesu waŵawoniyanga. Yesu wangutopu cha ndipu wanguŵika maŵanaŵanu ngaki ngosi pa uteŵeti waki. Iyu wangukambapu cha kuti kuja pa banja pamwenga kuleka kuja pa banja ndivu vakukhumbika ukongwa kwa Akhristu. Kweni wangukamba kuti Akhristu anyaki angasankha kuja ŵija. (Mate. 19:11, 12) Yesu waŵatumbikanga ŵanthu ambula kuyirwa pamwenga kuto. Iyu waŵawonanga kuti mbakumaliyapu cha pamwenga kuti asoŵeka chinthu chinyaki pa umoyu wawu.

8. Mwakukoliyana ndi 1 Akorinto 7:7-9, kumbi Paulo wanguŵachiskanji Akhristu?

⁸ Nge Yesu, wakutumika Paulo wanguteŵete kwambula kuto. Paulo wangukambapu cha kuti kuto pamwenga kuyirwa nkhunanga. Iyu wanguziŵa kuti iyi ndi nkhani yakuti munthu wangasankha yija. Kweni wanguchiska Akhristu kuti angateŵete Yehova kwambula kuyirwa pamwenga kuto. (Ŵerengani 1 Akorinto 7:7-9.) Paulo wanguŵanaŵanapu cha kuti Akhristu ambula kuyirwa pamwenga kuto mbakumaliyapu. Mwakuti wangusankha Timote yo wenga wambula kuto kuti wachiti uteŵeti wapade. * (Afi. 2:19-22) Mbumampha cha kuŵanaŵana kuti mubali ngwakwenere pamwenga ngwambula kwenere kuchita uteŵeti unyaki chifukwa chakuti ngwakuto pamwenga ngwambula kuto.—1 Akori. 7:32-35, 38.

9. Kumbi Chigongwi cha Alinda chingukambanji pa nkhani ya kuja pa banja pamwenga cha?

⁹ Yesu kweniso Paulo angukambapu cha kuti Mkhristu watenere kuja pa banja pamwenga kuja yija. Kumbi isi tikhumbika kuyiwona wuli nkhani yeniyi? Chigongwi cha Alinda cha October 1, 2012 chingukamba kuti: “Kwali Mkhristu wasankha kuja pa banja pamwenga kuja yija, vosi ndi mphasu yakutuliya kwaku Chiuta. . . . Yehova wawona kuti kuleka kuto pamwenga kuyirwa nkhwakuchitiska soni cha pamwenga chitima.” Mwaviyo, titenere kuŵatumbika abali ndi azichi ambula kuyirwa pamwenga kuto.

10. Kumbi tingalongo wuli kuti titumbika abali ndi azichi ambula kuyirwa pamwenga kuto?

 ¹⁰ Kumbi tingalongo wuli kuti titumbika abali ndi azichi ambula kuyirwa pamwenga kuto? Titenere kukumbuka kuti Abali ndi azichi anyaki asankha kuleka kuyirwa pamwenga kuto pa vifukwa vakupambanapambana. Mwakuyeruzgiyapu, anyaki akusankha kuleka kuto pamwenga kuyirwa. Anyaki akhumba kuyirwa pamwenga kuto kweni ŵechendamusaniyi munthu wakwenere. Ndipu anyaki vingaŵa kuti munthu yo angutorana nayu wakutayika. Kwali vinthu ve wuli, mbumampha cha kuti abali ndi azichi afumbengi Akhristu ŵenaŵa kuti ntchifukwa wuli ŵe pa banja cha pamwenga kuŵawovya kuti asaniyi munthu wakuti atorani nayu. Mbuneneska kuti Akhristu anyaki angapempha kuti muŵawovyi kusaniya munthu wakutorana nayu. Kumbi muwona kuti angavwa wuli asani mwaŵasaniliya mubali pamwenga mzichi kwambula kukupemphani? (1 Ate. 4:11; 1 Timo. 5:13) Tiyeni tikambiskani vo angukamba abali kweniso azichi anyaki ambula kuyirwa pamwenga kuto.

11-12.Kumbi abali ndi azichi ambula kuyirwa, tingaŵaguŵiska wuli?

¹¹ Wakuwonere dera munyaki wambula kuto wangukamba kuti ungayanduwa ukongwa asani uteŵete Yehova kwambula kuto. Kweni vingaŵa vakugongowesa asani abali ndi azichi anyaki afumba kuti: “Ntchifukwa wuli mweche amphara?” Mubali munyaki wambula kuto yo wateŵete pa Beteli wangukamba kuti: “Nyengu zinyaki abali kweniso azichi awona kuti ŵanthu ambula kuto alenga lisungu. Ivi vichitiska kuti ndiwonengi kuti kuleka kuto ndi mphingu mumalu mwakuwona kuti ndi mphasu.”

¹² Mzichi munyaki wambula kuyirwa yo wateŵete pa Beteli wangukamba kuti: “Abali ndi azichi anyaki aŵanaŵana kuti asani Akhristu ambula kuto pamwenga kuyirwa ŵe pa gulu la ŵanthu, ndikwesa akhumba kuti asaniyi munthu wakutorana nayu. Nyengu yinyaki ndinguluta ku chigaŵa chinyaki kuchichita ntchitu ya pa Beteli ndipu ndinguluta ku maunganu ndi mazulu. Mzichi munyaki yo ndajanga nayu wangundikambiya kuti mu mpingu wawu mwe abali ŵaŵi anthanga yangu. Iyu wangundikambiya kuti wakhumba kundiwovya kuti ndisaniyi mubali cha. Kweni tati tafika ku Nyumba ya Ufumu wangundidaniya po penga abali ŵaŵi wo wakambanga, kuti ndikumani nawu. Ini ndi abali ŵenaŵa tinguchita soni ukongwa.”

13. Kumbi mzichi munyaki wambula kuyirwa wachiskika ndi ayani?

¹³ Mzichi munyaki wambula kuyirwa yo wateŵete so pa Beteli wangukamba kuti: “Pe azichi anyaki ambula kuyirwa wo awona vinthu mwakwenere, akhumbisiska kuchita vinandi, mbakunozgeka kuwovya ŵanthu ndipu akondwa. Yiwu atovya ukongwa mu mpingu. Azichi ŵenaŵa ŵe ndi maŵanaŵanu ngamampha pa nkhani yakuleka kuyirwa. Yiwu atijiwona kuti aluska ŵanthu akuyirwa cha. Kweniso atijiwona kuti angatondeka kukondwa cha chifukwa chakuti alivi munthulumi kweniso ŵana.” Vikondwesa ukongwa kuja mu mpingu wo abali ndi azichi atumbikana kweniso awona kuti weyosi ngwakuzirwa. Chifukwa uziŵa kuti abali ndi azichi atikuwona kuti ulenga lisungu cha, atikuchitiya sanji cha, atikupatuwa cha ndipu yiwu awona kuti utiŵaluska cha. Venivi vitikuwovya kuziŵa kuti atikuyanja.

14. Kumbi tingalongo wuli kuti titiŵatumbika Akhristu wo ŵe pa banja cha?

¹⁴ Abali ndi azichi ŵidu ambula kuto pamwenga kuyirwa awonga ukongwa asani titiŵawona kuti mbakukhumbika chifukwa cha  mijalidu yamampha yo ŵe nayu, mumalu mwakuŵachitiya lisungu kuti ŵe pa banja cha. Mumalu mwakuŵachitiya lisungu, tikhumbika kuŵawonga chifukwa chakuti mbakugomezgeka. Venivi vingawovya Akhristu ambula kuto pamwenga kuyirwa kujivwa kuti titiŵawona kuti mbakuzirwa. (1 Akori. 12:21) Yiwu awonengi kuti titiŵatumbika ndipu tiwona kuti mbakukhumbika mu mpingu.

15. Kumbi Akhristu anyaki asinthanji kuti achiti vinandi pakuteŵete Yehova?

¹⁵ Mazuŵa nganu, apharazgi anandi asambira chineneru chinyaki kuti asazgiyeku uteŵeti wawu. Kuti achiti venivi asintha vinthu vinandi pa umoyu wawu. Yiwu aleka mpingu wa chineneru chawu ndi kusamiya ku mpingu wa chineneru chinyaki ko kukhumbika apharazgi anandi. (Machi. 16:9) Akhristu ŵenaŵa asankha ŵija kuti achiti vinandi pakuteŵete Yehova. Chinanga pangato nyengu kuti asambiri chineneru chasonu, kweni atovya ukongwa mpingu wo asamiyaku. Nkharu yawu yamampha kweniso vinthu vo aziŵa vitovya kuti mpingu uje wakukho. Abali ndi azichi ŵenaŵa, titiŵawona kuti mbakuzirwa ukongwa!

16. Kumbi ŵara awonanji asani akhumba kuŵika munthu pa udindu?

¹⁶ Wupu wa ŵara ungaleka cha kuzomereza mubali kuti waje mteŵeti wakovya pamwenga mura chifukwa chakuti watichiziŵa cha chineneru cho wasambira sonu. Ŵara atenere kwende fundu za mu Malemba asani akhumba kuŵika mubali pa udindu, mumalu mwakutore mo waziŵiya chineneru cho wasambira.—1 Timo. 3:1-10, 12, 13; Tito 1:5-9.

17. Kumbi apapi atenere kuŵanaŵaniya mafumbu nanga asani asamiya kucharu chinyaki?

¹⁷ Akhristu anyaki athaŵiya kucharu chinyaki chifukwa cha masuzgu nga mucharu chawu pamwenga kuchipenja ntchitu. Venivi vingachitiska kuti ŵana ŵawu asambiri sukulu mu chineneru cha charu cho asamiyaku. Apapi nawu angakhumbika kuti asambiri chineneru cha charu cho, kuti asaniyi ntchitu. Kumbi angachita wuli asani asaniya mpingu pamwenga kagulu ka chineneru chawu? Kumbi atenere kuwungana ndi mpingu nuwu? Kumbi atenere kuwungana mu mpingu wa chineneru cha charu cho asamiyaku pamwenga mpingu wa chineneru chawu?

18. Mwakukoliyana ndi Agalatiya 6:5, kumbi tingalongo wuli kuti titumbika vo mutu wa banja wasankha?

¹⁸ Mutu wa banja utenere kusankha mpingu wo banja laki litenere kuwungana. Chifukwa chakuti mbudindu waki, mutu wa banja utenere kusankha mpingu wo banja laki lingachiyanduwa nawu. (Ŵerengani Agalatiya 6:5.) Tikhumbika kuwona mwakwenere vo mutu wa banja wasankha. Titenere kuzomereza vo mutu wa banja wasankha ndipu tiŵalondere kweniso kuŵayanja.—Aroma 15:7.

19. Kumbi mutu wa banja utenere kupemphere nkhani niyi?

 ¹⁹ Nyengu zinyaki, banja lingasankha kuwungana mu mpingu wa chineneru chawu, kweni ŵana angaŵa kuti atichiziŵa umampha cha chineneru cho. Kuwungana ndi ŵana mu mpingu wa chineneru cho apapi atichiziŵa, penipo ŵana atuvwa umampha chineneru cha mucharu cho akusamiya, kungachitiska kuti ŵana aleki kuyanduwa ndi mawunganu. Kungachitiska so kuti aleki kuja pa ubwezi wakukho ndi Yehova. Chifukwa wuli? Chifukwa chakuti ŵana aluta ku sukulu ya chineneru cha apapi ŵawu cha, kweni ya chineneru cha charu cho akusamiyaku. Asani vaŵa viyo, mutu wa banja ukhumbika kuyipemphere nkhani iyi kuti asankhi mwazeru vo vingaŵovya ŵana ŵawu kuja pa ubwezi wakukho ndi Yehova kweniso ŵanthu ŵaki. Yiwu angasankha kusambiza ŵana ŵawu chineneru chawu pamwenga angaluta ku mpingu wa chineneru cho ŵana atuvwa umampha. Mutu wa banja utenere kusankha mpingu wo banja laki lingachifwatuka kuteŵete Yehova.

20. Kumbi tingalongo wuli kuti titumbika abali ndi azichi wo asambira chineneru chasonu?

²⁰ Vosi vo takambiskana mu nkhani iyi, vilongo kuti mu mipingu yinandi mwe abali kweniso azichi wo afwiyapu kusambira chineneru chasonu. Vingaŵa vakusuzga kuti alongoro vo akhumba kukamba. Tikhumbika kuwona kuti atanja ukongwa Yehova kweniso kuti akhumbisiska kumuteŵete, mumalu mwakuŵawona kuti mbajira chineneru. Asani tiwonengi mijalidu yawu yamampha yeniyi, tiŵawonengi kuti mbakuzirwa kweniso tiŵatumbikengi. Tikambengi cha kuti “Nditikukhumba cha” chifukwa chakuti mbajira kulongoro chineneru chidu.

21-22. Kumbi Yehova wakutipaskanji?

²¹ Titimuwonga ukongwa Yehova chifukwa chakuti tosi wakutipaska ntchitu yo tichita mu mpingu. Kwali te anthulumi pamwenga anthukazi, te pa banja pamwenga cha, te akukota pamwenga anyamata, tilongoro umampha chineneru chinyaki pamwenga te ajira, tosi te akuzirwa kwaku Yehova kweniso kwa anyidu.—Aro. 12:4, 5; Ako. 3:10, 11.

²² Tiyeni tilutirizgi kugwiriskiya ntchitu vo tasambira mu chakuyeruzgiyapu chaku Paulo cha viŵalu va liŵavu. Venivi vitiwovyengi kuziŵa vo tingachita kuti tichiskengi abali ndi azichi kweniso kuti tiŵayanjengi ndi kuŵatumbika.