1. Kumbi tingajifumba mafumbu nanga asani tiŵanaŵaniya vinthu vosi vo Yehova wakulenga?

ASANI tiŵanaŵaniya vinthu vosi vo Yehova wakulenga, tingavwa nge mo Davidi yo wakulembaku buku la Masalimo wanguvwiya. Iyu wangupemphera kuti: “Asani ndilereska kuchanya, ntchitu za vikumbu vinu, mwezi ndipuso nyenyezi vo yimwi mukupanga, kumbi munthu ndiyani kuti mumukumbukengi, kweniso mwana wa munthu ndiyani kuti mumuphweriyengi?” (Salimo 8:3, 4) Mwakuyanana ndi Davidi, nasi tingajiwona kuti te kanthu ndi kanthu cha pakuyeruzgiya ndi nyenyezi zo Yehova wakulenga ndipu tizukuma kuti iyu watitiŵanaŵaniya. Kweni mu nkhani iyi, tiwonengi kuti Yehova wanguŵaphwere ŵanthu akwamba, Adamu ndi Heva kweniso wanguŵalenga kuti aje mubanja laki.

2. Kumbi Yehova wakhumbanga kuti ŵana ŵaki akwamba a pacharu chapasi achitenji?

² Adamu ndi Heva, ŵenga ŵana aku Yehova akwamba a pacharu chapasi ndipu Yehova wenga Wiskewu wachanju wakuchanya. Iyu wangulipaska ntchitu banja lenili. Chiuta wanguŵakambiya kuti: “Mubalani, muyandani, muzazi charu chapasi ndipu muchithereski.” (Gene. 1:28) Iyu wakhumbanga kuti yiwu aje ndi ŵana kweniso achiphweriyengi umampha charu. Asani yiwu anguvwiya kweniso kuchita khumbu laku Yehova, Adamu ndi Heva ndipuso ŵana ŵawu atingi ajengi mubanja laku Chiuta kwamuyaya.

3. Ntchifukwa wuli tingakamba kuti Adamu ndi Heva angupaskika malu ngakuzirwa mubanja laku Yehova?

³ Adamu ndi Heva ŵenga ndi malu ngakuzirwa mubanja laku Yehova. Nge mo pakambiya pa Salimo 8:5 ndipuso mazu ngamumphata, Davidi wangukamba vakukwaskana ndi munthu  yo Yehova wakulenga kuti: “Mukumusisa kamanavi pakumuyeruzgiya ndi angelu, ndipu mukumuvwalika unkhankhu ndi ulemu pamutu waki.” Yehova wangupanga munthu kuti waje ndi nthazi, zeru kweniso malusu ngakuyanana ndi angelu cha. (Salimo 103:20) Kweni ŵanthu ‘akusisika kamanavi’ pakuyeruzgiya ndi vakulengeka vanthazi vauzimu venivi. Venivi vakuziziswa ukongwa! Yehova wati walenga apapi ŵidu akwamba, wanguŵapaska umoyu wamampha ukongwa.

4. Kumbi ndi vinthu wuli vo vinguchitikiya Adamu ndi Heva ŵati aleka kuvwiya Yehova, nanga tikambiskanengenji mu nkhani iyi?

 ⁴ Vachitima kuti Adamu ndi Heva angutaya malu ngawu mubanja laku Yehova. Venivi vachitiska kuti ŵana ŵawu akumanengi ndi masuzgu ngakulu nge mo tiwoniyengi mu nkhani iyi. Kweni chilatu chaku Yehova chechendasinthi. Iyu wakhumba kuti ŵanthu akuvwiya aje ŵana ŵaki kwamuyaya. Chakwamba, tiyeni tikambiskani mo Yehova watitumbikiya. Pavuli paki, tikambiskanengi vo tingachita sonu kuti tilongo kuti tikhumba kuja mubanja laku Chiuta. Ndipu pakumaliya, tiwonengi vitumbiku vo ŵana aku Yehova a pacharu chapasi azamukondwa navu kwamuyaya.

5. Kumbi tingalongo wuli kuti titumbika Chiuta chifukwa chakuti wakutilenga muchikozgu chaki?

⁵ Yehova wakutilenga muchikozgu chaki. (Gene. 1:26, 27) Chifukwa chakuti tikulengeka muchikozgu chaku Chiuta, tingaja ndi mijalidu yinandi yamampha yo iyu we nayu nge chanju, lisungu, kugomezgeka kweniso urunji. (Salimo 86:15; 145:17) Asani tija ndi mijalidu yeniyi, ndikuti titumbika Yehova kweniso tilongo kuti titimuwonga. (1 Petu. 1:14-16) Asani tichita vinthu vo vikondwesa Awusefwi akuchanya, tikondwa kweniso tikhorwa. Chifukwa chakuti iyu wakutilenga muchikozgu chaki, Yehova wakutipaska mwaŵi wakuti tiŵi akwenere kuja mubanja laki.

6. Kumbi Yehova wangulongo wuli kuti watiŵatumbika ŵanthu pa nyengu yo walenganga charu?

⁶ Yehova wakutipangiya malu ngamampha ngakujamu. Vyaka vinandi wechendalengi munthu wakwamba, Yehova wangupanga charu kuti ŵanthu ajengemu. (Yobu 38:4-6; Yere. 10:12) Chifukwa chakuti iyu ngwalisungu kweniso ngwakupaska, Yehova wakutipaska vinthu vinandi vamampha kuti isi tikondwengi. (Salimo 104:14, 15, 24) Nyengu zinyaki, waŵanaŵaniyanga vinthu vo wangulenga ndipu “wanguwona kuti ve umampha.” (Gene. 1:10, 12, 31) Iyu wakutumbika ŵanthu mwakuŵapaska “mazaza pa” vinthu vosi vamampha vo wakulenga pacharu chapasi. (Salimo 8:6) Chiuta wakhumba kuti ŵanthu akufikapu azikondwengi kwamuyaya pakuphwere vinthu vo iyu wakulenga. Kumbi nyengu zosi mutimuwonga Yehova chifukwa cha layizgu lakukondwesa lenili?

7. Kumbi lemba la Yoswa 24:15, lilongo wuli kuti ŵanthu ŵe ndi wanangwa wakusankha?

⁷ Yehova wakutipaska wanangwa wakusankha. Tingasankha vo tikhumba kuchita pa umoyu. (Ŵerengani Yoswa 24:15.) Chiuta widu wachanju wakondwa asani tasankha kumuteŵete. (Salimo 84:11; Nthanthi 27:11) Tingagwiriskiya ntchitu wanangwa widu wakusankha mwazeru pa vakuchitika vakupambanapambana. Tiyeni tiwoni mo Yesu wangugwiriskiya ntchitu wanangwa waki mwakwenere.

8. Kumbi Yesu wanguwugwiriskiya wuli ntchitu wanangwa waki wakusankha?

⁸ Tingayezga Yesu mwakuŵika vakukhumba va anyidu pamalu ngakwamba. Nyengu yinyaki, Yesu ndi akutumika ŵaki ŵati avuka ukongwa, anguluta kumalu ngakuŵija kuti akapumuwi. Kweni yiwu angupumuwa cha. Chigulu cha ŵanthu chinguŵasaniya ndipu akhumbisiskanga kuti Yesu waŵasambizi. Yesu  wanguguŵa cha ndi venivi. Mumalu mwaki, iyu wanguŵalenge lisungu ŵanthu. Sonu kumbi Yesu wanguchitanji? Iyu “wangwamba kuŵasambiza vinthu vinandi.” (Mariko 6:30-34) Asani tiyezga Yesu mwakugwiriskiya ntchitu nyengu yidu kweniso nthazi zidu pakovya ŵanthu anyaki, tikankhuska Awusefwi akuchanya. (Mate. 5:14-16) Ndipuso titimulongo Yehova kuti tikhumba kuja mubanja laki.

9. Kumbi apapi atenere kukumbukanji?

⁹ Yehova wakupaska ŵanthu wanangwa wakuja ndi ŵana kweniso udindu wakuti aŵasambizengi kuti amuyanjengi ndipuso kumuteŵete. Asani ndimwi mpapi, kumbi muwonga mphasu yapade yeniyi? Chinanga kuti Yehova wakuŵatumbika ukongwa angelu, kweni wakuŵapaska cha mwaŵi wenuwu. Mwaviyo, asani ndimwi mpapi, mutenere kuwonga mwaŵi wakulera ŵana wo mwenawu. Apapi akupaskika udindu wakuzirwa wakulera ŵana ŵawu “mwakuŵasambiza ndi kuŵalunguchizga nge mo Yehova wakhumbiya.” (Aefe. 6:4; Doto. 6:5-7; Salimo 127:3) Kuti Yehova wawovyi apapi, gulu laki latipaska vinthu vinandi vakukonkhoska Bayibolu nge mabuku, mavidiyo, sumu kweniso nkhani za pa webusayiti yidu. Venivi vilongo kuti Awusefwi akuchanya kweniso Mwana wawu atiŵayanja ukongwa ŵana. (Luka 18:15-17) Asani apapi athemba Yehova kweniso achita vosi vo angafiska pakuphwere ŵana ŵawu akuzirwa, Yehova wakondwa. Ndipu apapi ŵenaŵa atovya ŵana ŵawu kuti azije mubanja laku Yehova kwamuyaya.

10-11. Kumbi ndi vinthu wuli vo Yehova watichitiya chifukwa cha sembi yaku Yesu?

¹⁰ Yehova wakutipaska Mwana waki wakuzirwa kuti tije so mubanja Laki. Nge mo takambiya mu  ndimi 4, Adamu ndi Heva akutaya malu ngawu mubanja laku Yehova ndipu angutaya so malu nga ŵana ŵawu. (Aro. 5:12) Adamu ndi Heva angusankhiya dala kuleka kuvwiya Chiuta. Mwaviyo, penga pakwenere kuti yiwu atuzgikemu mubanja laki. Nanga ndi vinthu wuli vo vatingi vichitikiyengi ŵana ŵawu? Yehova watanja ŵanthu. Mwaviyo, wanguchitapu kanthu kuti ŵana ŵawu akuvwiya aje mubanja laki. Wanguchita venivi mwakugwiriskiya ntchitu sembi ya Mwana waki wapade, Yesu Khristu. (Yoha. 3:16; Aro. 5:19) Chifukwa cha sembi yaku Yesu, a 144,000 akugomezgeka, aja ŵana aku Chiuta.—Aro. 8:15-17; Chivu. 14:1.

¹¹ Fundu yinyaki njakuti ŵanthu anyaki akugomezgeka mamiliyoni nganandi, achita khumbu laku Chiuta ndi mtima wosi. Yiwu alindizga kuzija mubanja laku Chiuta pavuli pakuyeseka kakumaliya, kukumaliya kwa vyaka 1,000. (Salimo 25:14; Aro. 8:20, 21) Wo alindizga venivi, chinanga ndi sonu yiwu adana Mlengi wawu kuti “Ada.” (Mate. 6:9) Ŵanthu wo azamuyuskika nawu azamupaskika mwaŵi wakusambira vo Yehova wakhumba kuti azichitengi. Wo azamusankha kuvwiya, nawu azamuja mubanja laki.

12. Kumbi timukengi fumbu wuli sonu?

¹² Nge mo tawone kali, Yehova watichitiya vinthu vinandi kuti watitumbiki. Iyu wapereka mwaŵi kwa Akhristu akusankhika kuti aje ŵana ŵaki kweniso a “mzinda ukulu” waŵapaska chilindizga chakuti azije ŵana ŵaki mucharu chifya. (Chivu. 7:9) Kumbi tingamulongo wuli Yehova kuti tikhumba kuzija mubanja laki kwamuyaya?

13. Kumbi tingachitanji kuti tije mubanja laku Chiuta? (Mariko 12:30)

¹³ Mulongongi kuti mutanja Yehova mwakumuteŵete ndi mtima winu wosi. (Ŵerengani Mariko 12:30.) Chiuta wakutipaska mphasu zinandi. Ndipu wanangwa widu wakumusopa, ntchimoza mwa mphasu zikuluzikulu zo iyu wakutipaska. Titimulongo Yehova kuti titimuyanja asani ‘tisunga marangu ngaki.’ (1 Yoha. 5:3)  Dangu limoza lo Yehova wakhumba kuti tivwiyengi ndi lo Yesu wakupereka lakuti tisambizengi ŵanthu kuja akusambira kweniso kuŵabatiza. (Mate. 28:19) Iyu wakutilamula so kuti tiyanjanengi. (Yoha. 13:35) Ŵanthu wo atimuvwiya, Yehova wazakuŵazomereza kuja mubanja laki la pacharu chosi la ŵanthu wo atimusopa.—Salimo 15:1, 2.

14. Kumbi tingalongo wuli kuti titanja anyidu? (Mateyu 9:36-38; Aroma 12:10)

¹⁴ Mulongongi kuti mutanja anyinu. Chanju ndilu jalidu likulu ukongwa laku Yehova. (1 Yoha. 4:8) Yehova wangulongo kuti watitiyanja techendamuziŵi. (1 Yoha. 4:9, 10) Nasi titimuyezga asani tilongo kuti titanja anyidu. (Aefe. 5:1) Nthowa yamampha ukongwa yo tingalongore kuti titanja ŵanthu, nkhuŵasambiza vakukwaskana ndi Yehova po nyengu yecheŵaka. (Ŵerengani Mateyu 9:36-38.) Asani tichita viyo, titiŵapaska mwaŵi wakuti angaja mubanja laku Chiuta. Asani munthu wabatizika, tikhumbika kulutirizga kumuyanja kweniso kumutumbika. (1 Yoha. 4:20, 21) Kumbi venivi visazganjipu? Chinthu chimoza cho tingachita, nkhulongo kuti titimuthemba. Mwakuyeruzgiyapu, asani tivwisa cha chifukwa cho wachitiya chinthu chinyaki, tiŵanaŵana cha kuti wachita venivi chifukwa chakujikuzga. Mumalu mwaki, tichitengi vinthu vakulongo kuti titimupaska ulemu mubali widu ndipuso kumuwona kuti watitiluska.—Ŵerengani Aroma 12:10; Afi. 2:3.

15. Kumbi mbayani wo tikhumbika kuŵalongo lisungu kweniso chanju?

¹⁵ Mulongongi lisungu kweniso chanju ku ŵanthu wosi. Asani tikhumba kuja mugulu la ŵanthu wo angadana Yehova kuti Awusewu mpaka muyaya, tikhumbika kugwiriskiya ntchitu Mazu ngaku Chiuta pa umoyu widu. Mwakuyeruzgiyapu, Yesu wangusambiza kuti tikhumbika kuŵalongo lisungu kweniso chanju ŵanthu wosi, chinanga mbarwani ŵidu. (Luka 6:32-36) Kweni nyengu zinyaki vingaŵa vakusuzga kuchita viyo. Asani ndi viyo, titenere kusambira kuchita vinthu kweniso kuŵanaŵana nge mo Yesu wachitiya. Asani tichita vosi vo tingafiska pakuvwiya Yehova kweniso kuyezga Yesu, titiŵalongo Awusefwi akuchanya kuti tikhumba kuja mubanja lawu kwamuyaya.

16. Kumbi tingachita wuli kuti tivikiliyi mbiri ya banja laku Yehova?

¹⁶ Muvikiliyengi mbiri ya banja laku Yehova. Mubanja chayilu, kanandi mwana mumana watole vo mku waki wachita. Asani mku waki wagwiriskiya ntchitu fundu za mu Bayibolu pa umoyu waki, waja chakuwoniyapu chamampha ku mvurwa waki. Ndipu asani iyu wachita vinthu viheni, mvurwa waki wangalondo chakuwoniyapu chaki chiheni. Venivi viyanana ŵaka ndi banja laku Yehova. Asani Mkhristu wakugomezgeka waja wakugaruka, pamwenga wayamba kuchita ureŵi, pamwenga vinthu vachinyengu, abali ndi azichi anyaki angayamba kuchita vinthu viheni vo iyu wachita. Ŵanthu wo achita viyo, ananga mbiri ya ŵanthu a mubanja laku Yehova wo atimusopa. (1 Ate. 4:3-8) Tikhumbika cha kulondo vakuwoniyapu viheni ndipuso tingazomerezanga cha kuti chechosi chitipatuski kwa Awusefwi achanju akuchanya.

17. Kumbi titenere kukhwecha maŵanaŵanu nanga, ndipu ntchifukwa wuli?

¹⁷ Muthembengi Yehova mumalu mwakuthemba vinthu vakuliŵavu. Yehova walayizga kuti watipaskengi chakurya, vakuvwala kweniso nyumba asani tipenja dankha Ufumu kweniso tivwiya fundu zaki zaurunji. (Salimo 55:22; Mate. 6:33) Asani tithemba layizgu lenili, tiŵanaŵana cha kuti vinthu vakuliŵavu va mucharu ichi vingativikiliya kweniso vingatichitiska kuti tikondwengi kwamuyaya. Tiziŵa kuti nthowa yija yo tingajaliya ndi chimangu chayichu, nkhuchita khumbu laku Yehova. (Afi. 4:6, 7) Ndipu chinanga tingafiska kugula vinthu  vinandi, tikhumbika kuŵanaŵaniya asani te ndi nyengu pamwenga nthazi zakuphwere vinthu vo tikhumba kugula. Kumbi tiŵikengi ukongwa maŵanaŵanu pa vinthu vo tenavu? Titenere kukumbuka kuti Yehova wakutipaska ntchitu yakuti tichitengi mubanja laki. Ivi vilongo kuti tikhumbika cha kuzomereza kuti vinthu vinyaki vititimbanyizgi. Tikhumbika cha kuja nge munthu wachuma yo wangwanja ukongwa katundu yo wenga nayu ndipu wangusankha kuleka kulondo Yesu. Mwaviyo, iyu wangutaya mwaŵi wakuteŵete Yehova kweniso wakuja yumoza mwa ŵana ŵaki.—Mariko 10:17-22.

18. Kumbi ntchinthu chakuzirwa ukongwa nichi kweniso ndi vitumbiku wuli vo ŵanthu akuvwiya azamukondwa navu kwamuyaya?

¹⁸ Ŵanthu akuvwiya azamukondwa ukongwa chifukwa azamuyanjanga Yehova kweniso kumusopa kwamuyaya ndipu chenichi ntchinthu chakuzirwa ukongwa kuluska vosi. Ŵanthu wo ŵe ndi chilindizga chakuzija pacharu chapasi, azamukondwa so kuphwere charu chakutowa ichi cho Yehova wanguchilenga kuti chije muzi wawu. Pambula kuswera Ufumu waku Chiuta uchitiskengi kuti charu kweniso vinthu vosi vizije so vakutowa. Yesu wazamumalisa masuzgu ngosi ngo ngangwamba Adamu ndi Heva ŵati asankha kutuwa mubanja laku Chiuta. Yehova wazamuyuska ŵanthu mamiliyoni nganandi ndipu wazakuŵapaska mwaŵi wakuja ndi umoyu kwamuyaya kwambula kutama pacharu chapasi, cho chazamusintha kuja paradayisu. (Luka 23:42, 43) Asani ŵanthu a mubanja la pacharu chapasi laku Yehova azija akufikapu, weyosi wazamulongo “unkhankhu ndi ulemu” wo Davidi wangulemba.—Salimo 8:5.

19. Kumbi titenere kukumbukanji?

¹⁹ Asani mwe mugulu la “mzinda ukulu,” mulindizga vinthu vamampha ukongwa kunthazi. Chiuta watikuyanjani ndipu wakhumba kuti muje mubanja laki. Mwaviyo, chitani vosi vo mungafiska kuti mumukondwesi. Zuŵa lelosi muŵanaŵaniyengi vinthu vo Chiuta walayizga. Muwonengi kuti mwaŵi wo mwe nawu wakusopa Awusemwi akuchanya ngwakuzirwa kweniso muwongengi mwaŵi wakuzimuthamika kwamuyaya!