NKHANI YAKUSAMBIRA YA NAMBALA 33
Yehova Waphwere Ndipuso Kuvikiliya Ŵanthu Ŵaki
“Jisu laku Yehova lilereska ŵanthu wo atimuwopa.”—SALIMO 33:18.
SUMU 4 “Yehova Ndi Muliska Wangu”
VO TISAMBIRENGI MU NKHANI IYI *
1. Ntchifukwa wuli Yesu wangupempha Yehova kuti wavikiliyi akusambira ŵaki?
USIKU wakuti mawa laki wafwengi, Yesu wangupempha mwapade kwa Awisi akuchanya. Iyu wangupempha Yehova kuti wavikiliyi akusambira ŵaki. (Yoha. 17:15, 20) Chinanga kuti nyengu zosi Yehova waphwere kweniso kuvikiliya ŵanthu ŵaki, kweni Yesu wanguziŵa kuti akusambira ŵaki azamususkika ukongwa ndi Satana. Yesu wanguziŵa so kuti yiwu azamukhumbika chovyu chaku Yehova kuti akhwechi mauryarya ngaku Dyaboli.
2. Mwakukoliyana ndi Salimo 33:18-20, ntchifukwa wuli tikhumbika cha kopa asani tikumana ndi masuzgu?
2 Charu chaku Satana ichi, chichitiska kuti Akhristu auneneska akumanengi ndi masuzgu nganandi. Tikumana ndi masuzgu ngo ngangatiguŵiska kweniso chinanga ndi ngo ngatesa kugomezgeka kwidu kwaku Yehova. Kweni nge mo tiwoniyengi mu nkhani iyi, tikhumbika kopa chechosi cha. Yehova wawona masuzgu ngo tikumana nangu ndipu ngwakunozgeka kutiwovya kuti tikunthiyepu. Tiyeni tikambiskani vakuwoniyapu viŵi va mu Bayibolu vo vilongo kuti Yehova ‘walereska ŵanthu wo atimuwopa.’—Ŵerengani Salimo 33:18-20.
ASANI TITIJIVWA KUTI TE TIJA
3. Kumbi mphanyengu niyi po tingajivwa kuti te tija?
3 Chinanga kuti te ndi abali ndi azichi anandi mumpingu, kweni nyengu zinyaki tingajivwa kuti te tija. Mwakuyeruzgiyapu, achinyamata angajivwa kuti ŵe ŵija asani akonkhoske anyawu vo agomezga kusukulu pamwenga asani asamiya ku mpingu wasonu. Tanyaki tingaguŵa pamwenga kusuzgika ndi maŵanaŵanu ngaheni, tichiŵanaŵana kuti tilimbanengi navu tija venivi. Tingatondeka kukambiyaku anyidu mo tivwiya chifukwa cha kufipa mtima kuti ativwisengi cha. Ndipu nyengu zinyaki tingakayika asani walipu yo watitiŵanaŵaniya nadi. Kwali titijivwa kuti te tija pa chifukwa wuli, nyengu zinyaki tingafipa mtima ndipuso kujivwa kuti tilivi wakutiwovya. Kweni Yehova wakhumba cha kuti tijivwengi viyo. Chifukwa wuli?
4. Ntchifukwa wuli mchimi Eliya wangukamba kuti: “Ini pe ndini ndajaku wamoyu”?
4 Tiyeni tikambiskani chakuwoniyapu cha munthu wakugomezgeka Eliya. Yezebeli wangulapizga kuti wamubayengi, mwaviyo iyu wanguthaŵa kwa mazuŵa ngakujumpha 40 kuti wataski umoyu waki. (1 Mafu. 19:1-9) Pakumaliya we yija mumphanji, wanguliriya Yehova kuti: “Ini pe ndini ndajaku [mchimi] wamoyu.” (1 Mafu. 19:10) Kweni mucharu ichi mwenga so achimi anyaki; Obadiya wangufiska kutaska achimi 100 wo Yezebeli wakhumbanga kuŵabaya. (1 Mafu. 18:7, 13) Sonu ntchifukwa wuli Eliya wajivwanga kuti wenga yija? Kumbi iyu wanguŵanaŵana kuti achimi wosi wo Obadiya wangutaska ŵenga kuti ŵafwa pa nyengu iyi? Kumbi panyaki wajivwanga kuti we yija chifukwa waŵanaŵananga kuti pengavi munthu weyosi yo wangwamba kuteŵete Yehova limoza ndi iyu, chinanga kuti Yehova wangulongo kuti ndi Chiuta wauneneska pa Phiri la Karimeli? Pamwenga wawonanga kuti pengavi yo waziŵanga kuti umoyu waki wenga pangozi pamwenga wakayikiyanga asani penga munthu weyosi yo wamuŵanaŵaniyanga? Bayibolu likonkhoska vinandi cha vakukwaskana ndi mo Eliya wavwiyanga. Kweni cho tiziŵa ntchakuti Yehova wanguvwisa chifukwa cho Eliya wavwiyanga kuti we yija ndipuso mo Iyu wangamuwovye.
Asani titijivwa kuti te tija, kumbi tisambira fundu ya kupembuzga niyi pa mo Yehova wanguwovye Eliya? (Wonani ndimi 5-6)
5. Kumbi Yehova wanguchitanji kuti wasimikiziyi Eliya kuti wenga yija cha?
5 Yehova wanguwovya Eliya mu nthowa zinandi. Iyu wanguchiska Eliya kuti wakambi maŵanaŵanu ngaki. Kaŵi kosi wangufumba Eliya kuti: “Uchitanji kunu?” (1 Mafu. 19:9, 13) Kaŵi kosi, Yehova wanguvwisiya Eliya wachimukonkhoske mo wavwiyanga. Yehova wangumuka Eliya mwa kumulongo kuti Iyu walipu ndipuso kuti We ndi nthazi ukongwa. Iyu wangusimikiziya so Eliya kuti penga Ayisirayeli anyaki anandi wo ŵenga ŵeche kusopa Iyu. (1 Mafu. 19:11, 12, 18) Tikayika cha kuti Eliya wanguvwa umampha wati wapunguliya mtima waki kwaku Yehova kweniso kuvwa vo Iyu wangumumuka. Yehova wangumupaska mauteŵeti nganyaki ngakuzirwa Eliya. Iyu wangumukambiya kuti wasankhi Hazayeli kuti waje fumu ya ku Siriya, wasankhi Yehu kuti waje fumu ya ku Isirayeli kweniso Elisha kuti waje mchimi. (1 Mafu. 19:15, 16) Chifukwa chakuti Yehova wangupaska Eliya mauteŵeti ngenanga, vingumuwovya kuti waŵikengi maŵanaŵanu ngaki pa vinthu vamampha. Chiuta wangumupaska so Elisha mubwezi waki wa pamtima yo wamuwovyanga. Kumbi Yehova wangakuwovyani wuli asani mutijivwa kuti mwe mwija?
6. Kumbi ndi vinthu wuli vo mungapempha kwaku Yehova asani mutijivwa kuti mwe mwija? (Salimo 62:8)
6 Yehova wakhumba kuti mupempherengi kwaku iyu. Iyu wawona masuzgu ngo mukumana nangu ndipu watikusimikiziyani kuti wavwisiyengi mapempheru nginu nyengu yeyosi. (1 Ate. 5:17) Iyu wakondwa kuvwisiya kwa ateŵeti ŵaki. (Nthanthi 15:8) Kumbi ndi vinthu wuli vo mungapempha kwaku Yehova asani mutijivwa kuti mwe mwija? Mujuliyeni mtima winu Yehova nge mo Eliya wanguchitiya. (Ŵerengani Salimo 62:8.) Mukambiyeni vo vitikufipiskani mtima kweniso mo muvwiya. Mupempheni Yehova kuti wakuwovyeni kukunthiyapu asani mwaguŵa. Mwakuyeruzgiyapu, asani mutijivwa kuti mwe mwija ndipuso muchita mantha kupharazga kusukulu, mupempheni Yehova kuti wakuwovyeni kuja ndi chiganga. Mungamupempha so kuti wakupaskeni zeru kuti mukonkhoski vo mugomezga mwalusu. (Luka 21:14, 15) Asani musuzgika ndi maŵanaŵanu ngaheni, pemphani Yehova kuti wakuwovyeni kuti mukambiyi Mkhristu wakukhwima vo vitikusuzgani. Mungamupempha Yehova kuti wamuwovyi Mkhristu mwenuyu kuti wakuvwiseni. Mupunguliyeni mtima winu Yehova, wonani mo wamukiya mapempheru nginu kweniso zomerezani kuti ŵanthu anyaki akuwovyeni. Asani mwachita viyo, muvwengeku umampha.
Kumbi musaniya nthowa za kusazgiyaku uteŵeti winu kweniso kupharazgiya limoza ndi ŵanthu anyaki? (Wonani ndimi 7)
7. Kumbi mwasambiranji kwaku Mauricio?
7 Tosi Yehova watipaska ntchitu yakukhumbika ukongwa yakuti tichiti. Mungasimikiza kuti Yehova wawona kweniso wawonga vosi vo muchita pakufiska uteŵeti winu mumpingu kweniso pa ntchitu yakupharazga. (Salimo 110:3) Kumbi kutangwanika pa ntchitu yeniyi, kungakuwovyani wuli asani mutijivwa kuti mwe mwija? Tiyeni tikambiskani chakuwoniyapu cha mubali wachinyamata zina laki Mauricio. * Pati pajumpha nyengu yimanavi kutuliya po iyu wangubatizikiya, kamana ndi kamana mubwezi waki wapamtima wangwamba kuwuleka uneneska. Mauricio wangukamba kuti: “Ndati ndawona kuti waleka kuteŵete Yehova ndingwamba kujikayikiya. Ndawonanga kuti panyaki ndifiskengi cha layizgu langu la kujipereka kwaku Yehova kweniso kulutirizga kuja mugulu laki. Ndingujivwa kuti nde ndija ndipu ndinguŵanaŵana kuti palivi yo wangavwisa mo ndivwiya.” Kumbi ndi vinthu wuli vo vinguwovya Mauricio? Iyu wanguti: “Ndingwamba kupharazga ukongwa. Venivi vingundiwovya kuti ndileki kujiŵanaŵaniya ŵaka ndija kweniso mo ndavwiyanga. Ndakondwanga kweniso ndajivwanga kuti nde ndija viŵi cha asani ndipharazga ndi anyangu.” Kukamba uneneska, chinanga tingapharazga masu ndi masu cha ndi anyidu, tingachiskika asani tipharazgiya nawu limoza mwakulemba kalata kweniso pafoni. Kumbi ndi vinthu wuli so vinyaki vo vinguwovya Mauricio? Iyu wangukamba so kuti: “Ndajitangwamiskanga so ndi ntchitu za ku mpingu. Ndanozgekiyanga umampha kweniso kukamba mwalusu nkhani za akusambira pa maunganu. Venivi vingundiwovya kujivwa kuti Yehova ndipuso ŵanthu anyaki atindiwona kuti nde wakukhumbika.”
ASANI TAGUŴA NDI MAYESERU NGAKULU
8. Kumbi tingavwa wuli asani takumana ndi mayeseru ngakulu?
8 Mu mazuŵa nganu ngakumaliya, tikumanengi ndi mayeseru nganandi. (2 Timo. 3:1) Kweni tingazizwa ndi nyengu yo mayeseru nganyaki ngangachitikiya ndipuso mtundu wa mayeseru ngo. Mwamabuchibuchi tingakavuka, angatisaniya ndi matenda ngakofya pamwenga munthu yo tamuyanjanga wangatayika. Pa nyengu yeniyi, tingasuzgika maŵanaŵanu kweniso tingaguŵa, ukongwa asani takumana ndi mayeseru ngakundondozana ŵaka pamwenga mayeseru nganandi pa nyengu yimoza. Kweni tikumbukengi kuti Yehova wawona vo tikumana navu ndipu ndi chovyu chaki tingakunthiyapu mayeseru nga mtundu wewosi.
9. Konkhoskani mayeseru nganyaki ngo Yobu wangukumana nangu.
9 Tiyeni tiwoni chakuwoniyapu cha munthu wakugomezgeka Yobu. Iyu wangukumana ndi mayeseru nganandi ngakuguŵiska mu kanyengu kamanavi ŵaka. Pa zuŵa limoza pe, Yobu wangukambirika kuti viŵetu vaki vabika kweniso ateŵeti ŵaki ndi ŵana ŵaki abayika. (Yobu 1:13-19) Weche ndi chitima chikulu, Yobu wangutama matenda ngakupweteka kweniso ngakunanga liŵavu. (Yobu 2:7) Vinthu vingufika paheni ukongwa kwaku Yobu, mwakuti wangukamba kuti: “Ndawutinkha umoyu wangu, ndikhumba cha kulutirizga kuja ndi umoyu.”—Yobu 7:16.
Yehova wakambiya Yobu mo Iyu waphwere vinthu vosi vo wakulenga kuti wamusimikiziyi kuti watimuyanja kweniso wamuphweriyengi (Wonani ndimi 10)
10. Kumbi Yehova wangumuwovya wuli Yobu kuti wakunthiyepu mayeseru ngo wangukumana nangu? (Wonani chithuzi cho che pachikokhombi.)
10 Yehova wawonanga mayeseru ngaku Yobu. Chifukwa chakuti Yehova wamuyanjanga Yobu, wangumuwovya kuti wafiski kukunthiyapu mayeseru ngenanga. Yehova wangulongoro ndi Yobu ndipu wangumukumbusa kuti We ndi zeru zambula kumala kweniso kuti waphwere vinthu vo wakulenga. Iyu wangukamba vakukwaskana ndi nyama zinandi zakofya. (Yobu 38:1, 2; 39:9, 13, 19, 27; 40:15; 41:1, 2) Yehova wangugwiriskiya so ntchitu mnyamata wakugomezgeka Elihu kuti wachiski Yobu kweniso kumupembuzga. Elihu wangumusimikiziya Yobu kuti nyengu zosi Yehova watumbika ateŵeti ŵaki chifukwa cha kukunthiyapu kwawu. Kweni Yehova wanguchitiska so Elihu kuti wamupaski ulongozgi wachanju Yobu. Elihu wanguwovya Yobu kuti waleki kujiŵanaŵaniya ukongwa, mwakumukumbusa kuti isi te kanthu kamana ukongwa pa kuyeruzgiya ndi Yehova Mlengi wa chilengedu chosi. (Yobu 37:14) Yehova wangumupaska so uteŵeti Yobu. Iyu wangumukambiya kuti wapemphere anyaki atatu wo angubuda. (Yobu 42:8-10) Kumbi Yehova watitiwovya wuli mazuŵa nganu asani tikumana ndi mayeseru ngakulu?
11. Kumbi Bayibolu lititipembuzga wuli asani tikumana ndi mayeseru?
11 Chinanga kuti Yehova walongoro nasi mwakudunjika cha nge mo wanguchitiya ndi Yobu, kweni walongoro nasi kuziya mu Mazu ngaki Bayibolu. (Aro. 15:4) Iyu watitipembuzga mwakutipaska chilindizga cha munthazi. Tiyeni tikambiskani fundu zimanavi ŵaka zakutuliya mu Bayibolu zo zingatipembuzga asani takumana ndi mayeseru. Kuziya mu Malemba, Yehova watitisimikiziya kuti palivi cho ‘chingatipatuska ku chanju chaki’ chinanga ngangaŵa mayeseru ngakulu. (Aro. 8:38, 39) Iyu watitisimikiziya so kuti we “pafupi ndi wosi wo atimudana.” (Salimo 145:18) Yehova watitikambiya kuti asani titimuthemba, tingakunthiyapu mayeseru ngengosi kweniso tingakondwa ukongwa chinanga mphanyengu yo tisuzgika. (1 Akori. 10:13; Yako. 1:2, 12) Mazu ngaku Chiuta ngatitikumbuska so kuti mayeseru ngo tikumana nangu sonu, ngamana kweniso nga kanyengu kamanavi pa kungayeruzgiya ndi mphotu ya umoyu wamuyaya yo tazamulonde. (2 Akori. 4:16-18) Yehova watitisimikiziya kuti wazamutuzgapu cho chitambisa mayeseru, yo ndi Satana Dyaboli ndipuso ŵanthu wo achita vinthu viheni nge iyu. (Salimo 37:10) Kumbi mukuloŵeza mavesi nganyaki nga mu Bayibolu ngakupembuzga ngo ngangazikuwovyani kukunthiyapu mayeseru kunthazi?
12. Kumbi Yehova wakhumba kuti tichitengenji kuti tiyanduwengi ukongwa ndi Mazu ngaki?
12 Yehova wakhumba kuti tipatuwengi nyengu yakusambiriya Bayibolu nyengu zosi kweniso kuti tilungurukengi pa vo tiŵerenga. Asani tigwiriskiya ntchitu vo tisambira, chivwanu chidu chikuwa ndipu tija pa ubwezi wakukho ndi Awusefwi akuchanya. Ndipu pakumaliya paki tija ndi nthazi zakukunthiyapu mayeseru. Yehova wapereka so mzimu waki wakupaturika ku ŵanthu wo athemba Mazu ngaki. Ndipu mzimu wenuwu ungatipaska “nthazi yakujumpha yo tituŵa nayu” kuti tikunthiyepu mayeseru ngengosi.—2 Akori. 4:7-10.
13. Kumbi chakurya chauzimu cho “kapolu wakugomezgeka ndi wazeru” watitipaska chititiwovya wuli kukunthiyapu mayeseru?
13 Yehova wagwiriskiya ntchitu “kapolu wakugomezgeka ndi wazeru” kutipaska nkhani zinandi, mavidiyo kweniso sumu kuti vitiwovyi kuja ndi chivwanu chakukho ndipuso kuja masu mwauzimu. (Mate. 24:45) Tikhumbika kugwiriskiya ntchitu umampha vinthu vosi vo Yehova watitipaska. Pambula kuswera yapa, Mzichi munyaki wa ku United States wanguwonga ukongwa chakurya chauzimu chosi cho tipaskika. Iyu wanguti: “Mu vyaka 40 vo ndaja ndichiteŵete Yehova, chivwanu changu chayeseka mwakuwerezawereza.” Iyu wangukumana ndi mayeseru ngakulu. Mwakuyeruzgiyapu, ambuyaki anthulumi angubayika ndi dilayiva yo wanguloŵe, apapi ŵaki angutama ukongwa mpaka kufwa kweniso iyu wangutamapu kasa kaŵi. Kumbi ndi vinthu wuli vo vingumuwovya kukunthiyapu? Iyu wanguti: “Yehova waja wachindiwovya nyengu zosi. Chakurya chauzimu cho waja wachipereka kuziya mwa kapolu wakugomezgeka ndi wazeru chandiwovya kukunthiyapu. Chifukwa cha venivi nditijivwa nge mo Yobu wanguvwiya yo wanguti: ‘Mpaka po ndifwiyengi, ndilekengi cha kuja wakugomezgeka!’”—Yobu 27:5.
Kumbi tingawovya wuli ŵanthu anyaki mumpingu? (Wonani ndimi 14)
14. Kumbi Yehova watiŵagwiriskiya wuli ntchitu abali ndi azichi ŵidu kuti atiwovyi asani takumana ndi mayeseru? (1 Atesalonika 4:9)
14 Yehova wasambiza ŵanthu ŵaki kuti ayanjanengi kweniso kupembuzgana pa nyengu ya masuzgu. (2 Akori. 1:3, 4 ŵerengani 1 Atesalonika 4:9.) Nge mo Elihu wanguchitiya, abali ndi azichi ŵidu nawu mbakunozgeka kutiwovya kuti tilutirizgi kuja akugomezgeka asani tikumana ndi masuzgu. (Machi. 14:22) Mwakuyeruzgiyapu, wonani mo abali ndi azichi a mumpingu wo Diane wawunganaku angumuchiskiya kweniso mo angumuwovye kuti walutirizgi kuja wakukho mwauzimu mulumu waki wati watama ukongwa. Iyu wanguti: “Venga vakusuzga ukongwa. Kweni tinguwona mo Yehova wangutiwovye mu myezi yakusuzga yeniyi. Mpingu widu unguchita vinthu vinandi kuti utiwovyi. Abali ndi azichi atiyendiyanga, kutimbiya mafoni ndipuso ativumbatiyanga. Vosi venivi vingutiwovya kuti tikunthiyepu. Chifukwa chakuti nditendesa cha galimotu, abali ndi azichi awonesesanga kuti ndaluta ku maunganu kweniso mu uteŵeti asani nde ndi mpata.” Vakukondwesa ukongwa kuja mugulu la ŵanthu wo atanjana viyo!
MUWONGENGI CHIFUKWA CHAKUTI YEHOVA WATIKUPHWERIYANI
15. Ntchifukwa wuli tisimikiza kuti tingakunthiyapu mayeseru?
15 Tosi tikumanengi ndi mayeseru nga mtundu unyaki. Kweni nge mo tasambiriya tiŵengi tija cha asani takumana ndi mayeseru. Nge mo da wachanju wachitiya, nyengu zosi Yehova wawona vo tikumana navu. Iyu we nasi ndipu ngwakunozgeka kuvwisiya asani titimupempha kuti watiwovyi kweniso ngwakukhumbisiska kutiwovya. (Yesa. 43:2) Tisimikiza kuti tingakunthiyapu masuzgu ngo tikumana nangu chifukwa chakuti iyu watitipaska vosi vo tikhumbika kuti tikunthiyepu. Iyu watipaska mphasu ya pempheru, Bayibolu, chakurya chauzimu chinandi ndipuso abali wo atitiyanja pacharu chosi chapasi, kuti vitiwovyi pa nyengu ya masuzgu.
16. Kumbi tingachita wuli kuti Yehova walutirizgi kutiphwere?
16 Tiwonga ukongwa kuti te ndi Awusefwi akuchanya wo atitilereska! “Mitima yidu yikondwa chifukwa chaku iyu.” (Salimo 33:21) Tingalongo kuti tiwonga Yehova chifukwa cha kutiphwere, asani tigwiriskiya ntchitu umampha vinthu vosi vo watitipaska kuti watiwovyi. Tikhumbika so kuchitapu kanthu kuti Chiuta walutirizgi kutiphwere. Mu mazu nganyaki tingakamba kuti, asani tilutirizgengi kuyesesa kumuvwiya Yehova ndi kuchita cho ntchamampha mu masu mwaki, iyu walutirizgengi kutilereska mpaka muyaya!—1 Petu. 3:12.
SUMU 30 Ada Ŵangu, Chiuta Wangu Ndipuso Bwezi Langu