1-2. (a) Kumbi Yehova watiŵawona wuli ŵanthu wo achitiya dala ubudi? (b) Kumbi Yehova wakhazanji ku ŵanthu wo achita ubudi ukulu?

 YEHOVA ndi Chiuta wakulekere vinthu cha, iyu wazomereza cha ubudi. (Salimo 5:​4-6) Iyu wakhumba kuti titumbikengi fundu zaki za urunji zo zisanirika mu Mazu ngaki. Mbuneneska kuti Yehova wakhaza kuti ŵanthu ambula kufikapu achitengi vinthu mwakufikapu cha. (Salimo 130:​3, 4) Kweni iyu wazomereza cha kuti ‘ŵanthu wo atopa Chiuta cha asaniriyengepu mwaŵi pa wezi waki ukulu kuti achitengi jalidu liheni mwambula soni.’ (Yuda 4) Ndichu chifukwa chaki Bayibolu likamba kuti “ŵanthu ambula kopa Chiuta” azamubayika pa nkhondu ya Aramagedoni.—2 Petu. 3:7; Chivu. 16:16.

² Kweni Yehova wakhumba cha kuti munthu weyosi wazibayiki. Nge mo takambiyapu kali mu nkhani zajumpha mu magazini iyi, Bayibolu likamba mwakuvwika umampha kuti iyu “wakhumba kuti weyosi walapi.” (2 Petu. 3:9) Ŵara mu mpingu ayezga Yehova asani awovya mwakuzikira munthu yo wachita ubudi kuti wasinthi nthowa zaki ndi kuwere kwaku Yehova. Kweni nyengu zinyaki ŵanthu wo achita ubudi ukulu alapa cha. (Yesa. 6:9) Anyaki alutirizga kuchita vinthu viheni chinanga kuti ŵara ayesesa kuŵawovya mwakuwerezawereza kuti alapi. Kumbi ŵara atenere kuchitanji asani vaŵa viyo?

 “MUMUMIKI DANKHA MU MPINGU”

3. (a) Kumbi Bayibolu likamba kuti ndi vinthu wuli vo vitenere kuchitikiya ŵanthu wo achita ubudi ukulu kweni alapa cha? (b) Ntchifukwa wuli tingakamba kuti munthu yo wachita ubudi ukulu wasankhiya dala kumikika dankha mu mpingu?

³ Asani munthu yo wachita ubudi ukulu walapa cha, ŵara alondo ulongozgi wa pa 1 Akorinto 5:​13, wo ukamba kuti: “Mumumiki dankha mu mpingu munthu muheni yo.” Tingakamba kuti munthu yo wachita ubudi wasankhiya dala kuti venivi vimuchitikiyi; iyu wavuna vo wakupanda. (Aga. 6:7) Ntchifukwa wuli tingakamba viyo? Chifukwa wakaniya dala kuvwiya ulongozgi wo wapaskikapu mwakuwerezawereza kutuliya ku ŵara wo ungamuwovya kuti walapi. (2 Mafu. 17:​12-15) Vo iyu wachita vilongo kuti wakana kuvwiya marangu ngaku Yehova.—Doto. 30:​19, 20.

4. Ntchifukwa wuli chipharazgu chiperekeka ku mpingu asani munthu wambula kulapa wamikika dankha mu mpingu?

⁴ Asani munthu wambula kulapa wamikika dankha mu mpingu, chipharazgu chiperekeka kuti mpingu uziŵi kuti munthu yo wamikika dankha kuja Kaboni waku Yehova. a Chipharazgu chenichi chiperekeka kuti chilengesi munthu yo wachita ubudi cha. Mumalu mwaki, chitovya kuti abali ndi azichi alondongi ulongozgi wa mu Malemba wakuti ‘aleki kwanjana’ pamwenga ‘kurya nayu chakurya munthu waviyo.’ (1 Akori. 5:​9-11) Ulongozgi wenuwu ngwakovya ukongwa. Wakutumika Paulo wangukamba kuti: “Chakutupisa chimanavi, chitupisa bulunga losi la fulawu wakukasa.” (1 Akori. 5:6) Ŵanthu akubuda ambula kulapa angatimbanyiza anyawu wo atesesa kulondo fundu za urunji zaku Yehova.—Nthanthi 13:20; 1 Akori. 15:33.

5. Kumbi munthu yo wamikika dankha mu mpingu tikhumbika kumuwona wuli, nanga ntchifukwa wuli?

⁵ Kumbi titenere kumuwona wuli Mkhristu yo wamikika dankha mu mpingu? Chinanga kuti tichitiya nayu limoza cha vinthu, kweni iyu walutiya limu cha, mumalu mwaki timuwonengi nge mbereri yo yasoŵa. Mbereri yo yalanda yingawere so ku zinyaki. Kumbukani kuti mbereri yeniyi, yo yalanda yikujipereka kwaku Yehova. Vachitima kuti pasonu panu yichita vinthu mwakukoliyana ndi vo yikulayizga kwaku Yehova cha ndipu chifukwa cha venivi yingataya mwaŵi wakuzilonde umoyu wamuyaya. (Ezeki. 18:31) Kweni chifukwa chakuti nyengu yecheŵaka kweniso Yehova ngwakunozgeka kumulongo lisungu, tikhaza kuti munthu yo wangawere so kwaku Iyu. Kumbi ŵara angamuwovya wuli munthu yo wakumikika dankha mu mpingu?

KUMBI ŴARA ANGAŴAWOVYA WULI ŴANTHU WO AKUMIKIKA DANKHA MU MPINGU?

6. Kumbi ŵara achitanji kuti awovyi munthu yo wamikika dankha mu mpingu?

⁶ Kumbi asani munthu munyaki wamikika dankha mu mpingu, ŵara aleke limu kumuwovya kuti wawere kwaku Yehova? Awa! Asani akambiya munthu yo wachita ubudi ukulu kuti wamikika dankha mu mpingu, komiti ya ŵara yitimukonkhoske vo wakhumbika kuchita kuti wawere so mu mpingu. Kweni ŵara achita so vinyaki. Kanandi yiwu akambiya munthu yo wamikika dankha mu mpingu kuti akumanengi nayu so nyengu yinyaki asani pajumpha myezi yimanavi kuti awoni asani wasintha. Asani munthu yo wazomera kuti wakumani so ndi ŵara, yiwu atenere kumuchiska kuti walapi ndi kuwere mu mpingu. Chinanga kuti pa nyengu yeniyi walapa cha, ŵara anozgengi mbwenu kuti azikumani nayu so nyengu yinyaki.

7. Kumbi ŵara ayezga wuli lisungu laku Yehova asani awovya munthu yo wamikika dankha mu mpingu? (Yeremiya 3:12)

 ⁷ Ŵara atesesa kuyezga Yehova pa nkhani yakulongo lisungu asani awovya munthu yo wakumikika dankha mu mpingu. Mwakuyeruzgiyapu, Yehova wangulindizga cha kuti ŵanthu ŵaki ambula kuvwiya alapi dankha wechendaŵawovyi. Mumalu mwaki, Yehova ndiyu wangwamba kuchitapu kanthu kuŵawovya, yiwu ŵechendalongo mtima wakulapa. Nge mo tinguwone mu nkhani yachiŵi, Yehova wangulongo lisungu mwakukambiya mchimi Hoseya kuti waweriyani ndi muwolu waki yo walutirizganga kuchita ureŵi. (Hose. 3:1; Mala. 3:7) Mwakuyezga Yehova, ŵara mu mpingu akhumbisiska kuti munthu yo wanguchita ubudi wawere kwaku Yehova, ndipu yiwu akhwimisa vinthu cha.—Ŵerengani Yeremiya 3:12.

8. Kumbi ntharika ya mwana wakusoŵa yititiwovya wuli kuvwisa lisungu laku Yehova? (Luka 15:7)

⁸ Kumbukani ntharika yaku Yesu ya mwana wakusoŵa yo tingukambiskana mu nkhani yachiŵi mu magazini yeniyi. Ŵati awona kuti mwana wawu wawere kunyumba kwawu, awisi “angumutchimbiriya, angumuvumbatiya ndi kumufyofyontha.” (Luka 15:20) Wonani kuti ada mu ntharika iyi, anguchita kulindizga cha kuti mwana wawu waŵapemphi kuti amugowoke. Mumalu mwaki angwamba ndiwu kuchitapu kanthu nge mo da weyosi yo watanja mwana waki wangachitiya. Ŵara nawu ayesesa kulongo jalidu lenili asani awovya munthu yo walanda. Yiwu akhumba kuti mbereri zakulanda zenizi “ziwere kwaku Yehova.” (Luka 15:​22-24, 32) Asani munthu yo wangubuda walapa, kuchanya kweniso pacharu chapasi patuŵa likondwa likulu!—Ŵerengani Luka 15:7.

9. Kumbi Yehova wachiska ŵanthu wo anguchita ubudi ukulu kuti achitenji?

⁹ Kutuliya pa vo tasambira, viwoneke limu kuti Yehova wazomereza cha kuti ŵanthu amtima wambula kulapa alutirizgi kuja mu mpingu. Kweni watiŵajowole limu cha ŵanthu ŵenaŵa. Iyu wakhumba kuti awere so kwaku iyu. Lemba la Hoseya 14:4 lilongo mo Yehova wawone ŵanthu wo anguchita ubudi ukulu wo alapa. Lemba lenili likamba kuti: “Ndazamuchizga kuleka kugomezgeka kwawu. Ndazakuŵayanja mwakukhumba kwangu, chifukwa chakuti ukali wangu watuwaku.” Kuziŵa mo Yehova wavwiya kungawovya kuti ŵara ajengi masu kuti aziŵengi asani munthu wakubuda wayamba kulapa. Ndipu venivi visimikiziya ŵanthu wo aleka Yehova kuti weche kuŵayanja ndipu wakhumba kuti awere kwaku iyu mwaliŵi.

10-11. Kumbi ŵara angawovya wuli ŵanthu wo akumikika ndankha mu mpingu vyaka vinandi vo vajumpha?

¹⁰ Kumbi ŵara angachita wuli ndi ŵanthu wo akumikika dankha mu mpingu, ndipu panyaki pajumpha vyaka vinandi kutuliya po akumikikiya dankha mu mpingu? Vingaŵa kuti ŵanthu ŵenaŵa akuleka kuchita ubudi wo unguŵachitiska kuti amikiki dankha mu mpingu. Ndipu nyengu zinyaki angakumbuka ndi kukumbuka so cha chifukwa cho akumikikiya dankha mu mpingu. Kwali aja nyengu yitali wuli kubwalu kwa mpingu, ŵara atenere kuŵapenja kweniso kuŵayende. Pa nyengu yo ŵara akumana nawu angapemphera kwaku Yehova ndipuso kuŵachiska kuti awere mu mpingu. Asani munthu waja kubwalu kwa mpingu kwa vyaka vinandi, waja kuti ngwakulopwa ukongwa mwauzimu. Mwaviyo, asani munthu yo walongo kuti wakhumba kuwere so mu mpingu, ŵara anganozga kuti mubali pamwenga mzichi wasambirengi nayu Bayibolu chinanga kuti pasonu panu wechendawezeke mu mpingu. Ndipu ŵara pe  ndiwu anganozga kuti munthu munyaki wasambirengi Bayibolu ndi munthu yo wakumikika dankha mu mpingu.

¹¹ Ŵara ayesesa kuyezga Yehova pa nkhani ya lisungu. Mwaviyo yiwu ayesesa kupenja kweniso kuwovya ŵanthu anandi wo akumikika dankha mu mpingu kuti aziŵi kuti khomu ndakujulika. Asani munthu yo wanguchita ubudi walongo mtima wakulapa kweniso wakuleka vinthu viheni vo wachitanga, wangawezeke mu mpingu mwaliŵi.—2 Akori. 2:​6-8.

12. (a) Kumbi ŵara akhumbika kuphwere ukongwa pa vakuchitika nivi? (b) Ntchifukwa wuli tikhumbika cha kuŵanaŵana kuti ŵanthu anyaki Yehova wangaŵachitiya lisungu cha? (Wonaniso mazu ngamumphata.)

¹² Nyengu zinyaki ŵara akhumbika kuphwere ŵechendasankhi kuweze mu mpingu munthu yo wanguchita ubudi ukulu. Mwakuyeruzgiyapu, asani munthu wanguchitiya nkhaza  mwana, wenga wampatuku, pamwenga wangumalisa nthengwa yaki mwachinyengu kuti watorani ndi munthu munyaki, ŵara akhumbika kuwonesesa kuti munthu yo walapa nadi. (Mala. 2:14; 2 Timo. 3:6) Ŵara atenere kuvikiliya mskambu. Kweni pa nyengu yeniyo pe, ŵara akhumbika kuziŵa kuti Yehova walondere munthu weyosi wakubuda yo walapa nadi ndipu wakuleka kuchita vinthu viheni. Mwaviyo, chinanga kuti ŵara akhumbika kuchita vinthu mwakuphwere ukongwa ndi ŵanthu wo anguchitiya chinyengu anyawu, kweni akhumbika cha kuchita vinthu mwakujumphisa mpaka kukamba kuti ŵanthu aviyo Yehova wangaŵachitiya lisungu cha. b—1 Petu. 2:10.

VO MPINGU UNGACHITA

13. Kumbi pe mphambanu wuli pa nkhani ya mo tichitiya vinthu ndi munthu yo wachenyeka ndi munthu yo wamikika dankha mu mpingu?

¹³ Nge mo tingusambiriya mu nkhani yajumpha, nyengu zinyaki apharazga kuti munthu wachenyeka. Asani vaŵa viyo, tilutirizga kuchitiya nayu limoza vinthu chifukwa tiziŵa kuti wakulapa kweniso wakuleka kuchita vinthu viheni. (1 Timo. 5:20) Iyu weche mu mpingu ndipu wakhumbika kuchiskika po wacheza ndi Akhristu anyaki. (Ahe. 10:​24, 25) Kweni venivi vipambana ukongwa ndi munthu yo wamikika dankha mu mpingu. ‘Tileka kwanjana’ nayu “chinanga nkhurya nayu munthu waviyo.”—1 Akori. 5:11.

14. Kumbi Akhristu angagwiriskiya wuli ntchitu njuŵi yawu yakusambizika Bayibolu pakuchita vinthu ndi munthu yo wakumikika dankha mu mpingu? (Wonaniso chithuzi.)

¹⁴ Kumbi vo takambiskana mu nkhani iyi vilongo kuti tilekiyengi limu kuchitiya nayu limoza vinthu munthu yo wamikika dankha mu mpingu mu nthowa yeyosi? Ndimu viliri cha. Mbuneneska kuti tingacheza nayu cha munthu waviyo. Kweni Mkhristu weyosi wangagwiriskiya ntchitu njuŵi yaki yakusambizika Bayibolu kudana munthu yo wakumikika dankha mu mpingu, panyaki yo ndi mubali waki pamwenga yo wenga mubwezi waki ukongwa kuti waluti ku maunganu nga mpingu. Nanga asani waza ku maunganu nga mpingu,  kumbi tikhumbika kuchita nayu wuli? Kuvuli kosi uku, tamutawuzganga cha munthu waviyo. Yapa napu Mkhristu weyosi wakhumbika kugwiriskiya ntchitu njuŵi yaki yakusambizika Bayibolu pa nkhani yeniyi. Anyaki angafwatuka kumutawuzga mwakudumuwa munthu mwenuyu pamwenga kumulondere pa maunganu. Kweni tikhumbika cha kukambiskana nayu nyengu yitali pamwenga kuchitiya nayu limoza vinthu vinyaki.

15. Kumbi mbayani wo akambika pa 2 Yohane 9-11? (Wonaniso bokosi lakuti “ Kumbi Yohane ndi Paulo Akambanga Ubudi Wakuyanana?”)

¹⁵ Anyaki angafumba kuti, ‘Asi Bayibolu likamba kuti Mkhristu yo watawuzgana ndi munthu yo wakumikika dankha mu mpingu wagaŵana nayu ntchitu zaki ziheni?’ (Ŵerengani 2 Yohane 9-11.) Nkhani yosi ya lemba ili yilongo kuti ulongozgi uwu ukamba va ŵanthu ampatuku pamwenga ŵanthu wo achiska anyawu kuti achitengi vinthu viheni. (Chivu. 2:20) Mwaviyo, asani munthu yo walutirizga kuchiska visambizu vampatuku pamwenga wachiska anyaki kuti achitengi vinthu vinyaki viheni, ŵara atenere cha kumuyende. Mbuneneska kuti munthu mwenuyu wangasintha kuti walapi. Kweni mpaka po wazisinthiya, titenere cha kumutawuzga pamwenga kumudaniya ku maunganu nga mpingu.

MUYEZGENGI YEHOVA PA NKHANI YA LISUNGU

16-17. (a) Kumbi Yehova wakhumba kuti ŵanthu wo akuchita ubudi ukulu achitenji? (Ezekiyeli 18:32) (b) Kumbi ŵara angalongo wuli kuti agwira ntchitu limoza ndi Yehova?

¹⁶ Kumbi tasambiranji mu nkhani zinkhondi zo ze mumagazini yinu? Yehova wakhumba cha kuti munthu weyosi wabayiki! (Ŵerengani Ezekiyeli 18:32.) Iyu wakhumba kuti ŵanthu wo akuchita ubudi ukulu awere so kwaku iyu. (2 Akori. 5:20) Ndichu chifukwa chaki nyengu zosi Yehova wapempha ŵanthu wo akuchita ubudi ukulu kuti alapi ndi kuwere kwaku iyu. Ŵara mu mpingu ŵe ndi mwaŵi wakugwiriya ntchitu limoza ndi Yehova po ayesesa kuwovya ŵanthu wo akuchita ubudi ukulu kuti alapi.—Aro. 2:4; 1 Akori. 3:9.

¹⁷ Ŵanaŵaniyani ŵaka likondwa lo lituŵa kuchanya asani munthu wakubuda walapa! Awusefwi akuchanya a Yehova akondwa ukongwa asani mbereri yawu yimoza yo yingusoŵa yawere mu mpingu. Tilutirizga kumuyanja ukongwa Yehova asani tiŵanaŵaniya lisungu laki kweniso wezi waki ukulu.—Luka 1:78.