Wakutumika Paulo wangulembe Akhristu a ku Tesalonika kuti: “Asani munyaki waleka kuvwiya mazu ngidu ngo nge mukalata iyi, munthu waviyo mumudindi chidindu.” (2 Ate. 3:14) Kali takambanga kuti ulongozgi wenuwu uluta ku ŵara. Asani munthu munyaki mu mpingu waleke dala kuvwiya fundu za mu Bayibolu chinanga kuti wapaskikapu ulongozgi mwakuwerezawereza, ŵara akambanga nkhani yakutcheŵesa mpingu. Asani nkhani yo yakambika, mupharazgi weyosi walekanga kucheza ndi munthu yo.

Kweni sonu pe kusintha. Ulongozgi waku Paulo ukamba vo Mkhristu weyosi pakuyija wangasankha kuchita mwakukoliyana ndi mo vinthu viliri. Mwaviyo, ŵara akhumbika cha kukamba nkhani yakutcheŵesa mpingu. Ntchifukwa wuli pe kusintha? Tiyeni tikambiskani ulongozgi waku Paulo mwakukoliyana ndi nkhani yosi.

Wakutumika Paulo wanguwona kuti anyaki mu mpingu “[ayendanga] mwambula kwenere.” Yiwu akananga kuvwiya ulongozgi wa mu Bayibolu. Ulendu wa kuvuli wo iyu wanguŵayende, wanguŵakambiya kuti: “Asani munthu munyaki wakhumba cha kugwira ntchitu, wangaryanga cha.” Kweni ŵanthu anyaki akananga mbwenu kugwira ntchitu kuti ajiphweriyengi chinanga kuti ŵenga akuti angafiska kuchita venivi. Kweniso yiwu asereriyanga pa nkhani zaŵeni zo zileka kuŵakwaska. Kumbi Akhristu akhumbikanga kuchita nawu wuli ŵanthu akwenda mwambula kwenere ŵenaŵa?—2 Ate. 3:​6, 10-12.

Wakutumika Paulo wangukamba kuti: “Mumudindi chidindu.” Mazu nga Chigiriki ngo kukutuliya mazu yanga ngang’anamuwa kuphwere kuti ukhwechi munthu yo wangakutimbanyiza. Paulo wangupereka ulongozgi wenuwu ku mpingu wosi, ku ŵara pe cha. (2 Ate. 1:1; 3:6) Mwaviyo, asani Mkhristu weyosi pakuyija wawona kuti Mkhristu munyaki wavwiya cha ulongozgi wa mu Malemba, wasankhanga kuleka “kuchitiya nayu vinthu limoza” munthu waviyo.

Kumbi venivi vang’anamuwanga kuti munthu mwenuyu amuwonengi nge munthu yo wamikika dankha mu mpingu? Awa, chifukwa Paulo wangukamba so kuti: “Mumulunguchizgengi nge mubali winu.” Mwaviyo, Mkhristu weyosi walutirizganga kuchitiya nayu vinthu limoza pa maunganu ndipuso mu uteŵeti. Kweni wasankhanga kuleka kucheza nayu pa vakuchitika vinyaki nge kuchita vakukondwesa pamwenga masaza. Chifukwa wuli? Paulo wangukamba kuti: “Kuti wachiti soni.” Asani Mkhristu wakwenda mwambula kwenere wadindika chidindu, wachitanga soni chifukwa cha nkharu yaki ndipu wasinthanga.—2 Ate. 3:​14, 15.

Kumbi Akhristu mazuŵa nganu angagwiriskiya wuli ntchitu ulongozgi wenuwu? Chakwamba, tikhumbika kusimikiza kuti munthu yo “watenda [nadi] mwambula kwenere” nge mo Paulo wangukambiya. Iyu wakambanga za ŵanthu wo tipambana vakusankha pa nkhani zo weyosi watende njuŵi yaki cha. Wakambanga so za ŵanthu wo atanja vinthu vakupambana ndi isi cha. Kweniso wakambanga ŵanthu wo atiguŵisa cha. Mumalu mwaki, Paulo wakambanga ŵanthu wo aleke dala kuvwiya ulongozgi wakuvwika umampha wa mu Malemba.

Mazuŵa nganu, asani tawona kuti Mkhristu munyidu wachitiya dala kuleka kuvwiya ulongozgi wa mu Malemba, a tingasankha kuleka kucheza nayu pamwenga kuchita nayu vinthu vinyaki vakukondwesa. Chifukwa chakuti munthu wakhumbika kusankha venivi pakuyija, tikhumbika cha kukambiskana ndi ŵanthu anyaki wo mba mubanja lidu cha. Ndipu tilutirizgengi kuchitiya nayu vinthu limoza pa maunganu kweniso mu uteŵeti. Asani wasintha nkharu yaki, mbwenu tiyambengi so kuchita nayu vinthu vosi mwakufwatuka.