Kumbi mungamuka mafumbu yanga ngo ngatuwa mu maganizini nga 2019 nga Chigongwi cha Alinda?

Kumbi layizgu laku Chiuta lakuti: “Palivi chidya chechosi cho chapangika kuti chikupweteki cho chazakukuthereska,” ling’anamuwanji? (Yesa. 54:17)

Tikayika cha kuti Chiuta wazakutivikiliya ku vinthu vakofya nge “kuwuluma kwa ŵanthu ankhaza.” (Yesa. 25:4, 5) Vinthu viheni vo arwani ŵidu angatichitiya va kanyengu kamanavi.​—w19.01, peji 6-7.

Kumbi vo Chiuta wanguchita ndi Akanani kweniso Ayisirayeli ambula kuvwiya, vilongo wuli kuti ndi murunji?

Chiuta wangulanga ŵanthu wosi wo achitanga ureŵi ndipuso kusuzga anthukazi ndi ŵana. Kweni wangutumbika ŵanthu wo amuvwiyanga ndipuso wo achitanga vinthu mwaurunji ndi anyawu.​—w19.02, peji 22-23.

Kumbi titenere kuchita wuli asani munthu yo wapemphera ndi Kaboni cha?

Tingachita umampha kuja cheti ndi kuchita vinthu mwaulemu ndipu tingakambanga cha kuti “ame” pamwenga kukolana manja ndi anyidu. Tingapemphera pakutija mumtima.​—w19.03, peji 31.

Ntchifukwa wuli kukolere mwana mbubudi ukulu?

Kukolere mwana nkhubudiya mwana yo amukolere, mpingu, boma ndi Chiuta. Muvyaru vo mwe dangu lakuti ŵanthu akakambiyengi ŵaraŵara aboma asani munthu munyaki wavwika mbiri yakuti wakolere mwana, ŵara wo aja muvyaru venivi avwiya dangu lenili.​—w19.05, peji 9-10.

Kumbi mungachita wuli kuti musinthi umunthu winu?

Vo vingakuwovyani ndi ivi: Mupempherengi kwaku Yehova. Mulungurukengi kuti mujisandi. Kweniso musankhengi mabwezi ngamampha.​— w19.06, peji 11.

Kumbi tinganozgeke wuli kutombozgeka kweche sonu?

Titenere kuja pa ubwezi wakukho ndi Yehova. Tingakayikanga cha kuti Yehova watitiyanja ndipuso kuti wazakutijowopu cha. Tiŵerengengi Bayibolu zuŵa lelosi ndi kupemphera nyengu zosi. Tingakayikanga cha kuti vinthu vo Chiuta wakulayizga mu Ufumu waki vazamuchitika. Ndipuso tiloŵezengi malemba ngo titanja ndi sumu zo zithamika Yehova.​— w19.07, peji 2-4.

Kumbi tingachita wuli kuti tiwovyi abali ŵidu kuti azitaskiki?

Tikhumbika kuŵalenge lisungu, tijengi ndi nkharu yamampha, akuzikira ndipuso tichitengi vinthu mwaulemu.​—w19.08, peji 15-17.

Kumbi tisisipulika wuli nge mo Yesu wangulayizgira pa Mateyu 11:28?

Te ndi alongozgi achanju, anyidu amampha ukongwa ndipuso tigwira ntchitu yamampha kuphala ntchitu yinyaki yeyosi.​—w19.09, peji 23.

Kumbi Chiuta wangatipaska wuli khumbu ndi nthazi zakuchitiya khumbu laki? (Afi. 2:13)

Asani tiŵerenga Mazu ngaku Chiuta ndi kuŵanaŵaniyapu, iyu wangatipaska nthazi ndi khumbu lakuchitiya khumbu laki. Mzimu waki ungatiwovya kuti tisazgiyeku malusu ngo tenangu.​—w19.10, peji 21.

Kumbi ndi vinthu vinkhondi nivi vo mungachita kuti musankhengi umampha vinthu?

Mungachita vinthu ivi: Mufufuzengi ukongwa, mupemphengi zeru kwaku Chiuta, mujifumbengi chifukwa cho mukhumbiya kuchita vo mwasankha, mungachitanga vinthu mwachipulamutu cha ndipuso muziŵengi vinthu vo mungakwaniska.​—w19.11, peji 27-29.

Kumbi chisambizu chakuti mzimu wa munthu utufwa cha chingwambiya po Satana wanyenganga Heva?

Awa. Satana wangumukambiyapu cha Heva kuti wafwengi liŵavu pe. Mumalu mwaki, wangumukambiya kuti wafwengi cha. Visambizu vosi vaboza vingumala pa nyengu ya Chigumula. Chisambizu chakuti mzimu utufwa cha chitenere kuti chingwamba Chiuta wechendambininiski ŵanthu wo azenganga sonju ya Babele.​—w19.12, peji 15.