Fundu yikulu pa Marangu 22:25-27, nkhukhumba kusimikiziya kuti munthulumi wenga wakunanga cha. Tikamba viyo chifukwa nkhani iyi yilongore limu kuti iyu wenga wakunanga. Mumalu mwaki, dangu ili lachiskanga akweruzga kusimikiziya asani msungwana yo walivi mulandu. Wonani vo mavesi nganyaki ngakukwamba ngakamba.

Mavesi ngakuvuli mu chaputala ichi ngakamba va munthulumi yo wakolere munthukazi wakulayizgika nthengwa mukati mwa “tawuni.” Kuchita viyo, chenga chigololu chifukwa munthukazi yo walayizgika nthengwa, amuwonanga nge kuti ngwakuyirwa. Nanga munthukazi? Mavesi yanga ngakamba kuti ‘wangudaniriza cha mutawuni.’ Wakachitengi viyo, ŵanthu atingi avwengi ndi kumuwovya. Kweni chifukwa chakuti wangudanirizga cha, ndikuti nayu wangukhumba ndipu wosi ŵaŵi aŵabayanga.​—Mara. 22:23, 24.

Yapa takamba vo vachitikanga asani ivi vachitikiya mutawuni. Nanga asani vachitikiya kudondu? Dangu lakambanga kuti: ‘Asani munthulumi wangukumana ndi msungwana kudondu, ndipu wangumuluska nthazi ndi kumukolere, munthulumi yo wamukolere ndiyu watenere kubayika. Msungwana yo mungachitanga nayu chechosi cha. Iyu wachita ubudi wakwenere nyifwa cha. Mulandu uwu uyanana ŵaka ndi mulandu wa munthu yo wayukiya munyaki ndi kumubaya. Pakuti wangukumana nayu kudondu, ndipu msungwana yo wangudaniriza kweni pengavi wakuti wamutaski.’​—Mara. 22:25-27.

Asani vaŵa viyo, akweruzga amugomezganga munthukazi. Munthowa wuli? Chifukwa asachizganga kuti panyaki “wangudaniriza kweni pengavi wakuti wamutaski.” Mwaviyo, iyu wanguchita chigololu cha. Kweni munthulumi wambikanga mulandu wakukolere kweniso wachigololu chifukwa “wangumuluska nthazi ndi kumukolere.”

Mwaviyo, chinanga kuti dangu ili lasimikiziyanga kuti msungwana wengavi mulandu, kweni likonkhoska so kuti munthulumi wenga ndi mulandu wakukolere ndi kuchita chigololu. Tikayika cha kuti akweruzga ‘afufuzanga mwakuphwere’ ndi kupereka cheruzgu chakukoliyana ndi fundu zo Chiuta wangukamba mwakuvwika umampha kweniso mwakuwerezawereza.​—Mara. 13:14; 17:4; Chitu. 20:14.