Kumbi mukuŵerenga mwakuphwere nkhani za mu magazini nga Chigongwi cha Alinda nga chaka chinu? Asani ndi viyo, wonani asani mungafiska kumuka mafumbu yanga:

Kumbi titenere kuchita nawu wuli Akhristu akusankhika?

Tiwonga chivwanu chawu kweni titiŵapaska ulemu wakujumphiska cha. Ndipuso ‘titiŵalumba’cha. (Yuda 16) Titenere cha kuŵafumba mafumbu ngakukwaskana ndi chilindizga chawu.—w20.01, peji 29.

Kumbi ndi vinthu wuli vo vitikusimikiziyani kuti Yehova watikutoliyaniku kanthu yimwi pakumwija?

Bayibolu lilongo kuti Yehova wangukuwonani mwechendaweku. Lilongo so kuti iyu watuvwa mapempheru nginu. Iyu waziŵa vo ve mumtima winu kweniso vo muŵanaŵana ndipu vo muchita vingamukondwesa pamwenga cha. (1 Mbiri 28:9; Nthanthi 27:11) Iyu wakukuguziyani kwaku iyu.—w20.02, peji 12.

Kumbi ndi nyengu niyi yo titenere kulongoro kweniso yo titenere kuja cheti?

Titenere kulongoro asani tipharazgiya anyidu vakukwaskana ndi Yehova. Asani tawona kuti munthu munyaki walandiya kuheni. Kweniso asani ŵara akhumbika kulunguchizga mubali pamwenga mzichi. Tija cheti asani tafumbika kuti tisumuwi mo ntchitu yidu yitende ku charu cho njakukanizika. Kweniso asani tiziŵa vinthu vachisisi.—w20.03, peji 20-21.

Kumbi azombi wo azumbulika mu Yoweli chaputala 2, apambana wuli ndi azombi wo azumbulika mu Chivumbuzi chaputala 9?

Pa Yoweli 2:20-29 pakamba kuti Chiuta wazakuŵadikisiya kutali azombi ndipu wangulayizga kuti wazamuweziyapu vo azombi angunanga. Pavuli paki, Chiuta wanguti wazamupunguliya mzimu waki. Uchimi wenuwu ungufiskika pa nyengu yo ŵanthu a ku Babiloni anguyukiya Ayisirayeli kweniso pavuli paki. Pa Chivumbuzi 9:1-11 pakonkhoska va akusankhika wo ŵenge azombi ndipu apharazga mwachiganga kuti Chiuta wazamuyeruzga mugonezi uheni uwu. Uthenga wenuwu utiŵaŵaŵa ukongwa ŵanthu wo ŵe kuchigaŵa cha charu.—w20.04, peji 3-6.

Kumbi fumu ya kunkhondi ndiyani mazuŵa nganu?

Charu cha Russia ndi vyaru vinyaki vo chikoliyana navu. Vilimbana ndi ŵanthu aku Chiuta chifukwa vikaniza ntchitu yakupharazga ndipuso vitinkha Akaboni. Vilimbana ndi fumu ya kumwera.—w20.05, peji 13.

Kumbi mijalidu 9 yo ye pa Agalatiya 5:22, 23, ndiyu pe yo “mzimu utuzga”?

Awa. Mzimu wakupaturika utitiwovya kuja so ndi mijalidu yinyaki yamampha, nge urunji. (Aefe. 5:8, 9)—w20.06, peji 17.

Kumbi kuŵika vithuzi vinu pa malu ngakucheziyapu nga pa Intaneti nkhwakofya wuli?

Vo muŵika pa malu ngakucheziyapu nga pa Intaneti vingalongo kuti mwe akujiŵikamu ndipuso kuti mwe akujiyuyuwa cha.—w20.07, peji 6-7.

Kumbi Akhristu wo apharazga angasambiranji kwa alovi alusu?

Yiwu abaya somba pa nyengu yo zisanirikiya kweniso malu ngo zisanirika. Asambira kugwiriskiya ntchitu vidya vakwenere. Ndipu achita chiganga kubaya somba mu nyengu yakusuzga. Nasi tingachita nge alovi ŵenaŵa mu uteŵeti widu.—w20.09, peji 5.

Kumbi tingaŵawovya wuli wo tisambira nawu Bayibolu kuti amuyanjengi ukongwa Yehova?

Tingaŵachiska kuti aŵerengengi Bayibolu zuŵa lelosi ndi kuŵanaŵaniyapu vo aŵerenga. Ndipuso tingaŵasambiza kuti apempherengi.—w20.11, peji 4.

Kumbi mbayani wo ŵe mugulu la “ŵanthu wosi wo azamuja amoyu” mwaku Khristu?—1 Akori. 15:22.

Wakutumika Paulo wang’anamuwanga kuti ndi munthu weyosi cha yo wazamuyuskika. Kweni “wosi” wo Paulo wakambanga asazgapu Akhristu akusankhika wo ‘akutoweseka mwakukoliyana ndi Khristu Yesu.’ (1 Akori. 1:2; 15:18)—w20.12, peji 5-6.

Kumbi akusankhika azamuchitanji asani ‘asambusika mu kumphone ŵaka kwa jisu, mu nyengu ya mbata yakumaliya’?—1 Akori. 15:51-53.

Yiwu azamuwovyana ndi Khristu pakukhwema ŵanthu ndi nthonga. (Chivu. 2:26, 27)—w20.12, peji 12-13.