Awa. Palivi peposi mu Bayibolu pamwenga mu mabuku ngakukonkhoska mbiri ya ŵanthu po palongo kuti ubatizu wenuwu wachitikanga.

Mo ma Bayibolu nganandi akufwatuliya vesi lenili, vichitiska kuti ŵanthu anyaki aŵanaŵanengi kuti mu nyengu ya Akhristu akwambiriya, ŵanthu abatizikanga mumalu mwa ŵanthu akufwa. Mwakuyeruzgiyapu, Bayibolu linyaki likamba kuti: “Asani kulivi chiyuka, kumbi wo abatizika mumalu mwa ŵanthu akufwa azamuchitanji?”—New International Version.

Chinanga kuti ve viyo, wonani vo akaswiri anyaki ŵaŵi a Bayibolu angukamba. Mwakuyeruzgiyapu, kaswiri munyaki wa Bayibolu zina laki Dr.  Gregory Lockwood wangukamba kuti: “Palivi peposi mu Bayibolu pamwenga mu mabuku ngakukonkhoska mbiri ya ŵanthu po palongo kuti ŵanthu anyaki abatizikanga mumalu mwa ŵanthu akufwa. Pulofesa Gordon D. Fee nayu wangukamba kuti: “Palivi buku lelosi mu mbiri ya ŵanthu pamwenga mu Bayibolu, po palongo kuti ubatizu wenuwu wachitikanga. Ubatizu wenuwu ukulembekamu cha mu Malemba nga Chipanganu Chasonu. Ndipuso palivi ukaboni wewosi wo ulongo kuti Akhristu akwambiriya pamwenga matchalichi nganyaki ngo ngangupangika akutumika ŵati ŵafwa ŵaka, ngachitanga ubatizu wenuwu.”

Bayibolu likamba kuti akusambira aku Yesu, akhumbikanga ‘kusambiza ŵanthu amitundu yosi kuti aje akusambira, kuŵabatiza . . . , ndi kuŵasambiza kuti asungengi vinthu vosi vo wangulamula.’ (Mate. 28:19, 20) Ivi vilongo kuti munthu wechendaje wakusambira, wakhumbikanga kusambira, kugomezga kweniso kuvwiya Yehova ndi Mwana Waki. Mwaviyo, munthu yo wenga kuti wafwa kali ndipu we mudindi, watingi wachitengi cha venivi ndipu Mkhristu yo wenga wechendafwi, watingi wamuchitiyengi cha munthu wakufwa.—Waku. 9:5, 10; Yoha. 4:1; 1 Akori. 1:14-16.

Sonu kumbi Paulo wang’anamuwanganji?

Ŵanthu anyaki a ku Korinto asuskanga kuti akufwa azamuyuka. (1 Akori. 15:12) Paulo wangususka maŵanaŵanu ngawu ngaheni ngenanga. Iyu wangukamba kuti ‘zuŵa lelosi waŵanga pa ngozi yakuti wangafwa.’ Chinanga kuti waŵanga pangozi yakuti wangafwa, iyu wagomezganga kuti asani wafwa, wazamuyuskikiya kuchanya nge mo Yesu wanguyuskikiya.—1 Akori. 15:30-32, 42-44.

Akhristu a ku Korinto akhumbikanga kuvwisa kuti chifukwa chakuti ŵenga akusankhika, valongonga kuti zuŵa lelosi akumanengi ndi mayeseru ndipu akhumbikanga kufwa ŵechendayuskiki. Mwaviyo, asani yiwu ‘abatizika mwaku Khristu Yesu,’ ‘abatizikanga so mu nyifwa yaki.’ (Aro. 6:3) Venivi vang’anamuwanga kuti nge mo ve nge ndi Yesu, yiwu atingi akumanengi ndi masuzgu ndipu atingi afwengi kuti aziyuskikiyi kuchanya.

Pati pajumpha vyaka viŵi kutuliya po Yesu wangubatizikiya mumaji, iyu wangukambiya akutumika ŵaki ŵaŵi kuti: “Ubatizu wo ndibatizika, namwi mubatizikengi weniwo.” (Mariko 10:38, 39) Yapa, Yesu wang’anamuwanga kuti wabatizikengi so mumaji cha. Kweni wang’anamuwanga kuti iyu wafwengi chifukwa chakuja wakugomezgeka kwaku Chiuta. Paulo wangulemba kuti Akhristu akusankhika ‘azisuzgikiyanga nayu limoza ndi chilatu chakuti yiwu akankhuskikiyi nayu limoza.’ (Aro. 8:16, 17; 2 Akori. 4:17) Yapa vilongo kuti nawu akhumbikanga kufwa kuti aziyuskikiyi kuchanya.

Mwaviyo, Paulo wang’anamuwanga kuti: “Asani akufwa azamuyuka cha kumbi wo abatizika kuti aje akufwa azamuchitanji? Ntchifukwa wuli yiwu abatizika kuti aje akufwa?”