Kumbi mukuŵerenga mwakuphwere nkhani za mu magazini nga Chigongwi cha Alinda nga chaka chinu? Asani ndi viyo, wonani asani mungafiska kumuka mafumbu yanga:

Kumbi lemba la Yakobe 5:11 lititisimikiziyanji pakukamba kuti Yehova “ngwachanju chikulu ukongwa” kweniso “ngwalisungu”?

Tiziŵa kuti chifukwa chakuti Yehova ngwalisungu, iyu wakhumbisiska kutigowoke vo tinangisa. Lemba la Yakobe 5:11 lititisimikiziya so kuti iyu watitiwovya mwachanju. Nasi tingachita umampha kumuyezga.—w21.01, peji 21.

Ntchifukwa wuli Yehova wakwambisa umutu?

Yehova wakwambisa umutu chifukwa cha chanju. Umutu uchitiska kuti banja laki lakugomezgeka lichitengi vinthu mwachimangu kweniso mwandondomeku. Munthu yo wakoliyana ndi ndondomeku yeniyi mubanja, waziŵa yo wakhumbika kusankha vinthu kweniso yo wakhumbika kulongozga pakufiska vinthu venivi.—w21.02, peji 3.

Ntchifukwa wuli Akhristu akhumbika kuphwere asani agwiriskiya ntchitu nthowa zakulonde kweniso kutumiziyana mameseji?

Asani munthu wasankha kugwiriskiya ntchitu nthowa yeniyi, wakhumbika kuŵanaŵaniyapu mwakuphwere ŵanthu wo wachezengi nawu. Venivi vakusuzga asani gulu lakutumiziyana ndi kulonde mameseji le ndi ŵanthu anandi. (1 Timo. 5:13) Kofya kunyaki so nkhwakuti ŵanthu awandisapu nkhani zo alivi nazu ukaboni kweniso agwiriskiya ntchitu maadiresi nga gulu laku Chiuta pa nkhani za malonda.—w21.03, peji 31.

Kumbi ndi vifukwa vinyaki nivi vo Chiuta wanguzomereze kuti Yesu wasuzgiki ndi kufwa?

Chakwamba ntchakuti, chifukwa chakuti Yesu wangupayikika pachimiti, vinguwovya kuti Ayuda afwatuliki ku thembu. (Aga. 3:10, 13) Chachiŵi ntchakuti Yehova wasambizanga Yesu udindu wo watingi waziŵengi nawu kunthazi nge Wasembi Mura. Ndipu chachitatu ntchakuti, kugomezgeka kwaku Yesu mpaka nyifwa kungulongo kuti ŵanthu angaja akugomezgeka kwaku Chiuta chinanga akumana ndi masuzgu ngakulu. (Yobu 1:9-11)—w21.04, peji 16-17.

Kumbi mungachita wuli asani ŵanthu asanirika cha panyumba mu uteŵeti?

Muyesengi kuluta kunyumba za ŵanthu pa nyengu yo asanirikiya panyumba. Muyesengi so kupharazga ku malu ngakupambanapambana. Ndipuso muyesengi nthowa zinyaki, nge kuŵalembe makalata.—w21.05, peji 15-16.

Kumbi wakutumika Paulo wang’anamuwanganji po wangukamba kuti: “Chifukwa cha dangu ndingufwa ku dangu”? (Aga. 2:19)

Dangu laku Mozesi lingulongore limu ubudi wa ŵanthu kweniso lingulongozge Ayisirayeli kwaku Khristu. (Aga. 3:19, 24) Venivi vinguwovya Paulo kuti wazomeri Khristu. Mwaviyo, Paulo ‘wangufwa ku dangu,’ ndipu Dangu lengavi nthazi paku iyu.—w21.06, peji 31.

Kumbi Yehova watilongo wuli chakuwoniyapu chamampha pa nkhani yakukunthiyapu?

Yehova waja wachikunthiyapu kufipiskika kwa zina laki, kususkika kuti ngwakwenere cha kulamuliya chilengedu chosi, kugaruka kwa ŵana ŵaki anyaki, maboza ngaku Dyaboli, masuzgu ngo ateŵeti ŵaki akumana nangu, kulekana ndi mabwezi ngaki ngo ngatufwa, kukandirizgika kwa ŵanthu kweniso kunangika kwa charu.—w21.07, peji 9-12.

Kumbi Yosefi wakutilongo chakuwoniyapu chamampha nichi pa nkhani ya kuzikira?

Iyu wangukunthiyapu vinthu vambula urunji vo aku ŵaki angumuchitiya. Venivi vinguchitiska kuti wambiki mulandu waboza kweniso kuŵikika mujeri ku Ijipiti kwa vyaka vinandi.—w21.08, peji 12.

Kumbi lemba la Hagayi 2:6-9, 20-22 lingukambiya limu vakusukunyisa kwa kuyeruzgiya nunkhu?

Mitundu ya ŵanthu yikana kuvwisiya uthenga wa Ufumu wo tipharazga, kweni ŵanthu anandi ŵaza mu uneneska. Pambula kuswera, mitundu ya ŵanthu yazamusukunyisika kakumaliya pa nyengu yo yazamunangikiya.—w21.09, peji 15-19.

Ntchifukwa wuli titenere cha kuvuka pakuchita uteŵeti widu?

Yehova wawona phamphu lidu ndipuso wakondwa. Asani taleka kuvuka, tazamusaniya umoyu wamuyaya.—w21.10, peji 25-26.

Kumbi buku la Levitiko chaputala 19 lingatiwovya wuli kugwiriskiya ntchitu ulongozgi wakuti: “Namwi muje atuŵa mu vakuchita vinu vosi”? (1 Petu. 1:15)

Mazu nga pa vesi ili ngatenere kuti ndi mazu nga pa Levitiko 19:2. Mu chaputala 19, mwe vakuyeruzgiyapu vinandi va mo tingagwiriskiya ntchitu lemba la 1 Peturo 1:15 pa umoyu widu wa zuŵa ndi zuŵa.—w21.12, peji 3-4.