Kumbi mukuŵerenga mwakuphwere nkhani za mu magazini nga Chigongwi cha Mlinda nga chaka chinu? Asani ndi viyo, wonani asani mungafiska kumuka mafumbu yanga:

Kumbi tingayanduwa wuli asani tipemphera, tisambira Bayibolu kweniso kulunguruka vakukwaskana ndi Yehova?

Tisankhengi vinthu mwazeru, tijengi asambizi amampha ukongwa, chivwanu chidu chikhongi ukongwa kweniso timuyanjengi ukongwa Yehova.—w22.01, peji 30-31.

Kumbi kugomezga Yehova kweniso ŵanthu wo wakuŵasankha kuti alongozgengi mugulu laki kwazakutiwovya wuli?

Sonu ndipu titenere kugomezga ukongwa kuti nyengu zosi Chiuta wachita vinthu mu nthowa yamampha mwa kuleka kukayikiya ulongozgi kweniso vo ŵara asankha. Pa chisuzgu chikulu vazakutisuzga cha kuvwiya ulongozgi wo ungaziwoneka nge ngwakusuzga kuwuvwisa pamwenga kuwugwiriskiya ntchitu.—w22.02, peji 4-6.

Kumbi mungelu wang’anamuwanganji wachikambiya Zekariya vakukwaskana ndi “chingwi chakupimiya kujanja la [nduna ya Ayuda] Zerubabeli”? (Zeka. 4:8-10)

Chiwona chenichi chingusimikiziya ŵanthu aku Chiuta kuti chinanga kuti nyumba yakusopiyamu yasonu yawonekanga yakupambana ndi yakali, kweni yazamumalizika mbwenu kuzengeka ndipu yazamukuŵa nge mo Chiuta wakhumbiyanga.—w22.03, peji 16-17.

Kumbi tingaja wuli “chakuwoniyapu [chamampha] mu vakukamba”? (1 Timo. 4:12)

Tilongorongi mwalisungu ndipuso mwaulemu mu uteŵeti, timbengi sumu ndi mtima wosi, timukengi pafupipafupi pa maunganu, tikambengi uneneska kweniso tilongorongi mazu ngakuzenga anyidu ndipuso tingakambanga cha mazu ngengosi ngaheni.—w22.04, peji 6-9.

Ntchifukwa wuli mo viwoneke vinyama vakofya vinayi (maufumu) vo vizumbulika mu Daniyeli chaputala 7 ndimu so chiwoneke chinyama chakofya chimoza cho chikonkhoskeka pa Chivumbuzi 13:1, 2?

Chinyama chakofya cho chikonkhoska pa Chivumbuzi chaputala 13 chimiya ufumu umoza cha nge ufumu wa Roma. Mumalu mwaki, chimiya maboma ngosi ngandali ngo ngaja ngachilamuliya ŵanthu mpaka sonu.—w22.05, peji 9.

Kumbi ndi nthowa yikulu niyi yo tingalongore kuti tigomezga kuti Yehova wachita vinthu mwaurunji?

Asani munthu munyaki watinangiya tingakwiyanga cha kweniso tingasunganga vifukwa cha. Tisiyi nkhani yo mumanja mwaku Chiuta. Iyu wazamutuzgapu vinthu vosi viheni vo vaja vichichitika chifukwa cha ubudi.—w22.06, peji 10-11.

Kumbi mubali yo wapempheka kuti wapereki pempheru pa unganu wa mpingu wakhumbika kukumbukanji?

Iyu wakhumbika cha kupereka ulongozgi mupempheru pamwenga kupereka vipharazgu. Iyu wakhumbika cha kukamba “mazu . . . nganandi,” ukongwa asani ndi pempheru lakwamba. (Mate. 6:7)—w22.07, peji 24-25.

Kumbi ŵanthu “wo anguchita vinthu viheni” “azamuyuka kuti ayeruzgiki” mu nthowa wuli? (Yoha. 5:29)

Yiwu azamuyeruzgika kuti mbakunanga chifukwa cha vo anguchita kuvuli cha. Yesu wazamuwonanga vo azamuchitanga kweniso kuŵayesa ŵanthu ambula urunji ŵenaŵa mwakukoliyana ndi vo azamuchita pavuli pakuti ayuskika.—w22.09, peji 18.

Kumbi J. F. Rutherford wangukamba nkhani yakukondwesa niyi pa unganu wo unguchitika mu September 1922?

Pa unganu wo unguchitikiya ku Cedar Point, Ohio, U.S.A., iyu wangukamba kuti: “Fumu yiwusa! Yimwi ndimwi ateŵeti ŵaki. Mwaviyo, pharazgani, pharazgani, pharazgani za Fumu ndi Ufumu waki!”—w22.10, peji 3-5.

Kumbi lemba la Yesaya chaputala 30 likamba vinthu vitatu nivi vo Yehova wachita kuti watiwovyi kukunthiyapu?

Lemba ili lilongo kuti (1) wavwisiya mwakuphwere ndipuso kumuka mapempheru ngidu, (2) watitilongozga kweniso (3) watititumbika sonu ndipuso wazakutitumbika kunthazi.—w22.11, peji 9.

Ntchifukwa wuli tikamba kuti mazu nga pa Salimo 37:10, 11, 29, ngangufiskika mu nyengu yakali kweniso ngazamufiskika kunthazi?

Mazu ngo Davidi wangulemba ngangulongo mo umoyu watingi uŵiyengi mucharu cha Isirayeli, nge mo venge mu nyengu ya Fumu Solomoni. Yesu wakambanga va paradayisu wa kunthazi ndipu wanguko mazu ngo nge muvesi 11. (Mate. 5:5; Luka 23: 43)—w22.12, peji 8-10, 14.