Kumbi mukuŵerenga mwakuphwere nkhani za mu magazini nga Chigongwi cha Mlinda nga chaka chinu? Asani ndi viyo, wonani asani mungafiska kumuka mafumbu yanga:

Kumbi ‘kusintha maŵanaŵanu nginu’ kung’anamuwanji? (Aro. 12: 2)

Kusintha maŵanaŵanu kung’anamuwa kuti titenere kuchita ŵaka vinthu vamampha cha. Kweni kusazgapu kujifufuza kweniso kuyesesa kusintha kuti vo tichita vikoliyanengi ndi fundu zaku Chiuta.—w23.01, peji 8-9.

Kumbi tingalongo wuli kuti tiŵanaŵana umampha po tiwona vinthu vo vichitika pacharu?

Tikhumbisiska kuziŵa mo vinthu vo vichitika pacharu chapasi vifiskiya mauchimi nga mu Bayibolu. Mumalu mwa kusachizga ŵaka kuti venivi vifiska uchimi, vo vingachitiska kuti mpingu ugaŵikani, tigwiriskiya ntchitu vo gulu laku Yehova lakamba pa nkhani zenizi. (1 Akori. 1:10)—w23.02, peji 16.

Kumbi ubatizu waku Yesu ndi wa akusambira ŵaki upambana wuli?

Yesu wanguwiya mu mtundu wo wenga wakujipereka kali kwaku Chiuta. Mwaviyo, wangujipereka cha kwaku Yehova nge mo isi tichitiya. Yesu wenga munthu wakufikapu kweniso wambula kubuda. Iyu wakhumbikanga kulapa cha.—w23.03, peji 4-5.

Kumbi tingaŵawovya wuli ŵanthu anyaki kuti amukengi pa maunganu?

Tipereka ndemanga zifupi kuti ŵanthu anyaki nawu amukepu. Kweniso tikhwecha kukamba fundu zinanandi tija. Mwaviyo, ŵanthu anyaki nawu asaniya chakumukapu.—w23.04, peji 23.

Kumbi “Msewu Wakupaturika” wo ukambika pa Yesaya 35:8 umiyanji?

Pakwamba, msewu ukulu wakuyeruzgiya wamiyanga msewu wa Ayuda wakutuwa ku Babiloni kuluta ku Isirayeli. Nanga mazuŵa nganu? Kwa vyaka vinandi chechendafiki chaka cha 1919, ntchitu yakunozga msewu yingugwirika, kung’anamuwa kufwatuliya kweniso kusindikiza Mabayibolu. Ŵanthu aku Chiuta atenda pa “Msewu Wakupaturika” ndipu kuchita venivi kwaŵawovya kuti asopengi Yehova sonu ndipuso kunthazi azamulonde vitumbiku vinandi mu Ufumu waku Yehova.—w23.05, peji 15-19.

Kumbi tisambiranjipu pa anthukazi ŵaŵi akuyeruzgiya wo azumbulika mu Nthanthi chaputala 9?

Nthanthi chaputala 9 chikamba va “munthukazi muzereza” yo mudanu waki ulongozge ku “Dindi” ndipuso “zeru chayizu,” zo zimiya munthukazi yo mudanu waki ulongozge ‘kunthowa ya kuvwisa vinthu’ kweniso umoyu. (Nthanthi 9:​1, 6, 13, 18)—w23.06, peji 21-24.

Kumbi Chiuta wangulongo wuli kuti ngwakujiyuyuwa ndipuso koloŵa pa nyengu yo wachitanga vinthu ndi Loti?

Yehova wangukambiya Loti kuti watuweku ku Sodomu ndipu wathaŵiyi kuchigaŵa cha mapiri. Kweni Loti wati wamuŵeyere kuti wathaŵiyi mutawuni yimana ya Zowari, Chiuta wangumuzomereza.—w23.07 peji 21.

Kumbi munthukazi wangachita wuli asani mulumu waki wawonere vinthu vakusikuwa?

Munthukazi watenere cha kujimba mulandu kuti ndiyu wachitiska. Iyu waŵanaŵaniyengi ubwezi waki ndi Chiuta ndipuso kulunguruka nkhani za mu Bayibolu za anthukazi wo asuzgikanga maŵanaŵanu, wo angupembuzgika ndi Chiuta. Iyu wangamuwovya mulumu waki kuti wakhwechengi vinthu vo vingachitiska kuti wawonere vinthu vakusikuwa.—w23.08, peji 14-17.

Asani ŵanthu asuska vo tigomezga, kumbi kuwamu kungawovya wuli kuti timukengi mwakuzika?

Tingachita umampha kuwona kuti fumbu lo iyu wafumba lingatiwovya kuziŵa maŵanaŵanu ngaki mumalu mwakuwona ŵaka kuti wakhumba kususkana nasi. Kuchita viyo kungawovya kuti timumuki mwakuzika.—w23.09, peji 17.

Kumbi tingasambiranji kwaku Mariya pa nkhani yakusaniya nthazi kwa anyidu?

Mariya wati waziŵa kuti wajengi nyina waku Mesiya, wangusaniya nthazi ku ŵanthu anyaki. Gabiriyeli kweniso Elizabeti angumuchiska mwauzimu. Nasi tingasaniya nthazi kwa Akhristu anyidu.—w23.10, peji 15.

Kumbi Yehova wangamuka wuli mapempheru ngidu?

Yehova walayizga kuti wavwisiyengi mapempheru ngidu ndipu wachivwisiya waŵanaŵaniya mo ngakoliyana ndi khumbu laki. (Yere. 29:12) Iyu wangamuka mapempheru ngakuyanana mu nthowa zakupambana, kweni watitiwovya nyengu zosi.—w23.11, peji 21-22.

Lemba la Aroma 5:2 lizumbuwa “chilindizga,” sonu kumbi ntchifukwa wuli vesi 4 likamba so va chilindizga?

Asani munthu wavwisiya uthenga wamampha, wangaja ndi chilindizga chakuzilonde umoyu wamuyaya mu paradayisu. Kweni asani wakumana ndi mayeseru, wakunthiyapu ndipuso wawona kuti Chiuta watimuyanja, wagomezga ukongwa kuti vinthu vo tilindizga vazamufiskika nadi kweniso wativiwona kuti vakukhumbika ukongwa.—w23.12, peji 12-13.