ANTHUKAZI anyaki ŵaŵi achisungwana, ayendanga mu tawuni ya Baguio ku Philippines. Yiwu anguwona kashelufu ko penga mabuku kweni anguluta pafupi cha. Mzichi Helen yo wanguma pafupi ndi kashelufu kenaka, wanguŵamwemwete ukongwa ŵanthu ŵenaŵa. Anthukazi yaŵa angulutirizga ulendu wawu, kweni yiwu anguluwa cha mo Helen wanguŵamwemwete.

Pavuli paki, anthukazi yaŵa achiluta kunyumba kwawu ŵe mu basi, anguwona chikwangwani chakulembeka kuti jw.org pa chimati cha Nyumba ya Ufumu. Yiwu angukumbuka kuti malembu ngenanga ndingu angungawona pa kashelufu ŵe mu tawuni. Wosi ŵaŵi angusika basi yo angukwera ndi kuluta ku Nyumba ya Ufumu, ndipu angusaniya kuti pa geti pakulembeka nyengu yo mipingu yakupambanapambana yichitiya maunganu.

Anthukazi ŵaŵi yaŵa, anguza ku maunganu sabata yakulondopu. Kumbi ndiyani yo anguwona ŵati asere mu Nyumba ya Ufumu? Wenga Helen! Nyengu yeniyo, yiwu angumuŵanika kuti ndiyu wanguŵamwemwete ukongwa pa nyengu yo ŵenga mu tawuni. Helen wangukamba kuti: “Achiza kwaku ini, ndinguchita mantha kamanavi. Ndinguŵanaŵana kuti panyaki ndikunanga chinthu chinyaki.” Kweni asungwana yaŵa angumukonkhoske Helen kuti angumuwona we pa kashelufu.

Asungwana ŵenaŵa angukondwa ukongwa ndi maunganu kweniso kucheza ndi abali ndi azichi. Ndipu angujivwa nge kuti ŵe ku nyumba kwawu. Yiwu ŵati awona kuti abali ndi azichi akolopa mu Nyumba ya Ufumu maunganu ngati ngamala, angupempha kuti nawu awovyeku. Msungwana yumoza wakutuwaku ku Philippines, kweni munyaki wakwamba kuwungana ndipu wakwamba kusambira Bayibolu. Vosi ivi, ntchifukwa cha kumwemwete!