NKHANI YAKUSAMBIRA YA NAMBALA 5
“Mutu wa Munthulumi Weyosi Ndi Khristu”
“Mutu wa munthulumi weyosi ndi Khristu.”—1 AKORI. 11:3.
SUMU 12 Yehova, Chiuta Wanthazi
VO TISAMBIRENGI MU NKHANI IYI *
1. Kumbi ndi vinthu wuli vo vingachitiska kuti munthulumi wachitengi nayu vinthu mwambula kwenere muwolu waki kweniso ŵana ŵaki?
KUMBI yimwi muwona kuti mazu ngakuti “umutu” ngang’anamuwanji? Anthulumi anyaki achita nawu vinthu mwambula kwenere awolu ŵawu kweniso ŵana ŵawu chifukwa cha midawuku ya mtundu wawu kweniso mo akukuliya. Wonani vo mzichi munyaki zina laki Yanita yo waja Europe wangukamba. Iyu wangukamba kuti: “Mucharu cho ndija, ŵanthu anandi agomezga kuti anthukazi mbakusika kuluska anthulumi ndipu akhumbika kuŵawona nge akapolu.” Ndipu mubali munyaki zina laki Luke yo waja ku United States, wangukamba kuti: “Anthulumi anyaki asambiza ŵana ŵaŵu anthulumi kuti akhumbika cha kuvwiya anthukazi chifukwa vo akamba vambula kukhumbika.” Kweni maŵanaŵanu ngenanga, ngakoliyana cha ndi mo Yehova wakhumbiya kuti anthulumi agwiriskiyengi ntchitu umutu wawu. (Yeruzgiyani ndi Mariko 7:13.) Sonu kumbi munthulumi wangachita wuli kuti waje mutu wamampha wa banja laki?
2. Kumbi mutu wa banja ukhumbika kuziŵanji, nanga ntchifukwa wuli?
2 Kuti munthulumi waje mutu wamampha wa banja laki, chakwamba wakhumbika kuvwisa vo Yehova wakhumba kuti iyu wachitengi. Iyu wakhumbika so kuziŵa chifukwa cho Yehova wakwambisiya umutu kweniso mo wangayezge chakuwoniyapu chaku Yehova ndi Yesu. Ntchifukwa wuli munthulumi wakhumbika kuziŵa vinthu venivi? Chifukwa chakuti Yehova wakupaska mitu ya mabanja udindu ndipu wakhumba kuti awugwiriskiyengi ntchitu mwakwenere.—Luka 12:48b.
KUMBI UMUTU UNG’ANAMUWANJI?
3. Kumbi tisambiranji vakukwaskana ndi umutu nge mo pakambiya pa 1 Akorinto 11:3?
3 Ŵerengani 1 Akorinto 11:3. Lemba ili lilongo mo Yehova wachitiya vinthu mwandondomeku ndi banja laki kuchanya kweniso pacharu chapasi. Umutu we ndi vigaŵa viŵi vakuzirwa, mazaza kweniso kumuka mo uchitiya ndi mazaza ngo. Yehova ndiyu “mutu” pamwenga kuti we ndi udindu wapachanya, ndipu ŵana ŵaki wosi, angelu kweniso ŵanthu, akhumbika kumuka ndi mo agwiriskiya ntchitu udindu wo wakuŵapaska. (Aro. 14:10; Aefe. 3:14, 15) Yehova wakumupaska udindu wakuwonere mpingu Yesu, kweni iyu wazamumuka kwaku Yehova ndi mo wachitiya nasi vinthu. (1 Akori. 15:27) Kweniso Yehova wakupereka udindu ku munthulumi kuti wawoneriyengi muwolu waki ndi ŵana ŵaki. Kweni munthulumi wazamumuka kwaku Yehova ndi Yesu chifukwa cha mo wachitiya vinthu ndi banja laki.—1 Petu. 3:7.
4. Kumbi Yehova ndi Yesu ŵe ndi udindu wuli?
4 Chifukwa chakuti Yehova ndi Mutu wa banja laki kuchanya ndipuso pacharu chapasi, iyu we ndi udindu wakupanga marangu ngakukwaskana ndi mo ŵana ŵaki atenere kuchitiya vinthu, ndipu wawonesesa kuti yiwu avwiya marangu ngenanga. (Yesa. 33:22) Ndipuso Yesu yo ndi mutu wa mpingu Wachikhristu, we ndi udindu wakupanga marangu kweniso kuwonesesa kuti weyosi mumpingu walondo marangu ngenanga.—Aga. 6:2; Ako. 1:18-20.
5. Kumbi mutu wabanja la Chikhristu we ndi mazaza wuli? Nanga ndi vinthu wuli vo wakhumbika cha kuchita?
5 Pakulondo mo Yehova ndi Yesu achitiya, mutu wabanja la Chikhristu we ndi udindu wakupanga marangu nga banja laki. (Aro. 7:2; Aefe. 6:4) Chinanga kuti ve viyo, udindu waki we ndi mphaka. Mwakuyeruzgiyapu, iyu wakhumbika kupanga marangu mwakukoliyana ndi fundu za mu Mazu ngaku Chiuta. (Nthanthi 3:5, 6) Kweniso mutu wabanja ulivi mazaza ngakupangiya marangu ŵanthu wo mba mubanja laki cha. (Aro. 14:4) Ndipuso asani ŵana ŵaki anthulumi ndi anthukazi akuwa, ndipu atuwapu panyumba kuchija pakuŵija, alutirizga mbwenu kumutumbika. Kweni iyu waja mutu wawu so cha.—Mate. 19:5.
NTCHIFUKWA WULI YEHOVA WAKWAMBISA UMUTU?
6. Ntchifukwa wuli Yehova wakwambisa umutu?
6 Yehova wakwambisa umutu chifukwa chakuti watanja banja laki. Ndipu umutu ndi mphasu yakutuliya kwaku iyu. Umutu uchitiska kuti banja laku Yehova lichitengi vinthu mwachimangu kweniso mwandondomeku. (1 Akori. 14:33, 40) Yehova wakalekengi kulongo yo we ndi mazaza, ndikuti ŵanthu a mubanja laki atingi achitengi vinthu mwandondomeku cha kweniso atingi akondwengi cha. Mwakuyeruzgiyapu, tatingi tiziŵengi cha kuti ndiyani yo wakhumbika kusankha vinthu kweniso yo wakhumbika kulongozga pakufiska vinthu venivi.
7. Mwakukoliyana ndi Aefeso 5:25, 28, kumbi Yehova wakhumba kuti anthulumi achitengi nawu wuli awolu ŵawu?
7 Asani ndondomeku ya umutu yo Chiuta wakujalikiska njamampha viyo, ntchifukwa wuli anthukazi anandi mazuŵa nganu awona kuti alumu ŵawu atiŵachitiya vinthu vankhaza kweniso atiŵalamuliya umampha cha? Ve viyo chifukwa chakuti anthulumi anandi atizitoliyaku kanthu cha fundu zaku Yehova za mo angachitiya vinthu mu banja. Mumalu mwaki, asankha kulondo midawuku ya muchigaŵa chawu. Yiwu angaŵachitiya so nkhaza awolu ŵawu kuti afiski vo akhumba. Mwakuyeruzgiyapu, munthulumi wangamuchitiya nkhaza muwolu waki kuti wajivwengi kuti ngwakuzirwa ukongwa pamwenga kuti walongo ku ŵanthu anyaki kuti iyu ndi “munthulumi nadi.” Iyu wangaŵanaŵana kuti wangamuchichizga cha muwolu waki kuti wamuyanjengi, kweni wangachitiska waka kuti wamuwopengi. Ndipu wangaŵanaŵana kuti chifukwa chakuti muwolu waki watimuwopa, ndikuti wangamulamuliya umampha. * Anthulumi wo aŵanaŵana viyo pamwenga wo achita vankhaza venivi, anangisa ukongwa. Yiwu atiŵatumbika cha anthukazi ndipu venivi vikoliyana cha ndi vo Yehova wakhumba.—Ŵerengani Aefeso 5:25, 28.
KUMBI MUNTHULUMI WANGACHITA WULI KUTI WAJE MUTU WAMAMPHA WA BANJA LAKI?
8. Kumbi munthulumi wangachita wuli kuti waje mutu wamampha wa banja laki?
8 Munthulumi wangasambira kuja mutu wamampha wa banja laki, asani watezga mo Yehova ndi Yesu achitiya ndi umutu wawu. Tiyeni tikambiskani mijalidu yiŵi yo Yehova ndi Yesu alongo ndipuso tiwoni mo mutu wa banja ungalongore mijalidu yeniyi asani uchita vinthu ndi muwolu waki kweniso ŵana ŵaki.
9. Kumbi Yehova walongo wuli kuti ngwakujiyuyuwa?
9 Kujiyuyuwa. Yehova ndi Munthu wazeru ukongwa kuluska weyosi. Kweni chinanga kuti ve viyo, iyu wavwisiya maŵanaŵanu nga ateŵeti ŵaki. (Gene. 18:23, 24, 32) Mwakuyeruzgiyapu, nyengu yinyaki wanguzomereza kuti wo watiŵalamuliya apereki maŵanaŵanu ngawu. (1 Mafu. 22:19-22) Yehova ngwakufikapu kweni walindizga kuti tichitengi vinthu mwakufikapu cha. Mumalu mwaki, watovya ŵanthu ambula kufikapu wo atimuteŵete kuti vinthu viŵayendiyengi umampha. (Sali. 113:6, 7) Mwakuti Bayibolu likamba kuti Yehova ndiyu ‘watitiwovya.’ (Sali. 27:9; Ahe. 13:6) Fumu Davidi yinguziŵa kuti yingufiska kugwira ntchitu zosi zikuluzikulu zo yingupaskika chifukwa chakuti Yehova ngwakujiyuyuwa ndipu wayiwovyanga.—2 Samu. 22:36.
10. Kumbi Yesu wangulongo wuli kuti ngwakujiyuyuwa?
10 Tiyeni tikambiskani chakuwoniyapu chaku Yesu. Chinanga kuti iyu wenga Mbuya wa akusambira ŵaki, kweni wanguŵasambisa maphazi ngawu. Kumbi ntchifukwa chimoza nichi cho Yehova wanguzomereze kuti nkhani yeniyi yilembeki mu Bayibolu? Tikayika cha kuti iyu wakhumbanga kuti weyosi kusazgapu mitu ya mabanja, alondo chakuwoniyapu chaku Yesu. Yesu iyu mweneku wangukamba kuti: “Ndakupaskani chakuwoniyapu kuti nge mo ini ndakuchitiyani, namwi so muchitengi venivi.” (Yoha. 13:12-17) Chinanga kuti Yesu wenga ndi mazaza ngakulu, kweni walindizganga kuti anyaki amuteŵete cha. Mumalu mwaki, iyu ndiyu wateŵetiyanga anyaki.—Mate. 20:28.
Munthulumi yo ndi mutu wa banja wangalongo kuti ngwakujiyuyuwa kweniso ngwachanju asani wagwira ntchitu za pakhomu kweniso kovya banja laki kuti lije paubwezi wakukho ndi Yehova (Wonani ndimi 11, 13)
11. Kumbi mutu wa banja ungasambiranji kwaku Yehova ndi Yesu pa nkhani ya kujiyuyuwa?
11 Kumbi isi tisambiranjipu? Mutu wa banja ungalongo kuti ngwakujiyuyuwa munthowa zinandi. Mwakuyeruzgiyapu, iyu walindizga kuti ŵana ndi muwolu waki achitengi vinthu mwakufikapu cha. Kweniso iyu wavwisiya maŵanaŵanu nga ŵanthu a mu banja laki chinanga kuti nyengu zinyaki ngangakoliyana cha ndi maŵanaŵanu ngaki. Marley yo waja ku United States wangukamba kuti: “Nyengu zinyaki ini ndi mulumu wangu tituŵa ndi maŵanaŵanu ngakupambana. Kweni ndiziŵa kuti watindiwona kuti nde wakuzirwa ndipuso watinditumbika chifukwa iyu watindifumba maŵanaŵanu ngangu ndipu waŵanaŵaniyapu wechendasankhi vinthu.” Kusazgiyapu penapa, munthulumi wakujiyuyuwa, watuŵa so wakukhumbisisa kugwira ntchitu za pakhomu chinanga kuti ŵanthu a muchigaŵa chawu awona kuti ntchitu zenizi za anthukazi pe. Kuchita venivi kungaŵa kwakusuzga. Ntchifukwa wuli? Mzichi munyaki zina laki Rachel wangukamba kuti: “Muchigaŵa cho ndija asani munthulumi watovya muwolu waki kusuka mbali pamwenga kunozga munyumba, ŵanthu apafupi kweniso achibali aŵanaŵana kuti ‘wakuryisika.’ Ndipu yiwu awona kuti watondeka kulamuliya muwolu waki.” Asani ŵanthu anandi ŵe ndi maŵanaŵanu ngenanga ko muja, mukumbukengi kuti Yesu wangusambisa maphazi nga akusambira ŵaki chinanga kuti ntchitu yeniyi yagwirikanga ndi akapolu. Munthulumi yo ndi mutu wamampha wa banja laki, waŵanaŵaniya vakuti ŵanthu amuwonengi kuti ngwanthazi pamwenga kuti ngwakukhumbika cha. Mumalu mwaki, wakhumba kuti muwolu waki ndi ŵana ŵaki akondwengi. Kusazgiyapu pa kujiyuyuwa, kumbi ndi jalidu nili linyaki lakukhumbika lo mutu wa banja utenere kuja nalu?
12. Kumbi chanju chichitiska kuti Yehova ndi Yesu achitengenji?
12 Chanju. Chechosi cho Yehova wachita, watichichita chifukwa cha chanju. (1 Yoha. 4:7, 8) Mwachanju, iyu watitiphwere mwauzimu kuziya mu Mazu ngaki Bayibolu kweniso gulu laki. Iyu watitiwovya kuti tijivwengi kuti te akuvikilirika ndipu watitisimikiziya kuti watitiyanja. Nanga wuli pa nkhani ya vinthu vakuliŵavu vo tikhumbikiya? Yehova “watitipaska mwakuzara vinthu vosi vo tikondwa navu.” (1 Timo. 6:17) Asani tanangisa, iyu watitichenya kweni waleka cha kutiyanja. Chifukwa cha chanju, Yehova wakutipaska sembi ya mwana waki Yesu. Ndipu pakukamba zaku Yesu, iyu watitiyanja ukongwa mwakuti wakupereka umoyu waki chifukwa chaku isi. (Yoha. 3:16; 15:13) Mwaviyo, palivi cho chingatondekesa Yehova ndi Yesu kuti ayanjengi ŵanthu wo mbakugomezgeka kwaku iyu.—Yoha. 13:1; Aro. 8:35, 38, 39.
13. Ntchifukwa wuli mutu wa banja utenere kulongo kuti utanja banja laki? (Wonani so bokosi lakuti “ Kumbi Munthulumi yo Wato Ŵaka Sonu Wangachita Wuli Kuti Muwolu Waki Wamutumbikengi?”)
13 Kumbi isi tisambiranjipu? Chechosi cho mutu wa banja ungachita, ukhumbika kuchichita chifukwa cha chanju. Ntchifukwa wuli venivi vakukhumbika? Wakutumika Yohane wangulemba kuti: “Munthu yo waleka kwanja mubali waki [pamwenga kuti, banja laki] yo watimuwona, wangamuyanja cha Chiuta yo waleka kumuwona.” (1 Yoha. 4:11, 20) Sonu munthulumi yo wayezga Yehova ndi Yesu ndipuso yo watanja ŵanthu a mu banja laki, watovya banja laki kuti lijengi paubwezi wakukho ndi Yehova, watovya so ŵanthu a mubanja laki kuti ajivwengi kuti atanjika kweniso watilisaniriya vinthu vakukhumbika vakuliŵavu. (1 Timo. 5:8) Kweniso iyu wasambiza ŵana ŵaki ndi kuŵachenya. Iyu walutirizga so kusambira kuti wasankhengi vinthu vo vingawovya kuti Yehova watumbikiki kweniso vo vingawovya banja laki. Sonu tiyeni tikambiskani vinthu vitatu vakukhumbika vo mutu wa banja ukhumbika kuchita ndi kuwona mo iyu wangayezge Yehova ndi Yesu.
VO MUTU WA BANJA UKHUMBIKA KUCHITA
14. Kumbi mutu wa banja utovya wuli kuti banja laki lije paubwezi wakukho ndi Yehova?
14 Kovya banja laki kuti lije paubwezi wakukho ndi Yehova. Yesu wangulongo kuti watezga awisi chifukwa wawovyanga akusambira ŵaki kuti aje ndi chivwanu chakukho. (Mate. 5:3, 6; Mariko 6:34) Mwakuyanana ŵaka, chinthu chakukhumbika ukongwa cho mutu wa banja ungachita, nkhovya banja laki kuti lije paubwezi wakukho ndi Yehova. (Doto. 6:6-9) Iyu wachita venivi mwakuwonesesa kuti iyu ndi banja laki aŵerenga ndi kusambira Mazu ngaku Chiuta, awungana, apharazga uthenga wamampha kweniso alutirizga kuja mabwezi ngamampha ngaku Yehova.
15. Kumbi mutu wa banja ungawovya wuli kuti ŵanthu a mubanja laki ajivwengi kuti atanjika?
15 Kovya ŵanthu a mubanja laki kuti ajivwengi kuti atanjika. Yehova wangulongo pakweru kuti wamuyanjanga Yesu. (Mate. 3:17) Yesu nayu walongonga kuti watanja akusambira ŵaki kuziya mu vo wakambanga ndi kuchita. Ndipu akusambira ŵaki nawu angumukambiya kuti amuyanjanga. (Yoha. 15:9, 12, 13; 21:16) Mutu wa banja ungalongo kuti watanja muwolu waki ndi ŵana ŵaki kuziya mu vo wachita, nge kusambiriya nawu limoza Bayibolu. Iyu wakhumbika so kuŵakambiya kuti watiŵayanja kweniso watiŵawona kuti mbakuzirwa. Ndipu asani mphakwenere, wangaŵawonga pamasu pa ŵanthu anyaki.—Nthanthi 31:28, 29.
Kuti munthulumi yo ndi mutu wa banja wakondwesi Yehova, wakhumbika kusaniriya banja laki vinthu wakukhumbikiya vakuliŵavu (Wonani ndimi 16)
16. Kumbi mutu wa banja utenere so kuchitanji? Nanga ntchinthu wuli cho ukhumbika cha kuchita?
16 Kusaniriya banja laki vinthu vakukhumbika vakuliŵavu. Yehova wawonesesanga kuti Ayisirayeli ŵe ndi vinthu vakukhumbikiya chinanga mphanyengu yo alangikanga chifukwa chakuleka kuvwiya. (Doto. 2:7; 29:5) Iyu watitiwovya so kusaniya vinthu vakukhumbika mazuŵa nganu. (Mate. 6:31-33; 7:11) Mwakuyanana ŵaka, Yesu wanguryisa so ŵanthu wo amulondonga. (Mate. 14:17-20) Iyu wachizganga so ŵanthu wo atamanga. (Mate. 4:24) Kuti mutu wabanja ukondwesi Yehova, wakhumbika kusaniriya banja laki vinthu vakuliŵavu. Chinanga kuti ve viyo, pe chinthu chinyaki cho iyu wakhumbika cha kuchita. Iyu wakhumbika cha kumaliya nyengu yinandi pakugwira ntchitu yakuliŵavu kuti wawovyi banja laki, mpaka kutondeka kuwovya banja laki kuti lije paubwezi wakukho ndi Yehova kweniso kuŵawovya kuti ajivwengi kuti atanjika.
17. Kumbi Yehova ndi Yesu atitisambiza ndi kutichenya munthowa wuli?
17 Kusambiza banja laki. Yehova watitisambiza kweniso kutichenya chifukwa chakuti wakhumba kutiwovya. (Ahe. 12:7-9) Nge Awisi, Yesu watiŵasambiza mwachanju ŵanthu wo watiŵalongozga. (Yoha. 15:14, 15) Iyu wapereka ulongozgi wanthazi kweni wachita venivi mwalisungu. (Mate. 20:24-28) Ndipu Yesu watitivwisa kuti te ambula kufikapu kweniso tinangisa.—Mate. 26:41.
18. Kumbi munthulumi yo ndi mutu wamampha wa banja wakumbukanji?
18 Munthulumi yo ndi mutu wa banja, watezga Yehova ndi Yesu ndipu wakumbuka kuti ŵanthu a mubanja laki mbambula kufikapu. Iyu ‘watimukwiyiya ukongwa’ cha muwolu waki pamwenga ŵana ŵaki. (Ako. 3:19) Mumalu waki, iyu wagwiriskiya ntchitu fundu ya pa Agalatiya 6:1 ndipu watesesa kuŵanyolo “mwakuzika,” wachikumbuka kuti nayu ngwambula kufikapu. Nge Yesu, iyu waziŵa kuti nthowa yamampha yakusambiziya, nkhuziya mu vo wachita.—1 Petu. 2:21.
19-20. Kumbi munthulumi yo ndi mutu wa banja wangamuyezga wuli Yehova ndi Yesu asani wakhumba kusankha vinthu?
19 Kusankha vinthu vo vingawovya banja. Yehova wasankha vinthu vo vingawovya anyaki. Mwakuyeruzgiyapu, iyu wakupanga vinthu vamoyu kuti wayanduwi yija cha, kweni kuti nasi tikondwengi ndi umoyu. Palivi yo wangumuchichizga kupereka Mwana waki kuti maubudi ngidu ngagowokereki. Kweni iyu wangukhumbisisa kupereka sembi yeniyi kuti watiwovyi. Mwakuyanana ŵaka, Yesu nayu wasankhanga vinthu vo vawovyanga ŵanthu anyaki. (Aro. 15:3) Mwakuyeruzgiyapu, nyengu yinyaki wangusankha kuleka kupumuwa kuti wasambizi chigulu cha ŵanthu.—Mariko 6:31-34.
20 Munthulumi yo ndi mutu wamampha wa banja laki, waziŵa kuti chinthu chimoza chakusuzga cho wakhumbika kuchita, nkhusankha mwazeru vinthu vakukwaskana ndi banja laki. Ndipu udindu wenuwu watiwuwona mwakupepuka cha. Iyu wasankha cha vinthu kwambula chifukwa chakuvwika pamwenga chifukwa cha mo wavwiya ŵaka pa nyengu yo. Mumalu mwaki, wazomereza kuti Yehova wamusambizi mo wangasankhiya vinthu umampha. * (Nthanthi 2:6, 7) Asani wachita viyo, waŵanaŵaniya vo vingawovya ŵanthu anyaki, mumalu mwakuŵanaŵaniya ŵaka vaki.—Afi. 2:4.
21. Kumbi tazamukambiskananji munkhani yakulondopu?
21 Yehova wakupaska mitu ya mabanja udindu wakusuzga ukongwa. Ndipu iyu walindizga kuti yiwu azamumuka pa masu paki ndi mo agwiriskiya ntchitu udindu wenuwu. Asani munthulumi watesesa kulondo chakuwoniyapu chaku Yehova ndi Yesu, wangaja mutu wamampha wa banja laki. Ndipu asani muwolu waki wafiska udindu wo wenawu mubanja, banja lawu lingaja lakukondwa. Kumbi munthukazi watenere kuwuwona wuli udindu wa mulumu waki nge mutu? Nanga wakumana ndi masuzgu wuli? Nkhani yakulondopu yimukengi mafumbu ngenanga.
SUMU 16 Thamikani Ya Chifukwa Cha Mwana Waki Wakusankhika
^ ndimi 5 Asani munthulumi wato, waja mutu wa banja. Mu nkhani iyi, tikambiskanengi vo umutu ung’anamuwa, chifukwa cho Yehova wakuwuyambisiya kweniso vo anthulumi angasambira kwaku Yehova ndi Yesu pa nkhani yeniyi. Mu nkhani yachiŵi, tazamuwona vo munthulumi ndi munthukazi angasambira kwaku Yesu kweniso ku vakuwoniyapu vinyaki va mu Bayibolu. Ndipu mu nkhani yachitatu, tazamuwona mo abali angagwiriskiya ntchitu umutu mumpingu.
^ ndimi 7 Maŵanaŵanu ngakuti palivi suzgu lelosi asani anthulumi achitiya nkhaza awolu ŵawu, nyengu zinyaki atingalongo mumafilimu, maseŵeru kweniso chinanga ndi mu mabuku nganyaki. Mwaviyo, chifukwa cha venivi ŵanthu anyaki angaŵanaŵana kuti mbuheni cha kuti munthu wamuchitiyengi nkhaza muwolu waki.
^ ndimi 20 Kuti muziŵi vinandi pa nkhani ya mo mungasankhiya umampha vinthu, wonani nkhani ya mutu wakuti “Zosankha Zanu Zizilemekeza Mulungu,” mu Chigongwi cha Alinda cha Chichewa cha April 15, 2011, peji 13-17.
