1. Kumbi Yesu wanguŵakambiyanji akusambira ŵaki vakukwaskana ndi nyengu ya umaliru nanga wanguŵatcheŵeskanji?

 KWATI kwaja mazuŵa ngamanavi kuti Yesu wafwi, akusambira ŵaki anayi angumufumba kuti: “Kumbi chisimikizu . . . cha kumala kwa nyengu yinu, ntchinthu wuli?” (Mate. 24:3) Yiwu atenere kuti afumbanga mo angaziziŵiya nyengu yo Yerusalemu ndi nyumba yaki yakusopiyamu vazibwangandulikiyanga. Pa kuŵamuka, Yesu wangukamba va kubwangandulika kwa Yerusalemu ndi nyumba yaki yakusopiyamu pe cha, kweni wangukamba so vakukwaskana ndi “kumala kwa nyengu yinu,” yo isi tilimu. Pakukamba va nyengu ya umaliru, Yesu wangukamba kuti: “Va zuŵa pamwenga ora laki, palivi munthu yo waziŵa, chinanga mbangelu kuchanya pamwenga Mwana, kweni Ada ndiwu aziŵa.” Pavuli paki, wangutcheŵeska akusambira ŵaki wosi kuti “[alutirizgi] kuja masu.”​—Mariko 13:32-37.

2. Ntchifukwa wuli Akhristu a mu nyengu ya akutumika akhumbikanga kulutirizga kuja masu?

² Akhristu a mu nyengu ya akutumika akhumbikanga kulutirizga kuja masu kuti maumoyu ngawu ngazitaskiki. Yesu wangukambiya akusambira ŵaki vo vatingi viziŵawovyengi kuziŵa nyengu ya kubwangandulika kwa Yerusalemu ndi nyumba yaki yakusopiyamu. Iyu wanguti: “Asani mwaziwona kuti Yerusalemu wazingilizika ndi asilikali, ndikuti muziziŵi kuti we pafupi kubwangandulika.” Pa nyengu iyi, yiwu akhumbikanga kuzivwiya vo Yesu wanguŵatcheŵeska ndi “[kwamba] kuthaŵiya kumapiri.” (Luka 21:20, 21) Ŵanthu wo anguvwiya mazu ngakutcheŵeska ngenanga angupona pa nyengu yo Aroma abwanganduwanga Yerusalemu.

3. Kumbi tikambiskanengenji mu nkhani iyi?

 ³ Mazuŵa nganu, tija mu nyengu yo charu chiheni ichi che pafupi kumala. Mwaviyo, nasi tikhumbika kuŵanaŵana umampha kweniso kulutirizga kuja masu. Mu nkhani iyi, tikambiskanengi vo tingachita kuti tilutirizgi kuŵanaŵana umampha po tiwona vinthu vo vichitika pacharu, mo tingachitiya vinthu mwakuphwere kweniso mo tingagwiriskiya ntchitu mwakwenere nyengu yo yajaku.

4. Ntchifukwa wuli tikhumbisiska kuziŵa mo vinthu vo vichitika pacharu vifiskiya mauchimi nga mu Bayibolu?

⁴ Pe vifukwa vakuvwika vo vititichitiska kuti tikhumbisiskengi kuziŵa mo vinthu vo vichitika pacharu chapasi vifiskiya mauchimi nga mu Bayibolu. Mwakuyeruzgiyapu, Yesu wangukamba vinthu vo vazakutiwovya kuziŵa kuti charu chaku Satana ichi che pafupi kumala. (Mate. 24:3-14) Wakutumika Peturo wangutichiska kuti tiŵikengi mtima pa kufiskika kwa mauchimi kuti chivwanu chidu chilutirizgi kuja chakukho. (2 Petu. 1:19-21) Ndipu buku la Chivumbuzi litamba ndi mazu ngakuti: “Chivumbuzi chakuperekeka ndi Yesu Khristu, cho Chiuta wangumupaska kuti walongo akapolu ŵaki vinthu vo vitenere kuchitika pambula kuswera.” (Chivu. 1:1) Mwaviyo, tikhumbisiska kuwona vinthu vo vichitika pacharu mazuŵa nganu kweniso kuziŵa mo vifiskiya mauchimi nga mu Bayibolu. Ndipu tingakhumba kukambiyaku anyidu vinthu venivi.

5. Kumbi tikhumbika kukhwechanji, ndipu titenere kuchitanji? (Wonani so vithuzi.)

⁵ Kweni asani tikambiskana mauchimi nga mu Bayibolu, tikhumbika cha kusachizga waka vo vichitikengi. Chifukwa wuli? Chifukwa tikhumba cha kukamba chinthu chechosi cho chingachitiska kuti mpingu ugaŵikani. Mwakuyeruzgiyapu, tingavwa alongozgi a charu achikambiskana mo angamalisiya nkhondu ndi kuzisa chimangu ndipuso kuvikilirika. Mumalu mwa kusachizga waka kuti venivi vifiska uchimi wa pa 1 Atesalonika 5:3, tikhumbika kuziŵa vo gulu laku Yehova lakamba pambula kuswera yapa pa nkhani zenizi. Asani vo tikamba vituliya mu mabuku nga gulu laku Yehova, ndikuti tiwovyengi kuti mpingu ulutirizgi kukoliyana pa “maŵanaŵanu ngamoza.”​—1 Akori. 1:10; 4:6.

6. Kumbi tisambiranji pa 2 Peturo 3:11-13?

⁶ Ŵerengani 2 Peturo 3:11-13. Wakutumika Peturo watitiwovya kuti tiŵanaŵaniyengi chifukwa cho titenere kusandiya mauchimi nga mu Bayibolu. Iyu watitichiska kuti “[tilutirizgi] kukumbuka kuŵapu kwa zuŵa laku Yehova.” Chifukwa wuli? Chifukwa chakuti tikhumba kuziŵa “zuŵa ndi ora” lo Yehova wazisiyengi Aramagedoni cha, kweni tikhumba kugwiriskiya ntchitu nyengu yo yajaku kuti ‘tiŵi ndi nkharu yakupaturika kweniso tichitengi vinthu vakulongo kuti te akujipereka kwaku Chiuta.’ (Mate. 24:36; Luka 12:40) Mu mazu nganyaki tingakamba kuti, tikhumba kulutirizga kuja ndi nkharu yamampha kweniso kuwonesesa kuti vosi vo tichita pa kuteŵete Yehova vilongo kuti titimuyanja ukongwa. Kuti tifiski kuchita venivi titenere kuphwere ndi vo tichita.

7. Kumbi tilongo wuli kuti tiphwere ndi vo tichita? (Luka 21:34)

⁷ Yesu wangukambiya akusambira ŵaki kuti angaphweriyanga ndi vinthu vo vichitika pacharu pe cha, kweni aphweriyengi so ndi vo yiwu achita. Fundu yeniyi yiwoneke umampha pa vo wangutcheŵeska pa Luka 21:34. (Ŵerengani.) Wonani kuti Yesu wanguti: “Phweriyani.” Munthu yo waphwere ndi vo wachita, waja masu ndi vinthu vo vingananga ubwezi waki ndi Yehova ndipu watesesa kuvikhwecha. Asani wachita viyo, ndikuti wachita vinthu vo vingawovya kuti  Chiuta walutirizgi kumuyanja.​—Nthanthi 22:3; Yuda 20, 21.

8. Kumbi wakutumika Paulo wanguŵakambiyanji Akhristu?

⁸ Wakutumika Paulo wangukambiya Akhristu kuti aphweriyengi ndi vo achita. Mwakuyeruzgiyapu, iyu wangukambiya Akhristu a ku Efeso kuti: “Lutirizgani kuphwere ukongwa kuti mungayendanga nge ŵanthu ambula zeru cha, kweni nge ŵanthu azeru.” (Aefe. 5:15, 16) Nyengu zosi Satana watesesa kuti wanangi ubwezi widu ndi Yehova. Mwaviyo, Bayibolu lititikambiya kuti “[tilutirizgi] kuziŵa kuti khumbu laku Yehova ndakuti wuli” ndi chilatu chakuti tijivikiliyi ku viŵana vosi vaku Satana.​—Aefe. 5:17.

9. Kumbi tingachita wuli kuti tiziŵi khumbu laku Yehova?

⁹ Bayibolu lititikambiya vinthu vosi cha vo vingananga ubwezi widu ndi Yehova. Kanandi tisankha vakuchita pa nkhani zinyaki zo zikulembeka cha mu Malemba. Mwaviyo, kuti tisankhi umampha tikhumbika kuziŵa “khumbu laku Yehova.” Tingachita venivi asani tiŵerenga kweniso kulunguruka Mazu ngaku Chiuta nyengu zosi. Asani taliziŵa umampha khumbu laku Yehova ndipuso kwesesa kuja ndi “maŵanaŵanu ngaku Khristu,” ndikuti tiyendengi “nge ŵanthu azeru” chinanga mphavakuchitika vo palivi marangu ngo tingalondo. (1 Akori. 2:14-16) Nyengu zinyaki ntchipusu kuziŵa vinthu vo titenere kukhwecha, kweni nyengu zinyaki ntchipusu cha.

10. Kumbi ndi vinthu vinyaki nivi vo vingananga ubwezi widu ndi Yehova vo titenere kuvikhwecha?

¹⁰ Vinthu vinyaki vo vingananga ubwezi widu ndi Yehova vo titenere kuvikhwecha nkhukopana, kuloŵe, kurya ukongwa, kukamba mazu ngakupweteka anyidu kweniso kuwonere vakusangaluska va viwawa, vinthu va kusikuwa ndi vinyaki vaviyo. (Salimo 101:3) Murwani widu Dyaboli walutirizga kusaniya nthowa zakuti wanangiyi ubwezi widu ndi Yehova. (1 Petu. 5:8) Asani tingaleka kuja masu, Satana wangapanda mumaŵanaŵanu ndi mumtima mwidu mbewu ya sanji, kuleka kuchita vinthu mwauneneska, mbunu, kutinkhana, kujikuzga kweniso ukali. (Aga. 5:19-21) Pakwamba tingawona kuti mijalidu yeniyi njakofya cha. Kweni asani tingaleka kuchitapu kanthu mwaliŵi kuti tiyileki, yingalutirizga kukuwa nge chakume chapoyizoni ndipu yingachitiska kuti tikumani ndi masuzgu.​—Yako. 1:14, 15.

11. Kumbi ntchiŵana chambula kuwoneke nichi cho tikhumbika kukhwecha, nanga ntchifukwa wuli?

¹¹ Chiŵana chakofya ukongwa nkhwanjana ndi ŵanthu aheni. Tiyeni tiwoni chakuyeruzgiyapu. Tiyeruzgiyi kuti mugwira ntchitu yakulembeka limoza ndi munthu munyaki yo ndi Kaboni cha. Yimwi mukhumba kuti munthu mwenuyu waŵawonengi mwakwenere Akaboni aku Yehova, mwaviyo muchita nayu vinthu mwachanju kweniso mwaubwezi. Ndipuso nyengu zinyaki muryiya nayu limoza chakurya. Kweni mukuluta kwa nyengu mungayamba kuryiya limoza kaŵikaŵi. Nyengu zinyaki asani mucheza, iyu wakamba vinthu viheni vo pakwamba mwakhumbanga cha kuvivwa. Kweni pavuli paki mutamba kuviziŵiliya waka ndipu muguŵa navu so cha. Zuŵa linyaki watikupemphani kuti mukamwiyi limoza fanta ndipu yimwi muzomera. Pakumaliya paki, namwi mutamba kuŵanaŵana nge mo iyu waŵanaŵaniya. Yapa, mungaswera cha kwamba kuchita vinthu vo munyinu yo mugwira nayu ntchitu wachita. Mbuneneska kuti tikhumbika kuchita vinthu mwachanju kweniso mwaulemu ndi munthu weyosi, kweni titenere kukumbuka kuti mukuluta kwa nyengu tingayamba kuchita vinthu vo ŵanthu wo ticheza nawu achita. (1 Akori. 15:33) Kweni asani tiphwere ndi vo tichita nge mo Yesu wangukambiya, tikhwechengi kucheza ndi ŵanthu wo aleka kulondo marangu ngaku Yehova. (2 Akori. 6:15) Tiziŵengi  masuzgu ngo tingakumana nangu ndipu tingakhwechengi.

12. Kumbi akusambira aku Yesu akhumbikanga kuchitanji achilindizga kuti umaliru uzi?

¹² Akusambira aku Yesu akhumbikanga kujapu waka cheti cha achilindizga kuti umaliru uzi. Yesu wanguŵapaska ntchitu yakuti achiti. Iyu wanguŵalamula kuti apharazgi uthenga wamampha “mu Yerusalemu, mu Yudeya mosi ndi mu Samariya mpaka kuvigaŵa vakutali ukongwa va charu chapasi.” (Machi. 1:6-8) Iyi yenga ntchitu yikulu ukongwa! Chifukwa chakuti yiwu achitanga vosi vo angafiska kuti apharazgiyi ŵanthu anyaki, ayigwiriskiyanga ntchitu mwakwenere nyengu yawu.

13. Ntchifukwa wuli tikhumbika kuyigwiriskiya ntchitu mwakwenere nyengu yidu?(Akolose 4:5)

¹³ Ŵerengani Akolose 4:5. Kuti tiphweriyengi ndi vo tichita, tikhumbika kuŵanaŵaniya ukongwa mo tigwiriskiya ntchitu nyengu yidu. Ve viyo chifukwa chakuti “vinthu vamabuchibuchi” vingawiya weyosi. (Waku. 9:11) Tingafwa mwamabuchibuchi.

14-15. Kumbi tingachita wuli kuti tigwiriskiyi ntchitu nyengu yidu mwakwenere? (Aheberi 6:11, 12) (Wonani so chithuzi.)

¹⁴ Tingayigwiriskiya ntchitu mwakwenere nyengu yidu asani tichita khumbu laku Yehova  ndipuso kukholesa ubwezi widu ndi iyu. (Yoha. 14:21) Tikhumbika ‘kuma gwa, tingasukunyikanga cha ndipu tije ndi vakuchita vinandi mu ntchitu ya Ambuya.’ (1 Akori. 15:58) Asani tafwa pamwenga asani umaliru wa charu chiheni ichi waza tazamudandawulapu cha.​—Mate. 24:13; Aro. 14:8.

¹⁵ Mazuŵa nganu, Yesu walutirizga kulongozga akusambira ŵaki pakupharazga vakukwaskana ndi Ufumu waku Chiuta pacharu chosi chapasi. Iyu wafiska vo wangulayizga. Kuziya mugulu laku Yehova, Yesu watitisambiza mo tingapharazgiya ndipu watitipaska vidya vo tikhumbikiya kuti tipharazgengi uthenga wamampha. (Mate. 28:18-20) Tichita vo Yesu wakhumba kuti tichitengi asani tigwiraku mwaphamphu ntchitu yakupharazga ndi kusambiza kweniso asani tilutirizga kuja masu po tilindizga kuti Yehova wazisi umaliru wa nyengu yinu. Asani tigwiriskiya ntchitu ulongozgi wa pa Aheberi 6:11, 12, tikolesengi chilindizga chidu “mpaka pakumaliya.”​—Ŵerengani.

16. Kumbi tasimikiza mtima kuchitanji?

¹⁶ Yehova wakuŵika zuŵa ndi ora lo wazisiyengi umaliru wa charu chaku Satana ichi. Asani zuŵa lenili laza, Yehova wazamufiska mauchimi ngaki ngosi ngo wakulemba mu Mazu ngaki. Kweni pasonu panu, nyengu zinyaki tingawona nge kuti umaliru wa nyengu yinu uswera. Chinanga kuti ve viyo, zuŵa laku Yehova ‘liswerengi cha!’ (Haba. 2:3) Mwaviyo, tiyeni tisimikizi mtima kuti “tilutirizgengi kulereska kwaku Yehova” po ‘tilindizga Chiuta widu wa utaski.’​—Mika 7:7.