NKHANI YAKUSAMBIRA YA NAMBALA 4
Ntchifukwa Wuli Tisanirika pa Chikumbusu?
“Lutirizgani kuchita venivi pakundikumbuka.”—LUKA 22:19.
SUMU 20 Mukupereka Mwana Winu Wapade
VO TISAMBIRENGI MU NKHANI IYI *
1-2. (a) Kumbi mphanyengu niyi ukongwa yo tikumbuka wakwanjiwa widu yo wakufwa? (b) Kumbi Yesu wangwambisanji ndi usiku wakuti wafwengi mawa?
KWALI pajumpha nyengu yitali wuli kutuliya po ŵanthu wo taŵayanjanga akufwiya, titiŵakumbuka mbwenu. Asani zuŵa lo angufwiya lakwana, titiŵakumbuka ukongwa.
2 Chaka chechosi, tija mugulu la ŵathu mamiliyoni nganandi pacharu chosi chapasi wo awungana pamoza, kukumbuka nyifwa ya munthu munyaki yo titimuyanja ukongwa, Yesu Khristu. (1 Petu. 1:8) Tiwungana pamoza kuti tikumbukiyi munthu yo wakupereka umoyu waki nge sembi kuti watiwombo ku ubudi ndi nyifwa. (Mate. 20:28) Ndipu ndivu Yesu wakhumbanga kuti akusambira ŵaki akumbukengi nyifwa yaki. Usiku wakuti wafwengi mawa, iyu wangwambisa chakurya chamazulu ndipu wangulamula kuti: “Lutirizgani kuchita venivi pakundikumbuka.” *—Luka 22:19.
3. Kumbi tikambiskanengenji mu nkhani iyi?
3 Amanavi mwa ŵanthu wo asanirika pa Chikumbusu cha nyifwa yaku Khristu, ŵe ndi chilindizga chakuluta kuchanya. Kweni ŵanthu mamiliyoni nganandi wo ŵe ndi chilindizga chakuzija pacharu chapasi, nawu so asanirikapu. Mu nkhani iyi, tikambiskanengi vifukwa vo magulu ngaŵi ngenanga, ngakhumbisiskiya kusanirika pa Chikumbusu chaka chechosi. Tikambiskanengi so mo tiyanduliya chifukwa chakusanirikapu. Tiyeni tiyambi kukambiskana vifukwa vo Akhristu akusankhika asanirikiya pa Chikumbusu.
NTCHIFUKWA WULI AKHRISTU AKUSANKHIKA ASANIRIKA PA CHIKUMBUSU?
4. Ntchifukwa wuli Akhristu akusankhika aturya chiŵandi ndi kumwa vinyu pa Chikumbusu?
4 Chaka chechosi, Akhristu akusankhika, akhumbisiska kusanirika pa Chikumbusu ndipu aturya chiŵandi kweniso kumwa vinyu. Ntchifukwa wuli yiwu aturya chiŵandi kweniso kumwa vinyu? Kuti timuki fumbu lenili, tiyeni tikambiskani vo vinguchitika pa usiku wakumaliya wa umoyu waku Yesu wa pacharu chapasi. Ŵati achita Pasika, Yesu wangujalikiska mwambu wa Chakurya Chamazulu cha Ambuya. Iyu wangwendesa chiŵandi kweniso vinyu kwa akutumika ŵaki 11 akugomezgeka ndipu wanguŵakambiya kuti aryi ndi kumwa. Yesu wanguŵakambiya mapanganu ngaŵi, phanganu lifya kweniso phanganu la Ufumu. * (Luka 22:19, 20, 28-30) Mapanganu ngenanga, ngakujuliya nthowa akutumika kweniso ŵanthu anyaki amanavi kuti akaje mafumu kweniso asembi kuchanya. (Chivu. 5:10; 14:1) Mbakusankhika amanavi * pe, wo ŵe mu mapanganu ngaŵi ngenanga, wo angarya chiŵandi ndi kumwa vinyu pa Chikumbusu.
5. Kumbi Akhristu akusankhika aziŵanji vakukwaskana ndi chilindizga cho apaskika?
5 Chifukwa chinyaki cho Akhristu akusankhika akhumbisiskiya kusanirika pa Chikumbusu ndi ichi: Mwambu wenuwu, utiŵawovya kuti aŵanaŵaniyengi chilindizga chawu. Yehova waŵapaska chilindizga chamampha chakuti akaje ndi umoyu wambula kufwa kweniso kunangika kuchanya, kuti akawusiyi limoza ndi Yesu Khristu yo wakuyuskika kweniso limoza ndi a 144,000 anyawu. Ndipu chakuzirwa ukongwa ntchakuti akawoni Yehova Chiuta! (1 Akori. 15:51-53; 1 Yoha. 3:2) Akhristu akusankhika aziŵa kuti asankhika kuti akakondwi ndi venivi kuchanya. Kweni kuti azomerezeki kuluta kuchanya, atenere kulutirizga kuja akugomezgeka mpaka nyifwa yawu. (2 Timo. 4:7, 8) Akhristu akusankhika akondwa ukongwa asani aŵanaŵaniya chilindizga chawu chakuchanya. (Tito 2:13) Nanga wuli ‘ambereri zinyaki’? (Yoha. 10:16) Kumbi ndi vifukwa nivi vo vichitiska kuti asanirikengi pa Chikumbusu?
NTCHIFUKWA WULI AMBERERI ZINYAKI ASANIRIKA PA CHIKUMBUSU?
6. Ntchifukwa wuli ambereri zinyaki asanirika pa mwambu wa Chikumbusu chaka chechosi?
6 Ambereri zinyaki asanirika pa mwambu wa Chikumbusu ndipu aturya cha chiŵandi pamwenga kumwa vinyu, kweni awonere ŵaka. Mu chaka cha 1938, ŵanthu wo ŵe ndi chilindizga chakuzija pacharu chapasi, angudanika kakwamba kuti asaniriki pa mwambu wa Chikumbusu. Chigongwi cha Alinda cha March 1, 1938, chingukamba kuti: “Mphakwenere nadi kuti [ambereri zinyaki] asanirikengi pa mwambu wenuwu ndipuso kuwonere vo vichitika. . . . Ndipu atenere kuchita nadi venivi ndipuso yeniyi ndi nyengu yakuti akondwiyengi.” Nge mo ŵanthu wo adanika kunthengwa akondwe kuwonere mwambu wo, ambereri zinyaki akondwa kusanirikapu ndi kuwonere mwambu wa Chikumbusu.
7. Ntchifukwa wuli ambereri zinyaki akhumbisiska kuvwisiya nkhani ya Chikumbusu?
7 Ambereri zinyaki nawu aŵanaŵaniya chilindizga chawu. Yiwu akhumbisiska kuvwisiya nkhani ya Chikumbusu chifukwa yikonkhoska ukongwa vo Khristu kweniso a 144,000 wo wamulamuliya nawu limoza, azamuchitiya ŵanthu akugomezgeka mu Ulamuliru wa Vyaka 1000. Mwakulongozgeka ndi Fumu yawu Yesu Khristu, akusankhika azamuwovya pa kusintha charu kuti chizije paradayisu kweniso azamuwovya ŵanthu akuvwiya kuja akufikapu. Ŵanthu mamiliyoni nganandi wo awonere mwambu wa Chikumbusu, akondwa kuŵanaŵaniya mauchimi nga mu Bayibolu ngo ngazamufiskika, nge wo usanirika pa Yesaya 35:5, 6; 65:21-23; ndi Chivumbuzi 21:3, 4. Asani atijiyeruzgiya kuti yiwu ndi akwanjiwa ŵawu ŵe mucharu chifya, vitiŵawovya kuti agomezgengi ukongwa chilindizga chawu cha munthazi kweniso kukhumbisiska kulutirizga kuteŵete Yehova.—Mate. 24:13; Aga. 6:9.
8. Kumbi ntchifukwa chinyaki nichi cho ambereri zinyaki asanirikiya pa Chikumbusu?
8 Tiyeni tikambiskani chifukwa chinyaki cho ambereri zinyaki asanirikiya pa Chikumbusu. Yiwu akhumba kulongo kuti atanja kweniso atovya Akhristu akusankhika. Mazu ngaku Chiuta ngangukambiya limu kuti Akhristu akusankhika ndipuso wo ŵe ndi chilindizga chakuzija pacharu chapasi, azamukoliyana ukongwa. Mu nthowa wuli? Tiyeni tikambiskani vakuwoniyapu vimanavi ŵaka.
9. Kumbi uchimi wo we pa Zekariya 8:23, ulongo kuti ambereri zinyaki atiŵawona wuli akusankhika?
9 Ŵerengani Zekariya 8:23. Uchimi wenuwu ukonkhoska mwakuvwika umampha mo ambereri zinyaki awone abali ndi azichi akusankhika. Mazu ngakuti “Myuda” ndipuso “mwaŵanthu yimwi,” ngakamba za gulu limoza, Akhristu akusankhika wo ŵeche pacharu chapasi. (Aro. 2:28, 29) Mazu ngakuti “anthulumi 10 akutuliya mu vineneru vosi va mitundu ya ŵanthu” ngamiya ambereri zinyaki. Yiwu ‘akolesa’ Akhristu akusankhika ndipu asope nawu limoza mwauneneska. Mwaviyo, ambereri zinyaki alongo kuti akoliyana ndi akusankhika mwakuchitiya nawu limoza mwambu wa Chikumbusu.
10. Kumbi Yehova wachitanji kuti wafiski uchimi wo we pa Ezekiyeli 37:15-19, 24, 25?
10 Ŵerengani Ezekiyeli 37:15-19, 24, 25. Pakufiska uchimi wenuwu, Yehova wachitiska kuti Akhristu akusankhika ndi ambereri zinyaki, ateŵetiyengi limoza mwakukoliyana ukongwa. Uchimi wenuwu ukamba va timiti tiŵi. Ŵanthu wo ŵe ndi chilindizga chakuziluta kuchanya, ŵe nge kamiti “kaku Yuda” (fuku lo mafumu nga ku Isirayeli ngasankhikangamu), ndipu wo ŵe ndi chilindizga chakuzija pacharu chapasi, ŵe nge kamiti “kaku Efurayemu.” * Yehova wazibanyanga magulu ngaŵi ngenanga kuti ngaje “kamiti kamoza.” Venivi ving’anamuwa kuti yiwu ateŵete limoza mwakukoliyana, mwakulongozgeka ndi Fumu yawu yimoza, Khristu Yesu. Chaka chechosi, akusankhika kweniso ambereri zinyaki asanirika pa Chikumbusu nge magulu ngaŵi ngakupambana cha, kweni nge “mskambu umoza” wo ulongozgeka ndi “mliska yumoza.”—Yoha. 10:16.
11. Kumbi “Mbereri” zo zizumbulika pa Mateyu 25:31-36, 40, zitiŵawovya wuli abali aku Khristu?
11 Ŵerengani Mateyu 25:31-36, 40. “Mbereri” mu ntharika iyi zimiya ŵanthu arunji mu mazuŵa nganu ngakumaliya, wo ŵe ndi chilindizga chakuzija pacharu chapasi, kung’anamuwa ambereri zinyaki. Yiwu atovya ukongwa abali aku Khristu kufiska ntchitu yikulu yo ŵenawu, yakupharazga pacharu chosi kweniso kusambiza ŵanthu kuti aje akusambira.—Mate. 24:14; 28:19, 20.
12-13. Kumbi ambereri zinyaki atovya abali aku Khristu mu nthowa zinyaki nizi?
12 Chaka chechosi asani kwaja masabata ngamanavi kuti Chikumbusu chichitiki, ambereri zinyaki alongo kuti atovya abali aku Yesu, mwakugwiraku ntchitu yo yichitika pacharu chosi chapasi, yakudaniya ŵanthu ku Chikumbusu. (Wonani bokosi lakuti “ Kumbi Mwanozgeke Limu vo Mwazamuchita mu Nyengu ya Chikumbusu?”) Yiwu atovya so kuti mumipingu yosi pacharu chosi chapasi, muchitiki mwambu wa Chikumbusu, chinanga kuti mumipingu yinandi mulivi wo aturya chiŵandi kweniso kumwa vinyu. Ambereri zinyaki, akondwa ukongwa kovya abali aku Khristu mu nthowa zenizi. Yiwu aziŵa kuti Yesu wawona kuti vo achitiya abali ŵaki, ve nge kuti achitiya iyu.—Mate. 25:37-40.
13 Kumbi ndi vifukwa vinyaki nivi vo tosi tisanirikiya pa Chikumbusu, kwali tiluta kuchanya pamwenga cha?
NTCHIFUKWA WULI TOSI TISANIRIKA PA CHIKUMBUSU?
14. Kumbi Yehova kweniso Yesu, akulongo wuli kuti atitiyanja ukongwa?
14 Tiwonga chanju cho Yehova kweniso Yesu akutilongo. Yehova walongo kuti watitiyanja mu nthowa zinandi, kweni pe nthowa yimoza yo yiphara zosi. Chiuta widu wakulongo kuti watitiyanja ukongwa, mwakutitumiziya Mwana waki wakuzirwa kuti wazisuzgiki kweniso kutifwiya. (Yoha. 3:16) Ndipuso tiziŵa kuti Yesu nayu wakulongo chanju chikulu, mwakukhumbisiska kupereka umoyu waki chifukwa chaku isi. (Yoha. 15:13) Tingafiska cha kumuweze Yehova kweniso Yesu, chifukwa cha chanju cho akutilongo. Kweni tingalongo kuti tiwonga kuziya mu vo tichita pa umoyu widu wa zuŵa ndi zuŵa. (Ako. 3:15) Ndipu tisanirika pa Chikumbusu kuti tikumbukengi chanju cho akutilongo kweniso kuti tilongongi kuti titiŵayanja.
15. Ntchifukwa wuli Akhristu akusankhika kweniso ambereri zinyaki awona kuti mphasu ya sembi njakuzirwa ukongwa?
15 Tiwonga ukongwa mphasu ya sembi. (Mate. 20:28) Akusankhika awona kuti sembi yaku Yesu njakuzirwa ukongwa chifukwa yitiŵawovya kuti aŵi ndi chilindizga chakuziluta kuchanya. Chifukwa chakuti ŵe ndi chivwanu mu sembi yaku Khristu, Yehova watiŵakamba kuti mbarunji kweniso watiŵawona kuti mbana ŵaki. (Aro. 5:1; 8:15-17, 23) Ambereri zinyaki nawu, awonga ukongwa sembi yeniyi. Chifukwa chakuti ŵe ndi chivwanu mu ndopa zo Khristu wakudira, yiwu aja akutowa pa masu paku Chiuta, angamuchitiya uteŵeti wakupaturika, ndipuso alindizga ‘kuzituwa mu chisuzgu chikulu.’ (Chivu. 7:13-15) Nthowa yimoza yo Akhristu akusankhika kweniso ambereri zinyaki alongore kuti awonga sembi, nkhusanirika pa Chikumbusu chaka chechosi.
16. Kumbi ntchifukwa chinyaki nichi cho tisanirikiya pa Chikumbusu?
16 Chifukwa chinyaki cho tisanirikiya pa Chikumbusu, nkhukhumba kulongo kuti tivwiya Yesu. Kwali te ndi chilindizga wuli, weyosi waku isi wakhumbika kuvwiya dangu lo Yesu wangupereka pa usiku wo wangwambisa mwambu wa Chikumbusu kuti: “Lutirizgani kuchita venivi pakundikumbuka.”—1 Akori. 11:23, 24.
MO TOSI TIYANDULIYA CHIFUKWA CHA KUSANIRIKA PA CHIKUMBUSU
17. Kumbi Chikumbusu chititiwovya wuli kundere kufupi ndi Yehova?
17 Tindere kufupi ndi Yehova. (Yako. 4:8) Nge mo tasambiriya, Chikumbusu chititipaska mwaŵi wakuŵanaŵaniya chilindizga cho Yehova wakutipaska kweniso chanju chikulu cho wakutilongo. (Yere. 29:11; 1 Yoha. 4:8-10) Asani tiŵanaŵaniya chilindizga chidu cha munthazi, kweniso chanju chambula kumala cho Chiuta wakutilongo, titamba kumwanja ukongwa Yehova ndipuso tija nayu pa ubwezi wakukho.—Aro. 8:38, 39.
18. Kumbi kuŵanaŵaniya chakuwoniyapu chaku Yesu kutitichiska kuchitanji?
18 Tichiskika kuyezga chakuwoniyapu chaku Yesu. (1 Petu. 2:21) Asani kwaja mazuŵa ngamanavi kuti tichiti Chikumbusu, tiŵanaŵaniya nkhani za mu Bayibolu zakukwaskana ndi sabata yakumaliya ya umoyu waku Yesu wa pacharu chapasi, nyifwa yaki kweniso kuyuskika kwaki. Ndipu ndi mazulu pa mwambu wa Chikumbusu, nkhani yo yikambika yititikumbusa chanju cho Yesu wakutilongo. (Aefe. 5:2; 1 Yoha. 3:16) Asani tiŵerenga chakuwoniyapu chaku Yesu pa nkhani yakujipereka kweniso kuŵanaŵaniya vo wanguchita, tichiskika “kulutirizga kwenda nge mo iyu wayendiyanga.”—1 Yoha. 2:6.
19. Kumbi tingachita wuli kuti Chiuta walutirizgi kutiyanja?
19 Tisimikiza mtima kuchita vinthu vo vingawovya kuti Chiuta walutirizgi kutiyanja. (Yuda 20, 21) Chiuta walutirizgengi kutiyanja asani titesesa kuchita vosi vo tingafiska kuti timuvwiyengi, kutowesa zina laki kweniso kukondwesa mtima waki. (Nthanthi 27:11; Mate. 6:9; 1 Yoha. 5:3) Kuchita Chikumbusu kutitiwovya kusimikiza mtima kuti tichitengi vinthu mu nthowa yo yilongo kuti tikambiya Yehova kuti, ‘ndikhumba kuti mulutirizgi kundiyanja mpaka muyaya!’
20. Kumbi ndi vifukwa vakuvwika nivi vo tisanirikiya pa mwambu wa Chikumbusu?
20 Kwali te ndi chilindizga chakuchija kuchanya kwamuyaya pamwenga pacharu chapasi, te ndi vifukwa vakuvwika vakusanirikiya pa Chikumbusu. Chaka chechosi asani tiwungana pamoza pa zuŵa la Chikumbusu, tikumbuka nyifwa ya munthu munyaki yo titimuyanja ukongwa, Yesu Khristu. Chinthu chikulu ukongwa ntchakuti tikumbuka chanju cho Yehova wakutilongo pakutipaska Mwana waki nge sembi. Chaka chinu, Chikumbusu chichitikengi ndi mazulu pa Chinkhondi, pa 15 April, 2022. Titanja Yehova kweniso Mwana waki, mwaviyo, pa zuŵa lakukumbukiya nyifwa yaku Yesu, chinthu chikulu ukongwa cho tingachita nkhusanirika pa Chikumbusu.
SUMU 16 Thamikani Ya Chifukwa Cha Mwana Waki Wakusankhika
^ Kwali te ndi chilindizga cha kuchija kuchanya pamwenga kuzija mu paradayisu pacharu chapasi, tikhumbisiska kusanirika pa Chikumbusu chaka chechosi. Nkhani iyi yikonkhoskengi vifukwa vakuvwika va mu Malemba vo tisanirikiya pa mwambu wenuwu kweniso mo tiyanduliya chifukwa chakusanirikapu.
^ Mazu yanga ngakufwatulikiya kuti “Chenichi chitiyani kwachikumbuka ine” (Bayibolo la Mazgu Ghaku Chiuta).
^ Kuti muziŵi vinandi vakukwaskana ndi phanganu lifya kweniso phanganu la Ufumu, wonani nkhani yakuti “Mwazamuja Mafumu Ndipuso Asembi” mu Chigongwi cha Alinda cha October 15, 2014 peji 15-17.
^ VO MAZU NGANYAKI NGANG’ANAMUWA: Mazu ngakuti akusankhika amanavi, ngang’anamuwa za Akhristu akusankhika wo ŵeche pacharu chapasi.
^ Kuti muziŵi vinandi vakukwaskana ndi uchimi wa timiti tiŵi wo we mu Ezekiyeli chaputala 37, wonani buku lakuti Yehova Waweziyapu Kusopa Kwauneneska!, peji 130-135, ndimi 3-17.
