Ukaboni ulongo kuti Yesu wanguja Wasembi Mura wati wabatizika mu 29 C.E. Kumbi tiziŵa wuli venivi? Yesu wati wabatizika wangulongo kuti wenga wakukhumbisiska kupereka umoyu waki pa guŵa la sembi lakuyeruzgiya, lo limiya “khumbu” laku Chiuta. (Aga. 1:4; Ahe. 10:5-10) Chifukwa chakuti guŵa la sembi ndakukhumbika pa nyumba yakusopiyamu, dongosolu la nyumba yakusopiyamu yauzimu lingwamba pa nyengu yo Yesu wangubatizikiya. Nyumba yakusopiyamu yauzimu yimiya chechosi cho chititiwovya kuti tisopengi Yehova mu nthowa yakwenere kuziya mu sembi yaku Yesu.—Mate. 3:16, 17; Ahe. 5:4-6.

Nyumba yakusopiyamu yauzimu yakhumbikanga wasembi mura. Kuti venivi vichitiki, Yesu wangusankhika ndi “mzimu wakupaturika kweniso nthazi.” (Machi. 10:37, 38; Mariko 1:9-11) Kumbi tingasimikiza wuli kuti Yesu wangusankhika kuti waje Wasembi Mura wechendafwi kweniso wechendayuskiki? Nkhani yaku Aroni kweniso asembi ŵara wo angusere mumalu mwaki, yingatiwovya kumuka fumbu lenili.

Dangu laku Mozesi lakambanga kuti wasembi mura pe ndiyu waserengi ku Malu Ngakupaturika Ukongwa nga chihema. Ndipu nyumba yakusopiyamu yati yazengeka, iyu waserenga ku Malu Ngakupaturika Ukongwa nga nyumba yeniyi. Pakati pa Malu Ngakupaturika Ukongwa ndi Malu Ngakupaturika, ajalangapu ketani. Wasembi mura waserenga ku Malu Ngakupaturika Ukongwa pa Zuŵa Lakubenekere Maubudi pe. (Ahe. 9:1-3, 6, 7) Aroni ndi ŵanthu wo angusere mumalu mwaki, angusankhika kuja asembi ŵara ŵechendasere ku Malu Ngakupaturika Ukongwa kuporota paketani la chihema. Mwaviyo, Yesu nayu wangusankhika kuja Wasembi Mura wechendafwi kweniso “kuporota paketani, yo ndi liŵavu laki” kuti waluti kuchanya. (Ahe. 10:20) Pa chifukwa ichi wakutumika Paulo wangukamba kuti Yesu wazengi “nge wasembi mura” ndipu wazamuporota “muchihema chikulu kweniso chamampha ukongwa, chakupangika ndi manja nga ŵanthu cha,” kweni wakusere “kuchanya chayiku.”—Ahe. 9:11, 24.

Palivi mphambanu pakati pa nyengu yo phanganu lifya lingwambiya kugwira ntchitu ndi nyengu yo lingujalikiskikiya. Chifukwa wuli? Yesu wati waluta kuchanya ndi kupereka umoyu waki chifukwa chaku isi, wanguchita chinthu chakwamba pa vinthu vitatu vo vinguchitiska kuti phanganu lifya liyambi kugwira ntchitu. Venivi ndivu vinguchitika so kuti phanganu liyambi kugwira ntchitu. Kumbi ndi vinthu vitatu nivi vo wanguchita?

Chakwamba Yesu wanguwoneke pa masu paku Yehova; chachiŵi wangupereka sembi yaki kwaku Yehova; ndipu chachitatu, Yehova wangulonde sembi yaku Yesu. Phanganu lifya lingwamba kugwira ntchitu Yesu wati wachita venivi.

Bayibolu lititikambiya cha nyengu chayiyu yo Yehova wangulonde sembi yaku Yesu. Mwaviyo, tingakamba cha nyengu chayiyu yo phanganu lifya lingujalikiskikiya kweniso lingwambiya kugwira ntchitu. Kweni vo tiziŵa vakuti, Yesu wangukwera kuchanya kwati kwaja mazuŵa 10 kuti Pentekositi wachitiki. (Machi. 1:3) Pa nyengu yeniyi, Yesu wangupereka sembi yaki kwaku Yehova ndipu wanguyilonde. (Ahe. 9:12) Tiziŵa venivi chifukwa cha vo vinguchitika pa Pentekositi mu 33 C.E. (Machi. 2:1-4, 32, 33) Phanganu lifya lingujalikiskika ndipu lingwamba kugwira ntchitu.

Mwakudumuwa tingakamba kuti phanganu lifya lingujalikiskika kweniso lingwamba kugwira ntchitu Yehova wati walonde sembi yaku Yesu. Ndipu phanganu lingwamba kugwira ntchitu chifukwa lenga ndi Wasembi Mura Yesu yo wateŵete nge Mwendapakati wa phanganu.—Ahe. 7:25; 8:1-3, 6; 9:13-15.