Yehova wakhumba kuti munthulumi ndi muthukazi wo atorana akondwengi kweniso kuti ayanjanengi nyengu zosi. (Mate. 19:4-6) Asani mukhumba kuto pamwenga kuyirwa, kumbi mungasaniya wuli munthu wakwenere? Chifukwa chakuti Yehova ndi Mlengi widu, waziŵa vo tikhumbika kuchita kuti tije ndi nthengwa yalikondwa. Mwaviyo, asani mungagwiriskiya ntchitu fundu za mu Malemba, vinthu vikuyendiyeningi umampha. Tiyeni tikambiskani zinyaki mwa fundu zenizi.

Chakwamba, tikhumbika dankha kuziŵa fundu iyi yakukwaskana ndi taŵeni: “Mtima ngwakunyenga ukongwa kuluska chinthu chechosi ndipuso ngwakofya.” (Yere. 17:9) Asani ŵanthu ŵaŵi wo akhumba kutorana akumana ndipu ayamba chibwezi, mwaliŵi angayamba kwanjana ukongwa ndipu asani venivi vachitika, nkhwakusuza kusankha vinthu mwazeru. Asani ŵanthu akhumba kutorana chifukwa cha mo ŵaka avwiya, angaguŵa pakumaliya paki. (Nthanthi 28:26) Ndichu chifukwa chaki ndi zeru cha kuti ŵanthu ŵaŵi wo ŵe pa chibwezi, akambengi ukongwa mo atanjiyana pamwenga kulayizgana ŵechendaziŵani umampha.

Pa Nthanthi 22:3 pakamba kuti: “Munthu wakuchenje wawona soka ndipu wabisama, kweni munthu wambula kuziŵa vinandi walutiriya ndipu wakumana ndi masuzgu.” Kumbi kugwiriskiya ntchitu ma webusayiti ngo ŵanthu asaniriyapu nthengwa nkhwakofya wuli? Vachitima kuti pa ma webusayiti ngenanga, ŵanthu anyaki akumana ndi ŵanthu wo atiŵaziŵa cha ndipu atamba nawu chibwezi. Pavuli paki awamu kuti ŵanthu wo achitanga nawu chibwezi aŵapusiskanga ŵaka. Kweniso ŵanthu achinyengu ajula makaunti ngaboza kuti apusisi ŵanthu amampha ndi kuŵabiya ndalama. Nyengu zinyaki, ŵanthu achinyengu ŵenaŵa atijikamba kuti Mbakaboni.

Tiyeni tiwoni kofya kunyaki. Pa mawebusayiti nganyaki ngo ŵanthu asaniriyapu nthengwa, agwiriskiya ntchitu mapulogilamu nga pa kompyuta kuti aziŵi ŵanthu wo angayanana kuja pa chibwezi. Kweni palivi ukaboni wewosi wo ulongo kuti nthowa zenizi zakovya nadi. Mwaviyo, ndi zeru cha kuthemba pulogilamu ya pa kompyuta yo yikupangika ndi ŵanthu kuti munthu wasaniyi chinthu chinyaki chakukhumbika ukongwa, nge kusaniya munthu wakutorana nayu. Mapulogilamu nga pa kompyuta ngazamujapu cha ngakuthembeka nge mo ziliri fundu za mu Bayibolu.—Nthanthi 1:7; 3:5-7.

Fundu ya pa Nthanthi 14:15 yikamba kuti: “Munthu wambula kuziŵa vinandi wagomezga mazu  ngengosi, Kweni munthu wakuchenje waŵanaŵaniya mo watende.” Mwechendasankhi asani munthu munyaki wangaja wakwenere kutorana nayu, mutenere kumuziŵa dankha umampha. Kweni venivi vingachitika cha kuziya pa mawebusayiti. Chinanga kuti mungatumiziyana vithuzi kweniso kucheza kwa nyengu yitali pa intaneti, kumbi mungakamba kuti mutimuziŵa nadi umampha munthu yo? Ŵanthu anyaki wo aŵanaŵananga kuti angusaniya munthu wakwenere kutorana nayu, anguguŵa ŵati akumana nayu pamasu ndi pamasu.

Munthu yo wakulembaku buku la Masalimo wangukamba kuti: “Ini ndicheza cha ndi ŵanthu aryarya, kweniso ndikhwecha ŵanthu wo abisa mijalidu yawu.” (Salimo 26:4) Ŵanthu anandi awona kuti mbumampha ŵaka kuŵikapu chithuzi chaboza pa malu ngawu ngakucheziyapu nga pa intaneti ndi chilatu chakuti ŵanthu atolekengi nawu mtima. Yiwu angabisa mijalidu yawu yiheni pamwenga mijalidu yawu yeniyi yingawoneke cha asani atumiziyana mameseji ndi anyawu. Chinanga kuti anyaki angakamba kuti Mbakaboni aku Yehova, kweni kumbi yiwu Mbakhristu nadi akubatizika? Kumbi mbakukhwima mwauzimu? Kumbi ŵe paubwezi wakukho ndi Yehova? Kumbi abali ndi azichi atiŵatumbika mumpingu? Pamwenga achita vinthu mwambula zeru pamwenga so kuti ndi ‘mabwezi ngaheni?’ (1 Akori. 15:33; 2 Timo. 2:20, 21) Ndipuso kumbi mbakwenere kuto pamwenga kuyirwa mwakukoliyana ndi fundu za mu Bayibolu? Mutenere kuziŵa kwamuka kwa mafumbu ngosi ngenanga. Kweni vingaŵa vakusuzga kuziŵa kwamuka kwa mafumbu yanga, asani mungaleka kukambiskana ndi Akaboni wo atimuziŵa umampha munthu yo. (Nthanthi 15:22) Ndipuso mteŵeti wakugomezgeka waku Yehova, wangaŵanaŵaniya cha vakuti ‘wamangiki mugoli’ limoza ndi munthu wambula kugomezga.—2 Akori. 6:14; 1 Akori. 7:39.

Chifukwa chakuti nkhwakofya kugwiriskiya ntchitu mawebusayiti ngo ŵanthu asaniriyapu nthengwa, kweni pe nthowa zinyaki zamampha zakusaniriya kweniso kuziŵiya munthu yo wangaŵa wakwenere kutorana nayu. Kumbi ndi nunkhu ko mungasaniriya munthu yo wangaŵa wakwenere kutorana nayu? Asani tiwungana pamoza vambula kusuzga kuziŵana ndi ŵanthu anyaki. Mwakuyeruzgiyapu, asani te pa maunganu nga mpingu, ngadera, ngachigaŵa kweniso pa vakuchitika vinyaki.

Asani vingachitika cha kuwungana pamoza nge mo viliri ndi mulili wa COVID-19, tigwiriskiya ntchitu vipangizu va mazuŵa nganu pakuchita maunganu nga mpingu, po tituŵa ndi mwaŵi wakuziŵiyana ndi Akaboni anyaki wo ŵechendayirwi pamwenga kuto. Penapa mungawona mo akambiya nkhani pa maunganu kweniso mo alongore chivwanu chawu asani amuka. (1 Timo. 6:11, 12) Mungakambiskana so pa nyengu yakucheza asani maunganu ngamala, asani mpingu winu ugwiriskiya ntchitu vidiyoconference. Asani mucheza ndi Akaboni anyinu mungawona mo munthu yo mungayanja kuja nayu pa chibwezi wachitiya vinthu ndi ŵanthu anyaki ndipu venivi vingalongo mo iyu waliri. (1 Petu. 3:4) Mukuluta kwa nyengu asani munthu yo mwamuziŵa umampha, mungaziŵa asani mosi mwe ndi vilatu vakuyanana kweniso asani mungaŵa akwenere kutorana.

Asani ŵanthu wo ŵendato pamwenga kuyirwa agwiriskiya ntchitu fundu za mu Bayibolu pa kusaniya munthu wakwenere yo akhumba kutorana nayu, angawona kufiskika kwa nthanthi iyi yakuti: “Munthu yo wasaniya munthukazi [pamwenga munthulumi] wamampha wasaniya chinthu chamampha, ndipu Yehova wakondwa nayu.”—Nthanthi 18:22.