1. Kumbi khumbu laku Yehova ndakuti wuli mazuŵa nganu?

 MAZUŴA nganu, Chiuta wakhumba kuti uthenga wamampha wa Ufumu upharazgiki pacharu chosi chapasi. (Mariko 13:10; 1 Timo. 2:3, 4) Ntchitu yeniyi njaku Yehova ndipu veumampha ukongwa kuti wasankha Mwana waki wakwanjiwa kuti ndiyu walongozgengi ntchitu yeniyi. Tingasimikiza kuti ntchitu yakupharazga yimalizgikengi mwakukoliyana ndi mo Yehova wakhumbiya umaliru wechendazi, chifukwa chakuti ye mumanja mwa mulongozgi wakwenere Yesu.​—Mate. 24:14.

2. Kumbi tikambiskanengenji mu nkhani iyi?

² Mu nkhani iyi, tiwonengi mo Yesu wagwiriskiya ntchitu “kapolu wakugomezgeka ndi wazeru,” kupereka chakurya chauzimu kweniso kovya ŵanthu ŵaki kugwira ntchitu yikulu ukongwa yakupharazga yo njakukhumbika ukongwa. (Mate. 24:45) Tikambiskanengi so vo weyosi waku isi wangachita kuti wawovyi Yesu ndipuso kapolu wakugomezgeka.

3. Kumbi Yesu wakupaskika mazaza wuli?

³ Yesu ndiyu walongozga ntchitu yakupharazga. Kumbi tingasimikiza wuli venivi? Kwati kwaja kamanavi kuti waluti kuchanya, Yesu wangukumana ndi akusambira ŵaki anyaki akugomezgeka paphiri ku Galileya. Iyu wanguŵakambiya kuti: “Mazaza ngosi ngapaskika kwaku ini, kuchanya ndi pacharu chapasi.” Wonani mazu ngo wangukamba pavuli paki. Iyu wanguti: “Mwaviyo, lutani mukasambizengi ŵanthu amitundu yosi kuti aje akusambira ŵangu.” (Mate. 28:18, 19) Mwaviyo, Yesu  wapaskika so mazaza ngakulongozga ntchitu yakupharazga.

4. Ntchifukwa wuli tingasimikizga kuti Yesu wechekulongozga ntchitu yakupharazga?

⁴ Yesu wangukamba kuti ntchitu yakupharazga kweniso kovya ŵanthu kuja akusambira yazamuchitika ku ‘mitundu yosi’ ndipuso kuti iyu wazamukuŵa ndi akusambira ŵaki “mazuŵa ngosi mpaka pakumaliya pa nyengu yinu.” (Mate. 28:20) Mazu ngenanga, ngalongo kuti ntchitu yakupharazga yazilutiliyanga mwakulongozgeka ndi Yesu mpaka mazuŵa nganu.

5. Kumbi tifiskaku wuli uchimi wa pa Salimo 110:3?

⁵ Yesu wafipanga mtima cha kuti kwazamukuŵa antchitu amanavi pakumaliya pa nyengu yinu. Iyu wanguziŵa kuti mazu nga uchimi ngo wamasalimo munyaki wangukamba ngazamufiskika ngakuti: “Ŵanthu ŵaku ajiperekengi mwakukhumbisiska pa zuŵa laku la nkhondu.” (Salimo 110:3) Asani mupharazga uthenga wamampha, ndikuti mutovya Yesu kweniso kapolu wakugomezgeka ndi wazeru ndipuso mufiskaku uchimi wenuwu. Ntchitu yigwirika kweni pe masuzgu.

6. Kumbi apharazgi a Ufumu akumana ndi suzgu nili mazuŵa nganu?

⁶ Limoza mwa masuzgu ngo apharazgi a Ufumu akumana nalu, nkhususkika. Ampatuku, alongozgi a visopa ndipuso andali akambiya ŵanthu anandi maboza ngakukwaskana ndi ntchitu yidu. Asani abali ŵidu, ŵanthu anyaki wo titiŵaziŵa, kweniso wo tigwira nawu ntchitu alandizgika ndi maboza ngenanga, angatichichizga kuti tileki kuteŵete Yehova kweniso kuti tileki kupharazga. Mu vyaru vinyaki, arwani ŵidu atitiwofyeza, kutiyukiya, kutimanga kweniso kutiŵika mujeri. Tizizwa cha kuti ŵanthu atitichitiya venivi. Yesu wangukambiya limu kuti: “Mitundu yosi ya ŵanthu yazakukutinkhani chifukwa cha zina langu.” (Mate. 24:9) Ndipu chifukwa chakuti ŵanthu atititinkha, mbukaboni wakuti Yehova wakondwa nasi. (Mate. 5:11, 12) Dyaboli ndiyu wachitiska kuti arwani ŵidu atisuskengi. Kweni Yesu we ndi nthazi ukongwa kuphara Satana! Uthenga wamampha upharazgika ku ŵanthu a mitundu yosi, chifukwa chakuti Yesu ndiyu watovya. Tiyeni tikambiskani maukaboni.

7. Kumbi ndi vinthu wuli vo vilongo kuti uchimi wa pa Chivumbuzi 14:6, 7 ufiskika?

⁷ Suzgu linyaki lo tikumana nalu asani tipharazga, ndakuti ŵanthu alongoro vineneru vakupambanapambana. Mu chiwona cho Yesu wangulongo wakutumika Yohane, wangukambiya limu kuti uthenga wamampha wazamupharazgika mbwenu mu nyengu yidu yinu chinanga kuti paŵi suzgu lenili. (Ŵerengani Chivumbuzi 14:6, 7.) Kumbi vazamuchitika wuli? Titesesa kuchita vosi vo tingafiska kuti ŵanthu anandi avwisiyi uthenga wa Ufumu. Mazuŵa nganu, ŵanthu pacharu chosi, angaŵerenga vinthu vo vikonkhoska Bayibolu pa webusayiti yidu ya jw.org chifukwa visanirika mu vineneru vakujumpha 1,000! Wupu wakulongozga ukuzomerezga kuti buku la Kondwani ndi Umoyu Kwamuyaya! lo ntchidya chikulu cho tigwiriskiya ntchitu pakovya ŵanthu kuja akusambira, lifwatuliki mu vineneru vakujumpha 700. Chakurya chauzimu chiperekeka so ku ŵanthu ambula kuvwa mwakugwiriskiya ntchitu mavidiyo kweniso mabuku nga ŵanthu ambula kuwona. Tiwona mauchimi nga mu Bayibolu ngachifiskika. Ŵanthu “akutuliya mu vineneru vosi va mitundu ya ŵanthu” asambira kulongoro “chineneru chituŵa” cha uneneska wa mu Bayibolu. (Zeka. 8:23; Zefa. 3:9) Vosi ivi vifiskika chifukwa cha kulongozgeka ndi mulongozgi wakwenere Yesu Khristu.

8. Kumbi ndi vinthu wuli vo vichitika chifukwa cha ntchitu yakupharazga?

⁸ Mazuŵa nganu, ŵanthu akujumpha 8,000,000 mu vyaru, 240, ŵe mugulu laku Yehova ndipu ŵanthu akujumpha 100,000 abatizika  chaka chechosi! Kweni chakukhumbika ukongwa kuphara chiŵerengeru, ndi mijalidu ya Chikhristu, kung’anamuwa “umunthu wufya” wo akusambira asonu ŵenaŵa ŵenawu. (Ako. 3:8-10) Anandi akuleka mijalidu yabwekabweka, nkhaza, sankhu kweniso kwanja ukongwa charu chawu. Uchimi wo we pa Yesaya 2:4 ufiskika, yiwu ‘asambira so nkhondu cha.’ Chifukwa chakuti tiyesesa kuvwala umunthu wufya, tikopa ŵanthu kuti asere mugulu laku Chiuta ndipu tilongo kuti tilondo mulongozgi widu Khristu Yesu. (Yoha. 13:35; 1 Petu. 2:12) Venivi vichitika ŵaka vija cha. Vichitika chifukwa chakuti Yesu watitiwovya.

9. Mwakukoliyana ndi Mateyu 24:45-47, kumbi Yesu wangukambiya limu kuti ndi vinthu wuli vo vazamuchitika mu mazuŵa ngakumaliya?

⁹ Ŵerengani Mateyu 24:45-47. Yesu wangukambiya limu kuti mu mazuŵa ngakumaliya, wazamusankha “kapolu wakugomezgeka ndi wazeru,” kuti waperekengi chakurya chauzimu. Mwaviyo, takhazanga kuti kapolu wazamugwira ntchitu mwaphamphu mu nyengu yidu yinu. Venivi ndivu vichitika nadi. Yesu wagwiriskiya ntchitu kagulu kamanavi ka Akhristu akusankhika kupereka ‘chakurya chauzimu cha pa nyengu yaki’ ku ŵanthu aku Chiuta kweniso ku ŵanthu wo akhumbisiska kusambira vinandi. Akhristu akusankhika ŵenaŵa, achita ufumu cha pa chivwanu cha ŵanthu anyaki. (2 Akori. 1:24) Mumalu mwaki, yiwu aziŵa kuti Yesu Khristu ndi “mulongozgi kweniso wakulamuliya” wa ŵanthu ŵaki.​—Yesa. 55:4.

10. Kumbi ndi buku nili lo lingukuwovyani kwamba kuteŵete Yehova?

¹⁰ Kwambiya mu 1919, kapolu wakugomezgeka watuzga mabuku ngakupambanapambana kuti ŵanthu akunweka, aŵi ndi mwaŵi wakusambira uneneska wa mu Bayibolu. Mu 1921, kapolu wangunozga buku la Zeze wa Mulungu kuti wawovyi ŵanthu akunweka kusambira fundu zikuluzikulu za mu Bayibolu. Pavuli  paki, mabuku nganyaki so ngakutuzgika. Kumbi yimwi ndi buku nili lo lingukuwovyani kuti muziŵi kweniso kwanja Awusefwi akuchanya? Kumbi lenga buku lakuti, “Mulungu Akhale Woona,” Coonadi Cimene Cimatsogolera ku Moyo Wamuyaya, Mungathe Kukhala ndi Moyo Kosatha M’Paradaiso pa Dziko Lapansi, Chidziwitso Chotsogolera ku Moyo Wosatha, Kumbi Bayibolo Lisambizanji Weniukongwa?, Kumbi Tingasambiranji m’Bayibolu, pamwenga buku lidu lasonu la Kondwani ndi Umoyu Kwamuyaya!? Mabuku ngosi ngenanga, ngangunozgeka kuti ngatiwovyi pa ntchitu yakovya ŵanthu kuja akusambira. Ndipu pa nyengu yo buku lelosi latuzgikiyanga lenga lakukhumbika ukongwa.

11. Ntchifukwa wuli tosi tikhumbika kulonde chakurya chauzimu?

¹¹ Mbanthu akunweka pe cha wo akhumbika chakurya chakukhoma chauzimu. Tosi tikhumbika venivi. Wakutumika Paulo wangulemba kuti: “Chakurya chakukhoma ntcha ŵanthu akukhwima.” Paulo wangukamba so kuti kugwiriskiya ntchitu vinthu vo tisambira mu Bayibolu, kungatiwovya “kupambanisa pakati pa chamampha ndi chiheni.” (Ahe. 5:14) Kungaŵa kwakusuzga ukongwa kuvwiya fundu za mijalidu yamampha yaku Yehova pasonu panu, chifukwa chakuti ŵanthu anandi ŵe ndi nkharu ziheni ukongwa. Kweni Yesu wawonesesa kuti tisambira vinthu vo tikhumbika, kuti chivwanu chidu chilutirizgi kuja chakukho. Chakurya chauzimu chenichi, chituliya mu Mazu ngaku Chiuta, Bayibolu. Kapolu wakugomezgeka ndi wazeru, wanozga kweniso kugaŵa chakurya chenichi mwakulongozgeka ndi Yesu.

12. Mwakuyanana ndi Yesu, kumbi isi talitumbika wuli zina laku Chiuta?

¹² Mwakuyanana ndi Yesu, tipereka ulemu wakwenere ku zina laku Chiuta. (Yoha. 17:6, 26) Mwakuyeruzgiyapu, mu 1931, tingwamba kuziŵika ndi zina la mu Malemba lakuti Akaboni aku Yehova. Mwakuchita venivi, tingulongo mo zina laku Chiuta liliri lakuzirwa  kwaku isi ndipuso kuti tikhumba kuziŵika ndi zina la Awusefwi akuchanya. (Yesa. 43:10-12) Ndipu kwambiya mu October chaka chenichi, zina laku Chiuta laja lichiŵikika pachikonkhombi cha magazini yeyosi ya Chigongwi cha Mlinda. Kweniso mu Bayibolu la Charu Chifya la Malemba Ngakupaturika, akuweziyamu so zina laku Chiuta mumalu ngaki ngakwenere. Venivi vipambana ukongwa ndi matchalitchi ngachikhristu ngo ngakutuzgamu zina laku Yehova mu Mabayibolu ngawu nganandi!

13. Ntchifukwa wuli musimikiza kuti Yesu wagwiriskiya ntchitu “kapolu wakugomezgeka ndi wazeru” mazuŵa nganu? (Yoha. 6:68)

¹³ Mwakugwiriskiya ntchitu “kapolu wakugomezgeka ndi wazeru,” Yesu wakujalikiska gulu lapade la mazuŵa nganu kuti lilutiski panthazi kusopa kwauneneska. Kumbi yimwi mutuvwa wuli kuja mugulu lenili? Panyaki, mutuvwa nge mo wakutumika Peturo wanguvwiya yo wangukambiya Yesu kuti: “Tilutengi kwaku yani? Yimwi mwe ndi mazu ngakupaska umoyu wamuyaya.” (Yoha. 6:68) Kumbi weyosi waku isi mazuŵa nganu, watingi waŵengi pani asani tinguleka kukoliyana ndi gulu laku Yehova? Kuziya mu gulu lenili, Khristu wawonesesa kuti tiryiskika umampha mwauzimu. Iyu watitisambiza so mo tingachitiya umampha uteŵeti widu. Chinyaki ntchakuti watitiwovya kuti tivwali “umunthu wufya” kuti Yehova watiyanji.​—Aefe. 4:24.

14. Kumbi yimwi mwayanduwa wuli chifukwa chakuti mwe mugulu laku Yehova mu nyengu ya mulili wa COVID-19?

¹⁴ Yesu wapereka ulongozgi wazeru mu nyengu ya masuzgu. Venivi vinguwoneke umampha pa nyengu yo mulili wa COVID-19 ungubukiya. Pa nyengu yo ŵanthu anandi pacharu chapasi, aziŵanga cha vakuti achiti, Yesu wanguwonesesa kuti talonde ulongozgi wakuvwika  umampha kuti tivikiliriki. Tinguchiskika kuti tivwalengi masiki asani taluta ku malu ko kwe ŵanthu anandi kweniso kuti tijengi patalipatali. Ŵara angukumbuskika kuti akambiskanengi kaŵikaŵi ndi apharazgi wosi mumpingu kweniso kuti aziŵengi vo akhumbika mwakuliŵavu kweniso mwauzimu. (Yesa. 32:1, 2) Talondiyanga so ulongozgi unyaki kweniso kuchiskika ndi malipoti nga Wupu Wakulongozga.

15. Kumbi ndi ulongozgi nuwu wo unguperekeka, pa nkhani yakuchita maunganu kweniso pa ntchitu yakupharazga mu nyengu ya mulili, nanga ndi vinthu wuli vo vinguchitika pavuli paki?

¹⁵ Mu nyengu ya mulili, tingulonde so ulongozgi wakuvwika umampha wa mo tingachitiya maunganu nga mpingu kweniso mo tingapharazgiya. Tinguswera cha kwamba kuchita maunganu nga mpingu, ngadera, kweniso ngachigaŵa kuziya pa intaneti. Ndipuso tingwamba kugwiriskiya ntchitu ukongwa makalata kweniso foni pakupharazga. Yehova wangutumbika phamphu lidu. Maofesi nganandi nga nthambi, ngakambanga kuti chiŵerengeru cha apharazgi chasazgikiyangaku. Kukamba uneneska, anandi anguchiskika ukongwa ndi vo vaŵachitikiyanga pa nyengu yeniyi.—Wonani bokosi lakuti, “ Yehova Watumbika Ntchitu Yidu Yakupharazga.”

16. Kumbi tisimikizanji?

¹⁶ Anyaki atenere kuti awonanga kuti gulu laku Yehova ligozga ukongwa pa nkhani ya mulili wa COVID-19. Kweni kanandi, vawonekiyanga limu kuti ulongozgi wo talondiyanga wenga wazeru. (Mate. 11:19) Po tiŵanaŵaniya mo Yesu walongozge ŵanthu ŵaki mwachanju, tisimikiza kuti mwemosi mo vinthu vazamuŵiya kunthazi, Yehova ndi Mwana waki wakwanjiwa azamukuŵa nasi.​—Ŵerengani Aheberi 13:5, 6.

17. Kumbi mutuvwa wuli chifukwa chakuti mulongozgeka ndi Yesu?

¹⁷ Tikondwa ukongwa kuti Yesu ndi mulongozgi widu! Te mugulu lo ndakugaŵikana cha chifukwa chakupambana mudawuku, charu kweniso chineneru. Tiryiskika umampha ukongwa mwauzimu ndipuso tisambizika umampha mo tingachitiya ntchitu yakupharazga. Weyosi waku isi, wasambizgika mo wangavwaliya umunthu wufya kweniso kwanjana. Kweniso te ndi vifukwa vakuvwika vakumalikiya kuti Yesu ndi mulongozgi widu!