NKHANI YAKUSAMBIRA YA NAMBALA 25
“Ndipenjengi Mbereri Zangu”
“Ndipenjengi mbereri zangu, ndipu ndiziphweriyengi.”—EZEKI. 34:11.
SUMU 105 “Chiuta Ntchanju”
VO TISAMBIRENGI MU NKHANI IYI *
1. Ntchifukwa wuli Yehova watijiyeruzgiya ndi munthukazi yo watonkhesa?
MU NYENGU ya mchimi Yesaya, Yehova wangufumba kuti: “Kumbi munthukazi wangaluwa mwana waki wakonkha?” Chiuta wangukambiya ŵanthu ŵaki kuti: ‘Chinanga kuti anthukazi ŵenaŵa angaluwa, ini ndingakuluwani cha.’ (Yesa. 49:15) Kanandi Yehova watijiyeruzgiya cha ndi munthukazi yo we ndi mwana. Kweni pa nyengu iyi wanguchita venivi. Yehova wangugwiriskiya ntchitu chanju cho chiŵapu pakati pa mwana ndi anyina chifukwa wakhumbanga kuti ateŵeti ŵaki aziŵi mo watiŵayanjiya. Anthukazi anandi wo ŵe ndi ŵana angazomereza vo Jasmin wangukamba. Iyu wangukamba kuti, “Asani utonkhesa mwana, muja pa ubwezi kwa umoyu winu wosi.”
2. Kumbi Yehova watuvwa wuli asani ateŵeti waki alopwa?
2 Yehova waziŵa asani mteŵeti waki yumoza waleka kupharazga kweniso kuwungana. Ŵanaŵaniyani mo vitimuŵaŵiya asani wawona kuti ateŵeti ŵaki anandi alopwa * chaka chechosi.
3. Kumbi Yehova wakhumbanji?
3 Anandi mwa abali ndi azichi akulopwa awere so mu mpingu ndipu tikondwa ukongwa asani achita viyo. Yehova wakhumba kuti awere kwaku iyu ndipu nasi ndivu tikhumba. (1 Petu. 2:25) Kumbi tingaŵawovya wuli? Kweni techendamuki fumbu ili, tingachita umampha kuziŵa dankha vo vichitiska kuti aleki kuwungana kweniso kupharazga.
NTCHIFUKWA WULI ANYAKI ALEKA KUTEŴETE YEHOVA?
4. Kumbi ndi vinthu wuli vo vichitikiya abali anyaki chifukwa cha ntchitu?
4 Anyaki awona kuti ntchitu ndiyu yakukhumbika ukongwa pa umoyu wawu. Mwakuyeruzgiyapu, mubali Hung * yo waja ku Asia wangukamba kuti, “Ndajinyenganga kuti asani ndingaja ndi chuma chinandi, ndipu ndingateŵete umampha Yehova. Ndagwiranga ntchitu kwa maora nganandi. Ndingwamba kujaja ku maunganu ndipu pakumaliya ndinguleke limu kuwungana. Satana wagwiriskiya ntchitu charu kuti kamana ndi kamana ŵanthu aleki kuteŵete Yehova.”
5. Kumbi mzichi Anne wanguchitanji wati wakumana ndi masuzgu?
5 Abali ndi azichi anyaki akumana ndi masuzgu ngo ngatiŵaweze vuli. Mwakuyeruzgiyapu, mzichi Anne wa ku Britain we ndi ŵana ankhondi. Iyu wanguti, “Mwana wangu yumoza ngwakupunduka. Pati pajumpha nyengu mwana wangu munthukazi wangusezgeka ndipu mwana wangu munyaki wangutama matenda ngakusuzgika maŵanaŵanu. Ndingukwaskika ukongwa ndipu ndinguleka kuwungana kweniso kupharazga. Pavuli paki, ndingulopwa.” Titimulenge lisungu ukongwa mzichi Anne ndi banja laki kweniso abali ndi azichi anyaki wo akumana ndi masuzgu nga nge yanga!
6. Ntchifukwa wuli munthu wangatuwaku kwaku Yehova asani wangaleka kugwiriskiya ntchitu Akolose 3:13?
6 Ŵerengani Akolose 3:13. Ateŵeti anyaki aku Yehova, akuguŵa chifukwa cha vo wanguŵachitiya mubali pamwenga mzichi munyaki mu mpingu. Wakutumika Paulo wanguziŵa kuti nyengu zinyaki tingaŵa ndi “chifukwa chakudandawuliya” vakukwaskana ndi mubali pamwenga mzichi. Nyengu zinyaki vingaŵa kuti abali akutichitiya vinthu mwambula urunji. Asani tingaleka kuphwere tingakwiya ukongwa. Ndipu ukali ungachitiska kuti munthu watuweku kwaku Yehova. Ŵanaŵaniyani vo vinguchitikiya mubali Pablo wa ku America. Iyu angumupusikiya kuti wachita vinthu viheni ndipu ŵara angumuchenya. Kumbi Pablo wanguchita wuli? Iyu wanguti, “Ndingukwiya ukongwa ndipu pavuli paki ndinguleka kuwungana.”
7. Kumbi ntchinthu wuli cho chingachitika asani munthu njuŵi yitimusuzga?
7 Asani munthu wakuchitapu ubudi kuvuli, njuŵi yingamusuzga kwa nyengu yitali. Iyu wangawona kuti Chiuta wangamuyanja so cha. Chinanga kuti wakulapa ndipu Chiuta wakumugowoke, wangawona mbwenu kuti ngwambula kwenere kuja mugulu la ateŵeti aku Chiuta. Mwakuyeruzgiyapu, mubali Francisco wajiwonanga so viyo. Iyu wanguti, “Ndinguchenyeka chifukwa ndinguchita ureŵi. Chinanga kuti pakwamba ndawungananga, kweni ndingwamba kusuzgika maŵanaŵanu ndipu ndajiwonanga kuti nde wambula kwenere kuja mugulu laku Yehova. Njuŵi yandisuzganga mbwenu ndipu ndawonanga kuti Yehova wakundigowoke cha. Pavuli paki, ndinguleka kupharazga ndi kuwungana.” Kumbi mutuvwa wuli asani muwona abali ndi azichi wo akumana ndi masuzgu ngo takambiskana mu nkhani yinu? Kumbi mutiŵalenge lisungu? Kumbi Yehova watiŵawona wuli?
YEHOVA WATANJA ATEŴETI ŴAKI
Mliska wa mu nyengu ya Ayisirayeli wayiphweriyanga mbereri yakusoŵa (Wonani ndimi 8-9) *
8. Kumbi Yehova watiŵaluwa ŵanthu wo amuteŵetiyanga? Konkhoskani.
8 Yehova watiŵaluwa cha ŵanthu ŵaki wo akuleka dankha kumuteŵete kwa kanyengu kamanavi. Kweniso waluwa cha vo achitanga pakumuteŵete. (Ahe. 6:10) Yesaya wangukamba chakuyeruzgiyapu chamampha cho chilongo mo Yehova wachitiya ndi ŵanthu ŵaki. Iyu wangukamba kuti Yehova “wazamuphwere mskambu waki nge mliska. Iyu wazamuwunganisa pamoza ŵana a mbereri ndi janja laki, ndipuso wazakuŵanyamuwa pachifuŵa chaki.” (Yesa. 40:11) Kumbi Yehova yo ndi Mliska Mura watuvwa wuli asani mbereri yaki yimoza yasoŵa? Yesu wangulongo mo Yehova wavwiya wati wafumba akusambira ŵaki kuti: “Kumbi muwona wuli? Asani munthu we ndi mbereri 100 ndipu yimoza yalanda, asi walekengi dankha zinyaki 99 mumapiri ndi kuluta kuchipenja yo yalanda? Ndipu asani wayisaniya, nditikuneneskiyani kuti wakondwengi ukongwa chifukwa cha mbereri yo, kuluska 99 zo zinguleka kulanda.”—Mate. 18:12, 13.
9. Kumbi aliska amampha achita nazu wuli mbereri? (Wonani chithuzi cho che pachikonkhombi.)
9 Ntchifukwa wuli tingayeruzgiya Yehova ndi mliska? Chifukwa mliska wamampha waphwere mbereri zaki. Mwakuyeruzgiyapu, Davidi wangubaya nkharamu kweniso chinyama cha biyere kuti wavikiliyi mbereri zaki. (1 Samu. 17:34, 35) Mliska wamampha waziŵanga asani mbereri yaki yimoza yasoŵa. (Yoha. 10:3, 14) Mliska waviyo, wasiyanga mbereri zaki 99 mukhora pamwenga wakambiyanga anyaki kuti aziphwere kuti wakapenji yo yasoŵa. Yesu wangugwiriskiya ntchitu ntharika iyi kuti watisambizi fundu yinyaki yakukhumbika yakuti: “Ada wo ŵe kuchanya akhumba cha kuti chinanga nkhamoza mwa tiŵana iti kanangiki.”—Mate. 18:14.
Mliska wa mu nyengu ya Ayisirayeli wayiphweriyanga mbereri yakusoŵa (Wonani ndimi 9)
YEHOVA WAPENJA MBERERI ZAKI
10. Mwakukoliyana ndi Ezekiyeli 34:11-16, kumbi Yehova wangulayizga kuti wazamuchitanji ndi mbereri zakusoŵa?
10 Yehova watanja weyosi kusazgapu Akhristu akulopwa. Iyu wangulayizga kuziya mwa mchimi Ezekiyeli kuti wazamupenja mbereri zaki zakusoŵa ndi kuziwovya kuti zije so nayu pa ubwezi. Ndipu wangukamba vo wazamuchita kuti wazisaniyi. Ndipu venivi viyanana ndi vo aliska a mu nyengu ya Ayisirayeli achitanga asani mbereri yawu yasoŵa. (Ŵerengani Ezekiyeli 34:11-16.) Chakwamba, mliska wapenjanga mbereri yaki ndipu venivi vakhumbikanga nyengu kweniso nthazi. Asani wayisaniya, walutanga nayu ko kwe mbereri zinyaki. Kweniso asani mbereri yo yapwetekeka pamwenga ye ndi nja, mliska wayiwovyanga mwachanju, wamanganga po yajipweteka, wayinyamuwanga ndipuso kuyiryiska. Ŵara wo mbaliska a “mskambu waku Chiuta,” akhumbika kuchita venivi kuti awovyi munthu weyosi yo walanda. (1 Petu. 5:2, 3) Ŵara apenja ŵanthu wo alanda, atiŵawovya kuti awere mu mpingu kweniso kuti aje pa ubwezi ndi Yehova. *
11. Kumbi mliska wamampha waziŵanganji?
11 Mliska wamampha waziŵanga kuti nyengu zinyaki mbereri yingasoŵa. Ndipu asani mbereri yatuwapu pa gulu la zinyaki, mliska wayichitiyanga nkhaza cha. Ŵanaŵaniyani vo Chiuta wachitanga pakovya ateŵeti ŵaki anyaki wo anguleka kumuteŵete kwa kanyengu kamanavi.
12. Kumbi Yehova wanguchita nayu wuli Yona?
12 Yona wangumuvwiya cha Yehova ndipu wanguthaŵa wati wamutuma kuti waluti ku Nineve. Chinanga kuti venga viyo, Yehova wangumuleka cha Yona. Nge mo mliska wamampha wachitiya, Yehova wangumuwovya Yona kuti waje so ndi nthazi zakuchitiya uteŵeti wo wangumupaska. (Yona 2:7; 3:1, 2) Pavuli paki, Chiuta wangugwiriskiya ntchitu chakume chakutaŵa kuti Yona wavwisi kuzirwa kwa umoyu wa ŵanthu. (Yona 4:10, 11) Kumbi tisambiranji penapa? Ŵara angachitanga daka liŵi cha ndi ŵanthu akulopwa. Mumalu mwaki akhumbika kuvwisa vo vachitiska kuti mbereri yileki kuwungana. Ndipu asani mbereri yawere kwaku Yehova, ŵara atenere kulutirizga kulongo kuti atiyiŵanaŵaniya ndipuso atiyiyanja.
13. Kumbi tisambiranji asani tiwona mo Yehova wanguchitiya ndi munthu yo wakulemba Masalimo 73?
13 Munthu yo wakulemba Masalimo 73, wanguwere vuli wati wawona kuti ŵanthu aheni vinthu vitiŵayende umampha. Iyu wawonanga kuti palivi cho wayanduwanga chifukwa chakuteŵete Yehova . (Sali. 73:12, 13, 16) Kumbi Yehova wanguchita wuli? Iyu wangumususka cha. Mwakuti wanguzomera kuti vo wangukamba vilembeki mu Bayibolu. Pavuli paki, yo wakulemba Masalimo 73 wanguwamu kuti kuja pa ubwezi wamampha ndi Yehova nkhwakukhumbika ukongwa kuluska chinthu chechosi. (Sali. 73:23, 24, 26, 28) Kumbi tisambiranji penapa? Ŵara angathaŵiriyanga cha kususka abali wo ayamba kukayikiya umampha wakuteŵete Yehova. Mumalu mwakuŵasuska, ŵara akhumbika kuvwisa vo vichitiska kuti akayikiyengi. Asani achita viyo, angagwiriskiya ntchitu Malemba ngakwenere kuti aŵachiski.
14. Ntchifukwa wuli Eliya wakhumbikanga chovyu, ndipu Yehova wangumuwovya wuli?
14 Mchimi Eliya wanguthaŵa Fumukazi Yezebeli. (1 Mafu. 19:1-3) Eliya wawonanga kuti wanguja yija mchimi waku Yehova kweniso kuti vo wanguchita pakuteŵete Yehova vinguluta paŵaka. Iyu wanguguŵa ndipu wakhumbanga kuti wafwi. (1 Mafu. 19:4, 10) Mumalu mwakumususka, Yehova wangumusimikiziya kuti we yija cha. Wangumukambiya kuti wamuwovyengi kweniso kuti peche ntchitu yikulu yakuti wachiti. Yehova wangumuvwisiya Eliya ndipu wangumupaska uteŵeti unyaki. (1 Mafu. 19:11-16, 18) Kumbi tisambiranjipu? Tosi, ukongwa ŵara mu mpingu, tikhumbika kuchita vinthu mwalisungu ndi ateŵeti aku Yehova. Kwali munthu walongoro mwakukwiya pamwenga wakamba kuti Yehova wangamugowoke cha, ŵara amuvwisiyengi asani watiŵakonkhoske. Pavuli paki, amusimikiziyengi kuti Yehova watimuyanja.
KUMBI TITENERE KUZIWONA WULI MBERERI ZAKU CHIUTA ZO ZIKUSOŴA?
15. Mwakukoliyana ndi Yohane 6:39, kumbi Yesu waziwonanga wuli mbereri za Awisi?
15 Kumbi Yehova wakhumba kuti tiziwonengi wuli mbereri zaki zakusoŵa? Tingasambira vinandi kwaku Yesu. Iyu waziŵanga kuti Chiuta wawona kuti ateŵeti ŵaki wosi mbakuzirwa. Mwaviyo, Yesu wanguchitapu kanthu kuti wawovyi “mbereri zakusoŵa za nyumba yaku Isirayeli” kuti ziwere kwaku Yehova. (Mate. 15:24; Luka 19:9, 10) Pakuŵa mliska wamampha, Yesu wanguchitapu kanthu kuti waleki kutaya mbereri zaku Yehova.—Ŵerengani Yohane 6:39.
16-17. Kumbi ŵara atenere kuchitanji kuti awovyi wo akulanda? (Wonani bokosi lakuti, “ Mo Yivwiya Mbereri Yakusoŵa.”)
16 Wakutumika Paulo wanguchiska ŵara mu mpingu wa ku Efeso kuti awovyengi mbereri zaku Chiuta nge mo Yesu wachitiyanga. Iyu wanguti: “Mutenere kovya ambula nthazi ndipuso mukumbukengi mazu ngo Ambuya Yesu angukamba ŵija kuti: ‘Kupaska kuchitiska kuti munthu wakondwengi ukongwa kuluska kulonde.’” (Machi. 20:17, 35) Lemba ili lilongo kuti ŵara ŵe ndi udindu wakukhumbika ukongwa wakuphwere ŵanthu aku Yehova. Mura munyaki wa ku Spain zina laki Salvador wangukamba kuti, “Asani ndiŵanaŵaniya mo Yehova waphwere mbereri zakulanda, ndichiskika kuchita chechosi kuti ndiwovyengi ŵanthu akulopwa. Chifukwa chakuti nde mliska, ndiwona kuti Yehova wakhumba kuti ndiŵaphweriyengi.”
17 Ŵanthu wosi wo azumbulika mu nkhani iyi, anguwovyeka kuti awere kwaku Yehova. Pasonu panu, ŵanthu anandi wo akutuwaku kwaku Yehova akhumba so kuchita viyo. Nkhani ya sabata yamawa yazamukonkhoska mo tingaŵawovye kuti awere kwaku Yehova.
SUMU 139 Yeruzgiyani Kuti Mwe Mucharu Chifya
^ ndimi 5 Ntchifukwa wuli abali ndi azichi anyaki wo ateŵete Yehova mwakugomezgeka kwa vyaka vinandi aleka kuwungana? Kumbi Chiuta watiŵawona wuli? Mu nkhani iyi tikambiskanengi mafumbu ngenanga. Tiwonengi so vo tisambira kwaku Yehova asani tiwona mo wanguwovye ŵanthu anyaki mu nyengu yakali wo anguleka dankha kumuteŵete kwa kanyengu kamanavi.
^ ndimi 2 VO MAZU NGANYAKI NGANG’ANAMUWA: Munthu wakulopwa ndi mupharazgi yo waleka kupereka malipoti kwa myezi 6 pamwenga kujumpha. Chinanga kuti vingaŵa viyo, akulopwa atuŵa kuti ŵeche abali ndi azichi ŵidu ndipu titiŵayanja ukongwa.
^ ndimi 4 Mazina nganyaki ngasinthika.
^ ndimi 10 Nkhani ya sabata yamawa, yazamukonkhoska mo ŵara angachitiya venivi.
^ ndimi 60 CHITHUZI: Chifukwa chakuti mliska wa ku Isirayeli waŵanaŵaniyanga mbereri yaki, wayipenjanga asani yasoŵa ndipu walutanga nayu ko kwe zinyaki. Ŵara achita so viyo mazuŵa nganu.
^ ndimi 64 CHITHUZI: Mzichi wakulopwa we mu basi ndipu wawona mubali ndi muwolu waki wo apharazga ku malu ko kusanirika ŵanthu anandi.
