NKHANI YAKUSAMBIRA YA NAMBALA 26
“Weriyani Kwaku Ini”
“Weriyani kwaku ini, ndipu nani ndiweriyengi kwaku yimwi.”—MALA. 3:7.
SUMU 102 ‘Wovyani wo Mbakufoka’
VO TISAMBIRENGI MU NKHANI IYI *
1. Kumbi Yehova watuvwa wuli asani munthu yumoza yo wangusoŵa wawere kwaku iyu?
NGE mo tingusambiriya mu nkhani ya sabata yamala, Yehova watijiyeruzgiya ndi mliska wamampha yo waphwere mbereri zaki mwachanju. Iyu wapenja weyosi yo wasoŵa. Yehova wangukambiya Ayisirayeli wo anguleka kumuteŵete kuti: “Weriyani kwaku ini, ndipu nani ndiweriyengi kwaku yimwi.” Tiziŵa kuti ndimu wavwiya mazuŵa nganu chifukwa wakukamba kuti: “Ndisintha cha.” (Mala. 3:6, 7) Yesu wangukamba kuti Yehova ndi angelu akondwa ukongwa asani munthu yumoza yo wangusoŵa wawere kwaku Iyu.—Luka 15:10, 32.
2. Kumbi tikambiskanengenji mu nkhani iyi?
2 Tiyeni tikambiskani ntharika zitatu zo Yesu wangukamba zo zilongo mo tingawovye ŵanthu wo akuleka kuteŵete Yehova. Tikambiskanengi mijalidu yinyaki yo titenere kuŵa nayu kuti tiwovyi mbereri zakusoŵa kuti ziwere kwaku iyu. Tiwonengi so kuti tikondwa ukongwa asani titovya wo akuleka kuwungana kuti awere kwaku Yehova.
TIPENJENGI ŴANTHU WO AKULEKA KUWUNGANA
3-4. Ntchifukwa wuli munthukazi yo wazumbulika pa Luka 15:8-10 wangupenja mwakuphwere ndalama yaki yo yingusoŵa?
3 Tikhumbika kuchita phamphu kuti tisaniyi ŵanthu wo akhumba kuwere kwaku Yehova. Yesu wangukonkhoska ntharika yakukwaskana ndi munthukazi munyaki yo wangutaya dirakima. Ntharika iyi yikamba mo wangusuzgikiya kuti wasaniyi ndalama yo yingusoŵa.—Ŵerengani Luka 15:8-10.
4 Yesu wangukamba mo munthukazi uyu wanguvwiya wati wasaniya ndalama yaki yo yingusoŵa. Mu nyengu yaku Yesu, anthukazi anyaki achiyuda aperekanga madirakima 10 asani mwana wawu wayirwa. Panyaki vingachitika kuti ndalama yo munthukazi uyu wangutaya, yenga yimoza mwa ndalama zo wakhumbanga kuti wapaski mwana waki. Munthukazi uyu wakayikiyanga cha kuti ndalama yaki yambotoka pasi. Mwaviyo, wangubuska nyali ndi kwamba kupenjapenja kweni wanguyisaniya cha. Kweni nyali yaki yambulikanga ukongwa cha kuti wawoni po panguwiya ndalama. Pakumaliya wangupeya nyumba yosi. Wati wawunjika pamoza vo wangupeya wanguyiwona ndalama yaki. Iyu wangukondwa ukongwa! Ndipu wangudana abwezi ŵaki ndi anyaki kuti waŵakambiyi vo vinguchitika.
5. Ntchifukwa wuli kungaŵa kwakusuzga kusaniya ŵanthu akulopwa?
5 Ntharika yo Yesu wangukamba yilongo kuti tikhumbika kuyesesa kuti tisaniyi chinthu cho chasoŵa. Mwakuyanana ŵaka tikhumbika kufwiyapu kuti tisaniyi wo akuleka kuwungana ndi mpingu. Vingachitika kuti pajumpha vyaka kutuliya po akuleke kuwungana nasi. Angaŵa so kuti akusamiya ku chigaŵa chinyaki ko abali a kweniko atiŵaziŵa cha. Kweni pa nyengu yeniyi vingachitika kuti akhumbisiska kuwere kwaku Yehova. Yiwu akhumba kuteŵete Yehova pamoza ndi abali ndipuso azichi. Kweni angayamba cha ŵija kwambula kuŵawovya.
6. Kumbi tosi mu mpingu tingawovya wuli kupenja ŵanthu akulopwa?
6 Kumbi mbayani wo angawovya kupenja ŵanthu akulopwa? Tosi, kwali mbara, apayiniya, apharazgi kweniso abali a munthu yo wakulopwa. Kumbi mwe ndi mubali winu pamwenga mubwezi winu wakulopwa? Kumbi mukukumanapu ndi munthu yo wakuleka kuwungana muchipharazga kunyumba ndi nyumba pamwenga kumalu ngo kusanirika ŵanthu anandi? Asani wangazomera kukupaskani nambala ya foni kweniso kukukambiyani ko waja, mutenere kuziŵisa ŵara.
7. Kumbi mwasambiranji pa vo Thomas wangukamba?
7 Ŵara ndiwu ŵe ndi udindu ukulu wakuwovya ŵanthu akulopwa kuti awere kwaku Yehova. Kumbi angachita wuli venivi? Wonani vo wangukamba mura munyaki zina laki Thomas, * yo waja ku Spain. Iyu wawovyapu Akaboni akujumpha 40 kuti ayambi so kuwungana. Thomas wangukamba kuti: “Chakwamba ndifumba abali ndi azichi kuti andikambiyi ko munthu wakulopwa waja. Pamwenga nditiŵafumba asani aziŵa mubali weyosi yo wakuleka kuwungana. Abali ndi azichi anandi akondwa kugwiraku ntchitu yakupenja ŵanthu akulopwa. Asani ndakumana ndi abali pamwenga azichi wo akuleka kuwungana, nditiŵafumba vakukwaskana ndi ŵana ŵawu kweniso abali ŵawu. Vingachitika kuti abali ndi azichi ŵenaŵa pa nyengu yo awungananga azanga ndi ŵana ŵawu ndipu panyaki pa nyengu yeniyi, ŵana ŵawu ŵenga apharazgi ambula kubatizika. Ŵana ŵenaŵa nawu angawovyeka kuti awere kwaku Yehova.”
TIWOVYENGI ŴANA AKU YEHOVA KUTI AYAMBI KUWUNGANA
8. Mwakukoliyana ndi ntharika ya mwana wakusoŵa yo ye pa Luka 15:17-24, kumbi awisi anguchita wuli ndi mwana wawu yo wangulapa?
8 Kumbi titenere kuŵa ndi mijalidu niyi kuti tiwovyi abali ndi azichi akulopwa kuwere kwaku Yehova? Wonani vo tisambira mu ntharika ya mwana wakusoŵa yo Yesu wangukamba. (Ŵerengani Luka 15:17-24.) Yesu wangukamba kuti pakumaliya paki mwana uyu wanguziŵa kuti vo wanguchita venga viheni ndipu wanguwere kunyumba. Awisi ŵati amuwona angutchimbiya ndi kumuvumbatiya ndipu mwana yo wanguziŵa kuti awisi atimuyanja. Mwana uyu njuŵi yingumusuzga chifukwa cha vinthu viheni vo wanguchita ndipu wangukamba kuti ngwakwenere cha kudanika mwana wawu. Awisi angumuchitiya lisungu mwana wawu yo wangukamba mo wavwiyanga. Yiwu anguchitapu so kanthu kuti alongo kuti amulondere nge waganyu cha kweni nge mwana wakwanjiwa. Kuti alongo kuti atimuyanja kweniso kuti amulondere, awisi angunozga phwandu kweniso angumupaska vakuvwala vamampha mwana wawu yo wangulapa.
9. Kumbi titenere kuŵa ndi mijalidu niyi kuti tiwovyi abali ndi azichi akulopwa kuwere kwaku Yehova? (Wonani bokosi lakuti “ Kumbi Tingaŵawovya Wuli Ŵanthu wo Akhumba Kuwere Kwaku Yehova?”)
9 Yehova wayanana ndi ada a mu ntharika yeniyi. Iyu watiŵayanja abali akulopwa ndipu wakhumba kuti awere kwaku iyu. Asani tiyezga Yehova, tingaŵawovya kuti ayambi so kuwungana. Kuti tichiti ivi tikhumbika kuzikira, lisungu kweniso kuŵayanja. Ntchifukwa wuli tikhumbika kulongo mijalidu yeniyi, ndipu tingachita wuli venivi?
10. Ntchifukwa wuli tikhumbika kuzikira asani titovya abali ndi azichi kuti awere kwaku Yehova?
10 Titenere kuzikira chifukwa pangajumpha nyengu kuti abali ndi azichi akulopwa ayambi so kuwungana. Abali ndi azichi anandi wo anguleka kuwungana akamba kuti angwamba so kuwungana, ŵara kweniso abali mu mpingu ŵati aŵayende mwakuwerezawereza. Mzichi munyaki wa ku Asia zina laki Nancy wangukamba kuti: “Mubwezi wangu munyaki mu mpingu wangundiwovya ukongwa. Iyu wandiyanjanga nge kuti nde mku waki. Wangundikumbusa vinthu vamampha vo tachitanga po tateŵetiyanga limoza. Iyu wandivwisiyanga asani nditimukambiya mo ndivwiya ndipu wandipaskanga ulongozgi. Mzichi uyu wenga munyangu wapamtima ndipu wandiwovyanga nyengu zosi.”
11. Ntchifukwa wuli lisungu ndakukhumbika kuti tiwovyi munthu yo wakuguŵa?
11 Lisungu lenge munkhwala wanthazi wo ungawovya munthu yo waguŵa ndi vinthu vinyaki. Ŵanthu anyaki wo akuleka kuwungana angaŵa kuti munthu munyaki wakuŵaguŵisa mu mpingu ndipu ŵechekukwiya mpaka sonu. Chifukwa cha venivi atondeka kuwere kwaku Yehova. Anyaki angawona kuti anyawu akuŵachitiya vinthu vambula urunji. Angakhumba munthu munyaki kuti waŵavwisiyi ndi kuvwisa mo avwiya. (Yako. 1:19) María yo wangulopwa wangukamba kuti: “Ndakhumbanga munthu munyaki wakuti wandivwisiyengi, kundipembuzga kweniso kundipaska ulongozgi ndi kundiwovya.”
12. Kambani chakuyeruzgiyapu cho chilongo mo Yehova waguziya akulopwa.
12 Bayibolu liyeruzgiya chanju cho Yehova wenachu pa ateŵeti ŵaki ndi chingwi. Kumbi chanju chaku Chiuta chiyanana wuli ndi chingwi? Ŵanaŵaniyani chakuyeruzgiyapu ichi: Tiyeruzgiyi kuti mwabira mu nyanja yo yayuka ndipu munthu munyaki wakuponyiyani layifijaketi. Tikayika cha kuti mumuwongengi chifukwa chakuvwala chenichi chikuwovyeningi kuti muyanjamengi pamaji. Kweni layifijaketi njakukwana cha kuti muponi chifukwa maji ngazizira ndipu mungapona pijapija asani mwachifika po pe boti. Mukhumbika munthu munyaki kuti wakuponyiyeni chingwi ndi kukuguzani kuti mukafiki mu boti. Ayisirayeli ŵati alanda Yehova wangukamba kuti: “Ndingulutirizga kuŵaguza . . . ndi vingwi va chanju.” (Hose. 11:4) Chiuta watiŵawona so viyo ateŵeti ŵaki mazuŵa nganu wo akuleka kumuteŵete ndipu akumana ndi masuzgu. Iyu wakhumba kuti aziŵi kuti watiŵayanja ndipu wakhumba kuti aje so nayu pa ubwezi. Yehova wangagwiriskiya ntchitu yimwi kuti awoni kuti watiŵayanja.
13. Kambani chakuyeruzgiyapu cho chilongo kuti kwanja anyidu kungaŵawovya kuti awere kwaku Yehova.
13 Tikhumbika kukambiya ŵanthu wo akulopwa kuti Yehova watiŵayanja ndipu nasi titiŵayanja. Pablo yo wazumbulika mu nkhani ya sabata yamala, wanguja vyaka 30 kwambula kuwungana. Iyu wangukamba kuti: “Zuŵa linyaki ndi mlenji, mzichi munyaki wakukota wanguza kunyumba kwangu. Iyu wenga walisungu ndipu wangukambiskana nani mwachanju. Ndingwamba kuliya nge mwana. Ndingukambiya mzichi yo kuti panyaki ndi Yehova yo wakutumani kuti muzikambiskani nani. Pa nyengu yeniyi ndipu ndinguŵanaŵana kuti ndiwere kwaku Yehova.”
MUWOVYENGI AKULOPWA MWACHANJU
14. Mwakukoliyana ndi ntharika yo ye pa Luka 15:4, 5, kumbi mliska wanguchitanji wati wasaniya mbereri yaki yo yingusoŵa?
14 Nyengu zosi tikhumbika kuŵawovya ŵanthu akulopwa. Nge mo venge ndi mwana wakusoŵa yo Yesu wangukamba mu ntharika yaki, yiwu angaŵa kuti akwamba kali kusuzgika maŵanaŵanu. Chifukwa chakuti aja mucharu chaku Satana, vingachitika kuti ŵe pa ubwezi wamampha cha ndi Yehova nge mo venge kali. Tikhumbika kuŵawovya kuti ayambi so kuja pa ubwezi wamampha ndi Yehova. Mu ntharika ya mbereri yo yingusoŵa, Yesu wangukamba mo mliska wangunyamuliya mbereri yaki paphewa ndi kuluta nayu ku mbereri zinyaki. Mliska uyu wangufwiyapu kuti wasaniyi mbereri yeniyi. Wati wayisaniya, wanguwona kuti wakhumbika kuyinyamuwa kuti yikafiki ko kwenga zinyaki chifukwa pa nyengu iyi yengavi nthazi.—Ŵerengani Luka 15:4, 5.
15. Kumbi tingaŵawovya wuli ŵanthu akulopwa wo akhumba kuwere kwaku Yehova? (Wonani bokosi lakuti “ Kabuku ko Kangawovya.”)
15 Tikhumbika kufwiyapu kuti tiwovyi abali ndi azichi akulopwa kuti amalani ndi vo vitiŵatondekesa kuti ayambi so kuteŵete Yehova. Ndipu mwakuwovyeka ndi mzimu waku Yehova, Mazu ngaki kweniso mabuku ngo tilonde tingaŵawovya kuti aje so pa ubwezi wakukho ndi Yehova. (Aro. 15:1) Kumbi tingachita wuli venivi? Mura munyaki wangukamba kuti, “Abali ndi azichi anandi akulopwa akhumbika kusambira nawu Bayibolu asani akhumba so kwamba kuteŵete Yehova.” * Sonu asani mwapempheka kuti musambirengi Bayibolu ndi munthu wakulopwa mungakananga cha asani mungafiska. Mura uyu wangukamba so kuti, “Munthu yo wapempheka kuti wasambirengi nawu Bayibolu wakhumbika kuja bwezi lamampha lo angalithemba ndi kufwatuka kukambiskana nalu.”
LIKONDWA KUCHANYA NDI PACHARU CHAPASI
16. Kumbi tiziŵa wuli kuti angelu atitiwovya?
16 Pe vakuyeruzgiyapu vinandi vo vilongo kuti angelu atitiwovya kusaniya ŵanthu akulopwa wo akhumba kuwere kwaku Yehova. (Chivu. 14:6) Mwakuyeruzgiyapu, Silvio wa ku Ecuador wangupemphera kutuliya pasi pamtima kuti wayambi so kuwungana. Weche mkati mwakupemphera, ŵara ŵaŵi anguwode panyumba yaki. Pa nyengu yeniyi angwamba kumuwovya chifukwa ndivu wakhumbanga.
17. Ntchinthu wuli cho chichitikengi asani titovya akulopwa?
17 Asani tiwovyengi akulopwa kuti awere kwaku Yehova tikondwengi ukongwa. Mpayiniya munyaki zina laki Salvador watesesa kovya ŵanthu akulopwa. Iyu wangukamba kuti: “Nyengu zinyaki ndiliya chifukwa cha likondwa asani akulopwa ayamba so kuwungana. Ndikondwa ukongwa kugwira ntchitu ndi Yehova yakuwovya ateŵeti ŵaki kuti atuwi mucharu chaku Satana ndi kuwere mu mpingu.”—Machi. 20:35.
18. Kumbi mutenere kuziŵanji asani mukuleka kuwungana?
18 Asani mukuleka kuwungana, mutenere kuziŵa kuti Yehova wechekukuyanjani. Iyu wakhumba kuti muje so nayu pa ubwezi. Mukhumbika kuchitapu kanthu kuti muwere kwaku iyu. Mwakuyanana ndi ada a mu ntharika yo Yesu wangukamba, Yehova walindizga kuti muwere kwaku iyu ndipu wazakukulondiyani.
SUMU 103 Aliska Ndi Mphasu
^ ndimi 5 Yehova wakhumba kuti wosi wo akuleka kuwungana awere so kwaku iyu. Titenere kuyesesa kuwovya akulopwa kuti azomeri mdanu waku Yehova wakuti: “Weriyani kwaku ini.” Mu nkhani iyi tikambiskanengi mo tingaŵawovye.
^ ndimi 7 Mazina nganyaki ngasinthika.
^ ndimi 15 Abali ndi azichi anyaki akulopwa angawovyeka asani angasambira nkhani zinyaki mu buku lakuti, Kodi Mungatani Kuti Mulungu Azikukondani?, penipo anyaki angayanduwa asani angasambira buku lakuti Yandikirani kwa Yehova. Komiti ya Uteŵeti ya Mpingu ndiyu yisankha yo ngwakwenere kusambira ndi munthu wakulopwa.
^ ndimi 68 CHITHUZI: Abali atatu atovya mubali yo wakhumba kuwere kwaku Yehova. Mubali munyaki wakambiskana nayu pa foni, munyaki wamupingiya mphasu kulongo kuti watimuyanja penipo munyaki wavwisiya po wakambiskana nayu.
