NKHANI YAKUSAMBIRA YA NAMBALA 27
“Lindizga Yehova”
“Lindizga Yehova; ja ndi chiganga kweniso khwima mtima.”—SALIMO 27:14.
SUMU 128 Mukunthiyepu Mpaka pa Umaliru
VO TISAMBIRENGI MU NKHANI IYI *
1. (a) Kumbi Yehova watipaska chilindizga wuli? (b) Kumbi mazu ngakuti “lindizga Yehova” ngang’anamuwanji? (Wonani “Vo Mazu Nganyaki Ngang’anamuwa.”)
YEHOVA waŵapaska chilindizga chamampha ŵanthu wosi wo atimuyanja. Pambula kuswera yapa, iyu watuzgengepu matenda, chitima kweniso nyifwa. (Chivu. 21:3, 4) Iyu wazamuwovya ŵanthu “akufwasa” wo atimulindizga kuti azisinthi charu chapasi kuja paradayisu. (Salimo 37:9-11) Kweniso iyu wazamuchitiska kuti weyosi waku isi waje nayu pa ubwezi wakukho, wo wazamuja wamampha ukongwa kuphara mo viliri sonu. Kukamba uneneska, tilindizga vinthu vamampha ukongwa kunthazi! Kweni ntchifukwa wuli tigomezga kuti malayizgu ngaku Chiuta ngazamufiskika? Chifukwa nyengu zosi Yehova wafiska vo walayizga. Mwaviyo, te ndi chifukwa chakuvwika cha ‘kulindizgiya Yehova.’ * (Salimo 27:14) Tilongo venivi asani tilindizga mwakuzikira kweniso mwakukondwa kuti Chiuta widu wafiski khumbu laki.—Yesa. 55:10, 11.
2. Kumbi ndi vinthu wuli vo Yehova wachitapu kali?
2 Yehova walongo kali kuti wafiska malayizgu ngaki. Tiyeni tikambiskani chakuwoniyapu chimoza. Mubuku la Chivumbuzi, Yehova wakulayizga kuti mu nyengu yidu yinu, wazamuwunganiska ŵanthu kutuliya mu mtundu wewosi, fuku lelosi kweniso lilimi lelosi kuti amuteŵetiyengi mwakukoliyana. Mazuŵa nganu, gulu lapade lenili liziŵika kuti “mzinda ukulu.” (Chivu. 7:9, 10) Chinanga kuti gulu lenili le ndi anthulumi, anthukazi kweniso ŵana kutuliya pacharu chosi chapasi, yiwu ŵe nge banja limoza lo ndakukoliyana kweniso la chimangu. (Salimo 133:1; Yoha. 10:16) A mzinda ukulu ŵenaŵa mbapharazgi so aphamphu a uthenga wamampha. Yiwu nyengu zosi mbakunozgeka kukambiyaku weyosi yo wangavwisiya vakukwaskana ndi charu chamampha cho alindizga. (Mate. 28:19, 20; Chivu. 14:6, 7; 22:17) Asani mwe mugulu la mzinda ukulu, tikayika cha kuti muwona kuti vinthu vamampha vo mulindizga vakuzirwa ukongwa kwaku yimwi.
3. Kumbi Satana wakhumbanji?
3 Dyaboli wakhumba kutimbanyizga chilindizga chinu. Iyu wakhumba kuti mugomezgengi kuti Yehova watikuphweriyani cha kweniso kuti wazamufiska cha malayizgu ngaki. Asani Satana wangatimbanyizga chilindizga chidu, tingaŵavi chiganga kweniso tingaleka kuteŵete Yehova. Nge mo tiwoniyengi, Dyaboli wangwesesa kutimbanyizga chilindizga chaku Yobu ndipu wakhumbanga kumulekeska kuteŵete Yehova.
4. Kumbi tikambiskanengenji mu nkhani iyi? (Yobu 1:9-12)
4 Mu nkhani iyi, tiwonengi nthowa zo Satana wangugwiriskiya ntchitu kuti wachichizgi Yobu kuti waleki kuja wakugomezgeka kwaku Yehova. (Ŵerengani Yobu 1:9-12.) Tikambiskanengi so vo tingasambira pa chakuwoniyapu chaku Yobu kweniso chifukwa cho tikhumbikiya kukumbuka kuti Chiuta watitiyanja ndipuso kuti wazamufiska malayizgu Ngaki.
SATANA WANGUYESESA KUTI YOBU WALEKI KULINDIZGA YEHOVA
5-6. Kumbi ndi vinthu wuli vo vinguchitikiya Yobu mu kanyengu kamanavi waka?
5 Yobu wajanga umoyu wamampha ukongwa. Iyu wenga pa ubwezi wakukho ndi Yehova. Iyu wenga ndi banja likulu lalikondwa kweniso wenga wakukhupuka ukongwa. (Yobu 1:1-5) Kweni mu zuŵa limoza pe, vinthu vosi vaku Yobu vingumala. Viŵetu vaki ndivu vingwamba kumala. (Yobu 1:13-17) Pavuli paki, ŵana ŵaki wosi angufwa. Aŵanaŵaniya waki soka lo Yobu wangukumana nalu. Apapi vitiŵaŵaŵa ukongwa asani mwana wawu yumoza wafwa. Sonu ŵanaŵaniyani mo Yobu ndi muwolu waki anguvwiya, kuziŵa kuti ŵana ŵawu wosi 10 ŵafwa! Yiwu anguvwana cha, ŵenga ndi chitima ukongwa kweniso angumala zeru. Mphakuvwika kuti Yobu wangukeruwa vakuvwala vaki wachiliya kweniso wanguwa pasi!—Yobu 1:18-20.
6 Pavuli paki, Satana wangumutamisa ndi nthenda yakupweteka ukongwa Yobu ndipuso yakuchitiska soni. (Yobu 2:6-8; 7:5) Venivi vechendachitiki, ŵanthu a muchigaŵa chaki amutumbikanga ukongwa Yobu. Yiwu azanga kwaku iyu kuti afumbeku ulongozgi. (Yobu 31:18) Kweni pa nyengu iyi angwamba kumukhwecha. Abali ŵaki, mabwezi ngaki chayingu, ndipuso ateŵeti ŵaki, angumujowo!—Yobu 19:13, 14, 16.
Abali ndi azichi anandi mazuŵa nganu, angavwisa mo Yobu wanguvwiya wati wakumana ndi masoka (Wonani ndimi 7) *
7. (a) Kumbi Yobu wangugomezga kuti wasuzgikanga chifukwa wuli, kweni wangukana kuchitanji? (b) Kumbi Mkhristu wangakumana ndi mayeseru wuli ngo ngangayanana ndi ngo ngalongoreka pa chithuzi?
7 Satana wakhumbanga kuti Yobu wagomezgengi kuti wasuzgikanga chifukwa chakuti Yehova wanguleka kumuyanja. Mwakuyeruzgiyapu, Satana wangugwiriskiya ntchitu mphepu yanthazi kuti yiwisi nyumba yo ŵana wosi 10 aku Yobu aryiyangamu chakurya. (Yobu 1:18, 19) Iyu wanguchitiska so kuti motu uwi kutuliya kuchanya, kuti uwotchi viŵetu vaku Yobu ndipuso ateŵeti ŵaki wo aviphweriyanga. (Yobu 1:16) Chifukwa chakuti mphepu kweniso motu vingutuliya kuchanya, Yobu wanguŵanaŵana kuti vingutuliya kwaku Yehova Chiuta. Mwaviyo, Yobu wangugomezga kuti panyaki wakumuguŵiska Yehova. Chinanga kuti venga viyo, Yobu wangukana kutuka Awisi a kuchanya. Yobu wanguziŵa kuti kwa vyaka vinandi, wangulonde vinthu vinandi vamampha kutuliya kwaku Yehova. Mwaviyo, iyu wanguŵanaŵana kuti asani walondiyanga vinthu vamampha, ndikuti wakhumbikanga so kuja wakungozgeka kulonde vinthu viheni. Mwaviyo, iyu wanguti: “Zina laku Yehova lilutirizgi kutumbikika.” (Yobu 1:20, 21; 2:10) Chinanga kuti chuma chaku Yobu chingumala, ŵana ŵaki angufwa kweniso wangutama, iyu wangulutirizga kuja wakugomezgeka kwaku Yehova. Kweni Satana wangumuyesa so mu nthowa yinyaki.
8. Kumbi Satana wangugwiriskiya so ntchitu nthowa yinyaki niyi pa kuyesa Yobu?
8 Satana wangugwiriskiya so ntchitu nthowa yinyaki kuti wayesi Yobu. Iyu wangugwiriskiya ntchitu ŵanthu atatu wo angupusikiziya kuti ndi mabwezi ngaki kuti amuchitiski kuti wajiwonengi kuti ngwambula kukhumbika. Yiwu angukamba kuti Yobu wasuzgikanga chifukwa chakuti wanguchita vinthu vinandi viheni. (Yobu 22:5-9) Yiwu anguyesesa so kumuchitiska kuti wagomezgi kuti, chinanga kuti wanguchita vinthu vinandi vamampha kuti wakondwesi Chiuta, kweni Iyu waviwonanga kuti vambula kuzirwa. (Yobu 4:18; 22:2, 3; 25:4) Yapa, yiwu akhumbanga kuti Yobu waŵanaŵanengi kuti Chiuta watimuyanja cha, watimuphwere cha kweniso kuti vosi wachitanga pakumuteŵete vilivi ntchitu. Vo yiwu angukamba, vatingi vichitiskengi Yobu kuwona kuti Yehova wamalisengi cha masuzgu ngaki.
9. Kumbi ntchinthu wuli cho chinguwovya Yobu kuti waje ndi chiganga kweniso waje ndi nthazi?
9 Yeruzgiyani kuti muwona vo vichitika. Yobu waja pavyotu ndipu watuvwa urwirwi wambula kulekeza. (Yobu 2:8) Abwezi ŵaki alutirizga kukamba kuti ndi munthu wamampha cha ndipuso kuti chechosi cho wakuchitapu ntchakuzirwa cha. Mayeseru ngenanga ngazitu ukongwa kwaku iyu kuti wakunthiyepu kweniso we ndi chitima chikulu ukongwa chifukwa cha nyifwa ya ŵana ŵaki. Pakwamba, Yobu waja waka cheti. (Yobu 2:13–3:1) Kweni asani mabwezi ngaku Yobu ngaŵanaŵana kuti kuja cheti kwenuku kulongo kuti Yobu wamujowongi Mlengi waki, ndikuti anangisa ukongwa. Nyengu yinyaki, Yobu wayunuska mutu ndi kulereska mabwezi ngaki ngaboza ngenanga, ndi kukamba kuti: “Mpaka po ndifwiyengi, ndilekengi cha kuja wakugomezgeka!” (Yobu 27:5) Kumbi ntchinthu wuli cho chinguwovya Yobu kuti waje ndi chiganga kweniso waje ndi nthazi chinanga kuti wangukumana ndi masuzgu nganandi? Chinanga mphanyengu yo wanguguŵa ukongwa, iyu wangulekapu cha kugomezga kuti Chiuta waki wachanju, pakumaliya paki wamalisengi masuzgu ngaki. Iyu wanguziŵa kuti chinanga kuti wangafwa, Yehova wazamukuyuska.—Yobu 14:13-15.
KUMBI TINGAMUYEZGA WULI YOBU?
10. Kumbi nkhani yaku Yobu yititisambizanji?
10 Nkhani yaku Yobu, yititisambiza kuti Satana wangatichichizga cha kuti timuleki Yehova kweniso kuti Yehova waziŵa chechosi cho chititichitikiya. Vo vinguchitikiya Yobu, vingatiwovya so kuvwisa umampha kuti pe vinthu vinyaki vo vikwaskika. Tiyeni tikambiskani vinthu vinyaki vo tingasambira kwaku Yobu.
11. Asani tilutirizga kuthemba Yehova, kumbi tingasimikizanji? (Yakobe 4:7)
11 Yobu wangulongo kuti asani tilutirizga kuthemba Yehova, tingakunthiyapu mayeseru ngengosi ngo tingakumana nangu kweniso tingamususka Satana. Kumbi ndi vinthu wuli vo vingachitika pavuli paki? Malemba ngatitisimikiziya kuti Dyaboli watithaŵengi.—Ŵerengani Yakobe 4:7.
12. Kumbi chilindizga chakuti akufwa azamuyuka chingumuchiska wuli Yobu?
12 Tikhumbika kugomezga ukongwa kuti akufwa azamuyuka. Nge mo tinguwone mu nkhani yaluta, Satana wagwiriskiya ntchitu mantha ngakopa nyifwa ndi chilatu chakuti tileki kuja akugomezgeka kwaku Yehova. Pa nkhani yaku Yobu, Satana wangukamba kuti Yobu watingi wachitengi chechosi, chinanga nkhuleka kuja wakugomezgeka kwaku Yehova kuti wataski umoyu waki. Satana wapusikanga, chifukwa chinanga mphanyengu yo Yobu waŵanaŵananga kuti wafwengi, wangulutirizga mbwenu kuja wakugomezgeka kwaku Yehova. Kugomezga kuti Yehova ngwamampha kweniso chilindizga chanthazi cho wenga nachu chakuti Yehova wazamunozga vinthu pakumaliya paki, vingumuwovya kuti wakunthiyepu. Yobu wagomezganga kuti asani Yehova wangaleka kunozga vinthu pa nyengu yo weche ndi umoyu, Iyu wazakumuyuska kunthazi. Chilindizga chakuti akufwa azamuyuka chenga chanthazi kwaku Yobu. Asani nasi titichigomezga ukongwa chilindizga chenichi, tilekengi cha kuja akugomezgeka kwaku Yehova chifukwa chakopa nyifwa.
13. Ntchifukwa wuli tikhumbika kuziziŵa umampha nthowa zo Satana wangugwiriskiya ntchitu pa kuyesa Yobu?
13 Tikhumbika kuziziŵa umampha nthowa zo Satana wangugwiriskiya ntchitu pa kuyesa Yobu, chifukwa chakuti mazuŵa nganu wagwiriskiya so ntchitu nthowa zenizi. Wonani vo Satana wangukamba. Iyu wanguti: “Munthu [Yobu pe cha] wangapereka chechosi cho we nachu kuti wataski umoyu waki.” (Yobu 2:4, 5) Yapa, Satana wang’anamuwanga kuti titimuyanja viŵi cha Yehova Chiuta ndipuso kuti tingamuleka asani kuchita viyo kungataska umoyu widu. Satana wang’anamuwanga so kuti Chiuta watitiyanja cha kweniso kuti watoliyaku kanthu cha vo titesesa kuchita kuti timukondwesi. Chifukwa chakuti tiziŵa vo Satana wakhumba, isi tilindizga Yehova, titingagomezga cha maboza ngaki.
14. Kumbi mayeseru ngangavumbuwanji mwaku isi? Konkhoskani.
14 Mayeseru tingawonengi kuti ndi mwaŵi wakuziŵiya vo titondeka kuchita kweniso vo tichita umampha. Mayeseru ngo Yobu wangukumana nangu, ngangumuwovya kuziŵa vo watondekanga kuchita umampha ndipuso kuti wasinthi. Mwakuyeruzgiyapu, iyu wanguziŵa kuti wakhumbikanga kuja wakujiyuyuwa ukongwa. (Yobu 42:3) Nasi tingaziŵa vo titondeka kuchita kweniso vo tichita umampha asani takumana ndi mayeseru. Mubali munyaki zina laki Nikolay * yo wanguŵikika mujeri chinanga kuti watamanga ukongwa, wanguti: “Jeri le nge machini nga ekisire (X-ray) ndipu livumbuwa mijalidu yo Mkhristu wenayu.” Asani taziŵa vo tileka kuchita umampha, tingagwiriyapu ntchitu kuti tisinthi.
15. Kumbi tikhumbika kuvwisiya kwaku yani, nanga ntchifukwa wuli?
15 Tikhumbika kuvwisiya kwaku Yehova, arwani ŵidu cha. Yobu wanguvwisiya mwakuphwere pa nyengu yo Yehova wangulongoro nayu. Chiuta wangukambiskana ndi Yobu, ndipu wangumufumba kuti: ‘Kumbi uwona nthazi zangu kuziya mu vinthu vo ndikulenga? Ini ndiziŵa chechosi cho chakuchitikiya. Kumbi uŵanaŵana kuti ndingakuphwere cha?’ Yobu wangumuka mwakujiyuyuwa ndipuso wanguwonga ukongwa umampha waku Yehova. Iyu wanguti: “Makutu ngangu ngavwanga vakukwaskana ndi yimwi, kweni sonu ndakuwonani ndi masu ngangu.” (Yobu 42:5) Yobu watenere kuti wenga weche kuja pavyotu, liŵavu laki lenga vilonda pe kweniso wenga weche kuliya nyifwa ya ŵana ŵaki pa nyengu yo wangukambiya mazu ngenanga. Chinanga kuti venga viyo, Yehova wangumusimikiziya Yobu kuti watimuyanja ndipuso kuti wakondwa nayu.—Yobu 42:7, 8.
16. Mwakukoliyana ndi Yesaya 49:15, 16, kumbi titenere kukumbukanji asani takumana ndi mayeseru?
16 Mazuŵa nganu napu, ŵanthu angatinyoza kweniso angachitiska kuti tijiwonengi kuti te ambula kukhumbika. Yiwu angayesesa kunanga mbiri yaku weyosi waku isi pamwenga mbiri ya gulu lidu ndipu ‘angatipusikiziya vinthu viheni vamtundu wewosi.’ (Mate. 5:11) Pa nkhani yaku Yobu, tisambira kuti Yehova wagomezga kuti tilutirizgengi kuja akugomezgeka kwaku iyu asani takumana ndi mayeseru. Yehova watitiyanja ndipu wazakuŵajowopu cha ŵanthu wo atimulindizga. (Ŵerengani Yesaya 49:15, 16.) Tingavwisiyanga cha vinthu vaboza vo arwani aku Chiuta akamba! Mubali James wa ku Turkey yo banja laki lakumana ndi mayeseru ngakulu, wangukamba kuti: “Tinguziŵa kuti kuvwisiya maboza ngakukwaskana ndi ŵanthu aku Chiuta kungatiweze vuli. Mwaviyo, taŵikanga maŵanaŵanu ngidu pa chilindizga cha Ufumu ndipu tingulutirizga kuteŵete Yehova mwaphamphu. Venivi vinguchitiska kuti tilutirizgi kukondwa.” Mwakuyanana ndi Yobu, nasi tivwisiya kwaku Yehova! Maboza nga arwani ŵidu ngangananga cha chilindizga chidu.
CHILINDIZGA CHINU CHIKUWOVYENINGI
Yehova wangumutumbika Yobu chifukwa cha kugomezgeka kwaki. Iyu ndi muwolu waki anguja ndi umoyu utali kweniso wakukondwesa (Wonani ndimi 17) *
17. Kumbi musambiranji pa chakuwoniyapu cha anthulumi ndi anthukazi akugomezgeka wo azumbulika mu Aheberi chaputala 11?
17 Yobu njumoza mwa ateŵete aku Yehova wo angulutirizga kuja ndi chiganga kweniso kuja ndi nthazi, pa nyengu yo angukumana ndi mayeseru ngakulu. Mu kalata yo wangulembe Aheberi, wakutumika Paulo wangukambamu ateŵeti anyaki anandi ndipu wanguŵadana kuti “mtambu ukulu . . . wa akaboni.” (Ahe. 12:1) Yiwu angukumana ndi mayeseru ngakulu, kweni pa umoyu wawu wosi angulutirizga kuja akugomezgeka kwaku Yehova. (Ahe. 11:36-40) Kumbi kukunthiyapu kwawu kweniso phamphu lawu pakuteŵete Yehova, vinguwa paŵaka? Awa! Chinanga kuti pa umoyu wawu wosi anguwona cha kufiskika kwa malayizgu ngosi ngaku Chiuta, yiwu angulutirizga kulindizga Yehova. Ndipu chifukwa chakuti angusimikiza kuti Yehova wakondwanga nawu, yiwu agomezganga kuti azamuwona malayizgu ngaki ngachifiskika. (Ahe. 11:4, 5) Chakuwoniyapu chawu, chingatichiska kuti nasi tilutirizgi kulindizga Yehova.
18. Kumbi mwasimikiza mtima kuchitanji? (Aheberi 11:6)
18 Mazuŵa nganu, tija mucharu cho vinthu vihenekeheneke. (2 Timo. 3:13) Satana wakuleka cha kuyesa ŵanthu aku Chiuta. Chinanga kuti pambula kuswera tikumanengi ndi masuzgu, tiyeni tisimikizi mtima kuti titeŵetiyengi Yehova mwaphamphu, te ndi chigomezgu kuti “chilindizga chidu che mwaku Chiuta wamoyu.” (1 Timo. 4:10) Kumbukani kuti vo Chiuta wangumuchitiya Yobu, vilongo kuti “Yehova ngwachanju chikulu ukongwa kweniso ngwalisungu.” (Yako. 5:11) Mphanyi nasi tingulutirizga kuja akugomezgeka kwaku Yehova, tichisimikiza kuti iyu wazamupereka mphotu “ku ŵanthu wosi wo atimupenja ndi mtima wosi.”—Ŵerengani Aheberi 11:6.
SUMU 150 Zani Kwaku Chiuta Kuti Muzitaskiki
^ Asani tiŵanaŵaniya va munthu munyaki yo wangukunthiyapu mayeseru ngakulu, kanandi tikumbika Yobu. Kumbi tingasambiranji pa vo vinguchitikiya munthu wakugomezgeka mwenuyu? Tisambira kuti Satana wangatichichizga cha kuti timuleki Yehova. Tisambira so kuti nyengu zosi Yehova waziŵa chechosi cho chititichitikiya. Ndipuso nge mo Yehova wangumalisiya mayeseru ngaku Yobu, tiziŵa kuti zuŵa linyaki Iyu wazamumaliska masuzgu ngidu ngosi. Asani tilongo kuziya mu vo tichita, kuti tigomezga ndi mtima wosi fundu zenizi, ndikuti te mugulu la ŵanthu wo ‘alindizga nadi Yehova.’
^ VO MAZU NGANYAKI NGANG’ANAMUWA: Mazu nga Chiheberi ngo akungafwatuliya kuti “chilindizga,” kanandi ngang’anamuwa “kulindizga” chinthu chinyaki mwakunweka. Ngangang’anamuwa so kugomezga munthu munyaki pamwenga kumuthemba.—Salimo 25:2, 3; 62:5.
^ Mazina nganyaki ngasinthika.
