1-2. Kumbi Yehova watiŵadaniya pani ateŵeti ŵaki akugomezgeka?

 ASANI munthu munyaki wangakufumbani kuti, kumbi Yehova ndi mune winu? Kumbi mungamuka kuti wuli? Mungamuka kuti, ‘Yehova Mbada, ndi Chiuta wangu kweniso Bwezi langu.’ Ndipu iyu we so ndi mazina nganyaki ngo ngakonkhoska udindu waki. Kweni kumbi mutimuwona so kuti mwe mulendu waki?

² Fumu Davidi yinguyeruzgiya ubwezi wo ulipu pakati paku Yehova ndi ateŵeti Ŵaki akugomezgeka, ndi ubwezi wo uŵapu pakati pa munthu yo wadana alendu ndi alendu ŵaki. Iyu wangufumba kuti: “Yimwi Yehova, ndiyani yo wangaŵa mulendu muhema linu? Ndiyani yo wangaja muphiri linu lakupaturika?” (Salimo 15:1) Mazu ngenanga ngatitisambiza kuti tingaja alendu aku Yehova, kung’anamuwa mabwezi ngaki. Wenuwu ndi mwaŵi ukulu ukongwa!

YEHOVA WAKHUMBA KUTI TIJE ALENDU ŴAKI

3. Kumbi ndiyani yo wenga mulendu wakwamba waku Yehova, nanga Yehova wajanga nayu wuli mulendu waki mwenuyu?

³ Pakwamba wechendalengi chechosi Yehova wenga yija. Kweni pati pajumpha nyengu, wangulonde Mwana waki wakwamba muhema laki lakuyeruzgiya. Yehova wangukondwa ukongwa ndi udindu waki wasonu wakulonde mulendu. Bayibolu lilongo kuti Yehova ‘wamuyanjanga ukongwa’ Mwana waki. Mulendu waki wakwamba mwenuyu, nayu ‘wakondwanga pa masu paku Yehova nyengu zosi.’—Nthanthi 8:30.

4. Kumbi mbayani wo Yehova wanguŵadana pavuli paki kuti aje alendu muhema laki?

 ⁴ Pavuli paki Yehova wangulenga angelu, ndipu nawu so wanguŵadana kuti aje alendu ŵaki. Angelu ŵaki adanika kuti ‘ŵana aku Chiuta’ ndipu alongo kuti akondwa kuja ndi Yehova. (Yobu 38:7; Dani. 7:10) Kwa vyaka vinandi alendu aku Chiuta ŵenga angelu pe kuchanya. Pavuli paki wangulenga ŵanthu, ndipu nawu anguja alendu ŵaki. Ndipu anyaki mwa alendu ŵaki ŵenga Enoki, Nowa, Abrahamu ndi Yobu. Wo amusopanga mwauneneska angudanika kuti mabwezi ngaku Chiuta pamwenga kuti wo angwenda “ndi Chiuta wawuneneska.”—Gene. 5:24; 6:9; Yobu 29:4; Yesa. 41:8.

5. Kumbi tingasambiranji pa uchimi wo usanirika pa Ezekiyeli 37:​26, 27?

⁵ Kwa vyaka vinandi Yehova walutirizga kudana mabwezi ngaki kuti ngaje alendu ŵaki. (Ŵerengani Ezekiyeli 37:​26, 27.) Mwakuyeruzgiyapu kuziya mu uchimi waku Ezekiyeli tisambira kuti Chiuta wakhumbisiska kuti ateŵeti ŵaki akugomezgeka aje nayu pa ubwezi wamampha. Iyu walayizga kuti wachitengi nawu “phanganu lachimangu.” Uchimi wenuwu ukamba za nyengu yo Akhristu wo ŵe ndi chilindizga chakuluta kuchanya kweniso wo ŵe ndi chilindizga chakuzija pacharu chapasi, azamukoliyana kuja muhema laki lakuyeruzgiya nge “mskambu umoza.” (Yoha. 10:16) Ndipu venivi vichitika sonu.

CHIUTA WATITIPHWERE KWEKOSI KO TINGAŴA

6. Kumbi munthu wangaja wuli mulendu muhema laku Yehova, nanga hema Laki lisanirika pani?

⁶ Kali hema ngenga malu ngo munthu wapumuliyangamu ndipuso kuvikilirika ku mphepu, vuwa kweniso lumwi. Mulendu wakhazanga kuti mweneku wahema lo wamuphweriyengi umampha. Asani tajipereka kwaku Yehova tija alendu muhema laki lakuyeruzgiya. (Salimo 61:4) Tikondwa ndi chakurya chinandi chauzimu kweniso tija pa ubwezi ndi alendu anyaki aku Yehova. Hema Laki lakuyeruzgiya lisanirika kumalu ngamoza pe cha. Vingaŵa kuti mungulutaku kucharu chinyaki panyaki kuti mukachiti unganu wapade, ndipu kweniko mungukumana ndi ŵanthu wo akondwa muhema laku Chiuta. Hema lenili lingasanirika kwekosi ko kwe ateŵeti aku Yehova akugomezgeka.—Chivu. 21:3.

7. Kumbi ntchifukwa wuli tingakamba kuti ateŵeti aku Yehova akugomezgeka wo akufwa, ŵeche alendu muhema laki? (Wonani so chithuzi.)

⁷ Kumbi ateŵeti aku Chiuta wo akufwa, nawu ŵeche alendu muhema lenili? Hinya!  Ntchifukwa uli tikamba viyo? Chifukwa chakuti ŵanthu ŵenaŵa Yehova wechekuŵakumbuka. Yesu wangukamba kuti: “Vakuti akufwa ayuka, chinanga ndi Mozesi wangukambapu mu nkhani yakukwaskana ndi chivwati cha minga. Iyu wangukamba kuti Yehova ndi ‘Chiuta waku Abrahamu, Chiuta waku Isaki ndipuso Chiuta waku Yakobe.’ Iyu ndi Chiuta wa ŵanthu akufwa cha, kweni wa ŵanthu amoyu chifukwa kwaku iyu wosi mbamoyu.”—Luka 20:​37, 38.

UDINDU WO TE NAWU KWENISO VITUMBIKU VO TISANIYA

8. Kumbi alendu aku Yehova ayanduwa wuli chifukwa chakuti ŵe muhema laki?

⁸ Nge mo takambiya, hema ndi malu ngakupumuliyaku kweniso livikiliya ŵanthu ku mphepu, vuwa kweniso lumwi. Mwakuyanana ŵaka, hema laku Yehova nalu livikiliya alendu ŵaki ku vinthu vo vingananga ubwezi wawu ndi Yehova kweniso watiŵapaska chilindizga chayichu cha munthazi. Asani tilutirizga kuja pa ubwezi wakukho ndi Yehova, Satana wangachita chechosi cha cho chingatinangiya limu. (Salimo 31:23; 1 Yoha. 3:8) Mu charu chifya, Yehova wazamulutirizga kuvikiliya abwezi ŵaki akugomezgeka, ku vinthu vo vingaŵatondekesa kuja nayu pa ubwezi kweniso ku nyifwa.—Chivu. 21:4.

9. Kumbi Yehova wakhumba kuti alendu ŵaki achitengi wuli vinthu?

⁹ Ndi mwaŵi ukulu ukongwa kuja mulendu muhema laku Yehova, ndipu tingaja pa ubwezi wakukho ndi iyu kwa muyaya. Kumbi tikhumbika kuchitanji kuti tilutirizgi kuja alendu ŵaki? Asani munthu munyaki wangakudaniyani ku nyumba yaki, mungakhumba kuziŵa vo mutenere kuchita kuti mumukondwesi. Mwakuyeruzgiyapu wangakhumba kuti muzuwi sapatu zinu mwechendasere munyumba yaki, ndipu mungakanaku cha. Mwakuyanana ŵaka, tikhumba kuziŵa vo Yehova wakhumba kuti ŵanthu wo akhumba kulutirizga kuja muhema laki achitengi. Kwanja Yehova kutitichiska kuti tichitengi vosi vo tingafiska ‘kuti timukondwesengi ukongwa.’ (Ako. 1:10) Ndipu chinanga titimuwona Yehova nge kuti ndi Mubwezi widu, tiziŵa so kuti ndi Chiuta widu ndipuso Ada wo titenere kuŵatumbika. (Salimo 25:14) Asani tikumbuka venivi ndikuti nyengu zosi timutumbikengi ndipu tiluwengi cha kuti iyu ndiyani. Chifukwa chakuti titimutumbika ukongwa vitiwovyengi kuti tileki kumuguŵisa. Tikhumbisiska ‘kuti tiyendengi mwakujiyuyuwa’ ndi Chiuta widu.—Mika 6:8.

YEHOVA WANGULONGO KUTI NGWAMBULA SANKHU MUCHIPULULU

10-11. Kumbi mo Yehova wanguchitiya vinthu ndi Ayisirayeli muchipululu cha Sinayi vilongo wuli kuti iyu ngwambula sankhu?

¹⁰ Yehova wachita vinthu mwambula sankhu ndi alendu ŵaki. (Aro. 2:11) Tingaziŵa kuti Yehova wachita vinthu mwambula sankhu, asani tiwona mo wanguchitiya vinthu ndi Ayisirayeli muchipululu cha Sinayi.

¹¹ Yehova wati wataska ŵanthu ŵaki ku ukapolu ku Ijipiti, wangusankha asembi kuti ateŵetiyengi pachihema. Alevi angupaskika ntchitu zinyaki pachihema chakupaturika. Kumbi ŵanthu wo ateŵetiyanga pachihema pamwenga wo anguzenga misasa yawu kufupi ukongwa ndi chihema chenichi, Yehova waŵaphweriyanga ukongwa kuluska ŵanthu anyaki? Awa! Yehova ngwambula sankhu.

12. Kumbi mo Yehova wanguchitiya vinthu ndi Ayisirayeli vilongo wuli kuti iyu ngwambula sankhu? (Ekisodo 40:38) (Wonani so chithuzi.)

¹² Munthu weyosi yo wajanga mumusasa wa Ayisirayeli wayanjikanga ndi Yehova mwakuyanana, kwambula kutole kanthu kuti  wateŵete pachihema pamwenga waja kufupi ndi chihema. Mwakuyeruzgiyapu, Yehova wanguwonesesa kuti mtundu wosi wa Ayisirayeli ufiskengi kuwona chipilala cha mtambu wakuziziswa kweniso chipilala cha motu cho chenga pachanya pa chihema. (Ŵerengani Ekisodo 40:38.) Asani mtambu wayamba kulazgiya kumalu nganyaki, chinanga mbanthu wo mahema ngawu ngenga kutali ndi chihema awonanga venivi. Yiwu apanganyanga katundu wawu, ajinthuwanga mahema ngawu ndipu ayendiyanga limoza ndi mtundu wosi wa Ayisirayeli. (Nume. 9:​15-23) Ŵanthu wosi avwanga kuliya kwa mbata ziŵi za siliva, zo zalongonga kuti munthu weyosi wakhumbika kuyambapu ulendu. (Nume. 10:2) Kukamba uneneska kuja ŵaka pafupi ndi chihema vang’anamuwangapu cha kuti we pa ubwezi wakukho ndi Yehova kuphara yo wajanga kutali. Munthu weyosi yo wenga wa mtundu wa Ayisirayeli wo ungupangika ŵaka wenga wakwenere kuja mulendu Waki, kulongozgeka ndi Iyu kweniso kuvikilirika. Mazuŵa nganu napu, vilivi kanthu kuti tija nunkhu, Yehova wangatiyanja, kutiphwere kweniso kutivikiliya.

MO YEHOVA WALONGORE KUTI NGWAMBULA SANKHU MAZUŴA NGANU

13. Kumbi Yehova walongo wuli kuti ngwambula sankhu mazuŵa nganu?

¹³ Mazuŵa nganu ateŵeti aku Chiuta anyaki aja pafupi ndi likulu lidu pamwenga ofesi ya nthambi ya Akaboni aku Yehova. Ndipu anyaki ateŵete kwenuku, mwaviyo ŵanthu ŵenaŵa achita vinthu vinandi kumalu ngenanga ndipuso achitiya vinthu limoza ndi ŵanthu wo alongozga mu gulu laku Yehova. Ndipu anyaki ateŵete nge akuwonere madera pamwenga achita uteŵeti unyaki wa nyengu zosi wapade. Asani yimwi muchitaku cha mauteŵeti ngenanga ziŵani kuti Yehova watanja alendu wosi wo ŵe muhema laki. Ndipu ŵanthu ŵenaŵa watiŵaphwere weyosi pakuyija. (1 Petu. 5:7) Ŵanthu wosi aku Chiuta alonde chakurya chauzimu chamampha, alongozgeka ndi iyu kweniso watiŵavikiliya.

14. Kumbi ntchakuwoniyapu nichi chinyaki cho chilongo kuti Yehova ngwambula sankhu?

 ¹⁴ Nthowa yinyaki yo Yehova walongore kuti ngwambula sankhu nkhuwonesesa kuti munthu weyosi pacharu chapasi we ndi Bayibolu. Pakwamba Malemba Ngakupaturika ngangulembeka mu vineneru vitatu, Chiheberi, Chiaramu ndi Chigiriki. Kumbi tingakamba kuti ŵanthu wo afiska kuŵerenga Bayibolu mu vineneru vakwambiriya ŵe paubwezi wakukho ndi Yehova kuphara ŵanthu anyaki wosi? Awa, ndimu viliri cha.—Mate. 11:25.

15. Kambani ukaboni wo ulongo kuti Yehova ngwambula sankhu. (Wonani so chithuzi.)

¹⁵ Kuti Yehova watiyanji vithemba pa kusambira sukulu ukongwa cha pamwenga vineneru vakwambiriya va Bayibolu. Mumalu mwakupereka zeru zaki ku ŵanthu wo mbakusambira ukongwa pe, Yehova wapereka so zeru zenizi ku ŵanthu wosi pacharu chapasi, kwali mbakusambira ukongwa pamwenga cha. Bayibolu likufwatulika mu vineneru masawuzandi nganandi, venivi vitovya ŵanthu anandi pacharu chosi chapasi kuti ayanduwengi ndi vo wasambiza kweniso kusambira vo angachita kuti aje mabwezi ngaki.—2 Timo. 3:​16, 17.

LUTIRIZGANI ‘KULONDEREKA’ NDI YEHOVA

16. Mwakukoliyana ndi Machitidu 10:​34, 35, kumbi tingachita wuli kuti tilutirizgi kuja akuzomerezeka kwaku Yehova?

¹⁶ Ndi mwaŵi kulondereka ndi Yehova nge alendu muhema laki lakuyeruzgiya. Iyu ngwalisungu ukongwa, watiŵayanja ukongwa ŵanthu kweniso walondiyadi alendu kuphara munthu munyaki weyosi. Chinyaki ntchakuti iyu ngwambula sankhu ndipu wakutilondere tosi kwambula kutole ko tija, mo tikukuliya, masambiru ngidu, mtundu widu, msinkhu widu kwali te anthulumi pamwenga anthukazi. Kweni munthu yosi yo wachita vo iyu wakhumba walondereka kuja mulendu waki.—Ŵerengani Machitidu 10:​34, 35.

17. Kumbi tingasaniya pani vinthu vinyaki vo vingatiwovya kuti tije alendu muhema laku Yehova?

¹⁷ Pa Salimo 15:​1, Davidi wangufumba kuti: “Yimwi Yehova, ndiyani yo wangaŵa mulendu muhema linu? Ndiyani yo wangaja muphiri linu lakupaturika?” Pavuli paki Yehova wangugwiriskiya ntchitu Davidi kumuka mafumbu nga mu Salimo 15. Mu nkhani yakulondopu tikambiskanengi vinyaki mwa vinthu vo munthu wakhumbika kuchita kuti walutirizgi kuja wakuzomerezeka kwaku Yehova.