Vo Akuŵerenga Afumba
Ntchifukwa wuli lemba la Salimo 12:7 likufwatulika kuti “muŵavikiliyengi,” kung’anamuwa “ŵanthu wo asuzgika” (vesi 5) mumalu mwa kufwatulika kuti “mungavikiliyengi,” kung’anamuwa “mazu ngaku Yehova” (vesi 6)?
Nkhani yosi yilongo kuti vesi ili likamba ŵanthu.
Pa Salimo 12:1-4, tiŵerenga kuti, “ŵanthu akugomezgeka asoŵa pakati pa ŵanthu.” Sonu tiyeni tikambiskani lemba la Salimo 12:5-7 po patuwa fumbu lo tikhumba kukambiskana.
“Yehova wakamba kuti: ‘Chifukwa cha kukandirizgika kwa ŵanthu wo asuzgika,
Chifukwa cha kutamantha kwa ŵanthu akavu,
Ndisokengi kuti ndichitepu kanthu.
‘Ndiŵataskengi ku ŵanthu wo atiŵayuyuwa.’
Mazu ngaku Yehova ngakutowa;
Nge nge siliva wakuyengetulika maulendu 7 mung’anju ya mudongu.
Yimwi Yehova muŵavikiliyengi;
Muvikiliyengi weyosi waku yiwu ku mugonezi uwu mpaka muyaya.”
Vesi 5 likamba vo Chiuta wakhumba kuŵachitiya “ŵanthu wo asuzgika.” Iyu waŵataskengi.
Vesi 6 lisazgiyapu mazu ngakuti “Mazu ngaku Yehova ngakutowa, . . . nge siliva wakuyengetulika.” Umu ndimu tosi titingawone Mazu ngaku Yehova.—Salimo 18:30; 119:140.
Sonu tiyeni tikambiskani lemba la Salimo 12:7 lo likamba kuti: “Yimwi Yehova muŵavikiliyengi; muvikiliyengi weyosi waku yiwu ku mugonezi uwu mpaka muyaya.” Kumbi tiziŵa wuli kuti pa lemba ili mazu ngakuti “muŵavikiliyengi” ngang’anamuwa “Mazu ngaku Yehova” cha kweni “ŵanthu wo asuzgika”?
Chifukwa chakuti pa vesi 7 pe mazu ngakuti “Mazu ngaku Yehova,” ŵanthu anyaki aŵanaŵana kuti Chiuta ‘wavikiliya’ mazu ngaki. Ndipu tiziŵa kuti Chiuta wanguyesesa kuvikiliya Bayibolu chinanga kuti ŵanthu akususka anguyesesa kulinanga kweniso kukaniza kuti lileki kusanirika.—Yesa. 40:8; 1 Petu. 1:25.
Kweni vo vikambika pa vesi 5 vauneneska ndipu Yehova walutirizgengi kuwovya “ŵanthu wo asuzgika” ndipuso wo ‘akandirizgika.’—Yobu 36:15; Salimo 6:4; 31:1, 2; 54:7; 145:20.
Sonu ntchifukwa wuli tingakamba kuti vesi 7 likamba va ŵanthu?
Salimo lenili lilongo kuti nkhani yosi yikamba va ŵanthu.
Pa Salimo 12:1 pakamba va “ŵanthu akugomezgeka” wo ŵanthu aheni aŵapusika. Pavuli paki, tisaniya mazu ngakuti Yehova wazamusoka kuti wayukiyi ŵanthu wo agwiriskiya ntchitu mwambula kwenere malilimi ngawu. Salimo ili lititisimikiziya kuti tingamuthemba Chiuta kuti wazakuŵawovya ateŵeti ŵaki chifukwa mazu ngaki ngakutowa.
Mwaviyo, vesi 7 likamba kuti Yehova wazamuvikiliya “ŵanthu wo asuzgika” ku ŵanthu aheni.
Mazu ngakuti “muŵavikiliyengi” ngakoliyana ndi vo vikulembeka mumipukutu yakuthembeka ya Malemba Ngachiheberi. Mu Bayibolu la Chigiriki la Septuagint pavesi 7 akugwiriskiya ntchitu kaŵi mazu ngakuti “mutivikiliyengi,” vo vilongo so kuti mbanthu akugomezgeka wo asuzgika kweniso wo akandirizgika. Pakumaliya, vesi 7 likamba kuti “weyosi” wa ŵanthu akugomezgeka wazamuvikilirika “ku mugonezi uwu,” kung’anamuwa ŵanthu wo achitiska kuti ŵanthu anyaki akandirizgikengi. (Salimo 12:7, 8) Mu Bayibolu la Chiaramu pa vesi 7 pakamba kuti: “Yimwi, AMBUYA, mwazamuvikiliya arunji, mwakuŵavikiliya ku mugonezi uheni uwu kwamuyaya. Ŵanthu aheni atenda uku ndi uku, nge msundu wo utumwa ndopa za ŵana a ŵanthu.” Venivi vilongo kuti lemba la Salimo 12:7 likamba va mazu ngaku Chiuta cha.
Mwaviyo, vesi lenili lichiska “ŵanthu akugomezgeka” kuti Chiuta wazamuchitapu kanthu.
