1. Mwakukoliyana ndi Mateyu 24:9, ntchifukwa wuli tikhumbika cha kuzizwa asani charu chitititinkha?

YEHOVA wakutilenga kuti tiyanjengi anyidu kweniso kuti tiyanjikengi. Ndichu chifukwa chaki asani munthu munyaki watititinkha, tiguŵa kweniso panyaki tichita mantha. Mwakuyeruzgiyapu, mzichi munyaki zina laki Georgina yo waja ku Europe wangukamba kuti: “Pa nyengu yo ndenga ndi vyaka 14, ama angwamba kunditinkha chifukwa chakuti ndateŵetiyanga Yehova. Ndajivwanga nge kuti nde ndija ndipu ndingwamba kukayikiya asani ndenga nadi munthu wamampha.” * Mubali munyaki zina laki Danylo wangukamba kuti: “Asani asilikali atindipuma, atindinyoza kweniso atindiwofyeza chifukwa chakuti nde Kaboni aku Yehova, ndachitanga mantha kweniso ndachitanga soni.” Tiguŵa ukongwa asani ŵanthu atititinkha kweni venivi vititiziziswa cha. Ve viyo, chifukwa Yesu wangukambiya limu kuti tazamutinkhika.—Ŵerengani Mateyu 24:9.

2-3. Ntchifukwa wuli akusambira aku Yesu atinkhika?

² Charu chitiŵatinkha akusambira aku Yesu. Chifukwa wuli? Chifukwa nge mo Yesu wanguchitiya, nasi te “a charu cha.” (Yoha. 15:17-19) Mwaviyo, chinanga kuti titingatumbika maboma nga ŵanthu, kweni tichitaku cha ndali, kugwadiya mbendera pamwenga kumbaku sumu ya fuku. Mumalu mwaki, tisopa Yehova pe. Tija kuchigaŵa chaku Chiuta kuti iyu ndiyu we ndi wanangwa wakwenere kulamuliya ŵanthu. Kweni Satana ndi “mphapu” yaki, angususka kuti Chiuta ngwakwenere kulamuliya ŵanthu. (Gene. 3:1-5, 15) Kweniso tipharazga kuti ndi Ufumu waku Chiuta pe wo ungamalisa masuzgu nga ŵanthu ndipuso kuti pambula kuswera, Ufumu wenuwu unangengi ŵanthu wo atiwususka. (Dani. 2:44; Chivu. 19:19-21) Wenuwu  mbuthenga wamampha ku ŵanthu akufwasa kweni mbuthenga uheni ku ŵanthu aheni.—Salimo 37:10, 11.

³ Charu chitititinkha so chifukwa chakuti isi tivwiya marangu nga urunji ngaku Chiuta. Marangu ngenanga, ngapambana kutali ndi marangu ngacharu ngo ngachitiska kuti mijalidu ya ŵanthu yihenekiyengihenekiyengi. Mwakuyeruzgiyapu, mazuŵa nganu ŵanthu anandi azomereza ureŵi wa mtundu wewosi, jalidu lo Chiuta wangunangiya ŵanthu a ku Sodomu ndi Gomora! (Yuda 7) Chifukwa chakuti isi tivwiya marangu nga mu Bayibolu pa nkhani ya mijalidu yeniyi, ŵanthu anandi atitinyoza ndipuso atitiwona kuti te anamuvwa zawu.—1 Petu. 4:3, 4.

4. Kumbi ndi mijalidu niyi yo yititiwovya kukunthiyapu asani ŵanthu atititinkha?

⁴ Ntchinthu wuli chingatiwovya kukunthiyapu asani ŵanthu atititinkha kweniso atitinyoza? Tikhumbika kuja ndi chivwanu chakukho kuti Yehova watiwovyengi. Nge chishangu, chivwanu chidu ‘chingazimwa mivi yakukole motu ya muheni yo.’ (Aefe. 6:16) Kweni tikhumbika kuchita vinandi kuluska ŵaka kuja ndi chivwanu. Tikhumbika so kuja ndi chanju. Chifukwa wuli? Chifukwa chanju “chikwiya cha.” Chiwundiya kweniso kukunthiyapu vinthu vosi vakuguŵiska. (1 Akori. 13:4-7, 13) Sonu tiyeni tikambiskani mo kwanja Yehova, kwanja abali ndi azichi ŵidu kweniso kwanja chinanga mbarwani ŵidu, kungatiwovye kukunthiyapu asani titinkhika.

5. Kumbi kwanja Awisi, kungumuwovya wuli Yesu?

⁵ Ndi usiku kwati kwaja kamanavi kuti arwani ŵaki amubayi, Yesu wangukambiya akusambira ŵaki akugomezgeka kuti: “Nditanja Ada, [mwaviyo] ndichitengi nge mo Ada akundilamuliya.” (Yoha. 14:31) Chifukwa chakuti Yesu wayanjanga Yehova, vingumuwovya kuti wakunthiyepu masuzgu ngo wangukumana nangu. Asani nasi titanja Yehova, vingatiwovya kuti tikunthiyepu.

6. Mwakukoliyana ndi Aroma 5:3-5, kumbi ateŵeti aku Yehova atuvwa wuli asani akunthiyapu chifukwa chakuti charu chitiŵatinkha?

⁶ Kwanja Chiuta, nyengu zosi kutovya ateŵeti aku Yehova kuti akunthiyengepu asani atombozgeka. Mwakuyeruzgiyapu, akutumika ŵati alamulika ndi khoti likulu lanthazi la Ayuda kuti aleki kupharazga, kwanja Chiuta kunguŵawovya “kuvwiya Chiuta nge wakulamuliya kuluska ŵanthu.” (Machi. 5:29; 1 Yoha. 5:3) Mazuŵa nganu napu, kwanja Chiuta kutovya abali ŵidu kuti akunthiyengepu asani atombozgeka ndi maboma ngankhaza kweniso nganthazi. Mumalu mwakuguŵa, isi tiwona kuti ndi mwaŵi kukunthiyapu asani charu chitititinkha.—Machi. 5:41; ŵerengani Aroma 5:3-5.

7. Kumbi tikhumbika kuchita wuli asani ŵanthu a mu banja lidu atitisuska?

⁷ Nyengu zinyaki chiyesu chikulu chituliya ku ŵanthu a mu banja lidu. Asani tayamba kulongo kuti tikhumba kuziŵa uneneska, ŵanthu anyaki a mu banja lidu angayamba kuŵanaŵana kuti talandizgika. Anyaki angaŵanaŵana kuti tazunguliya mutu. (Yeruzgiyani ndi Mariko 3:21.) Mwakuti asani atitisuska, nyengu zinyaki angatichitiya vinthu vankhaza. Kweni tikhumbika cha kuzizwa ndi vinthu venivi. Yesu wangukamba kuti: “Arwani a munthu aŵengi ŵanthu a munyumba yaki.” (Mate. 10:36) Kweni mwemosi mo abali ŵidu angatiwone, isi tichita nawu vinthu nge arwani ŵidu cha. Mumalu mwaki, po titimwanja ukongwa Yehova ndipuso titiŵayanja ukongwa ŵanthu. (Mate. 22:37- 39) Kweni tilekengepu cha kuvwiya marangu ndi fundu za Bayibolu chifukwa chakukhumba ŵaka kukondwesa munthu munyaki.

8-9. Kumbi ntchinthu wuli cho chinguwovya mzichi munyaki kuti wakunthiyepu chinanga kuti wasuskikanga ukongwa?

⁸ Georgina yo tamukambapu kali wangufiska kukunthiyapu, chinanga kuti anyina amususkanga ukongwa. Georgina wangukamba kuti: “Ini ndi ama tingwamba kusambira Bayibolu ndi Akaboni. Kweni pati pajumpha myezi 6 po ndakhumbanga kuluta ku maunganu, ama angusintha ukongwa ndipu angwamba kundisuska. Ndingusaniya kuti  yiwu akoliyananga ndi ŵanthu akugaruka ndipu ama agwiriskiyanga ntchitu vo akugaruka aŵakambiyanga pa kundisuska. Ama andinyozanga so, kundiguza sisi, kundifyeka pakhosi kweniso anditayiyanga mabuku ngangu. Ndati ndakwaniska vyaka 15 ndingubatizika. Kweni ama anguyesesa kuti andilekesi kuteŵete Yehova mwakuchindiŵika ku malu nganyaki ngo kwajanga asungwana pe wo alekanga kuvwiya apapi ŵawu. Anyaki mwa asungwana ŵenaŵa agwiriskiyanga ntchitu munkhwala wakutimbanyizga wongu kweniso avwiyanga cha marangu ngakwenuku.”

⁹ Kumbi ntchinthu wuli cho chinguwovya Georgina kuti wakunthiyepu? Iyu wangukamba kuti: “Zuŵa lo ama angwambiya kundisuska ndipu ndamaliza ŵaka kuŵerenga Bayibolu losi lamphumphu. Pa nyengu iyi ndingusimikiza ndi mtima wosi kuti ndikusaniya nadi uneneska kweniso ndingujivwa kuti nde pa ubwezi wakukho ndi Yehova. Ndapempheranga kaŵikaŵi kwaku iyu ndipu iyu wandivwisiyanga. Ndichija ku nyumba yo ama angundiŵika, mzichi munyaki wangundidaniya ku nyumba kwaki ndipu tingusambiriya limoza Bayibolu. Pa nyengu yosi yeniyi, abali ndi azichi andichiskanga ukongwa. Yiwu anditonga nge munthu wa mu banja lawu. Yapa vinguwoneke limu kuti Yehova we ndi nthazi ukongwa kuluska wo atitisuska, kwali angaŵa ŵanthu amtundu wuli.”

10. Kumbi tingasimikiza kuti Yehova Chiuta widu watichitiyengenji nyengu zosi?

¹⁰ Wakutumika Paulo wangulemba kuti palivi chechosi cho ‘chingatipatuska ku chanju chaku Chiuta cho che mwa Ambuyafwi, Khristu Yesu.’ (Aro. 8:38, 39) Ndipu chinanga kuti tingasuzgika kwa nyengu yitali, nyengu zosi Yehova wajengi kuchigaŵa chidu kuti watipembuzgi kweniso kutipaska nthazi. Ndipu nge mo tawone ndi vo vinguchitikiya Georgina, Yehova watitiwovya so kuziya mwa abali ndi azichi ŵidu mumpingu.

11. Kumbi chanju cho Yesu wangukamba pa Yohane 15:12, 13 chitiŵawovya wuli akusambira ŵaki? Kambani chakuyeruzgiyapu.

¹¹ Usiku wakuti wafwengi mawa, Yesu wangukumbusa akusambira ŵaki kuti ayanjanengi. (Ŵerengani Yohane 15:12, 13.) Iyu wanguziŵa kuti chanju chakutuliya pasi pa mtima, chatingi chiŵawovyengi kuti alutirizgi kuja akukoliyana kweniso kuti akhunthiyengepu asani charu chitiŵatinkha. Tiyeni tikambiskani chakuyeruzgiyapu cha mpingu wa ku Tesalonika. Kutuliya pa nyengu yo mpingu uwu ungupangikiya, Akhristu ŵenaŵa atombozgekanga. Kweni abali ndi azichi akwenuku anguja chakuwoniyapu chamampha pa nkhani ya kugomezgeka ndi chanju. (1 Ate. 1:3, 6, 7) Paulo wanguŵachiska kuti alutirizgi kulongorana chanju  chinanga ‘nkhusazgiyaku kuchita viyo.’ (1 Ate. 4:9, 10) Chanju chatingi chiŵachitiskengi kuti alutirizgi kupembuzga wo asuzgika maŵanaŵanu ndi kuwovya akulopwa. (1 Ate. 5:14) Abali ndi azichi ŵenaŵa, angulondo ulongozgi waku Paulo. Mwakuti wachiŵalembe kalata yaki yachiŵi pati pajumpha pafufupi chaka, Paulo wanguŵakambiya kuti: “Chanju cho mwe nachu pakati pinu mosi, chilutirizga kusazgikiyaku.” (2 Ate. 1:3-5) Chanju cho abali yaŵa ŵenga nachu chinguŵawovya kukunthiyapu masuzgu kweniso kutombozgeka.

12. Pa nyengu yo mucharu chinyaki mwenga nkhondu, kumbi abali ndi azichi angulongo wuli kuti atanjana?

¹² Tiyeni tikambiskani vo vinguchitikiya Danylo yo tamukambapu kali kweniso muwolu waki. Nkhondu yati yafika mutawuni yo ajanga mucharu chawu, yiwu angulutirizga kuwungana, kupharazga mo angafiskiya ndipuso kugaŵana chakurya cho ŵenga nachu ndi abali ndi azichi. Zuŵa linyaki, asilikali wo ŵenga ndi futi anguza ku nyumba kwaki. Danylo wangukamba kuti: “Angundilamula kuti ndileki kuja Kaboni. Ndati ndaŵakaniya, yiwu angundipuma ndipu angwendesa futi kumutu kwangu ndi kupusikiziya kuti akhumba kundilasa. Yiwu ŵechendaluti, angundiwofyeza kuti amuwe so kuti azikolere muwolu wangu. Kweni mwaliŵiliŵi abali angutikweza mu sitima ya pamtunda ndi kuluta mutawuni yinyaki. Ndiluwengi cha chanju cho abali akwanjiwa ŵenaŵa angutilongo. Ndipu tati tafika mutawuni yasonu, abali akwenuku angutipaska chakurya kweniso angutiwovya kuti tisaniyi ntchitu ndipuso nyumba. Chifukwa cha venivi, pavuli paki tenga ndi mwaŵi wakuŵasaniriya malu ngakuja Akaboni anyaki wo athaŵanga nkhondu.” Vo vinguchitikiya Danylo, vilongo kuti chanju cho Akhristu anyidu ŵenachu chingatiwovya kukunthiyapu asani titinkhika.

13. Kumbi mzimu wakupaturika utitiwovya wuli kukunthiyapu asani titeŵete Yehova chinanga mphanyengu yo ŵanthu atititinkha?

¹³ Yesu wangukambiya akusambira ŵaki kuti ayanjenge arwani ŵawu. (Mate. 5:44, 45) Kumbi kuchita venivi nkhupusu? Awa! Kweni tingafiska kuŵayanja mwakuwovyeka ndi mzimu wakupaturika waku Chiuta. Mijalidu yo mzimu waku Chiuta utuzga yisazgapu, chanju, kuzikira, lisungu, kuzika, kweniso kujiko. (Aga. 5:22, 23) Mijalidu yeniyi yititiwovya kuti tikunthiyengepu asani titinkhika. Ŵanthu anandi akuleka kutisuska chifukwa chakuti alumu ŵawu wo mbakaboni, muwolu wawu, mwana pamwenga ŵanthu wo aja nawu pafupi, aŵalongonga mijalidu yo mzimu waku Chiuta utuzga. Ndipu anandi mwa ŵanthu wo atisuskanga akuja abali ndi azichi ŵidu akwanjiwa. Mwaviyo, asani vitikusuzgani kwanja ŵanthu wo atikutinkhani chifukwa chakuti muteŵete Yehova,  mupempherengi kwaku iyu kuti wakupaskeni mzimu wakupaturika. (Luka 11:13) Ndipu mugomezgengi ndi mtima wosi kuti nthowa yaku Chiuta, nyengu zosi yituŵa yamampha.—Nthanthi 3:5-7.

14-15. Kumbi lemba la Aroma 12:17-21, lingumuwovya wuli Yasmeen kuti wamulongongi chanju mulumu waki chinanga kuti wamususkanga ukongwa?

¹⁴ Tiyeni tikambiskani chakuyeruzgiyapu chaku Yasmeen yo waja ku Middle East. Iyu wati waja Kaboni waku Yehova, mulumu waki waŵanaŵananga kuti wapusisika ndipu wanguyesesa kuti wamulekesi kuteŵete Chiuta. Iyu wamunyozanga kweniso wanguchiska abali ŵaki, aliska kweniso anthulumi anyaki kuti amuwofyezi ndipu amumbanga mulandu kuti wakhumba kumalisa nthengwa yaki. Mwakuti mulumu waki walutanga ku Nyumba ya Ufumu kuchinyoza abali asani achita maunganu. Kanandi Yasmeen wajaliyanga waka kuliya chifukwa mulumu waki wamuchitiyanga vinthu mwambula lisungu.

¹⁵ Ku Nyumba ya Ufumu, Abali ndi azichi amupembuzganga kweniso kumuchiska Yasmeen. Ŵara angumuchiska kuti wagwiriskiyengi ntchitu mazu nga pa Aroma 12:17-21. (Ŵerengani.) Yasmeen wangukamba kuti: “Venga vakusuzga ukongwa. Kweni ndapempheranga kwaku Yehova kuti wandiwovyi ndipu ndayesesanga kugwiriskiya ntchitu vo Bayibolu likamba. Mwaviyo, asani alumu wangu anatisiyamu dala mu khichini, ndanozgangamu. Asani atindinyoza ndamukanga mwakuzika. Ndipu asani atama ndaŵaphweriyanga.”

16-17. Kumbi mwasambiranji pa vo vinguchitikiya Yasmeen?

¹⁶ Yasmeen wangutumbikika chifukwa chakuti wamulongonga chanju mulumu waki. Iyu wangukamba kuti: “Mulumu wangu wangwamba kundigomezga ukongwa chifukwa waziŵanga kuti nyengu zosi ndakambanga uneneska. Iyu wangwamba kundivwisiya mwaulemu asani tikambiskana nkhani zakukwaskana ndi chisopa ndipu wanguzomereza kuti wachitengi vinthu mwachimangu pa nyumba. Sonu watindichiska kuti ndikengi ku maunganu. Pasonu panu, ini ndi mulumu wangu te pa ubwezi wamampha ndipu pa nyumba pidu pe chimangu. Ndigomezga kuti nyengu yinyaki mulumu wangu wazamujula mtima waki ndikwamba kusambira uneneska ndipu tazamuteŵetiyanga Yehova limoza.”

¹⁷ Vo vinguchitikiya Yasmeen vilongo kuti chanju “chiwundiya vinthu vosi, . . . chilindizga vinthu vosi ndipuso chikunthiyapu vinthu vosi.” (1 Akori. 13:4, 7) Kutinkhika kungaŵa kwa nthazi kweniso kwakupweteka, kweni chanju ndichu che ndi nthazi ukongwa. Chanju chisintha mitima ya ŵanthu. Ndipu asani tilutirizga kulongo chanju, tikondwesa Yehova. Kweni chinanga kuti ŵanthu wo atitisuska alutirizga kutitinkha, tingalutirizga kukondwa. Munthowa wuli?

18. Ntchifukwa wuli titenere kukondwa asani ŵanthu atititinkha?

¹⁸ Yesu wangukamba kuti: “Ndimwi akukondwa asani ŵanthu atikutinkhani.” (Luka 6:22) Tichita kusankha cha kuti titinkhikengi. Ndipu tikondwa cha kuti titinkhikengi chifukwa cha chivwanu chidu. Sonu kumbi ntchifukwa wuli tikhumbika kukondwa asani titinkhika? Tiyeni tiwoni vifukwa vitatu ivi. Chakwamba, asani tikunthiyapu, Chiuta wakondwa nasi. (1 Petu. 4:13, 14) Chachiŵi, chivwanu chidu chiyengetulika ndipu chija chakukho ukongwa. (1 Petu. 1:7) Ndipu chachitatu, tazamulonde mphasu yapade ukongwa yo mbumoyu wamuyaya.—Aro. 2:6, 7.

19. Ntchifukwa wuli akutumika angukondwa ŵati akhwechulika?

¹⁹ Pati pajumpha nyengu yimanavi Yesu wati wayuskika, akutumika anguwona likondwa lo iyu wangukamba. Akutumika ŵati akhwechulika ndi kuŵalamula kuti aleki kupharazga, angukondwa. Chifukwa wuli? “Pakuti anguwona kuti ntchakwenere kuti yiwu alengeseki chifukwa cha zina laku Yesu.” (Machi. 5:40-42) Yiwu aŵayanjanga Ambuyawu kuluska mantha ngo ŵenga nangu chifukwa chakutinkhika ndi arwani ŵawu. Yiwu angulongo chanju chenichi mwakupharazga uthenga wamampha “kwambula kulekeza.” Mazuŵa nganu, abali ŵidu anandi alutirizga kuteŵete Chiuta mwakugomezgeka chinanga kuti akumana ndi masuzgu. Yiwu aziŵa kuti Yehova waluwengi cha ntchitu yawu ndi chanju cho atichilongo pa zina laki.—Ahe. 6:10.

20. Kumbi tazamukambiskananji mu nkhani yakulondopu?

²⁰ Charu chilutirizgengi kutitinkha po mugonezi uwu weche ŵaka. (Yoha. 15:19) Kweni tikhumbika cha kuchita mantha. Nge mo tiwoniyengi mu nkhani yakulondopu, Yehova “watipaskengi nthazi . . . kweniso wavikiliyengi’ ateŵeti ŵaki akugomezgeka. (2 Ate. 3:3) Mwaviyo, tiyeni tilutirizgi kwanja Yehova, abali ndi azichi ŵidu kweniso chinanga mbarwani ŵidu. Asani tilondongi ulongozgi wenuwu, tilutirizgengi kuja akukoliyana, chivwanu chidu chijengi chakukho, Yehova watumbikikengi, kweniso tilongongi kuti chanju ntchanthazi ukongwa kuluska kutinkhika.