1-2. Asani mwechendanozgeki kubatizika, ntchifukwa wuli mukhumbika cha kugongowa? (Wonani chithuzi cho che pachikonkhombi.)

 ASANI mukhumba kubatizika, ndikuti mwasankha kuchita chinthu chamampha ukongwa paumoyu winu. Kumbi mwe akunozgeka kubatizika pasonu panu? Asani muwona kuti mwanozgeka kubatizika ndipu ŵara nawu azomereza, mbwenu kabatizikeni paunganu wo utuza. Asani mwachita viyo, Yehova wakutumbikeningi ukongwa.

² Kweni kumbi munthu munyaki wakukukambiyanipu kuti mukhumbika kusintha dankha vinthu vinyaki mwechendabatiziki? Pamwenga namwi muwona kuti mukhumbika dankha kusintha vinthu vinyaki? Asani ndi viyo, mungagongowanga cha. Mungafiska chilatu chinu chakukhumba kubatizika kwali ndimwi munamana pamwenga mura.

3. Kumbi nduna ya ku Ifiyopiya yingumufumbanji Filipu, nanga pabuka fumbu wuli? (Machitidu 8:36, 38)

³ Ŵerengani Machitidu 8:36, 38. Nduna ya ku Ifiyopiya yingufumba Filipu mupharazgi kuti: “Ntchinthu wuli cho chitinditondekesa kubatizika?” Munthu wa ku Ifiyopiya wakhumbanga kubatizika, kweni kumbi wenga wakunozgeka nadi kubatizika?

4. Kumbi nduna ya ku Ifiyopiya yingulongo wuli kuti yakhumbanga kulutirizga kusambira?

⁴ Nduna ya ku Ifiyopiya ‘yinguluta ku Yerusalemu kuchisopa.’ (Machi. 8:27) Mwaviyo iyu yitenere kuti yingung’anamukiya ku Chiyuda. Ndipuso yitenere kuti yingusambira vakukwaskana ndi Yehova mu Malemba ngakupaturika nga Chiheberi. Kweni yakhumbiskisanga  kusambira vinandi. Pa yengu yo Filipu wangukumana ndi nduna yeniyi munthowa, kumbi wanguyisaniya kuti yichitanji? Iyu wanguyisaniya kuti yiŵerenga buku la mchimi Yesaya. (Machi. 8:28) Iyu yaŵerenganga fundu za ndimba za mu Bayibolu. Nduna ya ku Ifiyopiya yingukhorwa cha ndi vinthu vipusu vo yingusambira; yakhumbanga kulutirizga kusambira.

5. Kumbi nduna ya ku Ifiyopiya yinguchita wuli ndi vo yingusambira?

⁵ Nduna ya ku Ifiyopiya yenga ndi mazaza pasi paku Kandaki, fumukazi ya ku Ifiyopiya. Iyu “yawoneriyanga chuma chaki chosi.” (Machi. 8:27) Mwaviyo, yitenere kuti yatangwamikanga ukongwa chifukwa chakuti yenga ndi maudindu nganandi. Kweni yasaniyanga nyengu yakusope Yehova. Yingukhorwa waka cha ndi vo yingusambira kweni yinguvigwiriskiya ntchitu. Mwaviyo, yingwenda mtunda utali ukongwa kutuwa ku Ifiyopiya kuluta ku Yerusalemu kuchisopa Yehova. Ulendu wenuwu wakhumbikanga nyengu ndipuso ndalama kweni kwali vinthu venga wuli, nduna yo, yakhumbanga kusopa Yehova.

6-7. Kumbi nduna ya ku Ifiyopiya yingulutirizga wuli kwanja ukongwa Yehova?

⁶ Nduna ya ku Ifiyopiya yingusambira vinthu vinyaki vakukhumbika ukongwa kwaku Filipu kusazgapu fundu yakuti Yesu ndi Mesiya. (Machi. 8:34, 35) Nduna yeniyi yingukondwa ukongwa kusambira vo Yesu wanguyichitiya. Kumbi iyu yinguchitanji yati yasambira venivi? Iyu yatingi yilutirizgengi kuja munthu wakung’anamukiya ku Chiyuda, kweni yingwamba kwanja ukongwa Yehova kweniso Mwana Waki. Iyu yinguchiskika kusintha vinthu pa umoyu waki kuti yibatiziki kweniso kuja wakusambira waku Yesu Khristu. Filipu wanguwona kuti munthu mwenuyu wenga wakunozgeka kubatizika, mwaviyo wangumubatiza.

⁷ Asani mungayezga nduna ya ku Ifiyopiya, ndikuti namwi munganozgeke kubatizika. Namwi mungakamba ndi mtima wosi kuti: “Ntchinthu wuli cho chitinditondekesa kubatizika?” Sonu tiyeni tikambiskani mo mungayezge nduna ya ku Ifiyopiya. Iyu yingulutirizga kusambira, yingugwiriskiya ntchitu vo yingusambira ndipuso yingulutirizga kwanja Chiuta.

8. Kumbi lemba la Yohane 17:3 likamba kuti tikhumbika kuchitanji?

⁸ Ŵerengani Yohane 17:3. Kumbi mazu ngaku Yesu ngenanga ndingu ngangukuwovyani kuti muyambi kusambira Bayibolu? Tanandi ndivu vikutichitikiya. Kumbi mazu ngenanga ndingungatitichiska nasi kuti tilutirizgi kusambira? Hinya. Tilekengi cha ‘kuziŵa . . . Chiuta yija wauneneska.’ (Waku. 3:11) Tilutirizgengi kusambira mpaka muyaya. Kusambira vinandi vakukwaskana ndi Yehova kutiwovyengi kuti tilutirizgi kuja nayu paubwezi wakukho.​—Salimo 73:28

9. Kumbi tikhumbika kuchitanji asani taziŵa visambizu vakwamba va mu Bayibolu?

 ⁹ Pa nyengu yo titamba kusambira vakukwaskana ndi Yehova, tisambira waka visambizu vakwamba va mu Bayibolu. Mu kalata yo wangulembe Aheberi, wakutumika Paulo wangukamba kuti visambizu venivi ndi “fundu zipusu.” Wachikamba venivi, iyu wang’anamuwanga kuti “chisambizu chakwamba” ntchambula kukhumbika cha. Kweni wanguchiyeruzgiya ndi mkaka wo ngwakukhumbika ku mwana. (Ahe. 5:12; 6:1) Kweni iyu wanguchiska Akhristu wosi kuti akhumbika so kusambira fundu zandimba zakutuliya mu Mazu ngaku Chiuta, mumalu mwakusambira waka visambizu vakwamba pe va mu Bayibolu. Kumbi yimwi mukhumbisiska kusambira fundu zandimba za mu Bayibolu? Kumbi yimwi mukhumbisiska kusambira vakukwaskana ndi Yehova kweniso khumbu laki?

10. Ntchifukwa wuli ŵanthu anyaki vitiŵasuzga kusambira vinthu?

¹⁰ Kweni tanandi vititisuzga kusambira vinthu. Nanga yimwi ve wuli pankhani yeniyi? Kumbi yimwi po mwenga kusukulu munguyanduwa mwakukwana mwakuti musuzgika cha kusambira vinthu? Kumbi mwayanjanga kusambira kweniso kujivwa kuti mwasambira vinandi pamwenga munguwona kuti vakuŵerengaŵerenga mu mabuku vitikusuzgani? Asani ndi viyo mwe mwija cha. Chinanga kuti ve viyo, Yehova wangakuwovyani. Iyu ndi Msambizi wamampha ukongwa ndipu palivi yo wangayanana nayu.

11. Kumbi Yehova walongo wuli kuti iyu ndi “Msambizi Mura”?

¹¹ Yehova watijidana kuti “Msambizi waku Mura.” (Yesa. 30:20, 21) Iyu ndi Msambizi wakuzikira, walisungu kweniso wakuvwisa. Iyu wawonamu vamampha mu ŵanthu wo watiŵasambiza. (Salimo 130:3) Iyu watitipempha cha kuchita vinthu vo tingatondeka kufiska. Kumbukani kuti iyu ndiyu wakupanga wongu winu ndipu yeniyi ndi mphasu yamampha ukongwa. (Salimo 139:14) Tikuwa ndi khumbu lakusambira vinthu. Mlengi widu wakhumba kuti tilutirizgengi kusambira kweniso kuti tikondwengi ndi vo tisambira. Mwaviyo tingachita umampha kuti ‘tikhumbisiskengi’ kusambira uneneska wa mu Bayibolu pasonu panu. (1 Petu. 2:2) Mujiŵikiyengi vilatu pankhani yakusambira ndipu muyesesengi kulondo ndondomeku yinu yakuŵerenga ndipuso kusambira Bayibolu. (Yoswa 1:8) Yehova wakuwovyeningi kuti muyanjengi kuŵerenga kweniso kuti musambirengi ukongwa vakukwaskana ndi iyu.

12. Ntchifukwa wuli tikhumbika kusambira va umoyu waku Yesu kweniso uteŵeti waki?

¹² Musaniyengi nyengu yakulunguruka vakukwaskana ndi umoyu waku Yesu ndipuso uteŵeti waki. Kuyezga Yesu kungatiwovya kuti titeŵetiyengi Yehova mu mazuŵa nganu ngakusuzga. (1 Petu. 2:21) Yesu wangukamba mwambula kuyeŵapu mani kuti akusambira ŵaki azamukumana ndi masuzgu. (Luka 14:27, 28) Iyu wangukayika cha kuti akusambira ŵaki azamulutirizga kuja akugomezgeka kwaku Chiuta nge mo iyu wanguchitiya. (Yoha. 16:33) Musambirengi vakukwaskana ndi umoyu waku Yesu ndipuso mujiŵikiyengi vilatu vakuti mumuyezgengi pa umoyu winu wa zuŵa ndi zuŵa.

13. Kumbi mukhumbika kumupemphanji Yehova, nanga ntchifukwa wuli?

¹³ Kuziŵa waka vinthu nkhwakukwana cha. Kweni chakukhumbika ukongwa nkhumuziŵa umampha Yehova kweniso kumuyanja ndi kumugomezga. (1 Akori. 8:1-3) Po mulutirizga kusambira vakukwaskana ndi Yehova, mumupemphengi kuti wakuwovyeni kuja ndi chivwanu chakukho. (Luka 17:5) Iyu wamuka ndi mtima wosi mapempheru nga viyo. Kumuziŵa umampha Chiuta kungakuwovyani kuti mulutirizgi kuluta panthazi mwauzimu.—Yako. 2:26.

14. Kumbi Petulo wangudidimizga wuli fundu yakuti tikhumbika kugwiriskiya ntchitu vo tisambira? (Wonani so chithuzi.)

¹⁴ Wakutumika Petulo wangudidimizga fundu yakuti akusambira aku Khristu akhumbika kugwiriskiya  ntchitu vo asambira. Iyu wanguzumbuwa nkhani ya mu Bayibolu yakukwaskana ndi Nowa. Yehova wangukambiya Nowa kuti wagwiriskiyengi ntchitu chigumula kuti wanangi ŵanthu aheni a munyengu yo. Kweni kuziŵa waka kuti kuzengi chigumula kwenga kwakukwana cha kuti Nowa ndi banja laki ataskiki. Wonani kuti Petulo wakambanga va nyengu yaku Nowa, “penipo chombu chakhomekanga” kweniso chigumula chechendachitiki. (1 Petu. 3:20) Kukamba uneneska, Nowa ndi banja laki angugwiriskiya ntchitu vo Chiuta wanguŵakambiya ndipu angupanga chombu. (Ahe. 11:7) Pavuli paki, Petulo wanguyeruzgiya vo Nowa wanguchita ndi ubatizu, ndipu wangulemba kuti: “Ubatizu uyanana ndi chombu chenichi, ndipu nawu so utikutaskani sonu.” (1 Petu. 3:21) Mwaviyo, tingayeruzgiya vo muchita pasonu panu kuti mubatiziki ndi vo Nowa wanguchita limoza ndi banja laki kwa vyaka vinandi kuti wakhomi chombu. Kumbi mukhumbika kuchitanji kuti munozgeke ubatizu?

15. Kumbi tingalongo wuli kuti talapa nadi?

¹⁵ Chinthu chakukhumbika ukongwa nkhulapa maubudi ngidu kutuliya pasi pa mtima. (Machi. 2:37, 38) Asani munthu walapa ndi mtima wosi wasintha nadi. Kumbi mukuleka kuchita vinthu viheni vo Yehova watinkha nge ureŵi, kukweŵa foja ndipuso kutuka? (1 Akori. 6:9, 10; 2 Akori. 7:1; Aefe. 4:29) Asani mwechendaleki yesesani kuti musinthi. Kambiskanani ndi munthu yo musambira nayu Bayibolu pamwenga pemphani ŵara kuti akuwovyeni kweniso kukupaskani ulongozgi. Asani ndimwi wachinyamata ndipu mweche kuja ndi apapi ŵinu apempheni kuti akuwovyeni kuti muleki nkharu ziheni zo zingakutondekesani kubatizika.

16. Kumbi titenere kuchitanji asani tikhumba kuti tisopengi Yehova nyengu zosi?

¹⁶ Chinthu chinyaki chakukhumbika so ukongwa nkhuchita vinthu va uzimu, nge kuwungana ndi kumukapu pa maunganu. (Ahe. 10:24, 25) Ndipu asani mwazomerezeka kuti mupharazgengi, muwonesesengi kuti mupharazga kaŵikaŵi. Asani mupharazgengi kaŵikaŵi mbwenu mukondwengi ukongwa ndi ntchitu yeniyi. (2 Timo. 4:5) Asani ndimwi wachinyamata ndipu mweche kuja ndi apapi ŵinu, jifumbeni kuti: ‘Kumbi apapi ŵangu achita kundikumbusa kuti ndilutengi mu upharazgi pamwenga kumaunganu? Pamwenga ndichita kukhumba  ndija kuti ndichitengi venivi?’ Asani muchita venivi mwakukhumba mwija mulongo kuti mwe ndi chivwanu, mutimuwonga ndipuso mutimuyanja ukongwa Yehova Chiuta. Kuchita venivi kulongo kuti mwe akujipereka kwaku Chiuta, ndipu zenizi ndi mphasu zo mupereka kwaku Yehova. (2 Petu. 3:11; Ahe. 13:15) Mphasu zosi zo tipereka kwaku Yehova mwambula kuchichizgika zikondwesa Chiuta widu (Yeruzgiyani ndi 2 Akorinto 9:7.) Tichita venivi chifukwa chakuti tikondwa kumupaska vinthu vamampha ukongwa Yehova.

17-18. Kumbi ndi jalidu lakukhumbika ukongwa nili lo lingakuwovyani kuti mubatiziki, nanga ntchifukwa wuli? (Nthanthi 3:3-6)

¹⁷ Po mutesesa kuti mubatiziki mukumanengi ndi masuzgu. Ŵanthu anyaki angakunyozgani chifukwa cha vo mwayamba kugomezga ndipu nyengu zinyaki angakususkani pamwenga kukutombozgani. (2 Timo. 3:12) Panyaki mutesesa kuti muleki jalidu liheni kweni nyengu zinyaki mutiliwereza mbwenu jalidu lo. Panyaki mungataya mtima ndipuso kuguŵa chifukwa chakuti mufiska cha chilatu chinu. Kumbi ntchinthu wuli cho chingakuwovyani kuti mukunthiyepu? Kwanja ukongwa Yehova ndiku kungakuwovyani.

¹⁸ Kwanja Yehova ndichu chinthu chakukhumbika ukongwa kwaku yimwi. (Ŵerengani Nthanthi 3:3-6.) Asani mutanja ukongwa Yehova mbwenu mufiskengi kukunthiyapu mayeseru. Kanandi Bayibolu likamba kuti Yehova watiŵalongo chanju chambula kumala ateŵeti ŵaki. Ivi ving’anamuwa kuti waŵajowongi cha ateŵeti ŵaki pamwenga kuleka kuŵayanja. (Salimo 100:5) Yimwi mukupangika muchikozgu chaku Chiuta. (Gene. 1:26) Kumbi mungalongo wuli kuti mwe ndi chanju chambula kumala?

19. Kumbi mungalongo wuli kuti mutimuwonga ukongwa Yehova pa vinthu vosi vo watikuchitiyani? (Agalatiya 2:20)

¹⁹ Mungayamba kulongo chanju chambula kumala mwakuwonga. (1 Ate. 5:18) Zuŵa lelosi, mujifumbengi kuti ‘Kumbi Yehova walongo wuli kuti watindiyanja?’ Pavuli paki wonesesani kuti mutimuwonga Yehova mupempheru mwakuzumbuwa vinthu chayivu vo wakuchitiyani. Nge mo wakutumika Paulo wanguchitiya, namwi muziŵengi vinthu vamampha vo Yehova wakuchitiyani chifukwa chakuti watikuyanjani. (Ŵerengani Agalatiya 2:20.) Jifumbeni kuti: ‘Kumbi nani ndikhumba kulongo kuti nditimuyanja?’ Kwanja Yehova kungakuwovyani kuti mukhwechi mayeseru kweniso kuti mufiski kukunthiyapu  masuzgu ngo mukumana nangu. Venivi vikuwovyeningi kulutirizga kumusopa Yehova kulongo kuti mutiŵayanja Awusemwi zuŵa lelosi.

20. Kumbi mutenere kuchitanji kuti mujipereki kwaku Yehova, nanga venivi vakukhumbika wuli?

²⁰ Pavuli paki, chanju chinu kwaku Yehova chingakuchiskani kuti mupereki pempheru lapade. Mujiperekengi kwaku Chiuta. Kumbukani kuti asani mwajipereka kwaku Yehova muŵengi ndi chilindizga chamampha ukongwa. Muŵengi mteŵeti waki kwamuyaya. Asani mwajipereka kwaku Yehova mulayizga kuti mumuteŵetiyengi mu nyengu yamampha kweniso yamasuzgu. Layizgu lenili lichitika kamoza pe. Kukamba uneneska asani tajipereka kwaku Yehova ndikuti tachita chinthu chikulu ukongwa. Kweni ŵanaŵaniyani fundu iyi: Mungasankha vakuchita vinandi pa umoyu winu, ndipu vinyaki vingaŵa vamampha kweni palivi chinthu chamampha ukongwa kuphara kujipereka kwaku Yehova. (Salimo 50:14) Satana wachitiskengi kuti muleki kwanja Awusemwi, wachiŵanaŵana kuti mulekengi kuja wakugomezgeka kwaku yiwu. Mungazomerezanga cha kuti Satana wakuthereskeni! (Yobu 27:5) Asani mutanja Yehova muchitengi vinthu mwakukoliyana ndi kujipereka kwinu ndipuso mulutirizgengi kuja paubwezi wakukho ndi Awusemwi a kuchanya.

21. Ntchifukwa wuli tingakamba kuti ubatizu mbumaliru wa vosi cha kweni nkhwambapu ŵaka kuteŵete Yehova?

²¹ Asani mwajipereka kwaku Yehova, kambiskanani ndi ŵara a mumpingu winu vakukwaskana ndi kubatizika. Nyengu zosi, mukumbukengi kuti ubatizu ndi umaliru wa vosi cha, kweni nkhwambapu ŵaka kutewete Yehova. Mwaviyo, mukhumbika kulutirizga kumuyanja ukongwa Yehova. Mujiŵikiyengi so vilatu vo vingawovya kuti chanju chinu chilutirizgi kukuwa zuŵa lelosi. Venivi vazamuchitiska kuti mubatiziki ndipu lenili lazamukuŵa zuŵa lakukondwesa ukongwa. Kweni uku nkhwambapu ŵaka. Lutirizgani kumuyanja ukongwa Yehova kweniso Mwana waki mpaka muyaya!