NKHANI YAKUSAMBIRA YA NAMBALA 10
Ntchifukwa Wuli Mukhumbika Kubatizika?
“Weyosi waku yimwi wabatiziki”—MACHI. 2:38.
SUMU 34 Lutirizani Kuja Akugomezgeka
VO TISAMBIRENGI MU NKHANI IYI a
1-2. Kumbi ntchinthu wuli chichitika asani ŵanthu abatizika, nanga tikambiskanengenji mu nkhani iyi?
KUMBI mukuwonapu gulu la ŵanthu wo akhumba kuchibatizika? Mutenere kuti munguŵavwa achimuka mwanthazi mafumbu ngaŵi ŵechendaluti kuchibatizika. Munguwona ŵanthu a mubanja lawu kweniso mabwezi ngawu achikondwa. Ŵanthu wo abatizikanga achizuwuka mumaji, ŵanthu anguŵambiya manja ndipu yiwu ŵenga ndi likondwa likulu. Sabata yeyosi ŵanthu masawuzandi nganandi atijipereka kwaku Yehova Chiuta ndipuso kubatizika.
2 Nanga yimwi muwona wuli? Asani mukhumba kubatizika, mbwenu mwasankha chinthu chakuzirwa ukongwa mucharu chiheni ichi chifukwa ‘mupenja Yehova.’ (Salimo 14:1, 2). Nkhani iyi yalembeke yimwi, vilivi kanthu kuti ndimwi mwana pamwenga mura. Kweni kwaku isi tikubatizika kali tikhumbika kusimikiza mtima kuti tilutirizgengi kuteŵete Yehova mpaka muyaya. Sonu tiyeni tikambiskani vifukwa vikuluvikulu vitatu vo vititichitiska kuti titeŵetiyengi Yehova.
KWANJA UNENESKA NDIPUSO URUNJI
Satana waja wachinanga zina laku Yehova kwa vyaka masauzandi nganandi ndipu walutirizga kuchita venivi mpaka sonu (Wonani ndimi 3-4))
3. Ntchifukwa wuli ateŵeti aku Yehova atanja uneneska ndipuso urunji? (Salimo 119:128, 163)
3 Yehova wangukambiya ŵanthu ŵaki kuti ‘muyanjengi uneneska.’ (Zeka. 8:19) Yesu wanguchiska akusambira ŵaki kuti apenjengi urunji. (Mate. 5:6) Ivi ving’anamuwa kuti Chiuta wakhumba kuti tichitengi vinthu vamampha kweniso vakwenere. Kumbi yimwi mutanja uneneska kweniso urunji? Tikayika cha kuti ndivu muchita. Mutinkha maboza kweniso vinthu vosi viheni. (Ŵerengani Salimo 119:128, 163.) Munthu yo wakamba maboza wayezga Satana yo walamuliya charu ichi. (Yoha. 8:44; 12:31) Satana wakhumbisiska kunanga zina lakupaturika laku Yehova Chiuta. Satana waja wachiwandisa maboza ngakukwaskana ndi Chiuta widu kutuliya po wakugarukiya mumunda wa Edeni. Iyu wakamba kuti Yehova ngwambunu, walamuliya umampha cha ndipuso watiŵanora vinthu vamampha ŵanthu ŵaki. (Gene. 3:1, 4, 5) Vinthu vaboza vo Satana wakamba vakukwaskana ndi Yehova vichitiska kuti ŵanthu awonengi kuti Chiuta ndi muheni. Asani ŵanthu asankha kuleka “kwanja uneneska,” Satana wangaŵachitiska kuti achitengi vinthu vosi viheni.—Aro. 1:25-31.
4. Kumbi Yehova walongo wuli kuti ndi “Chiuta wauneneska”? (Wonani so chithuzi.)
4 Yehova ndi “Chiuta wauneneska” ndipu wasambiza uneneska ŵanthu wo atimwanja. (Salimo 31:5) Kuchita venivi kutovya kuti ŵanthu wo, aleki kupusisika ndi maboza ngaku Satana. Yehova wasambiza so ateŵeti ŵaki kuti achitengi vinthu mwauneneska ndipuso mwaurunji. Venivi vitovya kuti ŵanthu aŵapaskengi ulemu kweniso ajengi ndi chimangu cha mu mtima. (Ntha. 13:5, 6) Kumbi namwi wangukuchitiyanipu venivi pa nyengu yo mwasambiranga Bayibolu? Mungusambira kuti nthowa zaku Yehova zamampha ukongwa ku ŵanthu wosi kweniso kwaku yimwi. (Salimo 77:13). Sonu mukhumba kuchita vo Chiuta wawona kuti vakwenere. (Mate. 6:33) Mukhumba kuvikiliya uneneska kuti mususki maboza ngo Satana wakamba ngakukwaskana ndi Yehova Chiuta widu. Kumbi mungachita wuli venivi?
5. Kumbi mungawuvikiliya wuli uneneska kweniso urunji?
5 Mungasankha kuja umoyu wo ungalongo pakweru kuti mukana maboza ngosi ngaku Satana ndipu mukolesa uneneska. Mungalongo kuti mwe kuchigaŵa chaku Yehova nge Wakulamuliya winu ndipu mukhumba kuti muchitengi vo iyu wakamba kuti vakwenere. Kumbi mungachita wuli venivi? Mungachita venivi mwakujipereka kwaku Yehova mu pempheru kweniso kubatizika. Kwanja uneneska kweniso urunji vingachitiska kuti mubatiziki.
KWANJA YESU KHRISTU
6. Mwakukoliyana ndi lemba la Salimo 45:4, ntchifukwa wuli mutanja Yesu Khristu?
6 Ntchifukwa wuli mutanja Yesu Khristu? Vinyaki mwa vifukwa vo titimuyanjiya visanirika pa lemba la Salimo 45:4 (Ŵerengani.) Yesu watanja uneneska, urunji ndipuso ngwakujiyuyuwa. Asani mutanja uneneska ndipuso urunji ndikuti Yesu Khristu nayu mumuyanjengi. Ŵanaŵaniyani mo Yesu wanguvikiriya uneneska ndipuso urunji. (Yoha. 18:37) Kumbi Yesu walongo wuli kuti ngwakujiyuyuwa?
7. Kumbi chitikukondwesani ntchinthu wuli asani muŵanaŵaniya jalidu laku Yesu lakujiyuyuwa?
7 Yesu wangulongo kuti ngwakujiyuyuwa kuziya mu vo wachitanga. Mwakuyeruzgiyapu, iyu wangupereka unkhankhu wosi kwa Awisi. (Mariko 10:17, 18; Yoha. 5:19) Kumbi mutuvwa wuli asani muŵanaŵaniya kujiyuyuwa kwaku Yesu? Kumbi venivi vitikuchitiskani kuti muyanjengi Mwana waku Chiuta kweniso kuja wakusambira waki? Vingaŵa nadi viyo. Ntchifukwa wuli Yesu ngwakujiyuyuwa? Chifukwa chakuti watanja kweniso kuyezga Awisi wo mbakujiyuyuwa. (Salimo 18:35; Ahe. 1:3) Mwaviyo, nasi tikhumbika kumuyezga Yesu yo wayezga mijalidu yaku Yehova mwakufikapu.
8. Kumbi ntchifukwa wuli titanja Yesu yo ndi Fumu yidu?
8 Titimuyanja Yesu chifukwa chakuti iyu ndi Fumu yidu yamampha ukongwa. Iyu wakusambizika ndipuso kusankhika ndi Yehova kuti waje Fumu. (Yesa. 50:4, 5) Kweniso Yesu wakulongo kuti watitiyanja ukongwa. (Yoha. 13:1) Mukhumbika kumuyanja ukongwa Yesu chifukwa chakuti ndi Fumu yinu. Iyu wangukamba kuti wo atimuyanja nadi watiŵadana kuti mabwezi ngaki ndipu alongo chanju chenichi mwakuvwiya marangu ngaki. (Yoha. 14:15; 15:14, 15) Ndi mwaŵi ukulu ukongwa kuja paubwezi ndi Mwana waku Yehova!
9. Kumbi ubatizu wa Akhristu uyanana wuli ndi ubatizu waku Khristu?
9 Yesu wangukambiya akusambira ŵaki kuti akhumbika kubatizika. (Mate. 28:19, 20) Iyu wangulongo chakuwoniyapu pa nkhani yeniyi. Ubatizu waku Yesu upambana ndi ubatizu wa akusambira ŵaki mu nthowa zinyaki. (Wonani bokosi lakuti “ Kumbi Ubatizu Waku Yesu ndi wa Akusambira Ŵaki Upambana Wuli?”) Kweni ubatizu waku Yesu ndi wa akusambira ŵaki, uyanana mu nthowa zinyaki. Pa nyengu yo Yesu wabatizikanga, wangulongo kuti wakhumba kuchita khumbu la Awisi. (Ahe. 10:7) Mwakuyanana waka, akusambira aku Khristu asani abatizika alongo pakweru kuti ajipereka kwaku Yehova Chiuta. Yiwu awona kuti chinthu chakukhumbika ukongwa pa umoyu wawu, nkhuchita vo Yehova wakhumba. Mwaviyo ayezga Yesu, Msambizi wawu.
10. Kumbi ntchifukwa wuli mutanja Yesu, nanga venivi vingakuchiskani kuchitanji?
10 Mugomezga kuti Yesu ndi Mwana wapade waku Yehova ndipuso kuti wakusankhika ndi iyu kuti watilamuliyengi. Muziŵa so kuti Yesu ngwakujiyuyuwa ndipu wayezga Awisi mwakufikapu. Mukusambira kuti Yesu waryiskanga ŵanthu anja, kupembuzga ŵanthu akuguŵa kweniso kuchizga ŵanthu wo atamanga. (Mate. 14:14-21) Muwona mo walongozge mpingu waki mazuŵa nganu. (Mate. 23:10) Ndipu muziŵa kuti iyu nge Fumu ya Ufumu waku Chiuta wazakutichitiya vinthu vamampha kunthazi. Kumbi mungalongo wuli kuti mutimuyanja? Mwakulondo chakuwoniyapu chaki. (Yoha. 14:21) Chinthu chakwamba cho mungachita nkhujipereka kwaku Yehova kweniso kubatizika.
KWANJA YEHOVA CHIUTA
11. Kumbi ntchifukwa wuli mungasankha kubatizika?
11 Kumbi ntchifukwa wuli mungasankha kubatizika? Yesu wangulongo kuti dangu likulu ukongwa pa marangu ngaku Yehova ndakuti: “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi, ndi nthazi zaku zosi.” (Mariko 12:30) Kumbi mazu ngenanga ngalongo kuti mutanja Chiuta?
Yehova ndiyu wapereka vinthu vamampha vosi vo mwenavu ndipu mulutirizgengi kuŵa navu mpaka muyaya (Wonani ndimi 12-13)
12. Kumbi ntchifukwa wuli mutanja Yehova? (Wonani so chithuzi.)
12 Pe vifukwa vinandi vo titanjiya Yehova. Mwakuyeruzgiyapu muziŵa kuti Iyu ‘ntchisimi cha umoyu’ kweniso kuti “mphasu yeyosi yamampha ndipuso yakufikapu” yituliya kwaku Iyu. (Salimo 36:9; Yako. 1:17) Chiuta widu wa chanju ndiyu watitipaska vinthu vosi vamampha vo tikondwa navu.
13. Ntchifukwa wuli sembi yaku Yesu ndi mphasu yapade ukongwa?
13 Sembi yaku Yesu ndi mphasu yapade ukongwa yo Yehova wakutipaska. Ntchifukwa wuli tikamba viyo? Ŵanaŵaniyani ubwezi wo ulipu pakati paku Yehova ndi Mwana waki. Yesu wangukamba kuti: “Ada atindiyanja” ndipu nani “nditanja Ada.” (Yoha. 10:17; 14:31) Ubwezi wawu ungukho ukongwa kutuliya pa nyengu yo angujaliya limoza kwa vyaka mabiliyoni nganandi. (Ntha. 8:22, 23, 30) Ŵanaŵaniyani mo Yehova wanguvwiya wati wapereka Mwana waki kuti wasuzgiki mpaka kufwa. Yehova watanja ukongwa ŵanthu kusazgapu yimwi, mwakuti wakupereka Mwana waki wakwanjiwa nge sembi kuti yimwi ndipuso ŵanthu anyaki muzije ndi umoyu wamuyaya. (Yoha. 3:16; Aga. 2:20) Chenichi ntchifukwa chikulu ukongwa cho tingayanjiya Chiuta.
14. Kumbi ntchinthu chamampha ukongwa nichi cho mungachita paumoyu winu?
14 Mutimuyanja ukongwa Yehova chifukwa chakuti mwasambira vinandi vakukwaskana ndi iyu. Mwaviyo, mukhumbisiska kuja paubwezi ndi iyu sonu ndipuso muyaya. Ndipu mungafiska kuchita venivi. Iyu watikuchiskani kuti mukondwesengi mtima waki. (Ntha. 23:15, 16) Mungachita venivi kuziya mu vo mulongoro kweniso vo muchita. Vo muchita pa umoyu wa zuŵa ndi zuŵa vingalongo kuti mutimuyanja nadi Yehova. (1 Yoha. 5:3) Chenichi ntchinthu chamampha ukongwa cho mungachita paumoyu winu.
15. Kumbi mungalongo wuli kuti mutimuyanja Yehova?
15 Kumbi mungalongo wuli kuti mutimuyanja Yehova? Chakwamba mukhumbika kujipereka kwaku Chiuta wauneneska kuziya mupempheru. (Salimo 40:8) Pavuli paki mulongo pakweru kuti mukujipereka kwaku Chiuta mwakubatizika. Nge mo takambiyapu kali mu nkhani iyi, ubatizu ntchinthu chakukondwesa kweniso chakukhumbika ukongwa paumoyu winu. Mutamba kuja umoyu wasonu, kung’anamuwa kuchita khumbu laku Yehova. (Aro. 14:8; 1 Petu. 4:1, 2) Chenichi chingawoneka kuti ntchinthu chikulu ukongwa cho mwasankha kuchita paumoyu winu, ndipu ndimu viliri nadi. Kweni venivi vingakuwovyani kuti muyambi kuja umoyu wamampha ukongwa. Munthowa wuli?
16. Kumbi lemba la Salimo 41:12, lilongo kuti Yehova wazakuŵachitiyanji ŵanthu wo asankha kumuteŵete?
16 Yehova ngwakupaska ukongwa kuphara munthu weyosi. Kwali mungamupaska vinthu wuli, kweni iyu watikupaskani vinthu vinandi ukongwa. (Mariko 10:29, 30) Iyu watikupaskani umoyu wamampha ukongwa kweniso wakukhorwesa, chinanga mphanyengu yinu po muja mucharu chiheni. Ndipu uku nkhwamba ŵaka. Ulendu wo mutamba kutuliya pa ubatizu winu utenere cha kumala. Mungalutirizga kuteŵete Awusemwi achanju mpaka muyaya. Mulutirizgengi so kwanjana ndi Awusemwi akuchanya. Ndipu venivi vazakukuwovyani kuti muzije ndi umoyu wamuyaya.—Ŵerengani Salimo 41:12.
17. Kumbi ntchinthu wuli cho mungamupaska Yehova?
17 Asani mwajipereka kwaku Chiuta kweniso kubatizika, mutuŵa ndi mwaŵi wakuŵapaska vinthu vamampha ukongwa Awusemwi akuchanya. Yiwu akupaskani vinthu vosi wamampha kweniso umoyu wakukondwesa chifukwa chakuti mukusankha kuŵateŵete. Mwaviyo mungalongo kuti mutiŵawonga Awusemwi wo akulenga kuchanya kweniso charu chapasi mwakuŵapaska vinthu vo yiwu alivi, kung’anamuwa kuŵateŵete ndi mtima wosi. (Yobu 1:8; 41:11; Ntha. 27:11) Chenichi ntchinthu chamampha ukongwa cho mungasankha kuchita paumoyu winu. Tikayika cha kuti kwanja Yehova ndiku kungakuwovyani kuti mubatiziki.
KUMBI MWANOZGEKA KUBATIZIKA?
18. Kumbi mungajifumba mafumbu nanga?
18 Sonu kumbi mungamuka wuli fumbu lakuti, ‘Kumbi mubatizikengi?’ Mungamuka mwija fumbu lenili. Kweni venivi vingakuwovyani kujifumba kuti, ‘Kumbi ndilindizganji kuti ndibatiziki?’ (Machi. 8:36) Kumbukani vifukwa vikuluvikulu vitatu vo takambiskana vo vititichitiska kuti titeŵetiyengi Yehova. Chakwamba ntchifukwa chakuti mutanja uneneska kweniso urunji. Jifumbeni kuti, ‘Kumbi ndikhumba kuti zuŵa linyaki ndiziwoni kuti munthu weyosi walongoro uneneska kweniso wachita vinthu vakwenere?’ Chachiŵi ntchifukwa chakuti mutanja Yesu Khristu. Jifumbeni kuti, ‘Kumbi ndikhumba kuti Mwana waku Chiuta waje Fumu yangu ndipuso kumuyezga?’ Ndipu chifukwa chachitatu cho ntchikulu ukongwa ntchakuti mutanja Yehova. Jifumbeni kuti, ‘Kumbi ndikhumba kukondwesa mtima waku Yehova mwa kumuteŵete nge Chiuta wangu?’ Asani mumuka mafumbu ngenanga kuti hinya, sonu ntchifukwa wuli muleka kubatizika? Kumbi ntchinthu wuli cho chitikutondekesani kuti mubatiziki pasonu panu?—Machi. 16:33.
19. Kumbi ntchifukwa wuli mutenere cha kuchita vidazi kuti mubatiziki? Kambani chakuyeruzgiyapu. (Yohane 4:34)
19 Asani muchita vidazi kuti mubatiziki ŵanaŵaniyani chakuyeruzgiyapu cho Yesu wangukamba. (Ŵerengani Yohane 4:34.) Wonani kuti Yesu wanguyeruzgiya kuchita khumbu la Awisi ndi kurya chakurya. Chifukwa wuli? Chakurya ntchamampha kwaku isi. Yesu wanguziŵa kuti chechosi cho Yehova watipempha kuti tichiti ntchamampha kwaku isi. Yehova wakhumba cha kuti tichiti chinthu chechosi cho chingatipweteka. Kumbi Yehova wakhumba kuti mubatiziki? Hinya. (Machi. 2:38) Mwaviyo, mungasimikiza kuti kuvwiya dangu lakuti mubatiziki kungakuwovyani. Nge mo munthu wangakhumbiskisiya kurya chakurya chamampha ukongwa, namwi mukhumbisisengi kubatizika.
20. Kumbi tazamukambiskananji mu nkhani yakulondopu?
20 Ntchifukwa wuli ŵanthu anyaki aswera kubatizika? Ŵanthu anandi amuka kuti “Ndechendanozgeki kubatizika.” Fundu njakuti kujipereka kwaku Yehova kweniso kubatizika ntchinthu chakukhumbika ukongwa cho mungasankha pa umoyu winu. Mwaviyo, mukhumbika kuŵanaŵaniyapu dankha mwechendasankhi ndipu pangakhumbika nyengu kweniso phamphu kuti muje akwenere kubatizika. Kweni asani mukhumbisiska kubatizika, kumbi mukhumbika kuchitanji pasonu panu? Tazamukambiskana kwamuka kwa fumbu lenili mu nkhani yakulondopu.
SUMU 28 Tije pa Ubwezi ndi Yehova
a Chinthu chakukhumbika ukongwa ku munthu weyosi yo wasambira Bayibolu mbubatizu. Kumbi ntchinthu wuli cho chingamuchitiska kuti wabatiziki? Ntchanju. Kweni kwanja vinthu wuli ndipuso yani? Mu nkhani iyi tikambiskanengi kwamuka kwa mafumbu ngenanga ndipuso tikambiskanengi vo Mkhristu weyosi wakubatizika wakhumbika kuchita.
