1. Kumbi ŵanthu awonanji asani awungana nasi kakwamba? (Wonani so chithuzi.)

 YERUZGIYANI kuti banja linyaki laza ku Nyumba ya Ufumu ya Akaboni aku Yehova kuziwungana nasi kakwamba. Banja lo likondwa chifukwa chakuti abali ndi azichi alilondere mwamasangu ndipuso liwona kuti Akaboni aku Yehova atanjana. Yiwu achiweku kumaunganu, munthukazi wakambiya mulumu waki kuti: ‘Akaboni aku Yehova apambana ukongwa ndi ŵanthu anyaki wosi, ndakondwa limu kuwungana nawu.’

2. Ntchifukwa wuli ŵanthu anyaki aguŵa?

² Chanju cho ŵanthu aku Yehova ŵenachu ntchapade ukongwa. Chinanga vingaŵa viyo, Akaboni aku Yehova nawu mbanthu ambula kufikapu. (1 Yoha. 1:8) Chifukwa chakuti titiŵaziŵa umampha abali ndi azichi ŵidu ntchipusu kuziŵa vo anangisa. (Aro. 3:23) Vachitima kuwona kuti abali ndi azichi anyaki aguŵa mpaka kuleka kuteŵete Yehova chifukwa cha vo abali anangisa.

3. Kumbi ntchinthu wuli cho chingawovya ŵanthu kuziŵa Akhristu auneneska? (Yohane 13:34, 35)

³ Tiyeni tiwoni so lemba lo patuliya mutu wa nkhani iyi. (Ŵerengani Yohane 13:34, 35.) Kumbi ntchinthu wuli cho chingawovya ŵanthu kuziŵa Akhristu auneneska? Yiwu aziŵika chifukwa chakuti atanjana, ndipu Bayibolu likambapu cha kuti akhumbika kuja akufikapu. Wonani so kuti Yesu wangukambapu cha kuti: ‘Pa chifukwa chenichi, mwazamuziŵa kuti ndimwi akusambira ŵangu.’ Kweni wangukamba kuti: “Pa chifukwa chenichi, ŵanthu wosi azamuziŵa kuti ndimwi  akusambira ŵangu.” Yapa Yesu wangulongo kuti akusambira ŵaki ndipuso ŵanthu wo Mbakhristu cha, azakuŵaziŵa Akhristu auneneska asani yiwu atanjana ukongwa.

4. Kumbi ŵanthu anyaki angakhumba kuziŵanji vakukwaskana ndi Akhristu auneneska?

⁴ Ŵanthu anyaki wo mbakaboni cha angafumba kuti: ‘Kumbi tingaŵaziŵa wuli Akhristu auneneska? Kumbi Yesu wangulongo wuli kuti watiŵayanja akusambira ŵaki? Ndipu kumbi tingamuyezga wuli Yesu mazuŵa nganu?’ Chinanga mbakaboni nawu angachita umampha kuŵanaŵaniyapu mafumbu ngenanga. Kuchita viyo kungatiwovya kuti tiyanjanengi ukongwa asani anyidu atinangiya.​—Aefe. 5:2.

5. Konkhoskani mazu ngaku Yesu nga pa Yohane 15:12, 13.

⁵ Yesu wangukamba kuti akusambira ŵaki azamuyanjananga mwapade. (Ŵerengani Yohane 15:12, 13.) Wonani kuti iyu wanguŵalamula kuti: “Muyanjanengi nge mo ini ndakuyanjiyani.” Kumbi Yesu wang’anamuwanganji penapa? Yapa wang’anamuwanga kwanja ukongwa ŵanthu anyaki kuphara wamweni pamwenga chanju cho chingachitiska Mkhristu kufwiya Mkhristu munyaki asani mphakwenere kuchita viyo. b

6. Kumbi Mazu ngaku Chiuta ngakamba kuti chanju ntchakukhumbika wuli?

⁶ Mazu ngaku Chiuta ngatitisambiza kuti chanju ntchakukhumbika ukongwa. Mwakuyeruzgiyapu ŵanthu anandi atanja mavesi nga mu Bayibolu yanga: “Chiuta ntchanju.” (1 Yoha. 4:8) “Uyanjengi munyaku nge mo utijiyanjiya wamweni.” (Mate. 22:39) “Chanju chiwundiya maubudi nganandi.” (1 Petu. 4:8) “Chanju chimala cha.” (1 Akori. 13:8) Mavesi yanga kweniso nganyaki ngalongore limu kuti tikhumbika kuja ndi jalidu lamampha ukongwa lenili.

7. Ntchifukwa wuli Satana wangafiska cha kuwovya ŵanthu kuti ayanjanengi ndipuso kukoliyana?

 ⁷ Ŵanthu anandi afumba kuti: ‘Kumbi ndingachiziŵa wuli chisopa chauneneska? Visopa vosi vikamba kuti visambiza uneneska, kweni chisopa chechosi chisambiza vakupambana pa nkhani yakukwaskana ndi Chiuta.’ Satana wachitiska kuti paŵi visopa vinandi vaboza ndipu venivi vitimbanyizga ŵanthu kuti aleki kuziŵa chisopa chauneneska. Kweni wangawovya cha ŵanthu kuti ayanjanengi pacharu chosi chapasi. Ndi Yehova pe yo wangachita venivi. Mphakuvwika nadi kuti veviyo, chifukwa chanju chayichu chituliya kwaku Yehova. Ndipu ŵanthu wo alongozgeka ndi mzimu waku Yehova kweniso wo watiŵatumbika ndiwu alongorana chanju chenichi. (1 Yoha. 4:7) Ndichu chifukwa chaki Yesu wangukamba kuti akusambira ŵaki pe ndiwu azamulongorananga chanju chayichu.

8-9. Kumbi ŵanthu anandi akwaskika wuli ndi chanju cho Akaboni aku Yehova alongorana?

⁸ Mwakukoliyana ndi vo Yesu wangukambiya limu, ŵanthu anandi aziŵa Akhristu auneneska chifukwa chakuti atanjana ukongwa. Mwakuyeruzgiyapu, mubali Ian wakumbuka unganu wachigaŵa wakwamba wo wangulutaku, wo unguchitikiya musitediyamu ya kufupi ndi kunyumba kwaki. Nyengu yinyaki unganu uwu wechendachitiki, Ian wanguzilutaku ku sitediyamu yeniyi kuchiwonere bola. Iyu wangukamba kuti: “Ŵanthu wo ŵenga pa unganu wachigaŵa achitanga vinthu mwakupambana ukongwa ndi ŵanthu wo awoneriyanga bola. Akaboni achitanga vinthu mwaulemu, anguvwala umampha kweniso ŵana ŵawu ŵenga ndi nkharu yamampha.” Wangukamba so kuti: “Ŵanthu ŵenaŵa awonekanga kuti akhorwa ndi vinthu vo ŵenavu ndipuso achitanga vinthu mwachimangu. Wenuwu ndiwu umoyu ndakhumbanga.” Chinanga kuti ndikumbukapu nkhani yeyosi cha yo yingukambika pa unganu wenuwu kweni ndiluwa cha nkharu yo Akaboni angulongo.” c Venivi vichitika vija cha, veviyo chifukwa chakuti titanjana ukongwa. Chifukwa chakuti titiŵayanja abali ndi azichi ŵidu, tichita nawu vinthu mwalisungu ndipuso mwaulemu.

⁹ Mubali munyaki zina laki John nayu so wangukwaskika wati wawungana ndi Akaboni aku Yehova. Iyu wangukamba kuti: “Ndingukhorwa kuwona kuti weyosi watanjana ndi munyaki. Ŵanthu ŵaki ŵenga amampha ukongwa ndipu ndinguŵanaŵana kuti wosi mbakufikapu. Chanju chawu chingundiwovya kuziŵa kuti ndasaniya chisopa chauneneska.” d Venivi vilongo kuti Akaboni aku Yehova mbakhristu auneneska.

10. Kumbi mphanyengu niyi po tingalongore kuti titanja Akhristu anyidu? (Wonani so mazu ngamumphata.)

¹⁰ Nge mo takambiyapu kali, palivi Kaboni waku Yehova yo ngwakufikapu. e Nyengu zinyaki abali ndipuso azichi angakamba pamwenga kuchita vinthu vo vingatiguŵisa. (Yako. 3:2) Asani vaŵa viyo, tingalongo kuti titiŵayanja kuziya mu vo tilongoro pamwenga kuchita. Asani anyidu atiguŵisa, kumbi tingamuyezga wuli Yesu?​—Yoha. 13:15.

11. Kumbi ndi mijalidu yiheni niyi yo Yakobe ndi Yohane angulongo? (Wonani so chithuzi.)

¹¹ Yesu walindizganga kuti akusambira ŵaki achitengi vinthu mwakufikapu cha. Mumalu  mwaki, waŵawovyanga mwachanju kuti asinthi mijalidu yawu ndi chilatu chakuti akondwesi Yehova. Zuŵa linyaki, Yakobe ndi Yohane angukambiya anyinawu kuti akapemphi Yesu kuti waziŵapaski udindu wapachanya mu Ufumu waki. (Mate. 20:20, 21) Vo Yakobe ndi Yohane anguchita vingulongo kuti mbakujikuzga kweniso kuti akhumbanga kuti ŵanthu aŵawonengi kuti mbakukhumbika ukongwa.​—Nthanthi 16:18.

12. Kumbi Yakobe ndi Yohane ndiwu pe wo angulongo mijalidu yiheni? Konkhoskani.

¹² Ndi Yakobe kweniso Yohane pe cha wo angulongo mijalidu yiheni pa nyengu yeniyi. Wonani vo akusambira anyaki anguchita: “Akusambira anyaki 10 ŵati avwa venivi, anguŵakwiyiya wosi ŵaŵi.” (Mate. 20:24) Vo Yakobe, Yohane ndi akusambira anyaki anguchita vingupangisa kuti paŵi mphindanu. Panyaki yiwu angukamba kuti: ‘Kumbi mutijiwona kuti yimwi mwe akuzirwa ukongwa kuruska isi, lekani mwapemphanga udindu wapachanya? Ndimwi mwija cha mwagwiranga ntchitu mwaphamphu limoza ndi Yesu. Tosi te akwenere kulonde udindu wapachanya!’ Mwemosi mo venge, yiwu akhumbikanga kulongorana chanju kweniso kuchitiyana vinthu mwalisungu.

13. Kumbi Yesu wachitanga nawu wuli akusambira ŵaki asani anangisa? (Mateyu 20:25-28)

¹³ Kumbi Yesu wanguchitanji? Iyu wangukwiya cha. Ndipu wangukambapu cha kuti wamusaniya akusambira anyaki amampha, wo  mbakujiyuyuwa ukongwa kweniso wo atanjana. Mumalu mwaki, Yesu wangukambiskana nawu mwakuzikira chifukwa waziŵanga kuti ŵe ndi mtima wamampha. (Ŵerengani Mateyu 20:25-28.) Nyengu zosi Yesu waŵachitiyanga vinthu mwalisungu akusambira ŵaki chinanga kuti apindananga mwakuwerezawereza kuti mura ukongwa ndiyani pakati pawu.​—Mariko 9:34; Luka 22:24.

14. Kumbi akusambira aku Yesu angukuliya pakati pa ŵanthu amtundu wuli?

¹⁴ Tikayika cha kuti Yesu waziŵanga mo akusambira ŵaki angukuliya. (Yoha. 2:24, 25) Yiwu angukuliya pakati pa alongozgi avisopa wo asambizanga kuti munthu watuŵa wakukhumbika ukongwa pijapija asani we ndi udindu wapachanya. (Mate. 23:6) Alongozgi achisopa cha Chiyuda ajiwonanga so kuti mbarunji ukongwa kuphara ŵanthu anyaki. f (Luka 18:9-12) Yesu waziŵanga kuti akusambira ŵaki angatoliyaku jalidu lenili. (Nthanthi 19:11) Iyu wakhazanga cha kuti akusambira ŵaki achitengi vinthu kwambula kunangisa ndipuso wachitanga nawu vinthu mwakuzikira. Iyu waziŵanga kuti akhumbisiska kuchita vinthu vamampha. Mwaviyo wanguŵasambiza mwakuzikira kuti ajengi akujiyuyuwa kweniso ayanjengi anyawu mumalu mwa kujiwona kuti mbapachanya ukongwa kuphara anyawu.

15. Kumbi tingasambiranji pa vo Yakobe ndi Yohane anguchita?

¹⁵ Tingasambira vinandi pa vo Yakobe ndi Yohane anguchita. Yiwu angunangisa kupempha udindu wapachanya mu Ufumu waku Chiuta. Kweniso akusambira anyaki nawu angunangisa chifukwa angutimbanyizga chimangu pakati pawu. Kweni Yesu wanguchita nawu vinthu mwalisungu ndipuso mwachanju. Kumbi isi tisambiranjipu penapa? Chakukhumbika ukongwa ndi mo tichitiya vinthu asani anyidu atinangiya, mumalu mwakuŵika ŵaka mtima pa vo anyidu atinangiya. Kumbi ntchinthu wuli cho chingatiwovya? Asani Mkhristu munyidu watinangiya, tijifumbengi kuti: ‘Kumbi ntchifukwa wuli ndaguŵa ukongwa ndi vo wandichitiya? Kumbi venivi vilongo kuti nde ndi jalidu linyaki lo ndikhumbika kulileka? Kumbi mubali yo wandiguŵisa walimbana ndi masuzgu nganyaki? Chinanga kuti pangaŵa chifukwa chakuvwika chakuguŵiya, kumbi ndingalongo kuti nditimuyanja mwakumugowoke?’ Asani tichita vinthu mwachanju ndi anyidu, tilongo kuti te Akhristu auneneska.

16. Kumbi ndi vinthu wuli vinyaki vo tingasambira kwaku Yesu?

¹⁶ Chakuwoniyapu chaku Yesu chititisambiza so kuti tikhumbika kuŵavwisa Akhristu anyidu. (Nthanthi 20:5) Yesu waziŵanga vo ve mumtima mwa munthu, isi tingaziŵa cha. Kweni tikhumbika kusulaku ŵaka vo abali ndi azichi ŵidu atinangiya. (Aefe. 4:1, 2; 1 Petu. 3:8) Tingafiska kuchita venivi asani tiziŵa umampha vo akumana navu kweniso vo vaŵachitikiya pa umoyu. Tiyeni tiwoni chakuwoniyapu.

17. Kumbi wakuwonere dera wanguyanduwa wuli chifukwa chakumuziŵa umampha mubali?

¹⁷ Wakuwonere dera munyaki yo wateŵete ku East Africa, wakumbuka mo wawoniyanga mubali munyaki. Iyu waŵanaŵananga kuti mubali yo ngwambula lisungu. Kumbi wakuwonere dera wanguchita wuli? Iyu wangukamba  kuti: “Mumalu mwa kumukhwecha mubali mwenuyu ndingusankha kuti ndimuziŵi umampha.” Venivi vingumuwovya kuziŵa mo mubali mwenuyu wakukuliya ndipuso mo venivi vingusinthiya nkharu yaki. Wakuwonere dera wangukamba so kuti: “Ndati ndaziŵa mo mubali yo wayesese kusintha nkharu yaki kuti wakoliyanengi ndi ŵanthu anyaki ndipuso mo wasinthiya, ndingumutayiya kamiti. Tinguja mabwezi ngakanda yapa nani ndikandepu.” Kukamba uneneska, asani titesesa kuŵavwisa abali kweniso azichi ŵidu, vitisuzgengi cha kuŵayanja.

18. Kumbi tingajifumba mafumbu nanga asani Mkhristu munyidu watinangiya? (Nthanthi 26:20)

¹⁸ Nyengu zinyaki tingaŵa ndi mtima wakuti tikambiskani nayu Mkhristu munyidu yo watinangiya. Kweni chakwamba, tingachita umampha kujifumba mafumbu yanga: ‘Kumbi ndiziŵa nkhani yosi?’ (Nthanthi 18:13) ‘Kumbi vingaŵa kuti chenga chilatu chaki cha, kuti wandiguŵisi?’ (Waku. 7:20) ‘Kumbi ini ndikuguŵisapu cha munthu munyaki?’ (Waku. 7:21, 22) ‘Asani ndingakambiskana nayu nkhani yeniyi, vinthu vinangikiyengi limu cha?’ (Ŵerengani Nthanthi 26:20.) Asani tiŵanaŵaniya mafumbu ngenanga, tiziŵengi kuti kwanja abali kweniso azichi ŵidu kungatiwovya kuti tisulengeku ŵaka vo atinangiya.

19. Kumbi mwasimikiza mtima kuchitanji?

¹⁹ Akaboni aku Yehova alongo kuti mbakhristu auneneska chifukwa chakuti atanjana. Weyosi waku isi walongo kuti watanja ukongwa abali ndi azichi chinanga kuti mbambula kufikapu. Asani titanjana ukongwa tingawovya ŵanthu anyaki kuziŵa chisopa chauneneska ndipu angayamba kusopa Yehova, Chiuta wachanju. Tiyeni tosi tilutirizgi kulongo chanju cho chitovya ŵanthu kuziŵa Akhristu auneneska.