1. Kumbi ateŵeti anyaki akugomezgeka aku Yehova alimbana ndi maŵanaŵanu wuli?

 VAKUKONDWESA ukongwa kuziŵa kuti Yehova watanja ŵanthu ŵaki nge gulu. Bayibolu likamba kuti: “Yehova wakondwa ndi ŵanthu ŵaki.” (Salimo 149:4) Kweni nyengu zinyaki ŵanthu anyaki akayikiya asani Yehova wakondwa nawu pakuŵija. Ateŵeti akugomezgeka aku Yehova a mu nyengu yakali nawu akayikanga asani Yehova wakondwa nawu.—1 Samu. 1:​6-10; Yobu 29:​2, 4; Salimo 51:11.

2. Kumbi mbayani wo Yehova wakondwa nawu?

² Bayibolu lilongo kuti Yehova wangaŵayanja kweniso kukondwa nawu ŵanthu ambula kufikapu. Mu nthowa wuli? Kuti venivi vichitiki, titenere kugomezga Yesu Khristu kweniso kubatizika. (Yoha. 3:16) Asani tibatizika tilongo pakweru kuti tikulapa maubudi ngidu ndipuso tikumulayizga Chiuta kuti tichitengi khumbu laki. (Machi. 2:38; 3:19) Yehova wakondwa ukongwa asani tachita venivi kuti tije nayu pa ubwezi. Asani tiyesesa kuchita vosi vo tingafiska mwakukoliyana ndi vo tikumulayizga, Yehova wakondwa nasi ndipu watitiwona kuti te mabwezi ngaki.—Salimo 25:14.

3. Kumbi tikambiskanengenji mu nkhani iyi?

³ Kweni ntchifukwa wuli ŵanthu anyaki nyengu zinyaki awona kuti Chiuta wakondwa nawu cha? Kumbi Yehova walongo wuli kuti wakondwa nasi? Nanga Mkhristu wangasimikiza wuli kuti Chiuta wakondwa nayu?

 NTCHIFUKWA WULI ŴANTHU ANYAKI AWONA KUTI YEHOVA WAKONDWA NAWU CHA?

4-5. Chinanga kuti tingajivwa kuti te ambula kukhumbika, kumbi titenere kusimikizanji?

⁴ Tanandi tisuzgika ndi maŵanaŵanu ngakujiwona kuti te ambula kukhumbika kutuliya pa unamana widu. (Salimo 88:15) Mubali munyaki zina laki Adrián wangukamba kuti: “Kanandi nditijivwa kuti nde wambula kukhumbika. Ndikumbuka kuti kali nde munamana ndapempheranga kuti banja lidu lizisere mu Paradayisu, chinanga kuti ndakayikanga kuti nde wakwenere kuchijamu.” Tony yo wakulereke mu banja la Akaboni cha, wangukamba kuti: “Apapi ŵangu akundikambiyapu cha kuti atindiyanja pamwenga kuti amalika nani. Venivi vachitiskanga kuti ndijivwengi kuti pengavi chamampha cho ndichitapu.”

⁵ Asani nyengu zinyaki titijivwa kuti te ambula kukhumbika, tikumbukengi kuti Yehova mweneku ndiyu wakutiguziya kwaku iyu. (Yoha. 6:44) Iyu wawona vamampha mwaku isi, vo taŵeni tingaviwona cha ndipuso watitiziŵa umampha. (1 Samu. 16:7; 2 Mbiri 6:30) Mwaviyo, titenere kumugomezga asani wakamba kuti te akuzirwa.—1 Yoha. 3:​19, 20.

6. Kumbi wakutumika Paulo wajivwanga wuli chifukwa cha maubudi ngo wanguchita wechendaje Mkhristu?

⁶ Techendasambiri uneneska, tanyaki tachitanga vinthu vo pasonu panu teche kujimba navu mulandu. (1 Petu. 4:3) Chinanga mbakhristu akugomezgeka alimbana ndi vinthu vo anangisa. Kumbi nyengu zinyaki namwi muwona nge kuti Yehova wangakugowokiyani cha? Asani ndi viyo, ziŵani kuti ateŵeti anyaki akugomezgeka aku Yehova nawu vinguŵachitikiyapu. Mwakuyeruzgiyapu, wakutumika Paulo wasuzgikanga maŵanaŵanu asani wakumbuka vinthu vo wanangisanga. (Aro. 7:24) Mbuneneska kuti Paulo wangulapa maubudi ngaki kweniso kubatizika. Kweni wangukamba kuti ndi “mumana ukongwa pa akutumika wosi” kweniso ‘ngwakubuda ukongwa.’—1 Akori. 15:9; 1 Timo. 1:15.

7. Kumbi tikhumbika kukumbukanji pa maubudi ngo tinguchita kuvuli?

⁷ Awusefwi akuchanya alayizga kuti atigowokiyengi asani talapa. (Salimo 86:5) Asani titijivwiya lisungu nadi chifukwa cha maubudi ngidu, tingasimikiza kuti vo Yehova wakukamba vauneneska ndipu wakutigowoke nadi.—Ako. 2:13.

8-9. Kumbi tingamalana wuli ndi suzgu lakujivwa kuti tifikapu cha kuti tikondwesi Yehova?

⁸ Tosi tikhumbisiska kuchita vosi vo tingafiska kuti titeŵete Yehova. Kweni anyaki angawona nge kuti afikapu cha kuti akondwesi Yehova. Mzichi munyaki zina laki Amanda wangukamba kuti: “Kanandi ndawonanga kuti ndikhumbika kuchita vinandi pe kuti ndimupaskengi vinthu vamampha ukongwa Yehova. Mwaviyo, ndayesesanga kuchita vinandi kuphara vo ndingafiska kuchita. Asani ‘ndatondeka,’ ndawonanga nge kuti Yehova waguŵa nani nge mo ndamweni ndaguŵiya.”

⁹ Kumbi tingachita wuli kuti tileki kuja ndi maŵanaŵanu ngakuti tifikapu cha kuti tikondwesi Yehova? Kumbukani kuti Yehova ngwakukhwimisa vinthu cha. Iyu wakhumba cha kuti tichitengi vo tingatondeka kufiska. Iyu wawonga ukongwa vosi vo titimuchitiya, chikulu tiyesesa kuchita vo tingafiska. Ŵanaŵaniyani ateŵeti aku Yehova a mu nyengu yakali wo angumuteŵete ndi mtima wosi. Yumoza mwa ŵanthu ŵenaŵa ndi Paulo. Iyu wanguteŵete Yehova mwaphamphu kwa vyaka vinandi, ndipu wangwenda mitunda yitaliyitali kweniso wangujalikiska mipingu yinandi. Kweni vinthu vati vasintha pa umoyu waki iyu wapharazganga ukongwa cha nge mo wachitiyanga kali. Kumbi venivi vingung’anamuwa kuti Chiuta wanguleka kukondwa nayu? Awa. Iyu wangulutirizga kuchita vosi vo wangafiska ndipu Yehova wangumutumbika. (Machi. 28:​30, 31) Mwakuyanana ŵaka, vo tichita pakuteŵete Yehova vingasintha nyengu zinyaki. Kweni chakukhumbika ukongwa kwaku iyu ntchifukwa cho tichitiya vinthu vo. Sonu tiyeni tikambiskani mo Yehova walongore kuti wakondwa nasi.

 MO YEHOVA WALONGORE KUTI WAKONDWA NASI

10. Kumbi ndi vinthu wuli vo vingatiwovya kuziŵa kuti Yehova wakondwa nasi? (Yohane 16:27)

¹⁰ Kuziya mu Bayibolu. Yehova walongo ŵanthu ŵaki kuti watiŵayanja kweniso kuti wakondwa nawu. Malemba ngalongo maulendu ngaŵi po Yehova wangukambiya Yesu kuti ndi Mwana Waki yo watimuyanja kweniso kumukondwesa. (Mate. 3:17; 17:5) Kumbi namwi mukhumba kuti Yehova wakukambiyeni kuti wakondwa namwi? Yehova walongoro nasi masu ndi masu cha kweni walongoro nasi kuziya mu Mazu ngaki. Tingavwa Yehova wachitikambiya kuti wakondwa nasi asani tiŵerenga vo Yesu wangukamba mu Mabuku nga Uthenga Wamampha. (Ŵerengani Yohane 16:27.) Yesu wayezganga mwakufikapu mijalidu ya Awisi. Mwaviyo, kuŵerenga vo Yesu wakambiyanga akusambira ŵaki wo ŵenga ambula kufikapu kuti wakondwa nawu, kutiwovyengi kuti tiwonengi nge kuti Yehova wakambiya isi mazu ngenanga.—Yoha. 15:​9, 15.

11. Ntchifukwa wuli kukumana ndi masuzgu kulongo cha kuti Yehova waleka kukondwa nasi? (Yakobe 1:12)

¹¹ Kuziya mu vo wachita. Yehova ngwakunozgeka kutiwovya, nge kutipaska vinthu vakukhumbika pa umoyu. Nyengu zinyaki Yehova wangazomereza kuti tikumani ndi masuzgu nge mo venge ndi Yobu. (Yobu 1:​8-11) Asani tikumana ndi masuzgu vilongopu cha kuti Yehova waleka kukondwa nasi. Mumalu mwaki, vititipaska mwaŵi wakulongo kuti titimuyanja ukongwa kweniso titimuthemba. (Ŵerengani Yakobe 1:12.) Asani tikumana ndi masuzgu, tiwona mo Yehova walongore kuti watitiŵanaŵaniya kweniso kutiwovya kuti tikunthiyepu.

12. Kumbi tingasambiranji pa vo vinguchitikiya Dmitrii?

¹² Tiyeni tikambiskani vo vinguchitiskiya mubali Dmitrii wa ku Asia. Ntchitu yingumumaliya ndipu wanguja lova kwa myezi yinandi. Mwaviyo, wanguthemba Yehova ndipu wangwamba kuchita vinandi mu uteŵeti. Myezi yinandi yingujumphapu ndipu wanguyisaniya mbwenu cha ntchitu. Pavuli paki, wangwamba kutama ukongwa mwakuti wayukanga cha pabedi. Chifukwa cha venivi, iyu wangwamba kujiwona nge kuti ndi mulumu kweniso da wakutondeka. Iyu waŵanaŵananga so kuti Yehova waleka kukondwa nayu. Zuŵa linyaki ndi mazulu, mwana waki munthukazi wangumulembe papepala mazu nga pa Yesaya 30:15 ngo ngakamba kuti: “Mwazamusaniya nthazi chifukwa chakuja mwakufwasa kweniso kundithemba.” Mwana yo wanguza pafupi ndi bedi la awisi ndipu wangukamba kuti: “Ada, asani mwaguŵa, mukumbukengi mazu ngo nge pa lemba ili.” Dmitrii wanguziŵa kuti Yehova  wawovyanga banja laki kulutirizga kuŵa ndi chakurya chakukwana, vakuvwala kweniso pakuja. Iyu wangukamba kuti: “Ndakhumbikanga ŵaka kuja mwakufwasa kweniso kulutirizga kuthemba Chiuta wangu.” Asani namwi mukumana ndi masuzgu nge ngenanga, gomezgani kuti Yehova wakuphweriyeningi kweniso kukuwovyani kuti mukunthiyepu.

13. Kumbi Yehova wangagwiriskiya ntchitu ayani kuti walongo kuti wakondwa nasi?

¹³ Kuziya mwa Akhristu anyinu. Yehova wagwiriskiya ntchitu abali ndi azichi kuti walongo kuti wakondwa nasi. Mwakuyeruzgiyapu, wangaŵachiska kuti atikambiyi mazu ngakuchiska pa nyengu yakwenere. Venivi ndivu vinguchitikiya mzichi munyaki wa ku Asia pa nyengu yo wasuzgikanga ukongwa maŵanaŵanu. Iyu ntchitu yingumumaliya ndipuso wangwamba kutama ukongwa. Pavuli paki, mulumu waki wanguchita ubudi ukulu ndipu wanguleka kuteŵete nge mura. Iyu wangukamba kuti: “Ndavwisanga cha kuti ntchifukwa wuli venivi vichitika. Ndinguŵanaŵana kuti panyaki ndachita chinthu chinyaki chiheni ndipu Yehova waleka kukondwa nani.” Mzichi mwenuyu wangupempha Yehova kuti wamusimikiziyi kuti wakondwa nayu. Kumbi Yehova wanguchita wuli venivi? Iyu wangukamba kuti: “Ŵara a mpingu angundichiska ndipu angundisimikiziya kuti Yehova watindiyanja.” Pavuli paki, wangupempha so Yehova kuti wamuwovyi. Iyu wangukamba kuti: “Zuŵa lenili pe, ndingulonde kalata yakutuliya kwa abali ndi azichi a mu mpingu widu. Ndichiŵerenga mazu ngawu ngakuchiska, ndinguwona kuti Yehova wavwa pempheru langu.” Kukamba uneneska, kanandi Yehova walongo kuti wakondwa nasi kuziya mu mazu ngakuchiska ngakutuliya kwa abali ndi azichi.—Salimo 10:17.

14. Kumbi ndi nthowa yinyaki niyi yo Yehova walongore kuti wakondwa nasi?

¹⁴ Yehova walongo so kuti wakondwa nasi asani wagwiriskiya ntchitu Akhristu anyidu kuti atipaski ulongozgi. Mwakuyeruzgiyapu, mu nyengu  ya akutumika, Yehova wangugwiriskiya ntchitu wakutumika Paulo kulembe Akhristu anyaki makalata 14. Mu makalata ngenanga wakutumika Paulo wangupereka ulongozgi wambula kuyeŵapu mani kwa abali ndi azichi, ndipu wanguchita venivi mwachanju. Ntchifukwa wuli Yehova wanguchiska Paulo kuti walembi ulongozgi wenuwu? Ntchifukwa chakuti iyu ndi Da wamampha ndipu walanga ŵana ŵaki ‘wo atimukondwesa.’ (Nthanthi 3:​11, 12) Mwaviyo, asani tipaskika ulongozgi wa mu Bayibolu, mumalu mwakuŵanaŵana kuti Chiuta waleka kutiyanja, mbukaboni wakulongo kuti iyu wakondwa nasi. (Ahe. 12:6) Kumbi ndi vinthu wuli vinyaki vo vilongo kuti Yehova wakondwa nasi?

UKABONI UNYAKI WO ULONGO KUTI YEHOVA WAKONDWA NASI

15. Kumbi Yehova wapereka mzimu waki wakupaturika kwaku yani, nanga ntchifukwa wuli tichiskika ndi venivi?

¹⁵ Yehova wapereka mzimu waki wakupaturika ku ŵanthu wo wakondwa nawu.. (Mate. 12:18) Mwaviyo, tingajifumba kuti, ‘Kumbi ndaja ndichilongo mijalidu yinyaki yo mzimu wakupaturika waku Chiuta utuzga pa umoyu wangu?’ Kumbi muwona kuti mazuŵa nganu muchita vinthu mwakuzikira ukongwa kuphara mo mwachitiyanga kali mwechendasambiri uneneska? Asani mulongo ukongwa mijalidu yo mzimu wakupaturika utuzga, mbwenu ndikuti Yehova wakondwa namwi!—Wonani bokosi lakuti “ Mijalidu Yo Mzimu Utuzga . . . ”

16. Kumbi Yehova wagwiriskiya ntchitu ayani kuti apharazgi uthenga wamampha, nanga yimwi mutuvwa wuli chifukwa cha venivi? (1 Atesalonika 2:4)

¹⁶ Yehova wapereka ntchitu yakupharazga uthenga wamampha ku ŵanthu wo wakondwa nawu. (Ŵerengani 1 Atesalonika 2:4.) Wonani mo mzichi Jocelyn wanguyanduliya chifukwa chakupharazgiya ŵanthu uthenga wamampha. Zuŵa linyaki, Jocelyn wanguyuka umampha cha chifukwa chakuti wanguguŵa. Iyu wangukamba kuti: “Ndajivwanga kuti ndilivi nthazi kweniso ndajiwonanga kuti nde wambula kukhumbika. Kweni ndenga mpayiniya ndipu zuŵa lenili lenga lakuti ndisere mu uteŵeti. Mwaviyo ndingupemphera ndipu ndinguluta kuchipharazga.” Mlenji wenuwu Jocelyn wangukumana ndi munthukazi munyaki zina laki Mary, yo wenga wamampha ukongwa ndipu wanguzomera kusambira Bayibolu. Pati pajumpha myezi, Mary wangukamba kuti wapempheranga kwaku Chiuta kuti wamuwovyi pa nyengu yo Jocelyn wangugogode pa chisasa chaki. Kumbi Jocelyn wangusambiranjipu? Iyu wangukamba kuti: “Venga nge kuti Yehova watindikambiya kuti, ‘Ndikondwa  nawi.’” Mbuneneska kuti ndi weyosi cha yo wangavwisiya asani tipharazga. Kweni tingasimikiza kuti Yehova wakondwa nasi asani titesesa kupharazgiya ŵanthu uthenga wamampha.

17. Kumbi mwasambiranji pa vo Vicky wangukamba vakukwaskana ndi sembi yaku Yesu? (Salimo 5:12)

¹⁷ Yehova wagwiriskiya ntchitu sembi yaku Yesu kuti ŵanthu wosi wo wakondwa nawu ayanduwengi. (1 Timo. 2:​5, 6) Kweni kumbi tingachita wuli asani tikayikiya kuti Yehova wakondwa nasi chinanga kuti tigomezga sembi yaku Yesu ndipuso tikubatizika? Ziŵani kuti tikhumbika cha kuthemba ukongwa mtima widu kweni tithembengi Yehova. Iyu wawona kuti ŵanthu wo agomezga sembi yaku Yesu mbarunji ndipu walayizga kuti waŵatumbikengi. (Ŵerengani Salimo 5:12; Aro. 3:26) Kuŵanaŵaniya sembi yeniyi kungumuwovya mzichi Vicky. Zuŵa linyaki wati waŵanaŵaniya ukongwa va sembi, iyu wangukamba kuti: “Yehova wazikira nani kwa nyengu yitali. . . . Kweni venga nge kuti nditimukambiya kuti: ‘Mungayanja munthu wa nge ini cha. Sembi ya Mwana winu njakukwana cha kuti maubudi ngangu ngagowokereki.’” Chifukwa chakuti wanguŵanaŵaniya mphasu ya sembi yeniyi, wangwamba kujivwa kuti Yehova watimuyanja. Isi nasi tingajivwa kuti Yehova watitiyanja kweniso wakondwa nasi asani tiŵanaŵaniya kuzirwa kwa sembi yaku Yesu.

18. Kumbi tingasimikizanji asani tilutirizga kwanja Awusefwi akuchanya?

¹⁸ Chinanga kuti tingayesesa kugwiriskiya ntchitu vo takambiskana mu nkhani iyi, kweni nyengu zinyaki tingaguŵa kweniso kukayikiya mbwenu kuti Yehova wakondwa nasi. Asani venivi vatichitikiya, tikumbukengi kuti Yehova wakondwa ndi “ŵanthu wo alutirizga kumwanja.” (Yako. 1:12) Mwaviyo, lutirizgani kuja pa ubwezi ndi Yehova kweniso kuwona mo iyu walongore kuti wakondwa namwi. Nyengu zosi mukumbukengi kuti Yehova “we kutali cha ndi weyosi waku isi.”—Machi. 17:27.