1-2. Kumbi munthu wakhumbika kuchitanji wechendabatiziki?

 VYAKA vinkhondi vo vajumpha, ŵanthu akujumpha 1 miliyoni akubatizika kuti aje Akaboni aku Yehova. Nge Timote, anandi aku yiwu akusambira uneneska “kutuliya pa ulitema.” (2 Timo. 3:​14, 15) Anyaki akusambira vakukwaskana ndi Yehova ŵati akuwa ndipu anyaki akota. Munthukazi munyaki yo wasambiranga ndi Akaboni aku Yehova wangubatizika we ndi vyaka 97!

² Asani musambira Bayibolu ndi Akaboni pamwenga mulereka ndi apapi ŵinu wo mbakaboni, kumbi muŵanaŵana vakuti mubatiziki? Asani ndi viyo, titikuwongani ukongwa! Kweni mwechendabatiziki, mukhumbika dankha kujipereka kwaku Yehova. Nkhani iyi, yikonkhoskengi kuti kujipereka kwaku Chiuta kung’anamuwanji. Yikuwovyeningi so kuwona chifukwa cho mutenere cha kuchitiya vidazi kuti mujipereki kwaku Chiuta ndi kubatizika asani mwanozgeka kuchita viyo.

KUMBI KUJIPEREKA KWAKU YEHOVA KUNG’ANAMUWANJI?

3. Kambani vakuwoniyapu va mu Bayibolu va ŵanthu wo angujipereka kwaku Yehova.

³ Mu Bayibolu, kujipereka kwaku Yehova kumiya kujipatuwa kuti uchiti chinthu chinyaki chapade. Ayisirayeli ŵenga mtundu wo ungujipereka kwaku Yehova. Kweni Ayisirayeli anyaki ajiperekanga kwaku Yehova mwapade. Mwakuyeruzgiyapu, Aroni wavwalanga ‘chisimikizu chakupaturika cha kujipereka,’ kung’anamuwa kachisulu kakung’anima kagolidi ko kaŵikikanga panthazi pa mphumphu yo wavwalanga. Kachisulu kagolidi kenaka kalongonga kuti iyu wakusankhika kuti wateŵetiyengi mwapade nge wasembi mura wa Ayisirayeli. (Levi. 8:9) Anaziri nawu ajiperekanga kwaku Yehova mu nthowa yapade. Mazu ngakuti “Munaziri” ngatuliya ku mazu nga Chiheberi (nazirʹ)  ngo ngang’anamuwa kuti “Munthu yo Wajipatuwa” pamwenga “Munthu yo Wajipereka.” Anaziri akhumbikanga kuvwiya marangu nganyaki ngo ngangulembeke yiwu, ngo ngenga mu Dangu laku Mozesi.—Nume. 6:​2-8.

4. (a) Kumbi ŵanthu wo ajipereka kwaku Yehova atijipatuwa wuli kuti achiti uteŵeti wapade? (b) Kumbi ‘kujikana’ kung’anamuwanji? (Wonani so chithuzi.)

⁴ Asani mutijipereka kwaku Yehova, musankha kuja wakusambira waku Yesu Khristu ndipu mulongo kuti kuchita khumbu laku Chiuta ndiku kuŵengi chinthu chakukhumbika ukongwa pa umoyu winu. Kumbi kuchita venivi kusazganjipu? Yesu wangukamba kuti: “Asani munthu wapenja kundilondo, wajikani yija.” (Mate. 16:24) Mazu nga Chigiriki ngakuti “wajikani yija” ngangafwatulikiya so kuti “kukana kuchita khumbu laku.” Nge mteŵeti wakujipereka waku Yehova, mukhumbika kukana kuchita chechosi cho chipambana ndi khumbu laki. (2 Akori. 5:​14, 15) Venivi visazgapu kukana “ntchitu za liŵavu,” nge kuchita ureŵi. (Aga. 5:​19-21; 1 Akori. 6:18) Kumbi asani mwachita viyo ndikuti mujengi umoyu wakufyekeka? Viŵengi viyo cha asani mutanja Yehova kweniso asani muwona kuti kuvwiya marangu ngaki kukuwovyeningi kuti vinthu vikuyendiyeningi umampha. (Salimo 119:97; Yesa. 48:​17, 18) Mubali Nicholas wangukamba kuti: “Mungasankha mwija kuti fundu zaku Yehova muziwonengi nge mpanda wa jeri wo utikutondekesani kuchita vo mukhumba, pamwenga nge mpanda wo mukati mwaki mwe nkharamu wo utikuvikiliyani kuti muleki kupwetekeka.”

5. (a) Kumbi munthu watijipereka wuli kwaku Yehova? (b) Kumbi kujipereka ndi kubatizika kupambana wuli? (Wonani so chithuzi.)

⁵ Kumbi munthu watijipereka wuli kwaku Yehova? Muchita venivi mwakumulayizga mu pempheru kuti musopengi iyu pe kweniso kuti kuchita khumbu laki kuŵengi chinthu  chakwamba pa umoyu winu. Yapa mulayizga Yehova kuti mulutirizgengi kumuyanja ‘ndi mtima winu wosi, ndi umoyu winu wosi, ndi maŵanaŵanu nginu ngosi, ndi nthazi zinu zosi.’ (Mariko 12:30) Asani mutijipereka kwaku Yehova muchita venivi kumphepeti, ndipu vichitika pakati paku yimwi ndi Yehova. Kweni ubatizu uchitikiya pakweru kulongo ŵanthu wosi kuti mukujipereka kwaku Yehova. Kujipereka kwaku Yehova ndi layizgu lapade. Mukhumbika kuwonesesa kuti musunga layizgu lenili ndipu venivi ndivu Yehova wakhumba kuti muchitengi.—Waku. 5:​4, 5.

NTCHIFUKWA WULI MUKHUMBIKA KUJIPEREKA KWAKU YEHOVA?

6. Kumbi ntchinthu wuli cho chichitiska munthu kuti wajipereki kwaku Yehova?

⁶ Chifukwa chikulu cho mutijipereke kwaku Yehova ntchakuti mutimuyanja. Muchita venivi chifukwa mwapingika ŵaka cha. Kweni chifukwa chakuti ‘mukuziŵa uneneska’ kweniso ‘mukuvwisa vinthu vauzimu,’ kung’anamuwa vinthu vo mukusambira vakukwaskana ndi Yehova vo vikukuwovyani kuti mumuyanjengi ukongwa. (Ako. 1:9) Chifukwa chakusambira Malemba, mwasimikiza kuti (1) Yehova waliku nadi, (2) Bayibolu ndi Mazu ngaki, kweniso (3) iyu wagwiriskiya ntchitu gulu laki kuti wafiski khumbu laki.

7. Kumbi tikhumbika kuchitanji techendajipereki kwaku Chiuta?

⁷ Ŵanthu wo akujipereka kwaku Yehova atenere kuziŵa fundu zipusu zo zisanirika mu Mazu ngaku Chiuta ndipuso agwiriskiyengi ntchitu fundu zaki pa umoyu wawu. Yiwu akambiyaku anyawu vakukwaskana ndi chivwanu chawu mwakukoliyana ndi mo vinthu viliri pa umoyu wawu. (Mate. 28:​19, 20) Yiwu atimuyanja ukongwa Yehova ndipu akhumbisiska kuti  asopengi iyu pe. Kumbi ndimu viliri ndi yimwi? Asani mutanja Yehova ndi mtima winu wosi, mujiperekengi kwaku iyu ndi kubatizika kuti mukondwesi ŵaka munthu yo watikusambizani Bayibolu cha pamwenga apapi ŵinu. Ndipuso mujiperekengi mwakutore ŵaka anyinu cha.

8. Kumbi kuwonga kungakuwovyani wuli asani mukhumba kuti mujipereki kwaku Yehova? (Salimo 116:​12-14)

⁸ Asani muŵanaŵaniya vinthu vosi vamampha vo Yehova wakuchitiyani, mumuwongengi ndipuso mukhumbisiskengi kujipereka kwaku iyu. (Ŵerengani Salimo 116:​12-14.) Bayibolu likamba kuti “mphasu yeyosi yamampha ndipuso yakufikapu,” vituliya kwaku Yehova. (Yako. 1:17) Ndipu mphasu yikulu ukongwa yo wakukupaskani ndi sembi ya Mwana waki Yesu. Mphasu yeniyi njapade ukongwa ndipu yitovya kuti muje pa ubwezi wakukho ndi Yehova. Kweniso wakukupaskani mwaŵi wakuti muzije ndi umoyu wamuyaya. (1 Yoha. 4:​9, 10, 19) Nthowa yamampha ukongwa yakulongore kuti muwonga chanju cho Yehova wakukulongoni kweniso vinthu vosi vamampha vo wakukuchitiyani nkhujipereka kwaku iyu. (Doto. 16:17; 2 Akori. 5:15) Venivi vakonkhoskeka mwakuvwika umampha mu buku la Kondwani ndi Umoyu Kwamuyaya! sambiru 46, fundu 4. Ndipu mu sambiru lenili mwe so vidiyo yakuti, Kupereka Mphasu Zidu Kwaku Yehova.

KUMBI MWANOZGEKA KUTI MUJIPEREKI KWAKU YEHOVA NDI KUBATIZIKA?

9. Ntchifukwa wuli munthu wakhumbika cha kuchichizgika kuti wajipereki kwaku Yehova?

⁹ Nyengu zinyaki mungawona nge kuti mwanozgeka cha kuti mujipereki kwaku Yehova ndi kubatizika. Panyaki mukhumbika dankha kusintha vinthu vinyaki pa umoyu winu kuti muyendiyengi fundu zaku Yehova pamwenga mukhumbika dankha nyengu kuti mukholesi chivwanu chinu. (Ako. 2:​6, 7) Ŵanthu wosi wo asambira Bayibolu aluta panthazi mwauzimu mwakuyanana cha. Kweniso ŵana aja akunozgeka kujipereka ndi kubatizika pa msinkhu wakuyanana cha. Yesani kuwona mo mulutiya panthazi mwauzimu mwakukoliyana ndi vo mufiska kuchita ndipu mungajiyeruzgiyanga ndi munthu munyaki cha.—Aga. 6:​4, 5.

10. Kumbi mungachitanji asani mwawona kuti mwechendanozgeki kuti mujipereki kwaku Yehova kweniso kubatizika? (Wonani so bokosi lakuti, “ Wo Akulereke mu Uneneska.”)

¹⁰ Chinanga vingaŵa kuti mwaziŵa kuti mwe akunozgeka cha kujipereka kwaku Yehova, lutirizgani kuja ndi chilatu chenichi. Pempherani kwaku Yehova kuti wakuwovyeni kusintha vinthu vinyaki pa umoyu winu. (Afi. 2:13; 3:16) Mugomezgengi kuti iyu wavwisiyengi kweniso kumuka pempheru linu.—1 Yoha. 5:14.

NTCHIFUKWA WULI ANYAKI ACHITA VIDAZI KUTI AJIPEREKI KWAKU YEHOVA NDI KUBATIZIKA?

11. Kumbi Yehova wangatiwovya wuli kuti tilutirizgi kuja akugomezgeka kwaku iyu?

¹¹ Ŵanthu anyaki wo mbakunozgeka kujipereka kwaku Yehova ndipuso kubatizika achita vidazi. Yiwu angajifumba kuti, ‘Wuli asani pavuli pakuti ndabatizika mbwenu ndachita ubudi ukulu ndipu ndasezgeka?’ Asani mutopa venivi, ziŵani kuti Yehova wakupaskeningi chechosi cho mukhumbikiya “ndi chilatu chakuti muyendengi nge mo [iyu] wakhumbiya, kuti mumukondwesengi ukongwa.” (Ako. 1:10) Iyu wakupaskeningi so nthazi kuti muchitengi cho ntchakwenere. Iyu wawovyapu ŵanthu anandi kuti achitengi vinthu vakwenere. (1 Akori. 10:13) Ndichu chifukwa chaki mu mpingu wachikhristu musezgeka ŵaka ŵanthu amanavi. Yehova watovya ŵanthu ŵaki kuti alutirizgi kuja akugomezgeka.

12. Kumbi tingakhwecha wuli kuchita ubudi ukulu?

¹² Munthu weyosi wambula kufikapu wayeseka kuti wachiti vinthu viheni. (Yako. 1:14) Kweni mukhumbika kusankha mwija vo  mungachita asani muyeseka. Fundu njakuti mbudindu winu kusankha mo mungachitiya vinthu pa umoyu winu. Ŵanthu anyaki akamba kuti tingafiska cha kujiko pa vo tichita kweniso mo tivwiya. Kweni ili ndi boza likulu ukongwa. Mungafiska kujiko. Chinanga kuti muyeseka kuchita vinthu vinyaki viheni, mungasankha kuleka kuvichita. Pe so vinthu vinyaki vo vingakuwovyani kuti muleki kubuda. Mwakuyeruzgiyapu, mupempherengi kwaku Yehova zuŵa lelosi. Mujengi ndi chiziŵiliza chakusambira Mazu ngaku Chiuta pakumwija, muwunganengi kweniso mupharazgengi. Kuchita venivi kungakuwovyani kuti muchitengi vinthu mwakukoliyana ndi layizgu linu lakujipereka kwaku Yehova. Ndipu mungaluwanga cha kuti Yehova wakuwovyeningi kufiska venivi.—Aga. 5:16.

13. Kumbi Yosefi wakutileke chakuwoniyapu wuli?

¹³ Mungasuzgika cha kufiska layizgu linu asani musankhiya limu vo mwazamuchita mwechendakumani ndi mayeseru. Bayibolu lizumbuwa ŵanthu anandi wo anguchita venivi chinanga kuti nawu ŵenga ambula kufikapu. Mwakuyeruzgiyapu, mwakuwerezawereza muwolu waku Potifara wangunyengere Yosefi kuti wachiti nayu ureŵi. Kweni iyu wanguziŵiya limu vakuti wachiti. Bayibolu lititikambiya kuti “iyu wangukana,” ndipu wangukamba kuti: “Sonu ndichitiyenji uheni ukulu viyo ndi kubudiya Chiuta?” (Gene. 39:​8-10) Yapa viwoneke limu kuti Yosefi wanguziŵiya limu vo wazamuchita wechendayeseki ndi muwolu waku Potifara. Venivi vingumuwovya kuti wachiti cho ntchakwenere pa nyengu yo wayesekanga.

14. Kumbi tingasambira wuli kukana kuchita vinthu viheni?

¹⁴ Kumbi yimwi mungamuyezga wuli Yosefi? Mungasankhiya limu sonu vo mwazamuchita asani mwakumana ndi mayeseru. Sambirani kukana mwaliŵi vinthu vo Yehova watinkha kweniso mungaviŵanaŵaniyanga cha. (Salimo 97:10; 119:165) Asani mwachita viyo, mungazithera cha asani mwakumana ndi mayeseru chifukwa mwazamuja kuti mwaziŵiya limu vo mungachita. Ndipu mwazamuchita cho ntchakwenere.

15. Kumbi munthu wangalongo wuli kuti wapenja Yehova ndi mtima wosi? (Aheberi 11:6)

¹⁵ Panyaki vingaŵa kuti muziŵa kuti mukusaniya uneneska ndipu mukhumba kuteŵete Yehova ndi mtima winu wosi. Kweni pe chinthu chinyaki cho chitikutondekesani kuti mujipereki kwaku Yehova ndi kubatizika. Asani ve viyo, mungachita vo Fumu Davidi yinguchita. Mungapempha Yehova kuti: “Ndifufuzeni  yimwi Chiuta, ndipu ziŵani mtima wangu. Ndisandeni ndipu ziŵani maŵanaŵanu ngangu ngo ngatindifipiska mtima. Wonanimu mwaku ini asani mwe nthowa yeyosi yiheni, ndipu ndilongozgeni mu nthowa yamuyaya.” (Salimo 139:​23, 24) Pempheru lenili lilongo kuti mupenja kuti Yehova wakuwovyeni kweniso kuti mufwiyapu kuti mufiski chilatu chinu cha kujipereka ndi kubatizika. Ndipu Yehova watumbika wo “atimupenja ndi mtima wosi.”—Ŵerengani Aheberi 11:6.

LUTIRIZGANI KUNDERE KUFUPI NDI YEHOVA

16-17. Kumbi Yehova wangaŵaguziya wuli kwaku iyu ŵanthu wo alereke mu uneneska? (Yohane 6:44)

¹⁶ Yesu wangukamba kuti Yehova ndiyu waguza akusambira ŵaki. (Ŵerengani Yohane 6:44.) Kuziŵa venivi nkhwakukondwesa ukongwa kwaku yimwi. Yehova wawonamu kanthu kanyaki kamampha mwaku weyosi yo watimuguziya kwaku iyu. Iyu wawona munthu weyosi nge “chuma chaki chapade,” pamwenga “chuma chaki chakuzirwa.” (Doto. 7:6; mazu ngamumphata) Ndimu so watikuwoniyani yimwi pakumwija.

¹⁷ Kweni vingaŵa kuti ndimwi wachinyamata yo wakulereke mu uneneska. Mwaviyo mungawona nge kuti muteŵete Yehova, ŵaka pakuti apapi ŵinu mbakaboni pamwenga mungawona nge kuti Yehova wakukuguziyani kwaku iyu cha. Kweni Bayibolu likamba kuti: “Ndereni kufupi ndi Chiuta, ndipu nayu wanderengi kufupi ndi yimwi.” (Yako. 4:8; 1 Mbiri 28:9) Asani mutamba ndimwi kundere kufupi ndi Yehova, nayu wandere kufupi ndi yimwi. Yehova watikuwonani ŵaka nge munthu yo wakulereke mu banja la Akaboni cha. Kweni waguziya munthu weyosi kwaku iyu, kusazgapu weyosi yo wakulereke mu uneneska. Asani munthu waviyo watamba ndiyu kundere kufupi ndi Yehova, Yehova nayu wandere kwaku iyu nge mo tawone pa Yakobe 4:8.—Yeruzgiyani ndi 2 Atesalonika 2:13.

18. Kumbi mu nkhani yakulondopu tazamukambiskananji? (Salimo 40:8)

¹⁸ Asani mwajipereka kwaku Yehova ndi kubatizika, muyezga Yesu. Iyu wangujipereka ndi mtima wosi kwa Awisi kuti wachiti khumbu lawu. (Ŵerengani Salimo 40:8; Ahe. 10:7) Mu nkhani yakulondopu, tazamukambiskana vo vingakuwovyani kuti mulutirizgi kuteŵete Yehova mwakugomezgeka pavuli pakuti mwabatizika.