1-2. Kumbi munthu wasaniya vitumbiku wuli asani wabatizika?

 TIKONDWA ukongwa asani tabatizika ndi kuja mu banja laku Yehova. Ndi mwaŵi ukulu ukongwa kuja pa ubwezi wakukho ndi Yehova ndipu tikoliyana ndi vo Davidi wangukamba kuti: “Ngwakukondwa munthu yo [yimwi Yehova] mwasankha ndi kuza nayu pafupi kuti wazije mumabalaza nginu.”—Salimo 65:4.

² Yehova wazomereza ŵanthu bweka cha kuja nayu pa ubwezi. Nge mo tinguwone mu nkhani yajumpha, iyu wandere kufupi ndi ŵanthu wo alongo kuti akhumba kuja pa ubwezi wakukho ndi iyu. (Yako. 4:8) Asani mwajipereka kwaku Yehova ndi kubatizika, muja pa ubwezi wapade ndi iyu. Asani mwabatizika mungasimikiza kuti iyu “[wazakukupunguliyani] vitumbiku mpaka musoŵi pakuti muvisungi.”—Mala. 3:10; Yere. 17:​7, 8.

3. Kumbi Akhristu wo akujipereka ndi kubatizika ŵe ndi udindu ukulu nuwu? (Wakutawula 5:​4, 5)

³ Kweni ubatizu nkhwamba ŵaka kuteŵete Yehova. Asani mwabatizika, muyesesengi kuti mulutirizgi kufiska layizgu linu kweniso kuti mulutirizgi kuja akugomezgeka chinanga mphanyengu yo mukumana ndi mayeseru. (Ŵerengani Wakutawula 5:​4, 5.) Nge wakusambira waku Yesu, muyesesengi kulondo chakuwoniyapu chaki ndipuso kulondo marangu ngaki mwakugomezgeka. (Mate. 28:​19, 20; 1 Petu. 2:21) Nkhani iyi yikuwovyeningi kuchita venivi.

‘LUTIRIZGANI KULONDO’ YESU CHINANGA KUTI MUKUMANA NDI MAYESERU

4. Kumbi akusambira aku Yesu apinga wuli ‘chimiti chakutombozgekiyapu’? (Luka 9:23)

⁴ Mungaŵanaŵananga cha kuti asani mwabatizika ndikuti mukumanengi ndi masuzgu cha. Yesu wangukamba mwambula kubisa  kuti akusambira ŵaki azamupinga ‘chimiti chakutombozgekiyapu,’ ndipu azamuchita venivi “zuŵa lelosi.” (Ŵerengani Luka 9:23.) Kumbi Yesu wang’anamuwanga kuti akusambira ŵaki akumanengi ndi masuzgu pe? Awa. Kweni wakambanga ŵaka kuti kusazgiyapu pa vitumbiku vo azamusaniya, azamukumana ndi masuzgu. Ndipu masuzgu nganyaki ngangaja ngakulu ukongwa.—2 Timo. 3:12.

5. Kumbi Yesu wangulayizga kuti ŵanthu wo atijinola vinthu vinyaki azamusaniya vitumbiku wuli?

⁵ Panyaki pasonu panu mususkika ndi ŵanthu a mu banja linu, pamwenga mukuleka vinthu vinyaki kuti muŵikengi vinthu va Ufumu pamalu ngakwamba. (Mate. 6:33) Asani ndi viyo, mungakayikanga cha kuti Yehova wawona vosi vo mutimuchitiya pakumuteŵete. (Ahe. 6:10) Panyaki mwawona kufiskika kwa mazu ngo Yesu wangukamba ngakuti: “Palivi munthu yo waleka nyumba, avurwa ŵaki, aku ŵaki, azichi ŵaki, anyina, awisi, ŵana pamwenga minda chifukwa chaku ini kweniso chifukwa cha uthenga wamampha yo wangatondeka kulonde maulendu 100, nyumba, avurwa ŵaki, aku ŵaki, azichi ŵaki, anyina, ŵana pamwenga minda limoza ndi kutombozgeka mu nyengu yinu ndipuso umoyu wamuyaya mu nyengu yo yituza.” (Mariko 10:​29, 30) Vitumbiku vo mwasaniya vikulu ukongwa kuluska chechosi cho mukuleka.—Salimo 37:4.

6. Ntchifukwa wuli mukhumbika kulutirizga kulimbana ndi “khumbiru la liŵavu” asani mwabatizika?

⁶ Asani mwabatizika, mukhumbika mbwenu kulimbana ndi “khumbiru la liŵavu.” (1 Yoha. 2:16) Ve viyo chifukwa chakuti mweche ambula kufikapu. Nyengu zinyaki mungavwa nge mo wakutumika Paulo wavwiyanga. Iyu wanguti: “Mumtima mwangu ndikondwa ukongwa chifukwa cha dangu laku Chiuta, kweni muliŵavu langu ndiwonamu so dangu linyaki lo lilimbana ndi dangu la maŵanaŵanu ngangu, ndipu litindilongozge ku ukapolu wa dangu la ubudi lo le muliŵavu mwangu.” (Aro. 7:​22, 23) Panyaki mungagongowa chifukwa chakuti mulimbana ndi makhumbiru ngaheni. Kweni kukumbuka vo mungulayizga Yehova pa nyengu yo mwajiperekanga kwaku iyu, kukuwovyeningi kuti mulutirizgi kulimbana ndi mayeseru ngo mukumana nangu. Uneneska ngwakuti, layizgu linu lakujipereka likuwovyeningi pa nyengu yo mukumana ndi mayeseru. Mu nthowa wuli?

7. Kumbi kujipereka kwaku Yehova kukuwovyeningi wuli kuti mulutirizgi kuja akugomezgeka kwaku iyu?

⁷ Asani mwajipereka kwaku Yehova ndikuti mwajikana mwija. Venivi ving’anamuwa kuti mukanengi makhumbiru nga liŵavu kweniso vilatu vo vileka kukondwesa Yehova. (Mate. 16:24) Mwaviyo, asani mwakumana ndi mayeseru mukhumbikengi kuŵanaŵana kaŵi katatu cha kuti muchitengenji. Chifukwa muŵengi kuti mukusankha kali vo muchitengi, kung’anamuwa kulutirizga kuja wakugomezgeka kwaku Yehova. Mujengi kuti mwasimikiza kuti mukondwesengi Yehova ndipu mujengi nge Yobu. Chinanga kuti wangukumana ndi mayeseru ngakulu ukongwa, iyu wangusimikiza kuti: “Ndilekengi cha kuja wakugomezgeka!”—Yobu 27:5.

8. Kumbi kuŵanaŵaniya vo mungumulayizga Yehova mu pempheru pakujipereka kungakuwovyani wuli kukana mayeseru?

⁸ Asani muŵanaŵaniya vo mungulayizga mu pempheru pa nyengu yo mwajiperekanga, muŵengi ndi nthazi zakukaniya mayeseru ngengosi. Mwakuyeruzgiyapu, mungakopana cha ndi mulumu pamwenga muwolu wamweni chifukwa mukumulayizga kali Yehova kuti mwazamuchita cha venivi. Asani muzomereza cha kuti makhumbiru ngaheni ngakuwi mumtima winu, ndikuti musuzgikengi cha kungatuzgamu asani ngayamba ŵaka. Asani mwachita viyo, ‘mutuwengepu’ “panthowa ya ŵanthu aheni.”—Nthanthi 4:​14, 15.

9. Kumbi kuŵanaŵaniya vo mungumulayizga Yehova mu pempheru pakujipereka kungakuwovyani so wuli kuti muŵikengi vinthu vauzimu pakwamba?

⁹ Kumbi mungachita wuli asani mwasaniya ntchitu yo yingakutondekesani kusanirika pa maunganu nyengu zosi? Muziŵiya limu vo mungachita. Mwechendasaniyi ntchitu yeniyi  mungusimikiza kali kuti muzomerengi cha kugwira ntchitu yo yingakutondekesani kusanirika pa maunganu nyengu zosi. Mwaviyo, vingavwika cha kuzomera ntchitu yaviyo mbwenu pavuli paki mupenja nthowa yakuti muŵikengi Yehova pamalu ngakwamba. Kukumbuka kuti Yesu wangusimikiza kuti wakondwesengi Awisi, kungakuwovyani kuti mukanengi mwaliŵi chinthu chechosi cho muziŵa kuti chimukondwesengi cha Chiuta yo mukujipereka kwaku iyu.—Mate. 4:10; Yoha. 8:29.

10. Kumbi Yehova wakuwovyeningi wuli kuti ‘mulutirizgi kulondo’ Yesu asani mwabatizika?

¹⁰ Vo muchita asani mwakumana ndi masuzgu pamwenga muyeseka kuti muchiti chinthu chiheni, vingalongo kuti musimikiza kuti ‘mulutirizgengi kulondo’ Yesu. Asani muchita viyo, mungasimikiza kuti Yehova wakuwovyeningi kuti mulutirizgi kulondo Yesu. Bayibolu likamba kuti: “Chiuta ngwakugomezgeka ndipu wazomerezengi cha kuti muyeseki kujumpha po mungakunthiyapu, ndipu asani muyeseka iyu wanozgengi nthowa yakuti mufiski kukunthiyapu.”—1 Akori. 10:13.

KUMBI MUNGACHITA WULI KUTI MULUTIRIZGI KULONDO YESU?

11. Kumbi ndi nthowa yamampha ukongwa niyi yo yingakuwovyani kuti mulutirizgi kulondo Yesu? (Wonani so chithuzi.)

¹¹ Yesu wateŵetiyanga Yehova ndi mtima waki wosi ndipu wayanjanga kupemphera kwaku Iyu. (Luka 6:12) Ndipu nthowa yamampha ukongwa yo yingakuwovyani kuti mulutirizgi kulondo Yesu asani mwabatizika, nkhuja ndi chiziŵiliza chakuchita vinthu vauzimu. Bayibolu likamba kuti: “Kwali taluta panthazi wuli, tiyeni tilutirizgi kwenda mwakwenere mu nthowa yeniyi.” (Afi. 3:16) Kanandi mutuvwa vo vichitikiya abali ndi azichi wo angusankha kuchita vinandi pakuteŵete Yehova. Panyaki yiwu angusere Sukulu ya Apharazgi a Ufumu pamwenga anguluta kuchigaŵa ko kukhumbika apharazgi anandi. Asani namwi muwona kuti mungafiska, mungachita umampha kuja ndi  chilatu chenichi. Ateŵeti aku Yehova akhumbisiska kuchita vinandi pakumuteŵete. (Machi. 16:9) Kweni wuli asani pasonu panu mungafiska cha kuchita viyo? Mungajivwanga kuti mwe akumaliyapu cha. Chakukhumbika ukongwa ntchakuti mulutirizga kukunthiyapu. (Mate. 10:22) Ziŵani kuti Yehova wakondwa ukongwa asani muchita vo mungafiska kuti mumuteŵete mwakukoliyana ndi mo vinthu viliri pa umoyu winu. Yeniyi ndiyu nthowa yamampha ukongwa yo mungalongore kuti mulutirizga kulondo Yesu asani mwabatizika.—Salimo 26:1.

12-13. Kumbi mungachita wuli asani mwaleka kuchita phamphu pakuteŵete Yehova? (1 Akorinto 9:​16, 17) (Wonani so bokosi lakuti, “ Lutirizgani Kuchita Maphara.”)

¹² Kumbi mutenere kuchitanji asani muwona kuti mufiska cha kupemphera kwaku Yehova mwakutuliya pasi pa mtima pamwenga mukondwa cha asani mupharazga nge mo mwachitiyanga kali? Nanga wuli asani mukondwa cha ndi kuŵerenga Bayibolu nge mo mwachitiyanga kali? Asani mutuvwa viyo pavuli pakuti mwabatizika, mungaŵanaŵananga cha kuti Yehova wakuleka kukuwovyani ndi mzimu waki. Chifukwa chakuti mwe ambula kufikapu, mungasinthasintha mo muvwiya mumtima. Asani muwona kuti mwaleka kuchita phamphu pakuteŵete Yehova, muŵanaŵaniyengi chakuwoniyapu cha wakutumika Paulo. Chinanga kuti wakhumbisiskanga kuyezga Yesu, iyu waziŵanga kuti nyengu zinyaki waŵengevi mtima wakukhumbisiska kuchita vo wakhumba. (Ŵerengani 1 Akorinto 9:​16, 17.) Iyu wangukamba kuti: “Chinanga ndingachita mwambula kukhumba napu, uteŵeti wakuwonere wo ndikupaskika ndeche nawu mbwenu.” Tingakamba ŵaka kuti, Paulo wangusimikiza kuti wafiskengi uteŵeti waki chinanga kuti nyengu zinyaki wangaŵavi mtima wakukhumbisiska kuchita viyo.

¹³ Mwakuyanana ŵaka, lekani kusankha vakuchita mwakukoliyana ndi mo muvwiya mumtima pa nyengu yo. Simikizani kuti muchitengi cho ntchakwenere chinanga mungaŵa kuti  mukhumba cha kuchita viyo. Asani mulutirizga kuchita cho ntchakwenere, mungasintha mo muvwiya mumtima. Kusambira Bayibolu pakumwija nyengu zosi, kupemphera, kusanirika pa maunganu kweniso kupharazga, vikuwovyeningi kuti mulutirizgi kulondo Yesu asani mwabatizika. Ndipu asani abali ndi azichi awona kuti mukunthiyapu muchiteŵete Yehova, achiskikengi ukongwa.—1 Ate. 5:11.

“LUTIRIZGANI KUJIYESA . . . LUTIRIZGANI KUSIMIKIZA”

14. Kumbi nyengu zosi mutenere kufufuzanji, nanga ntchifukwa wuli? (2 Akorinto 13:5)

¹⁴ Kujifufuza nyengu zosi kungakuwovyani so ukongwa asani mwabatizika. (Ŵerengani 2 Akorinto 13:5.) Nyengu ndi nyengu mujifufuzengi mo muchitiya pa nkhani ya kupemphera zuŵa lelosi, kuŵerenga kweniso kusambira Bayibolu, kusanirika pa maunganu ndipuso kupharazga. Yesesani kusaniya nthowa zo zingakuwovyani kuti mukondwengi kweniso muyanduwengi ukongwa ndi vinthu venivi. Mwakuyeruzgiyapu, jifumbeni kuti: ‘Kumbi ndingafiska kukonkhoske ŵanthu anyaki fundu zipusu za mu Bayibolu? Kumbi pe vinthu vinyaki vo ndingachita vo vingandiwovya kuti ndikondwengi ndi upharazgi? Kumbi ndizumbuwa vinthu chayivu pakupemphera? Nanga mapempheru ngangu ngalongo kuti nditimuthemba ukongwa Yehova? Kumbi nyengu zosi ndisanirika pa maunganu? Kumbi ndingachita wuli kuti maŵanaŵanu ngangu ngosi ngajengi pa maunganu kweniso kuti ndimukengepu ndi kukamba nkhani?’

15-16. Kumbi mwasambiranji pa vo vinguchitikiya mubali munyaki pa nkhani ya kukana mayeseru?

¹⁵ Mungachita so umampha kujifufuza mwauneneska kuti muziŵi vinthu vo mutondeka kuchita umampha. Mubali munyaki zina laki Robert wangukonkhoska vo vingumuchitikiya, vo vingatiwovya kuvwisa umampha fundu yeniyi. Iyu wanguti: “Nde ndi vyaka pafufupi 20, ndagwiranga ntchitu kwa mazuŵa ngamanavi pa sabata. Zuŵa linyaki tati taŵeruka, munthukazi munyaki yo ndagwiranga nayu ntchitu wangundidaniya kunyumba kwaki. Iyu wangukamba kuti tamukuŵa taŵaŵi pe ndipu ‘tamuchita chechosi cho takhumba.’ Pakwamba ndamugwenthanga ŵaka kweni pakumaliya ndingumukaniya ndipuso ndingumukonkhoske chifukwa chaki.” Robert wangukana mayeseru ngo wangukumana nangu ndipu wanguchita umampha ukongwa. Kweni pati pajumpha nyengu, wangukumbuka vo vingumuchitikiya ndipu wanguwona kuti wakhumbikanga kuchita vinthu mwakupambanaku. Iyu wanguti: “Ndingukana mwaliŵi cha pamwenga mwachiganga nge mo Yesefi wanguchitiya pakukana muwolu waku Potifara. (Gene. 39:​7-9) Ndipu ndinguzizwa ukongwa kuti vingundisuzga kuti ndikani mayeseru ngenanga. Vo vingundichitikiya vingundiwovya kuziŵa kuti ndikhumbika kukholesa ubwezi wangu ndi Yehova.”

 ¹⁶ Namwi mungayanduwa ukongwa asani mungajifufuza nge mo Robert wanguchitiya. Chinanga mungakana mayeseru ngo mwakumana nangu, jifumbeni kuti: ‘Kumbi panguto nyengu yitali wuli kuti ndikani?’ Asani muwona kuti mukhumbika kusintha kuti muchitengi umampha ukongwa mungagongowanga cha. Kondwani ŵaka kuti sonu mwaziŵa vo mukhumbika kunozga. Mukambiyeni Yehova mupempheru vinthu vo mutondeka kuchita umampha kweniso muchitengi vo vingakuwovyani kuti muyendiyengi fundu zaku Yehova pa umoyu winu.—Salimo 139:​23, 24.

17. Kumbi vo vinguchitikiya Robert vingukwaska wuli zina laku Yehova?

¹⁷ Pe vinthu vinandi vo tingasambira pa vo vinguchitikiya Robert. Iyu wangukamba so kuti: “Ndati ndakana kuluta kunyumba ya munthukazi yo ndagwiranga nayu ntchitu, iyu wangundikambiya kuti, ‘Wakwera mayesu!’ Ndingumufumba kuti wang’anamuwanganji. Iyu wangundikonkhoske kuti munyaki yo kali wenga Kaboni wangumukambiya kuti achinyamata wosi wo Mbakaboni, aja umoyu wa paŵipaŵi kweniso achita vinthu viheni mwakubisa asani mwaŵi wasanirika. Mwaviyo, iyu wangukambiya munyaki mwenuyu kuti wandiyesengi kuti wawoni asani nani nde waviyo. Yapa, ndinguwamu kuti ndinguchita umampha ukongwa chifukwa ndenga ndi mwaŵi wakutumbika zina laku Yehova.”

18. Kumbi mwasimikiza kuchitanji asani mwabatizika? (Wonani so bokosi lakuti, “ Nkhani zo Zingakuwovyani.”)

¹⁸ Asani mwajipereka kwaku Yehova ndi kubatizika, mulongo kuti mukhumba kutowesa zina laki kwali mungakumana ndi vinthu wuli pa umoyu winu. Ndipu simikizani kuti Yehova wawona masuzgu kweniso mayeseru ngo mulimbana nangu. Iyu wakutumbikeningi chifukwa cha kulutirizga kuja wakugomezgeka kwaku iyu. Mugomezgengi kuti iyu wagwiriskiyengi ntchitu mzimu waki kuti wakupaskeni nthazi zakuchitiya venivi. (Luka 11:​11-13) Yehova wakuwovyeningi kuti mulutirizgi kulondo Yesu asani mwabatizika.