Tingagowokereka maubudi ngidu chifukwa cha sembi yo Yesu wakupereka mwakugwiriskiya ntchitu ndopa zaki. (Aefe. 1:7) Kweni Bayibolu likamba kuti: “Chiuta walekerezga ndi chilatu chakuti wagowoke maubudi ngo ngakuchitika kali,” kung’anamuwa Yesu wechendapereki sembi yakuwombole. (Aro. 3:25) Kumbi Yehova watingi wagowokiyengi wuli maubudi sembi yechendaperekeki ndipu pa nyengu yeniyo pe kuja Chiuta murunji?

Kwaku Yehova venga nge kuti sembi yaperekeka kali pa nyengu yo wangulayizgiya kuti waperekengi “mphapu” yo yazamutaska ŵanthu wo azakumugomezga. (Gene. 3:15; 22:18) Chiuta wangusimikiza kuti pa nyengu yaki Mwana waki wapade wazamupereka sembi yakuwombole ndi mtima wosi. (Aga. 4:4; Ahe. 10:​7-10) Pa nyengu yo Yesu wenga pacharu chapasi, Chiuta wangumupaska mazaza ngakugowoke maubudi wechendapereki sembi. Yesu wagowokiyanga maubudi nga ŵanthu wo ŵenga ndi chivwanu chifukwa wanguziŵa kuti sembi yo wazamupereka yazamubenekere maubudi ngawu.—Mate. 9:​2-6.