1-2. Kumbi ndi masuzgu wuli ngo Akaboni anandi akumana nangu?

WAKUTUMIKA Paulo wanguchiska Timote kweniso Akhristu wosi kuti afiski uteŵeti wawu mwakukwana. (2 Timo. 4:5) Mwaviyo, tilondo ulongozgi waku Paulo ndi kuchita vosi vo tingafiska pakuteŵete Chiuta. Kweni kuchita venivi nyengu zinyaki nkhupusu cha. Abali ndi azichi ŵidu anandi, akhumbika kuchita chiganga kuti agwiri ntchitu yakupharazga. (2 Timo. 4:2) Mwakuyeruzgiyapu, abali ŵidu anyaki aja mu vyaru vo ntchitu yidu yakupharazga njakukanizgika. Kweni yiwu apharazga chinanga kuti angaŵikika mujeri!

² Ŵanthu aku Yehova alimbana ndi masuzgu ngakupambanapambana ngo ngangaŵaguŵiska. Mwakuyeruzgiyapu, abali ndi azichi anandi agwira ntchitu kwa maola nganandi kuti asaniriyi banja lawu vinthu vakukhumbika. Yiwu angakhumbisiska kuchita vinandi mu uteŵeti kweni kukumaliya kwa sabata angaŵa kuti avuka. Anyaki angachita vinandi cha mu uteŵeti chifukwa chakuti atama ukongwa, mbakukota kweniso panyaki mbakuti atuwapu cha panyumba. Kweniso pe anyaki wo asuzgika maŵanaŵanu chifukwa chakuti atijiwona kuti mbambula kwenere. Mzichi Mary * yo waja ku Middle East wangukamba kuti: “Ndikhumbika kuyesesa kuti ndileki kujiwona mwambula kwenere, mwakuti kanandi ndivuka mumaŵanaŵanu. Pavuli paki, nditijimba mulandu chifukwa kujiwona viyo kutindimaliya nyengu ndi nthazi zo zatingi zindiwovyengi pakupharazga.”

3. Kumbi tikambiskanengenji mu nkhani iyi?

³ Kwali tikumana ndi masuzgu wuli, Yehova wangatipaska nthazi kuti timalani ndi masuzgu ngo tikumana nangu kweniso kuti tilutirizgi kumuteŵete mwakukoliyana ndi mo vinthu viliri. Techendakambiskani mo Yehova wangatiwovye, tiyeni tiwoni mo Yehova wanguwovye Paulo kweniso Timote kufiska uteŵeti wawu chinanga kuti akumananga ndi masuzgu.

4. Kumbi Paulo wangukumana ndi masuzgu wuli?

⁴ Paulo wangukumana ndi masuzgu nganandi. Iyu wakhumbikanga Yehova kuti wamupaski nthazi pa nyengu yo wapumikanga, waponyekanga mya kweniso kuŵikika mujeri. (2 Akori. 11:23-25) Paulo wangukamba mwambula kubisa kuti nyengu zinyaki wasuzgikanga ndi maŵanaŵanu ngaheni. (Aro. 7:18, 19, 24) Iyu wakunthiyangapu nthenda yinyaki yo yenga nge “munga muliŵavu” mwaki ndipu wakhumbisiskanga kuti Chiuta wamutuzgiyepu.—2 Akori. 12:7, 8.

5. Kumbi Paulo wangufiskanji chinanga kuti wakumananga ndi masuzgu?

⁵ Yehova wangumupaska nthazi Paulo kuti wafiski uteŵeti waki chinanga kuti wakumananga ndi masuzgu. Ŵanaŵaniyani vo Paulo wangufiska kuchita. Mwakuyeruzgiyapu, pa nyengu yo wenga pa ukayidi wa panyumba ku Roma, iyu wangupharazga mwaphamphu uthenga wamampha kwa alongozgi Achiyuda ndipuso watenere kuti wapharazgiyanga ŵaraŵara aboma. (Machi. 28:17; Afi. 4:21, 22) Iyu wangupharazgiya so asilikali anandi wo avikiliyanga fumu ndipuso wanguchitiya ukaboni ku ŵanthu wosi wo anguza kuzimuwona. (Machi. 28:30, 31; Afi. 1:13) Pa nyengu yeniyi, Chiuta wangugwiriskiya ntchitu Paulo kulemba makalata ngo Akhristu auneneska anguyanduwa nangu kweniso ngo ayanduwa nangu mazuŵa nganu. Kusazgiyapu pa fundu yeniyi, chakuwoniyapu chaku Paulo chinguchiska mpingu wa ku Roma. Ndipu venivi vinguwovya abali ŵaki kuti aje ndi “chiganga pakulongoro mazu ngaku Chiuta mwambula mantha.” (Afi. 1:14) Chinanga kuti nyengu zinyaki Paulo wachitanga vinandi cha kweni wayesesanga kuchita vosi vo wangafiska ndipu venivi ‘vinguwovya kuti uthenga wamampha uluti panthazi.’—Afi. 1:12.

6. Mwakukoliyana ndi 2 Akorinto 12:9, 10, kumbi ntchinthu wuli cho chinguwovya Paulo kufiska uteŵeti waki?

⁶ Paulo waziŵanga kuti chechosi cho wachitanga pakuteŵete Yehova, wafiskanga ndi nthazi zaki cha kweni ndi nthazi zaku Chiuta. Iyu wanguziŵa kuti nthazi yaku Chiuta “yija yakufikapu mu kulopwa.” (Ŵerengani 2 Akorinto 12:9, 10.) Mwakugwiriskiya ntchitu mzimu Waki wakupaturika, Yehova wangupaska Paulo nthazi kuti wafiski uteŵeti waki mwakukwana chinanga kuti watombozgekanga, wanguŵikika mujeri kweniso wakumananga ndi masuzgu nganyaki.

7. Kumbi Timote wakhumbikanga kumalana ndi masuzgu wuli kuti wafiski uteŵeti waki?

⁷ Timote yo wayendiyanga limoza ndi Paulo, nayuso wakhumbikanga kuthemba nthazi yaku Chiuta kuti wafiski uteŵeti waki. Timote wayendiyanga limoza ndi Paulo pa maulendu  ngatalingatali nga umishonale. Kweniso Paulo wangutuma Timote pa maulendu nganyaki kuti wakachiski mipingu. (1 Akori. 4:17) Timote watenere kuti wajiwonanga kuti wangafiska cha. Panyaki ndichu chifukwa chaki Paulo wangumukambiya kuti: “Munthu wangakudeleranga cha chifukwa cha msinkhu waku.” (1 Timo. 4:12) Kusazgiyapu yapa, pa nyengu yeniyi Timote nayu wenga ndi munga muliŵavu. Ndipu munga wenuwu kwenga “kutamatama.” (1 Timo. 5:23) Kweni Timote wanguziŵa kuti nthazi yaku Yehova ya mzimu wakupaturika, yimupaskengi nthazi zo wakhumbikiyanga kuti wafiski kupharazga uthenga wamampha kweniso kuteŵete abali ŵaki.—2 Timo. 1:7.

8. Kumbi Yehova watiŵapaska wuli nthazi ŵanthu ŵaki mazuŵa nganu?

⁸ Mazuŵa nganu Yehova wapaska taŵanthu ŵaki “nthazi yakujumpha yo tituŵa nayu” ndi chilatu chakuti tilutirizgi kumuteŵete mwakugomezgeka. (2 Akori. 4:7) Tiyeni tikambiskani vinthu vinayi vo Yehova watitipaska kuti tije ndi nthazi kweniso kutiwovya kuti tilutirizgi kuja akugomezgeka kwaku iyu. Vinthu vaki ndi ivi: pempheru, Bayibolu, Akhristu anyidu kweniso ntchitu yidu yakupharazga.

9. Kumbi pempheru lingatiwovya wuli?

⁹ Pempheru lititiwovya kuti tije ndi nthazi. Nge mo pakambiya pa Aefeso 6:18, Paulo watitichiska kupemphera kwaku Chiuta “pa chakuchitika chechosi.” Chiuta watimukengi mwakutipaska nthazi. Jonnie yo waja ku Bolivia, wanguwona mo Yehova wangumuwovye pa nyengu yo wangukumana ndi masuzgu ngakupambanapambana. Apapi ŵaki wosi ŵaŵi kweniso muwolu waki, angutama ukongwa pa nyengu yimoza. Jonnie wasuzgikanga ukongwa kuphwere ŵanthu wosi atatu. Anyina angutayika ndipu pangujumpha nyengu yitali kuti muwolu waki ndi awisi achiri. Asani wakumbuka mo vinthu ve nge kuvuli, Jonnie wakamba kuti: “Pa nyengu yo vinthu vasuzganga ukongwa, chinthu cho chandiwovyanga nyengu zosi nkhukamba vinthu chayivu mupempheru.” Yehova wangumupaska nthazi Jonnie zo wakhumbikanga kuti wakunthiyepu. Mura munyaki zina laki Ronald yo waja ku Bolivia wanguziŵa kuti anyina atamanga kansa. Anyina angutayika pati pajumpha mwezi umoza. Kumbi ntchinthu wuli cho chingumuwovya kuti wakunthiyepu? Iyu wangukamba kuti: “Kupemphera kwaku Yehova kutindiwovya kuti ndimukambiyengi vosi vo ve mumtima mwangu kweniso mo ndivwiya. Ndiziŵa kuti watindivwisa ukongwa kuluska munthu weyosi kweniso kuluska mo ini ndamweni nditijiziŵiya.” Nyengu zinyaki tingajivwa kuti tingafiska cha kukunthiyapu masuzgu pamwenga tingaziŵa cha vo tingakamba mupempheru. Kweni Yehova watitipempha kuti tipempherengi kwaku iyu chinanga tingasuzgika kukamba maŵanaŵanu ngidu pamwenga mo tivwiya.—Aroma 8:26, 27.

10. Nge mo pakonkhoske pa Aheberi 4:12, ntchifukwa wuli kuŵerenga Bayibolu ndi kuŵanaŵaniyapu vo tiŵerenga nkhwakukhumbika ukongwa?

¹⁰ Bayibolu lititiwovya kuti tije ndi nthazi. Nge mo Paulo wathembiyanga Malemba kuti ngamupaski nthazi kweniso kumupembuzga, nasi so tingangathemba. (Aro. 15:4) Tichiŵerenga Mazu ngaku Chiuta ndi kuŵanaŵaniyapu, Yehova wangagwiriskiya ntchitu mzimu waki kuti utiwovyi kuvwisa umampha mo tingagwiriskiya ntchitu Malemba pa suzgu yidu. (Ŵerengani Aheberi 4:12.) Ronald yo tamukambapu kali wangukamba kuti: “Ndikondwa ukongwa kuti ndikwamba kuŵerenga Bayibolu usiku wewosi. Ndiŵanaŵaniya ukongwa mijalidu yaku Yehova kweniso chanju cho walongo ateŵeti ŵaki. Venivi vitindiwovya kuti ndije so ndi nthazi.”

11. Kumbi Bayibolu lingumuwovya wuli mzichi munyaki yo mulumu waki wakutayika?

¹¹ Tingayamba kuja ndi maŵanaŵanu ngakwenere pa masuzgu ngo tikumana nangu asani  tiŵanaŵaniyapu pa vo Mazu ngaku Chiuta ngakamba. Ŵanaŵaniyani mo Bayibolu linguwovye mzichi munyaki yo ndi choko. Mura munyaki wangumukambiya kuti wangasambira vinandi asani wangaŵerenga buku la Yobu. Mzichi uyu wati wayamba ŵaka kuŵerenga buku ili, wangwamba kumumba mulandu Yobu chifukwa cha maŵanaŵanu ngaki ngaheni. Wachiŵanaŵaniya vo waŵerenganga wangwamba kumutcheŵeska Yobu kuti: “Yobu! Kuŵanaŵaniya ŵaka va masuzgu nginu pe cha.” Kweni pavuli paki, mzichi uyu wanguwamu kuti maŵanaŵanu ngaki ngayanananga ukongwa ndi ngaku Yobu. Venivi vinguwovya mzichi uyu kuti waleki kuŵanaŵaniya ukongwa masuzgu ngaki kweniso vingumupaska nthazi kuti wakunthiyepu nyifwa ya mulumu waki.

12. Kumbi Yehova watitipaska wuli nthazi mwakugwiriskiya ntchitu Akhristu anyidu?

¹² Akhristu anyidu atitiwovya kuti tije ndi nthazi. Yehova watitipaska so nthazi mwakugwiriskiya ntchitu Akhristu anyidu. Paulo wangulemba kuti wakhumbisiskanga ‘kuchiskana’ ndi abali ndi azichi ŵaki auzimu. (Aro. 1:11, 12) Mary yo tamuzumbuwapu kali watanja ukongwa kucheza ndi abali ndi azichi. Iyu wangukamba kuti: “Yehova wangugwiriskiya ntchitu abali ndi azichi wo aziŵanga cha va masuzgu ngangu. Yiwu akambanga mazu ngakuchiska pamwenga kunditumiziya kadi ndipu venivi ndivu ndakhumbikiyanga nadi. Vituŵa so umampha kukambiyaku azichi anyaki wo ŵenga ndi masuzgu ngakuyanana ŵaka kuti usambirepu pa vo vinguŵachitikiya. Ndipu nyengu zosi ŵara atindichitiska kuti ndijivwengi kuti nde wakukhumbika mumpingu.”

13. Kumbi tingachiskana wuli pa maunganu nga mpingu?

¹³ Malu ngamoza ngamampha ukongwa ngo tingachiskiyana, nkhu maunganu nga mpingu. Asani mwe pa maunganu, muyesesengi kuŵachiska anyinu mwa kuŵawonga kweniso kuŵalongo kuti mutiŵayanja. Mwakuyeruzgiyapu, zuŵa linyaki maunganu ngechendayambi, mura munyaki zina laki Peter wangukambiya mzichi munyaki yo mulumu waki ndi Kaboni cha kuti: “Tikondwa ukongwa kuti mutuza kunu ku maunganu. Nyengu zosi ŵana ŵinu wosi 6 asanirikapu pa maunganu ndipu aja akunozgeka kupereka ndemanga zawu.” Masozi nge mumasu, mzichi mwenuyu wangumuwonga mubali uyu ndipu wangukamba kuti: “Mungavwisa cha mo ndakhumbiyanga mazu ngakuchiska ngenanga msanawale.”

14. Kumbi kugwira ntchitu yakupharazga kutitiwovya wuli?

¹⁴ Kupharazga kutitiwovya kuti tije ndi nthazi. Asani tikambiyaku ŵanthu anyaki uneneska wa mu Bayibolu, tisisipulika ndipuso tituŵa ndi nthazi, kwali ŵanthu wo avwisiyengi pamwenga cha. (Nthanthi 11:25) Mzichi munyaki zina laki Stacy, wanguwona mo ntchitu yakupharazga yingumupaskiya nthazi. Munthu munyaki wa mu banja laki wati wasezgeka, iyu wanguguŵa ukongwa ndipu wajifumbanga kuti: ‘Kumbi chengapu chinyaki cho ndatingi ndichitengi kuti ndimuwovyi?’ Venga vakusuzga kuti Stacy waleki kuŵanaŵaniya suzgu iyi. Kumbi ntchinthu wuli chingumuwovya kuti wakunthiyepu suzgu iyi? Ntchitu yakupharazga! Wachigwira ntchitu yakupharazga, wangwamba kuŵanaŵaniya mo wangawovye ŵanthu a muchigaŵa cho wapharazgangaku. Stacy wangukamba kuti: “Pa nyengu yeniyi Yehova wangundiwovya kusaniya sambiru la Bayibolu lo lalutanga panthazi. Venivi, vingundichiska ukongwa. Chinthu cho chitindiwovya ukongwa pa umoyu wangu, nkhuluta kuchipharazga.”

15. Kumbi tisambiranjipu pa vo Mary wangukamba?

¹⁵ Chifukwa cha mo vinthu viliri pa umoyu wawu, anyaki angawona kuti angachita vinandi cha pa ntchitu yakupharazga. Asani ndimu muvwiya, kumbukani kuti Yehova wakondwa ukongwa ndi vo muyesesa kuchita. Ŵanaŵaniyani so chakuwoniyapu chaku Mary. Iyu wati wasamiya kudera lo alongoro chineneru chinyaki, wangujivwa kuti wangafiska cha. Mary wangukamba kuti: “Kwa kanyengu, ndafiskanga ŵaka kupereka  ndemanga yifupi, kuŵerenga vesi la mu Bayibolu pamwenga kugaŵiya ŵaka kapepala mu uteŵeti.” Venivi vamuchitiskanga kujivwa kuti wangafiska cha nge mo achitiyanga ŵanthu anyaki wo achiziŵanga umampha chineneru. Kweni iyu wangusintha maŵanaŵanu ngaki. Iyu wangwamba kuwona kuti Yehova wangamugwiriskiya mbwenu ntchitu chinanga kuti wachiziŵanga umampha cha chineneru. Mary wangukamba kuti: “Uneneska wakutaska umoyu ngupusu ndipu uneneska wenuwu ndiwu ungasintha ŵanthu ŵenaŵa.”

16. Kumbi wo atuwapu cha panyumba angachita wuli kuti asaniyi nthazi?

¹⁶ Yehova wawona kweniso wawonga mtima widu wakukhumbisiska kugwiraku ntchitu yakupharazga, chinanga tingaŵa kuti tituwapu cha panyumba. Iyu wangatipaska mwaŵi wakuti tipharazgiyengi ŵanthu wo atitiphwere pamwenga madokotala. Asani tingayeruzgiya vo tichita sonu ndi vo tachitanga kali, tingaguŵa. Kweni asani taziŵa mo Yehova watitiwovye sonu, ndikuti tiŵengi ndi nthazi zakuti tikunthiyepu mayeseru ngo tikumana nangu.

17. Mwakukoliyana ndi Wakutawula 11:6, ntchifukwa wuli tikhumbika kulutirizga kupharazga chinanga kuti tingaziŵa cha vo vingachitika?

¹⁷ Tiziŵa cha kuti ndi mbewu ya uneneska niyi yo tapanda yo yingame misisi ndi kukuwa. (Ŵerengani Wakutawula 11:6.) Mwakuyeruzgiyapu, mzichi munyaki zina laki Barbara yo we ndi vyaka va mu ma 80 nyengu zinandi wapharazga mwakugwiriskiya ntchitu foni kweniso makalata. Mukalata yimoza yo wangulemba, wanguŵikamu Chigongwi cha Alinda cha May 1, 2014, cho mwe nkhani yamutu wakuti, “Vo Chiuta Wakuchitiyani.” Kwambula kuziŵa, iyu wangutumiza kalata yo ku ŵanthu anyaki akutorana wo ŵenga akusezgeka. Yiwu anguŵerenga magazini yeniyi mwakuwerezawereza. Munthulumi wangujivwa kuti Yehova wakambiskana ndi iyu. Banja ili lingwamba so kuwungana pati pajumpha vyaka 27 kutuliya po angusezgeke. Ndipu pavuli paki, yiwu anguja so Akaboni. Ŵanaŵaniyani mo Barbara wanguchiskikiya wati wawona vo vinguchitika chifukwa cha kalata yo wangulemba.

18. Kumbi tingachita wuli kuti tiyanduwi ndi nthazi zaku Chiuta?

¹⁸ Yehova watitipaska mwaŵi wakuti tingalonde nthazi zaki zikulu. Asani tigwiriskiya ntchitu vinthu vo watipaska nge pempheru, Bayibolu, Akhristu anyidu kweniso ntchitu yakupharazga, tilongo kuti titimuthemba Yehova kweniso tikhumba kuti watiwovyi. Tiyeni nyengu zosi tithembengi Awusefwi akuchanya wo akondwa ‘kulongo nthazi zawu pakovya ŵanthu wo mtima wawu ngwamphumphu kwaku yiwu.’—2 Mbiri 16:9.