1-2. Kumbi ŵanthu anandi akayikiyanji pa nkhani ya mapempheru?

 KUMBI mukujifumbapu asani Yehova wamuka mapempheru nginu? Asani ndi viyo, mwe mwija cha. Abali ndi azichi anandi akujifumbapu venivi, ukongwa pa nyengu yo akumana ndi masuzgu. Asani tikumana ndi masuzgu, isi nasi vingatisuzga kuziŵa mo Yehova wamukiya mapempheru ngidu.

² Mu nkhani yinu tiwonengi chifukwa cho tigomezge kuti Yehova wamuka mapempheru nga ateŵeti ŵaki. (1 Yoha. 5:15) Tikambiskanengi so mafumbu yanga: Ntchifukwa wuli nyengu zinyaki vingawoneka nge kuti Yehova wamuka cha mapempheru ngidu? Kumbi Yehova wamuka wuli mapempheru ngidu mazuŵa nganu?

3. Ntchifukwa wuli Yehova wakhumba kuti tipempherengi kwaku iyu?

³ Malemba ngatitisimikiziya kuti Yehova watitiyanja ukongwa ndipuso kuti watitiwona kuti te akuzirwa kwaku iyu. (Haga. 2:7; 1 Yoha. 4:10) Ndichu chifukwa chaki watitikambiya kuti tipempherengi kwaku iyu kuti watiwovyi. (1 Petu. 5:6, 7) Iyu wakhumba kuti tilutirizgi kuja nayu pa ubwezi wakukho kweniso kuti tifiski kukunthiyapu masuzgu ngo tikumana nangu.

4. Kumbi tiziŵa wuli kuti Yehova wamuka mapempheru nga ateŵeti ŵaki? (Wonani so chithuzi.)

⁴ Kanandi mu Bayibolu tiŵerenga kuti Yehova wangumuka mapempheru nga ateŵeti ŵaki. Kumbi yimwi mukumbukapu yani? Kumbi mukumbuka Fumu Davidi? Iyu wenga ndi arwani anandi akofya pa umoyu waki, ndipu kanandi wapemphanga Yehova kuti wamuwovyi. Nyengu yinyaki wanguŵeyere Yehova kuti:  “Yimwi Yehova, vwani pempheru langu; vwisiyani kuliya kwangu kwakupempha chovyu. Ndimukeni mwakukoliyana ndi kugomezgeka kwinu kweniso urunji winu.” (Salimo 143:1) Yehova wangumuka mapempheru ngaku Davidi ngakuti wamutaski. (1 Sam. 19:10, 18-20; 2 Sam. 5:17-25) Mwaviyo, Davidi wangukamba mwakusimikiza kuti: “Yehova we pafupi ndi wosi wo atimudana.” Nasi tingasimikiza nge mo Davidi wanguchitiya.​—Salimo 145:18.

5. Kumbi mu nyengu yakali, Yehova wamukanga mapempheru nga ateŵeti ŵaki mwakukoliyana ndi mo yiwu aŵanaŵaniyanga? Kambani chakuwoniyapu. (Wonani so chithuzi.)

⁵ Nyengu zinyaki, Yehova wangamuka mapempheru ngidu mwakupambana ndi mo taŵanaŵaniyanga. Venivi ndivu vinguchitikiya wakutumika Paulo. Iyu wangupempha Chiuta kuti watuzgemu “munga muliŵavu” laki. Paulo wangupemphere nkhani yeniyi katatu kosi. Kumbi Yehova wangumuka mapempheru ngenanga? Hinya, kweni mwakupambana ndi mo Paulo waŵanaŵaniyanga. Mumalu mwakumalisa suzgu lo, Yehova wangumupaska nthazi zakuti walutirizgi kumuteŵete mwakugomezgeka.​—2 Akori. 12:7-10.

6. Ntchifukwa wuli nyengu zinyaki vingawoneka nge kuti Yehova wamuka cha mapempheru ngidu?

⁶ Nasi nyengu zinyaki Yehova wangamuka mapempheru ngidu mwakupambana ndi mo taŵanaŵaniyanga. Kweni tingasimikiza kuti Yehova waziŵa cho chingatiwovya ukongwa. Iyu “wangachita vinthu vikulu ukongwa kuluska vinthu vosi vo tipempha pamwenga kuziŵa.” (Aefe. 3:20) Mwaviyo, Yehova wangamuka mapempheru ngidu pa nyengu pamwenga mu nthowa yo isi takhazanga cha.

7. Ntchifukwa wuli tingakhumbika kusintha vo tingumupempha Yehova? Kambani chakuwoniyapu.

⁷ Tingakhumbika kusintha vo tingumupempha Yehova asani taziŵa umampha khumbu laki. Tiyeni tikambiskani vo vinguchitikiya Martin Poetzinger. Wati wato ŵaka, Mubali Poetzinger wangumangika ndi chipani cha Nazi. Pakwamba, iyu wangupempha Yehova kuti wamutuzgi mujeri kuti wakaphweriyengi muwolu waki ndipuso kuti wakalutirizgi kupharazga. Kweni pati pajumpha masabata ngaŵi, wanguwona kuti palivi vo vilongo kuti Yehova wachitiskengi kuti watuzgiki mujeri. Mwaviyo, wangwamba kupempha kwaku Yehova kuti: “A Yehova, chondi ndilongoni vo mukhumba kuti ndichiti.” Pavuli paki, iyu wangwamba kuŵanaŵaniya vo abali anyaki akunthiyapu mujeri lenili. Abali anandi ŵenaŵa afipiyanga mtima awolu ŵawu kweniso ŵana ŵawu. Pavuli paki Mubali Poetzinger wangupemphera kuti: “Yewu Yehova chifukwa cha uteŵeti wasonu  wo mwandipaska. Ndiwovyeni kuti ndichiskengi abali ŵangu.” Iyu wanguja mujeri kwa vyaka 9 ndipu pa nyengu yosi yeniyi wachiskanga abali!

8. Kumbi ndi fundu yakukhumbika niyi yo tikhumbika kukumbuka asani tipemphera?

⁸ Titenere kukumbuka kuti Yehova wazamufiska khumbu laki pa nyengu yo wakusankha. Mwakuyeruzgiyapu, iyu wakhumba kuzituzgiyapu limu masuzgu ngo tikumana nangu mazuŵa nganu nge masoka ngachilengedu, matenda kweniso nyifwa. Yehova wazamugwiriskiya ntchitu Ufumu waki kuti wafiski khumbu laki. (Dani. 2:44; Chivu. 21:3, 4) Kweni pasonu panu, Yehova wazomereza kuti Satana walamuliyengi charu. b (Yoha. 12:31; Chivu. 12:9) Asani Yehova wangatuzgapu masuzgu pasonu panu po Satana walamuliya, vingalongo kuti Satana walamuliya umampha. Mwaviyo, chinanga kuti tikhumbika kuti tilindizgi Yehova kuti wafiski vinthu vo wakutilayizga, ving’anamuwa kuti iyu watitileka tija cha. Tiyeni tikambiskani nthowa zinyaki zo Yehova watitiwovye.

9. Kumbi Yehova wangatiwovya wuli asani tikhumba kusankha vakuti tichiti pa nkhani yinyaki? Kambani chakuwoniyapu.

⁹ Watitipaska zeru. Yehova watitilayizga kuti watipaskengi zeru kuti tisankhengi umampha vinthu. Tikhumbika zeru zakutuliya kwaku Chiuta kuti tisankhi vinthu vo vingakwaska umoyu widu wosi nge kuja viyo kwambula kusere mu nthengwa pamwenga kusere mu nthengwa. (Yako. 1:5) Tiyeni tikambiskani vo vinguchitikiya mzichi munyaki wambula kuyirwa zina laki Maria. c Iyu wakondwanga kuteŵete nge mpayiniya wa nyengu zosi pa nyengu yo wangukumana ndi mubali munyaki. Maria wangukamba kuti: “Chifukwa chakuti kanandi tachezanga, weyosi wangwamba kukopeka ukongwa ndi munyaki. Ndinguziŵa kuti ndakhumbikanga kusankha vakuti ndichiti. Mwaviyo ndinguyipemphere ukongwa nkhani yeniyi. Ndinguziŵa kuti ndakhumbikanga ulongozgi wakutuliya kwaku Yehova kweni ndaziŵanga so kuti Yehova wangandisankhiya cha vakuchita.” Iyu wawona kuti Yehova wangumuka mapempheru ngaki ngakupempha zeru. Munthowa wuli? Maria wangufufuza mu mabuku ngidu ndipu wangusaniya nkhani zo zenga ndi kwamuka kwa mafumbu ngo wenga nangu pa nkhani yeniyi. Iyu wangugwiriskiya so ntchitu ulongozgi wakovya wo anyina angumupaska. Ulongozgi wenuwu ungumuwovya Maria kuŵanaŵaniya umampha wechendasankhi vakuchita. Pakumaliya paki, wangusankha vinthu mwazeru.

10. Mwakukoliyana ndi lemba la Afilipi 4:13, kumbi Yehova wachitanji kuti wawovyi ateŵeti ŵaki? Kambani chakuyeruzgiyapu. (Wonani so chithuzi.)

¹⁰ Iyu watitipaska nthazi kuti tikunthiyepu. Nge mo wanguchitiya ndi wakutumika Paulo, Yehova watipaskengi nthazi zakuti tikunthiyepu  mayeseru ngidu. (Ŵerengani Afilipi 4:13.) Tiyeni tikambiskani mo Yehova wanguwovye Mubali Benjamin kuti wakunthiyepu mayeseru ngakusuzga. Pa unyamata waki wosi, Benjamin limoza ndi banja laki ajanga mumisasa ya ŵanthu akuthaŵa kwawu ku Africa. Benjamin wangukamba kuti: “Ndapempheranga kaŵikaŵi kwaku Yehova kuti wandipaski nthazi zakuti ndichitengi vinthu vakumukondwesa. Yehova wangumuka mapempheru ngangu mwakundipaska chimangu cha mumtima, chiganga chakuti ndilutirizgengi kupharazga kweniso mabuku kuti ndilutirizgi kuja pa ubwezi wakukho ndi iyu.” Iyu wangukamba so kuti: “Kuŵerenga nkhani za vo abali ndi azichi angukumana navu kweniso kuziŵa mo Yehova wanguŵawovye kukunthiyapu kunguwovya kuti nani ndilutirizgi kuja wakugomezgeka.”

11-12. Kumbi Yehova wangamuka wuli mapempheru ngidu kuziya mwa abali ndi azichi ŵidu? (Wonani so chithuzi.)

¹¹ Iyu wangagwiriskiya ntchitu abali ndi azichi ŵidu. Usiku wakuti mawa laki waperekengi umoyu waki, Yesu wangupemphera ndi mtima wosi. Iyu wanguŵeyere Yehova kuti ŵanthu aleki kumuwona nge kuti ngwakunyoza Chiuta. Mumalu mwakuchita vo Yesu wangupempha, Yehova wangutumiza yumoza mwa angelu kuti wazimuchiski. (Luka 22:42, 43) Yehova wangagwiriskiya so ntchitu mubali pamwenga mzichi kuti watichiski mwakutimbiya foni pamwenga kutiyende. Tosi tingasaniya mpata wakukamba “mazu ngamampha” kwa abali ndi azichi ŵidu.​—Nthanthi 12:25.

¹² Tiyeni tikambiskani vo vinguchitikiya mzichi munyaki zina laki Miriam. Pati pajumpha masabata ngamanavi kutuliya po mulumu waki wangufwiya, Miriam wachitanga phukwa, kuguŵa kweniso kusuzgika maŵanaŵanu. Iyu wajaliyanga ŵaka kuliya ndipu wakhumbanga kukambiskana ndi munthu munyaki. Iyu wangukamba kuti: “Ndengavi nthazi zakuti ndingambiya foni munthu weyosi, mwaviyo ndingupemphera kwaku Yehova. Ndichipemphera uku ndiliya, foni yingudana. Yo wangumba foni yeniyi, wenga mura wa mpingu yo wenga so mubwezi widu.” Mura mwenuyu limoza ndi muwolu waki, angumuchiska ukongwa Miriam. Iyu wakayika cha kuti Yehova ndiyu wanguchitiska kuti mubali mwenuyu wamumbiyi foni.

13. Kambani chakuwoniyapu cho chilongo mo Yehova wangagwiriskiya ntchitu ŵanthu wo aleka kumusopa kuti wamuki mapempheru ngidu.

 ¹³ Yehova wangagwiriskiya ntchitu ŵanthu wo atimusopa cha. (Nthanthi 21:1) Nyengu zinyaki, Yehova wamuka mapempheru nga ŵanthu ŵaki mwakugwiriskiya ntchitu ŵanthu wo aleka kumusopa kuti aŵawovyi. Mwakuyeruzgiyapu, wangugwiriskiya ntchitu Fumu Aritazekisisi kuti yizomerezi Nehemiya kuti wawere ku Yerusalemu kuti wakawovyi pa ntchitu yakuzengaso tawuni yeniyi. (Nehe. 2:3-6) Mazuŵa nganu napu, Yehova wangagwiriskiya ntchitu ŵanthu wo aleka kumusopa kuti atiwovyi.

14. Kumbi mwachiskika wuli ndi vo vinguchitikiya mzichi Soo Hing? (Wonani so chithuzi.)

¹⁴ Mzichi munyaki zina laki Soo Hing wanguwona kuti Yehova wangumuwovya mwakugwiriskiya ntchitu dokotala waki. Mwana waki wasuzgika ndi matenda nga muwongu. Mwana mwenuyu wati wachita ngozi, Soo Hing ndi mulumu waki anguleka kugwira ntchitu kuti akamuphweriyengi. Venivi vinguchitiska kuti ayambi kusoŵa ndalama. Soo Hing wangukamba kuti wawonanga kuti wangafiska so cha kukunthiyapu. Iyu wangupunguliya mtima waki kwaku Yehova kuti wamuwovyi. Dokotala wangusaniya nthowa yakuti wawovyi mzichi Soo Hing kweniso banja laki. Chifukwa cha vo dokotala mwenuyu wanguchita boma lingupereka chovyu kweniso angusaniya nyumba yakuti angafiska kujamu. Pati pajumpha nyengu, Soo Hing wangukamba kuti: “Tingujiwone tija mo Yehova wangutiwovye. Kukamba uneneska, Yehova ‘ngwakuvwa pempheru.’”—Salimo 65:2.

15. Kumbi ndi vinthu wuli vo vinguwovya mzichi munyaki kuziŵa kuti Yehova wamuka mapempheru ngaki?

¹⁵ Ndi nyengu zosi cha po mapempheru ngidu ngamukika mu nthowa zapade. Kweni vo Yehova wamuka ndivu tikhumbikiya kuti tilutirizgi kuja akugomezgeka kwa Awusefwi akuchanya. Mwaviyo, muwonesesengi mo Yehova wamukiya mapempheru nginu. Mzichi munyaki zina laki Yoko wawonanga kuti Yehova wamuka cha mapempheru ngaki. Kweni pavuli paki, wangwamba kulemba chechosi cho wapempha kwaku Yehova. Pati pajumpha nyengu, iyu wanguwona so mu notibuku yaki ndipu wangusaniya kuti Yehova wamuka pafufupi mapempheru ngaki ngosi, kusazgapu ngo wanguluwa. Nyengu ndi nyengu tikhumbika kuŵanaŵaniya mo Yehova wamukiya mapempheru ngidu.​—Salimo 66:19, 20.

16. Kumbi tingalongo wuli kuti te ndi chivwanu pa nkhani ya mapempheru? (Aheberi 11:6)

 ¹⁶ Tilongo kuti te ndi chivwanu mwakupemphera ŵaka kwaku Yehova pe cha kweniso mwakuzomereza kuti Yehova wamuka mapempheru ngidu mu nthowa yo isi taŵanaŵanangaku cha. (Ŵerengani Aheberi 11:6.) Tiyeni tikambiskani vo vinguchitikiya Mike ndi muwolu waki Chrissy. Yiwu akhumbanga kuchiteŵete pa Beteli. Mike wangukamba kuti: “Tingufila ma fomu ngakupempha uteŵeti wenuwu kwa vyaka vinandi. Ndipuso tingumupempha Yehova mwakuwerezawereza kweni angutidana cha.” Mike ndi Chrissy angulutirizga kugomezga kuti Yehova waziŵa umampha mo wangaŵagwiriskiya ntchitu mu uteŵeti waki. Yiwu angulutirizga kuchita vosi vo angafiska ndipu ateŵetiyanga ko kwakhumbikanga apharazgi anandi nge apayiniya a nyengu zosi, kweniso kovya pa ntchitu zakuzenga mu gulu laku Yehova. Yiwu sonu achita uteŵeti wakuwonere dera. Mike wangukamba kuti: “Ndi nyengu zosi cha po Yehova wamuka mapempheru ngidu mu nthowa yo isi tiŵanaŵana. Kweni watitimuka ndipu wachita venivi munthowa yamampha ukongwa kuphara mo isi taŵanaŵaniyanga.”

17-18. Mwakukoliyana ndi Salimo 86:6, 7, kumbi tisimikizanji?

¹⁷ Ŵerengani Salimo 86:6, 7. Davidi yo wangulembaku buku la Masalimo, wangusimikiza kuti Yehova wanguvwa kweniso kumuka mapempheru ngaki. Namwi mungachita so viyo. Vakuwoniyapu vo takambiskana mu nkhani iyi, vititisimikiziya kuti Yehova wangatipaska zeru kweniso nthazi kuti tikunthiyepu. Iyu wangagwiriskiya ntchitu abali kweniso azichi ŵidu pamwenga ŵanthu wo pasonu panu atimusopa cha kuti atiwovyi mu nthowa yinyaki.

¹⁸ Chinanga kuti Yehova wangamuka cha mapempheru ngidu mu nthowa yo isi takhazanga, kweni tiziŵa kuti iyu wangamukengi. Iyu watipaskengi vinthu chayivu vo tikhumbika kweniso pa nyengu yo titivikhumbiya. Mwaviyo, lutirizgani kupemphera ndipuso mugomezgengi kuti Yehova watuvwa mapempheru nginu. Ndipu mungakayikanga cha kuti iyu wakuphweriyeningi sonu kweniso kuti mucharu chifya ‘chamoyu chechosi wazakuchipaska vo chikhumba mpaka kukhorwa.’​—Salimo 145:16.